Mikpa Ikọ Awaji me Owuwa Ido

Ebi otuchieen̄ kè Jisọs milook ata etip me otutuuk linyọn̄ ike Jisọs onyibe ema ida ibe erọ. Me 47 C.E., bọn ute ebi ikup me Antiọk miria Pọọlu mè Banabas ibe eje ekana esi ekpa ikọ Awaji. Pọọlu mè Banabas misa me uyok uyok ejit ilook ata etip me esese esese ama me Asia Minor kubọk Dabi, Lisitira, mè Aikoniọm.

Pọọlu mè Banabas mikpa ikọ Awaji inyi otutuuk ene, orere, ebi ibọbọọn̄ ubọọn̄, ebi ugbọọn̄, ebi ugane, ikerere ebi ijija si. Owuwa ene michieek me lek atikọ ema ekween̄be ofolek Karais. Mgbọ Pọọlu mè Banabas ebelook ata etip inyi Segiọs Pọlọs ogwu ibot mkpulu Saipọrọs, ogwu enerieen̄ ge okisa yọk ofia iroon̄ nriroon̄ isa igbagban ema. Pọọlu otutumu inyi ogwu enerieen̄ ya ibe: ‘Jioba mosut owu osusut.’ Mgbọ yaage, ogwu enerieen̄ ya okakana ogwu nnaan̄. Mije inu yi orọrọ, Segiọs Pọlọs ochechieek me lek Karais.

Pọọlu mè Banabas milook ata etip me ere geelek. Ema milook etip inan̄a me uwu ire uwu, me ewe, me lek oniin̄ mè uwu ntitiin̄ si. Mgbọ ema egwabe ogwu akọọk ge me ama Lisitira, ebi imumun̄ inu ukechieen̄ ya miweek itọtọbọ ebum inyi ema mije ekikeek ibe ke Pọọlu mè Banabas ire ebi kè awaji kiban̄ isisibi inu me akpalek ebilene. Ire, Pọọlu mè Banabas kpechieek ibe ife cha etọbọ ebum enyi ema. Kpan̄asi ikeya, etumu inyi ife cha ibe: ‘Itọbọ ebum inyi Awaji gaalek! Eji ire ebilene ikike.’ Usini ebi Ju enunu inifiat ibot ebi ama ya, ema eteteen̄ ewuuk isa itọbọ Pọọlu mè itaba ọmọ isi ito me udun̄ ama me nkeek ibe ke ikwu. Ire, Pọọlu ikakwu. Ebi bọn ute egwagwat lek isi itap ubọk inyi Pọọlu mè isa ọmọ igwu ikom inin̄ emen ama ya. Ike mgbọ ojebe, Pọọlu ogwugwu ikom isi Antiọk.

Me 49 C.E., Pọọlu okpọkpọk ije ikana isi ikpa ikọ Awaji. Pọọlu ogwugwu ikom isi ikpọ ebi bọn ute ikup me Asia Minor. Isi ikpa ikọ Awaji si me agan̄ Europe. Isi Atens, Efesọs, Filipai, Teselonaika mè ofifi ofifi ere si. Sailas, Luk mè Timọti ogwu enerieen̄ ijija ge migọọk Pọọlu ije ije chi. Ema migbaan̄ isi ikwaan̄ mè ibene ntitiin̄ me esese esese ere mè itap ubọk inama ebi ntitiin̄ cha inye si. Pọọlu ikup me Kọrint iso acha ge mè okpọkọ ikitap efuuk me owot ebi bọn ute me ere ya. Ilook ata etip, ijeen̄ ebi ene atikọ mè ige ikpa ijet ntitiin̄ si. Pọọlu ikichim uwu ọfọ si. Ike mgbọ ojebe, Pọọlu okpọkpọk igwu ikom isi Antiọk.

Me 52 C.E., Pọọlu ojeje ikana isi ikpa ikọ Awaji òso mgbọ ita, ibene me Asia Minor. Ikọp uran̄ isi Filipai me agan̄ inyọn̄ mè Kọrint si. Pọọlu ikup me Efesọs owuwa acha ikijeen̄ atikọ Baibul, ikigwa ebi ene mè ikitap ubọk inyi ntitiin̄ okup me ere ya. Isọkọ me lek si, Pọọlu ikinyinyi usem me isi owuwa ene usen geelek me emen uwu ikpa ge. Owuwa ene migban̄ ikọ kè Pọọlu mè inwene eru kiban̄. Me ota kan̄, mgbọ Pọọlu olookbe ata etip me owuwa ama isan̄a, isisi Jeruselem.