Mkpulu Ge Obobia Ire Mgbọ Geelek

Me eririeen̄ ge, ogwu ubọọn̄ Nebukadineja imun̄ ilaak ge okup nke nke. Isisaak ọmọ ire lek ikakọt ilaak. Inenigwen ebi ikido ido-inu ibe enu mè itumu inyi ema ibe: ‘Ikpa iwele inyi emi ilaak mmun̄be.’ Ema etutumu ibe: ‘Ogwu ubọọn̄, kpa nyi eji inu omun̄be me ilaak.’ Ire, Nebukadineja ofọfọọk ema ibe: ‘In̄-in̄! Ikpa inyi emi inu mmun̄be me ilaak, ire enyi kpetumu inyi emi, makpan̄ enyi.’ Ema ekpọkpọk itumu inyi ọmọ ibe: ‘Kpa nyi eji inu omun̄be me ilaak, inyi eji ekpa enyi owu inu isibibe.’ Itutumu inyi ema ibe: ‘Otutuuk kinyi ekiweek ifafiaan̄ emi. Ikpa inyi emi inu mmun̄be me ilaak!’ Ema efọfọọk ogwu ubọọn̄ ibe: ‘Kpunu ogwu ebilene geege obokọt irọ inu yi. Mkpọ okido yi ikafet eji irọrọ.’

Nebukadineja onanaan̄ ejit enenen ire lek inyibe ida ibe ekpan̄ otutuuk ebi ikido ido-inu mè ebi iriọọn̄-inu me ido ya. Eyi isibi ibe ke mekpan̄ si Danien, Sedarak, Mesak, mè Abedinego. Danien onenibeek ogwu ubọọn̄ ibe inyi ọmọ mgbọ. Ọmọ mè ebi unene kan̄ enenibeek uriaak inyi Jioba ibe itap ubọk inyi ema. Keke ke Jioba orọ?

Me ilaak ọkpọchieen̄ ge, Jioba ojejeen̄ Danien ilaak kè Nebukadineja mè itumu inyi mkpọ isibibe. Me usen oyaka igọọk, Danien osisi lek ogwu usun̄ ogwu ubọọn̄ ge mè itumu inyi ibe: ‘Kakpan̄ ene geege. Makọt ikpa mkpọ ilaak ogwu ubọọn̄ osibibe.’ Ogwu usun̄ ya osasa Danien isi lek Nebukadineja. Danien onenitumu inyi ogwu ubọọn̄ ibe: ‘Awaji ichili inu obomọnọ irek me mgbọ okup me isi ijeen̄ owu. Me emen ilaak kwun̄, owu omun̄ inu ge ebotbe okpọkpọk imin mè ikaan̄ ibot alata araran̄, isi ejit kan̄ mè ubọk iba kan̄ ore alata okuket, owot kan̄ melek owut-ukot kan̄ ke esa ekwe irom, ukot iba kan̄ ke esa okwukwut irom, sa ijọn̄ ukot kan̄ ke esa okwukwut melek abọt ewọpbe me ukan̄ igbaan̄ irom. Enenikpọkọ ewuuk ge. Ewuuk ya onanan̄a initọbọ inu ebotbe ya me ijọn̄ ukot kan̄ cha echi esabe okwukwut melek abọt ewọpbe igbaan̄ irom, mè ikpukpuku ijọn̄ ukot kan̄ igwook. Efet obeben otutuuk iwut ichieen̄ isan̄a, inu geege ikayaka isik. Ire, ewuuk ya otọtọbọ inu ebotbe ya ikpọk isan onenimin ikana ikpele ogoon̄ owewele ichit otutuuk linyọn̄.’

Danien onenitumu ibe: ‘Eyi ire inu ilaak kwun̄ osibi: Mkpulu kwun̄ ore ibot alata araran̄. Eyi alata okuket ire mkpulu obonu osikpulu iraka. Ikaan̄ si ge okup kubọk ekwe, eyi obokpulu otutuuk linyọn̄. Mkpulu oboyaka igọọk ibonye kubọk okwukwut. Me ota kan̄, mokaan̄ mkpulu ge oboche lek kan̄, usini agan̄ monye kubọk okwukwut ire, usini mowọ kubọk abọt. Ewuuk ya okakana ogoon̄ ire Ama Ubọọn̄ Awaji. Mojijaka ama ubọọn̄ kechilọ cha geelek igwook mè ibia ire mgbọ geelek.’

Nebukadineja orọrọn̄ inyana me ijọn̄ me isi kè Danien mè itumu ibe: ‘Awaji kwun̄ ojeen̄ owu ilaak yi. Kpunu Awaji okup kubọk kan̄.’ Nebukadineja ikakpan̄ Danien, kpan̄asi ikeya, irọrọ ọmọ ogwu ibot me otutuuk agan̄ Babilọn, mè ogwu ibot otutuuk ebi iriọọn̄-inu me Babilọn. Ire omun̄ ubọk Jioba osabe ifọọk uriaak kè Danien ni?