Awaji Inyi Kọniliọs Ekwukwu Mbuban

Me Sisaria, ikaan̄ ogwu ibot akọn̄ ge ekigwen Kọniliọs. Ebi Ju ekinyinyi ogwu enerieen̄ yi ulibi ikerere ibe ke ọmọ ikare ogwu Ju. Kọniliọs ikichichili ubọk iche mkpọ inyi ebi ugbọọn̄ mè ebi una. Kọniliọs ichieek me lek Awaji, ikekibeek uriaak inyi ọmọ si. Usen ge, ogwu osat Awaji ge osisibi me isi kè Kọniliọs mè itumu inyi ọmọ ibe: ‘Awaji inọ uriaak kwun̄. Mgbọ keyi, ria ebi ene ibe esi egwen Pita me Jọpa ejet owu.’ Mgbọ yaage, Kọniliọs oraria ene ita isi Jọpa, ere mokọtbe ijọn̄ọ ere iso akọp mile ita me agan̄ osiki.

Me ike mgbọ ya, Pita ogwu okup me Jọpa imun̄ ilaak ọkpọchieen̄ ge. Imun̄ anam echi ebi Ju kpekitaka mè inọ ida ge okitumu inyi ọmọ ibe ikpan̄ anam cha mè itaka. Ire, Pita ikachieek, itumu ibe: ‘Nkawuwuuk lek itaka anam ikatanage me ugwem n̄a.’ Ida ya ofọfọọk ọmọ ibe: ‘Kagwen anam chi anam ikatanage. Awaji irọ inyi ema etana. Ebirieen̄ ita emaan̄ me isotu kwun̄, gọọk ema je.’ Pita onenisi ichili isotu mè ido ebirieen̄ ita cha inu orọrọ ema enube. Ema efọfọọk ibe: ‘Ire Kọniliọs ogwu ibot akọn̄ ebi Rom ge oria eji inu me lek kwun̄. Ibe mè eji esa owu enu me uwu kan̄ me Sisaria.’ Mgbọ Pita onọbe ikọ kiban̄ isan̄a, ibọbọkọ ema itap me uwu mè initet ema ichen. Ema ekukup me uwu ya iwele egwe. Me ofit iwele kan̄, Pita melek ebirieen̄ cha mè usini bọn ute ikup me Jọpa enanan̄a ije isi Sisaria.

Mgbọ Kọniliọs omun̄be Pita, itọtọbọ ekpe me ijọn̄. Ire, Pita otutumu inyi ọmọ ibe: ‘Nan̄a keke! Emi ire ene ubọk owu orebe si. Ire Awaji otumu inyi emi ibe nnu uwu kwun̄ ubọk geelek ibe ke ebi Ju kpekinin̄ uwu ebi ekarege ebi Ju. Tumu nyi emi mkpọ orọrọ oriabe ibe enegwen emi.’

Kọniliọs otutumu inyi Pita ibe: ‘Me egwe ini oraraka, me mgbọ nkiriaak uriaak inyi Awaji, ogwu osat ge otutumu inyi emi ibe nria ibe esi egwen owu enu. Soso jeen̄ eji ikọ Jioba.’ Pita otutumu ibe: ‘Nniriọọn̄ mgbọ keyi ibe ke Awaji ikakigobo ene geege isi. Ikibọkọ ebi geelek iweweek itọtọbọ ebum inyi ọmọ itap.’ Pita ojejeen̄ ema owuwa mkpọ ofolek Jisọs. Awaji oneninyi Kọniliọs mè otutuuk ebi ikup me uwu ya ekwukwu mbuban kan̄. Otutuuk kiban̄ ekakaan̄ ntap-me-mun̄.