Mitet Jisọs

Jisọs mè ebi otuchieen̄ kan̄ mije itibi iteke ijọn̄ Kidọrọn isi ogoon̄ olifu. Ire me ejit eririeen̄ me mgbọ onyan̄ otoon̄be ijaan̄. Mgbọ ema erebe uko Gesemeni, Jisọs otutumu inyi ema ibe: ‘Ikup me ere keyi mè ikup me mbem.’ Jisọs ojeje ifo isi sọnja me emen uko ya mè itọbọ ekpe me ijọn̄. Me emen uga sasaak, ibebeek uriaak inyi Jioba ibe: “Nkeek kwun̄ irọ.” Jioba oneniria ogwu osat ge ibe isi itap Jisọs efuuk me emen. Me mgbọ Jisọs ogwube ikom isi lek ebi udun̄ kan̄, imumun̄ ibe ke ema ene ita ekilalaak. Itutumu ibe: ‘Inan̄a ikeke! Mgbọ keyi ikare mgbọ ilalaak! Ire mgbọ ebesa emi itap me ubọk ebi ochicha n̄a.’

Sọnja mgbọ, Judas onunu melek owuwa ebi ene ikakaan̄ oge akọn̄ mè uti me ubọk. Iriọọn̄ ere iboweek Jisọs imun̄ mije ema mikimalek isi uko ya. Judas iwuuk lek itumu inyi ebi akọn̄ cha ibe ke ọmọ morọ inyi ema eriọọn̄ ogwu Jisọs orebe. Ijeje isi lek Jisọs mè itumu ibe: ‘Ntọp owu amọn ogwu ijejeen̄,’ inenifip otu kan̄. Jisọs ododo ọmọ ibe: ‘Judas, ire okileke emi sa me ififip otu n̄a ni?’

Jisọs ododo ebi ibenitet ọmọ ibe: ‘Ire ekene ke enyi ekiweek?’ Ema efọfọọk ibe: ‘Ire Jisọs ogwu Najeret.’ Inenifọọk ema ibe: “Emi ire ene ya,” ife cha ekpekpebe ifo udun̄ mè irọn̄ me ijọn̄. Jisọs okpọkpọk ido ema ibe: “Ìre ekene ke enyi ekiweek?” Ema efọfọọk ibe: ‘Ire Jisọs ogwu Najeret.’ Jisọs otutumu ibe: ‘Ntumu inyi enyi ibe ke emi nre ene ya, itele ibe ebirieen̄ chi efo.’

Me mgbọ Pita oriọọn̄be inu okibọkọ irek, iwọwọọk oge kan̄ isibi mè ifieek utọn̄ kè Malikọs gwun̄ uwu ogwu ibot ngwugwa. Ire, Jisọs ochachak ubọk me lek utọn̄ ogwu enerieen̄ ya mè igwa ọmọ. Inenitumu inyi Pita ibe: ‘Yaka oge akọn̄ kwun̄ tap me emen ogan, mije, ogwu okep oge ibokwu me otu oge.’ Ebi akọn̄ cha etetet Jisọs mè ibọp ubọk kan̄, ebi otuchieen̄ kan̄ elilibi inan̄a. Esasa ọmọ isi lek Anas ogwu ibot ngwugwa. Anas ododo Jisọs usini idodo mè iria ọmọ isi uwu Keyefas ogwu ibot ngwugwa. Ire, keke oyaka inirọ ebi otuchieen̄ kan̄?