Ogwu Enerieen̄ Ge Okisi Ikwaan̄ me Uwu Mkpọn Ikween̄ Atikọ

Me Filipai, ikaan̄ ogwu enenwaan̄ usun̄ ge ekwukwu ido-inu okupbe me emen. Ogwu enenwaan̄ ya ikisa ido-inu ya ibọm ikpoko enenen inyi ebikaan̄ kan̄. Mgbọ Pọọlu mè Sailas erebe Filipai, gwun̄ enenwaan̄ ya ikijeje igọọk ema owuwa usen. Ijo ekwukwu ya orọrọ ibe ikitaan̄ ukpo itumu ibe: “Ebirieen̄ chi ìre ebi ikwaan̄ Awaji Ogwu Òbebene Ichit.” Usen ge, Pọọlu ogagana inyi ijo ekwukwu ya ibe: ‘Me erieen̄ kè Jisọs, nan̄a me emen gwun̄ enenwaan̄ yi sibi!’ Ekwukwu ya onanan̄a isibi me emen gwun̄ enenwaan̄ ya.

Mgbọ ebikaan̄ usun̄ enenwaan̄ ya eriọọn̄be ibe ke otu oniin̄ ema ekisa ikaan̄ ikpoko ichit, ema minaan̄ ejit enenen. Ema etetet Pọọlu mè Sailas, mè itaba ema isi me isi ebi oyerebet mè itumu ibe: ‘Ife chi ire ebi ikifiat ikan kiji, enu inikitap ufialek me ama kiji.’ Ebi oyerebet cha enyinyi ida ibe esulu Pọọlu mè Sailas mè etap ema me mkpọn. Ogwu ibot uwu mkpọn ya osasa ema isi itap me agwut mkpọn eyi okup me emen emen mè idun ichit mè igon ukot kiban̄ ikam me agbagba chieen̄ mgba-mfiik.

Pọọlu mè Sailas ekekikọt okwa itọn̄ Jioba, ebi ofifi ife ikup me mkpọn ya ekekigban̄. Me ekakpọge chieen̄, me ejit eririeen̄ ya, ijọn̄ obebene ikisisik me ere ya unye unye, mè isisik ire lek ọdọ uwu mkpọn ya. Otutuuk isotu uwu mkpọn ya ogwugwuku ibook, mkpọn esabe igon ebi mkpọn cha geelek owawaka igwook me ijọn̄. Ogwu ibot uwu mkpọn ya ojeje isi agwut mkpọn eyi okup me emen emen ya mè imun̄ ubọk otutuuk isotu cha ogwukube ibook. Me nkeek ibe ke otutuuk ebi mkpọn cha milibi isan̄a kpai, iwọwọọk oge akọn̄ kan̄ ibosa ikpan̄ lek.

Mgbọ yaage, Pọọlu otataan̄ ukpo itumu inyi ibe: ‘Kasak unan geege me lek kwun̄. Otutuuk kiji emaan̄ me ere keyi!’ Ogwu ibot uwu mkpọn ya oninin̄ emen uwu ya, mè irọn̄ me isi kè Pọọlu mè Sailas, mè ido ema ibe: “Ìre keke ke mbarọ mè ikaan̄ unyan̄a?” Ema efọfọọk ọmọ ibe: ‘Owu melek ebi uwu kwun̄ ebechechieek me lek Jisọs.’ Pọọlu mè Sailas enenijeen̄ ema usem Jioba, ogwu ibot uwu mkpọn ya mè otutuuk ebi uwu kan̄ ekakaan̄ ntap-me-mun̄.