Pọọlu mè Timọti

Timọti ire gwun̄ enerieen̄ ijija okup me ntitiin̄ okup me Lisitira. Ogwu ute ire ogwu Giris, ire, ogwu uga ire ogwu Ju. Ire mgbọ Timọti orebe sọntiik gwun̄ ke Yunais nga kan̄ mè Lọis nga nga kan̄ ebene ikijeen̄ ọmọ mkpọ ofolek Jioba.

Me òso mgbọ iba eyi Pọọlu osibe isi ikpa ikọ Awaji me Lisitira, itataba iman̄ ibe ke Timọti ichubọk ima ebi bọn ute mè iweek si itatap ubọk inyi ema. Pọọlu obebe mè Timọti igọọk ọmọ ikije ikana ikikpa ikọ Awaji. Ike Pọọlu okikpukpo Timọti, Timọti okakana ogwu orọriọọn̄ ilook ata etip mè ikijeen̄ ikọ Awaji ijaan̄.

Awaji isasa ekwukwu mbuban kan̄ iban Pọọlu mè Timọti me ere geelek ema esibe. Me eririeen̄ ge, me emen ilaak ọkpọchieen̄, Pọọlu imun̄ ogwu enerieen̄ ge okitumu ibe isaba inu me Mesidonia initap ubọk inyi ema. Ọmọ orọ, Pọọlu, Timọti, Sailas mè Luk esisi isi ilook ata etip mè ibene si ntitiin̄ me ama ya.

Me ama Mesidonia okup me Teselonaika, owuwa ebirieen̄ mè ebibaan̄ mikana ebi eyi Karais. Ire, usini ebi Ju mikaan̄ mba-ejit me lek Pọọlu mè ebi melek kan̄. Ema etititiin̄ ebi ijo ife mè isa ema isi lek ebi ibot ama, mè ikitaan̄ ukpo itumu ofolek Pọọlu mè ebi melek kan̄ ibe: ‘Ife chi ere ebi ikifiat ikan geelek ogwu Sisa okitap.’ Pọọlu mè Timọti elilibi ifo Beria me eririeen̄ usen ya mije, inu yi mokọt itap ugwem kiban̄ me ufe.

Ebi ama Beria mikaan̄ ulọk inọnọ ata etip, owuwa ebi Giris mè ebi Ju si mikana ebi ichechieek me lek kè Karais. Ire, Pọọlu inanan̄a me Beria ifo Atens mgbọ usini ebi Ju enan̄abe me Teselonaika inu initap ufialek me Beria. Timọti mè Sailas ekukup me Beria ikinama ichechieek ebi bọn ute inye. Ike mgbọ ojebe, Pọọlu obebe mè Timọti igwu ikom ifo Teselonaika isi itap ubọk inyi ebi bọn ute inyi ema ekọt eme tukutuku eyi ekitutuku ema me ere ya. Pọọlu iria Timọti isi owuwa ofifi ntitiin̄ si ibe isi itap efuuk me owot ebi bọn ute.

Pọọlu itumu inyi Timọti ibe: ‘Metutuku ebi geelek iweweek itọtọbọ ebum inyi Jioba.’ Mitutuku Timọti mè itap ọmọ me mkpọn bak lek ichechieek kan̄. Ire, Timọti ibele ejit ibe ke inu ọmọ ojebe itibi inyi ọmọ irek isasa igbe utoon̄-ejit inyi Jioba.

Pọọlu itumu si inyi ebi Filipai ibe: ‘Nkiria Timọti inu me lek kinyi. Ọmọ mojeen̄ enyi ubọk enyi ebesa ikitọbọ ebum inyi Awaji. Mokpukpo enyi si me lek ikwaan̄ ilolook ata etip.’ Pọọlu ikaan̄ utoon̄-ejit ibe ke Timọti mokọt irọ inu chi mije, ema migbaan̄ isi ikwaan̄ kubọk unene mè ebi usun̄ Awaji si me owuwa acha.