Pita Ijit Jisọs

Mgbọ Jisọs mè ebi otuchieen̄ kan̄ ekupbe me uwu inyọn̄ ge, itutumu inyi ema ibe: ‘Otutuuk kinyi melibi itele emi ikakwun̄ chereyi.’ Pita otutumu ibe: ‘Ikare emi! Ikerere ibe ke otutuuk ene mitele owu, emi mkpabatele owu.’ Ire, Jisọs otutumu inyi Pita ibe: ‘Sabum unọn onosan̄a amọn, owu motumu mgbọ ita ibe ke okariọọn̄ emi.’

Mgbọ ebi akọn̄ cha esabe Jisọs isi uwu kè Keyefas, owuwa me lek ebi otuchieen̄ cha elilibi. Ire, ene iba me lek kiban̄ egọgọọk urum ife cha ikije. Ene ge me lek kiban̄ ire Pita. Ijeje inin̄ oyet egep uwu kè Keyefas mè ikigwele ukan̄. Me lek utoon̄ ukan̄ ya, ogwu usun̄ enenwaan̄ ge okpọkpọ Pita me isi mè itumu ibe: ‘Nriọọn̄ owu isi! Owu ire ge me lek ebi ikigọọk Jisọs!’

Pita otutumu ibe: ‘In̄-in̄, nkagọọk ọmọ! Nkariọọn̄ inu okitumu!’ Ijeje isi agan̄ otunchit. Ire, sọnja mgbọ, ofifi ogwu usun̄ enenwaan̄ ge omumun̄ ọmọ mè itumu inyi owuwa ebi ikup me ere ya ibe: ‘Ogwu enerieen̄ yi iwuuk lek ikikup melek Jisọs!’ Pita otutumu ibe: ‘Nkariọọn̄ ogwu Jisọs orebe!’ Ogwu enerieen̄ ge otutumu ibe: ‘Owu ire ge me lek kiban̄! Ida usem kwun̄ ikpọk mbum ibe ke owu onan̄a me Galili kubọk Jisọs.’ Ire, Pita obebene ikitap awọ ibe: ‘Nkariọọn̄ ene yi!’

Mgbọ yaage, unọn osasan̄a amọn. Pita omumun̄ ike Jisọs okọọn̄be chieen̄ ikpọ ọmọ. Inenikeek usem Jisọs otumube mè ije isibi me ere ya ikisi ito ujat ito.

Me ike mgbọ ya, ebi Oru ebi Ju etititiin̄ me emen uwu kè Keyefas inyi metap Jisọs mkpọn me ubọk. Ema mira itumu ifieek ikpakpan̄ Jisọs, mgbọ keyi, ema ekiweek mkpọ ebetet ubọk me lek isa ikpan̄ ọmọ. Ire, ema kpemun̄ inu geege ebesa itumu ikeme ọmọ. Me ota kan̄, Keyefas ododo Jisọs isi mè isi ibe: ‘Ire owu ire Gwun̄ Awaji?’ Jisọs ofọfọọk ibe: ‘Iin̄, ene nrebe ire eya.’ Keyefas otutumu ibe: ‘Eji kpeyaka iweek ofifi ata-ikọ igbaalek. Ene yi itumu Awaji ifiat!’ Otutuuk ene echechieek mè ikitumu ibe: ‘Ogwu enerieen̄ yi igbe mkpa.’ Ema ekekitap ada me isi Jisọs, icho ataak igwook ọmọ mè ikisa akpọ igon ọmọ. Ekekitumu inyi ọmọ ibe: ‘Ire owu ire ogwu nriran, kpa nyi eji-nu ogwu osusulu owu!’

Me ofit iwele kan̄, esasa Jisọs isi uwu ebi Oru ebi Ju mè ikpọk ido ọmọ ibe: ‘Ire owu ire Gwun̄ Awaji?’ Jisọs ofọfọọk ibe: ‘Enyi ekitumu ibe ke ene nrebe ire eya.’ Ema etutumu ibe ke Jisọs itumu Awaji ifiat mè isa ọmọ isi uwu Pọntiọs Pailet ogwu ibot mkpulu ebi Rom. Keke oyaka ibọkọ irek? Kè eji eweek eriọọn̄.