Miria Pọọlu Isi Rom

Me òso mgbọ ita Pọọlu ojebe ikana isi ikpa ikọ Awaji, Pọọlu iyaka ikwaan̄ kan̄ me Jeruselem. Ire me ere ya ke etet ọmọ mè itap ọmọ me mkpọn. Me ilaak ọkpọchieen̄ Pọọlu omun̄be me eririeen̄ ge, Jisọs itumu inyi ọmọ ibe: ‘Omosi Rom isi ilook ata etip.’ Misan̄a Pọọlu me Jeruselem mè isa ọmọ isi Sisaria ere etapbe ọmọ me mkpọn iso acha iba. Mgbọ Pọọlu okekebe me isi Fesitọs ogwu mkpulu ikitumu ikọ ibot kan̄, itumu inyi Fesitọs ibe: ‘Emi nkibeek ibe ikọ n̄a ifo isi ogwu Sisa me lek kan̄ me Rom.’ Fesitọs otutumu ibe: “Owu òkiweek ibe ikọ kwun̄ ifo isi ogwu Sisa. Isi ogwu Sisa si ke owu obosi!” Etatap Pọọlu me emen uji ile ge obosi Rom, Luk mè Arisitakọs migọọk Pọọlu inin̄ uji ya si.

Unye efet obebene ikiwut mè irọ ibe ema efiat owuwa usen me okwaan̄. Otutuuk ene ekekikeek ibe ke ema mekwaan̄. Ire, Pọọlu otutumu inyi ema ibe: ‘Me eririeen̄ òraraka, ogwu osat Awaji Ogwukaan̄ n̄a itumu inyi emi ibe: “Pọọlu katet ukpook! Owu òkpolọlọ ikekeke me isi ogwu Sisa, inyi isibi oyerebet me ibot kwun̄. Mije kwun̄, Awaji îsa me atata nnwọn kan̄ inyan̄a ebek ugwem otutuuk ebi melek kwun̄ ekupbe me emen uji yi.” Eya orọ, ebi une n̄a, ìtet lek ìnye.’

Ema mikup me ejit okwaan̄ ya melek unye efet okiwut ya iso akọp mè usen ini. Me ota kan̄, ema emumun̄ ijọn̄, orere, achọ Mọlita. Uji ya ibabak isan̄a, ire, unan geege ikare lek efit ene iba, mè akọp jaaba, mè gweregwen ikukup me emen uji ya. Usini ene egwọgwọk ugwọk ifo ijon̄. Ire, usini ene etetet uwot mè okpọkọ uji okup me isi mun̄ isa ite ire ijọn̄. Ebi iluk me achọ Mọlita ya ekpọkpọ chieen̄ me lek kiban̄ mè isọk ukan̄ inyi ema egwele.

Mgbọ ema ekupbe me ere ya iso onyan̄ ita, ebi akọn̄ cha etatap Pọọlu me emen ofifi uji mè isa ọmọ isi Rom. Mgbọ Pọọlu orebe Rom, ebi bọn ute esisibi inichichini ọmọ. Mgbọ Pọọlu omun̄be ema, itọtọn̄ Jioba mè ikat ejit. Ikerere ibe ke Pọọlu ire ogwu mkpọn, mitele ibe iluk me uwu ge ibọkọbe mè ikikpe ikpoko me lek me irak mbem ogwu akọn̄ ge. Ikup me ere ya iso acha iba. Ebi ene isinu inikpọ Pọọlu, ira ikilook ema etip ofolek ama ubọọn̄ Awaji mè ikijeen̄ ema mkpọ ofolek Jisọs. Pọọlu ige si ikpa ijet ntitiin̄ echi okup me agan̄ Asia Minor mè Judia. Me atikọ, Jioba irọ inyi Pọọlu ikọt ilook ata etip me owuwa ido.