Jisọs Igobo Sọọlu

Sọọlu ire ogwu onan̄a me Rom, ogwu emanbe me Tasọs. Ọmọ ire ogwu Farisi orọriọọn̄ ikan ebi Ju ijaan̄ lek. Ichacha ebi eyi Karais si, ọmọ orọ, ikijeje ikana ikitaba bọn ute irieen̄ mè ibaan̄ isibi me uwu kiban̄ mè isi itap me mkpọn. Sọọlu ikekeke me agba ikikpọ ike ebi ene esabe me unaan̄-ejit itọbọ Sitibin ogwu udun̄ kè Karais ikpan̄.

Ire, ikakpọkpọk ire ebi eyi Karais ikup me Jeruselem gaalek ke Sọọlu oweek itatap me mkpọn. Mije keya, idodo ogwu ibot ebi ngwugwa ibe inyi ọmọ unye inyi isi ama Damasikọs isi itet ebi eyi Karais ikup me ere ya si. Ike Sọọlu ojebe igbet ama ya, utoon̄ onanan̄a me isinyọn̄ ikebe ikana ọmọ mèrèrèp, irọrọn̄ me ijọn̄. Ineninọ ida ge okitumu inyi ọmọ ibe: ‘Sọọlu, keke orọ okitutuku emi?’ Sọọlu ododo ibe: ‘Owu ire ekene?’ Ida ya ofọfọọk ibe: ‘Emi ire Jisọs. Je nin̄ emen ama Damasikọs, ke meteme owu inu owu oborọ.’ Mgbọ yaage, Sọọlu ikayaka ikọt imọọn̄ inu, ofifi ene otet ọmọ me ubọk ije inin̄ Damasikọs.

Me Damasikọs, ikaan̄ ogwu eyi Karais ge ogbegbe utoon̄-ejit ekigwen Ananayas. Jisọs itumu inyi ọmọ me ilaak ọkpọchieen̄ ibe: ‘Je si uwu Judas okup me oniin̄ ekigwen Oniin̄ Otatat mè week ogwu ekigwen Sọọlu.’ Ananayas otutumu ibe: ‘Okaan̄-ene, nriọọn̄ mkpọ ofolek ogwu enerieen̄ yi! Itet owuwa ebi udun̄ kwun̄ itap me mkpọn!’ Ire, Jisọs otutumu inyi ibe: ‘Je si lek kan̄, ke nra igobo Sọọlu ibe ikana ogwu obokilook ata etip inyi ebi owuwa ido.’

Ananayas omumun̄ Sọọlu mè itumu inyi ọmọ ibe: ‘Sọọlu gwun̄ Nte n̄a, Jisọs oria emi ibe nnechili chieen̄ kwun̄.’ Mgbọ yaage, Sọọlu obebene ikimọọn̄ inu. Ikwekween̄ mkpọ ofolek Jisọs, ikaan̄ ntap-me-mun̄ mè ibene ikigọọk ọmọ. Mgbọ keyi ikanabe ogwu eyi Karais, Sọọlu obebene ikigọọk ebi eyi Karais ogbo kan̄ ikilook ata etip me uwu ntitiin̄ ebi Ju. Ire okakeek ibe ke imumun̄ Sọọlu okijeen̄ ebi ene mkpọ ofolek Jisọs ike ebi Ju chieen̄ ni? Ema ekekido ibe: ‘Ire ikare ene yaage ogwu okitap ebi udun̄ kè Jisọs me mkpọn ire eyi ni?’

Sọọlu ilook ata etip inyi ebi iluk me Damasikọs iso acha ita. Ebi Ju micha Sọọlu mè itọt ubọk ebesa ikpan̄ ọmọ. Ire, ebi bọn ute eneniriọọn̄ otitọt ya mè itap Sọọlu me emen okwun ge etobobe olik me lek itap itibi otu nruruk ge me lek mgban ama ya inyi ikọt ilibi.

Mgbọ Sọọlu ofobe Jeruselem, isa igọgọọk ebi bọn ute ikup me ere ya irọ mkpọ. Ire, ukpook itet ema ofolek kan̄. Ogwu udun̄ kè Jisọs ge okakaan̄ ata ejit ekigwen Banabas osasa Sọọlu isi lek ebi otuchieen̄ mè irọ inyi ema echieek ibe ke Sọọlu ichubọk inwene. Sọọlu obebene ikisa me uyok uyok ejit ikigọọk ebi ntitiin̄ ikup me Jeruselem ikilook ata etip. Ike mgbọ ojebe, eneniriọọn̄ ọmọ kubọk Pọọlu.