Ota Inorie Ikakwun̄ Jisọs

Ebi Ju ekirie Ijọk Iraraka acha geelek me akọp mè usen ini me emen onyan̄ Nisan. Ijọk yi ikikeek ema ubọk Jioba osabe inyan̄a ema isibi me usun̄ me Ijipiti mè isa ema inu me Ijọn̄ Echieekbe me Use. Me acha 33 C.E., Jisọs mè ebi otuchieen̄ kan̄ mirie Ijọk Iraraka me agwut okup me uwu inyọn̄ ge okup me Jeruselem. Mgbọ ema eriebe inorie ya isan̄a, Jisọs otutumu ibe: ‘Ene ge me lek kinyi moleke emi inyi ekpan̄.’ Usem yi ike ebi otuchieen̄ Jisọs chieen̄ enenen, ema edodo Jisọs ibe: ‘Ire ekene ke ire?’ Jisọs ofọfọọk ibe: ‘Ire ogwu enerieen̄ nkinyi fituru yi.’ Ineninyi Judas Isikariọt okpọkọ fituru. Mgbọ yaage, Judas onanan̄a ikeke mè ije inan̄a me uwu ya.

Jisọs onenibeek uriaak, ikpọkọ fituru ya mè isa iche inyi ebi otuchieen̄ isisik. Itutumu ibe: ‘Itaka fituru yi, ikeke ichit chieen̄ akpalek n̄a eyi mbasa inyi me ibot kinyi.’ Ibeek uriaak si me lek miin̄ mè isa inyi ebi otuchieen̄ kan̄ mè itumu ibe: ‘Inwọ miin̄ yi, ikeke ichit chieen̄ eje n̄a, eyi mbanyi inyi metele ijo inu. Nkichieek enyi use ibe ke enyi megọọk emi ikpulu me emen inyọn̄. Ikirọ ikeyi acha geelek isa ikikeek emi.’ Ebi udun̄ kè Jisọs mikigbaan̄ ititiin̄ me usen yaage acha geelek. Chinichini yi ke ekigwen Inorie Ikakwun̄ Ogwukaan̄-Ene me chereyi.

Mgbọ ema eriebe inorie ya isan̄a, ebi otuchieen̄ ebebene ikigbini me etete kiban̄ ofolek ogwu okukup ufiak ichit. Ire, Jisọs otutumu inyi ema ibe: ‘Ogwu omimin ichit me etete kinyi ire ogwu okimun̄ lek kan̄ kubọk ogwu osisip ichit, ogwu ikakweek lek inu geege.

‘Enyi ire ebi unene n̄a. Nra itumu inyi enyi otutuuk inu Nte n̄a oweekbe ibe ntumu inyi enyi. Sọnja mgbọ, masi lek Nte n̄a me emen inyọn̄, ire, enyi mekup me inyọn̄ ijọn̄ yi. Ebi ene meriọọn̄ ibe ke enyi ire ebi udun̄ n̄a me atikọ ire enyi ekimun̄ lek kinyi me chieen̄. Ikimun̄ lek kinyi me chieen̄ ike mmun̄be enyi me chieen̄.’

Me ota kan̄, Jisọs obebeek Jioba me uriaak ibe ibem otutuuk ebi udun̄ kan̄. Ibeek Jioba ibe itap ubọk inyi ema egbaan̄ ekerọ ikwaan̄ me esuuk. Ibeek ibe mè erieen̄ Jioba ikup me mbuban. Jisọs mè ebi otuchieen̄ kan̄ ekọkọt okwa inyi Jioba mè isibi oyet. Mgbọ ebetet Jisọs igbet.