Inu Orọrọ Obokibele Ejit Me Mgbọ Ebi Ene Echabe Owu

1. Keke ke Jisọs otumu ofolek ebi ene ichacha eji?

ME USEM inyibe me inyọn̄ ogoon̄, Jisọs itumu ibe: “Uga ubelejit okup inyi enyi mgbọ ebi ene mêchabe enyi.” (Luk 6:22) Usem ya ira ike ebi ikigban̄ ọmọ chieen̄. Mije kpunu ene geege ogwu oboma ibe echa ọmọ. Eya orọ, keke orọ Jisọs otumube usem ya? Eya ire ata idodo ikekeek mkpọ ofolek bak lek owuwa ene me chereyi micha ebi udun̄ kè Jisọs. Eji mekpa inu orọrọ ebi ene echabe eji mè inu orọrọ eji ebekibele ejit me mgbọ ebi ene echabe eji.

INU ORỌRỌ ECHABE EJI

2-3. Keke ore inu ge orọrọ ekitutuku ata ebi eyi Karais, ike owa ke eji ebekimun̄ ebi ikirọ ikeme eji bak lek eji eriọọn̄be eyi? (Jọn 16:​2, 3)

² Echa eji bak lek eji ekitọbọ ebum inyi Jioba. Ofolek ebi ibetutuku mè ikpan̄ usini ebi udun̄ kan̄, Jisọs itumu ibe: “Ema kperiọọn̄ Nte n̄a, kperiọọn̄ emi si.” (Fuk Jọn 16:​2, 3.) Ire ekene okirọ ibe usini ene ekup ekeme ebi eyi Awaji? Ire Setan. Ọmọ ore “awaji ebi linyọn̄ keyi.” (2 Kọr 4:​3, 4) Ọmọ okikput ebi ene ibe ekakween̄ atikọ ofolek Jioba mè ikirọ ibe ekup ekeme ebi irọriọọn̄ mè ima Awaji. (Jọn 8:​42-44) Ike owa ke irọriọọn̄ eyi obosa ikaan̄ mgbaan̄ me lek ubọk eji ekisa imun̄ ebi ikikup ikeme eji? Eji esigobo itet ibe ke ire Setan okifiaan̄ ema, motap ubọk irọ inyi eji ekacha ema.

³ Kpọ-nu inu orọrọ Pavel,a ogwu okiluk me ido ere echitbe ikwaan̄ kiji. Bak lek ikupbe inye ikigbe utoon̄-ejit inyi Jioba, etetet ọmọ, isut ọmọ nnaan̄ nnaan̄, mè itap ọmọ me mkpọn me ere ọmọ gaalek obokup me owuwa onyan̄. Pavel itumu ibe: ‘Isibi utoon̄ inyi emi ibe ke ire Setan mè ebi ijo ekwukwu kan̄ ekichubọk iweek isasa tukutuku irọ ibe eji ekayaka itọbọ ebum inyi Jioba. Ibet lek owuwa ebi ikisi ikwaan̄ me mkpọn kpekaan̄ inu geege ikeme eji. Ema ekpọkpọk ikirọ ikwaan̄ kiban̄.’ Gwun̄ ute ge okup me ido Croatia ogwu omeme tukutuku me ubọk nte kan̄ mè nga kan̄ itumu ibe: “Nnigobo itet ibe ke Setan ochubọk ire ogwu ochicha n̄a, ikare nte n̄a mè nga n̄a.”​—Efes 6:12.

4. Keke ke eji ebekọt ikween̄ inan̄a me lek akpat ukot Jisọs mè Sitibin? (Kpọ si ogugo.)

⁴ Eji kpecha ebi ikikup ikeme eji. Kpan̄asi ikeya, eji mekọt ikibeek uriaak me ibot kiban̄. (Mat 5:44) Eji mekọt ikween̄ mkpọ me lek akpat ukot Jisọs mè Sitibin. Mgbọ ebi akọn̄ Rom egonbe ọmọ me inyọn̄ uti, Jisọs ibeek uriaak ibe: “Ute, tele nyi ema.” (Luk 23:34) Jisọs ikibeek ibe Jioba itele inyi ebi akọn̄ cha, ebi enyibe ida ibe ekpan̄ ọmọ. Mokọt ire ibe ke ikikeek mkpọ ofolek usini ebi Ju ebi itetele ibe ebi ochicha kan̄ ekaan̄ mgbaan̄ me lek kiban̄ ire lek ema ekitaan̄ ukpo ibe ekpan̄ ọmọ. Jisọs iriọọn̄ ibe ke ife chi kpechubọk iriọọn̄ inu ema ekirọ. Ubọk yaage si, Sitibin, ogwu udun̄ kè Jisọs ibeek ibe mè Awaji itele inyi ebi ibekpan̄ ọmọ. (Ikwaan̄ 7:​58-60) Ire Awaji ifọọk-otu uriaak kè Jisọs mè Sitibin ni? Iin̄. Owuwa ebi iweweek ibe ekpan̄ Jisọs migwu ikom me lek ijo kiban̄ mè ikaan̄ ichechieek me lek kè Jisọs mè ikaan̄ ntap-me-mun̄. (Ikwaan̄ 2:​36-41) Sọọlu, ene ge me lek ebi ibebieen̄ inye ibe ekpan̄ Sitibin iyaka inikana ogwu eyi Karais, ifieek ejit enenen me lek inu echi irọbe me ikariọọn̄ge.​—1 Tim 1:13.

5. Keke ke okween̄ me lek ukpatu kè César?

⁵ Jioba ikekifọọk otu uriaak eji ekibeek me ibot ebi ikikup ikeme eji me chereyi. Kpọ-nu ukpatu ofolek César, ogwu okiluk me Venezuela. Nte kan̄ ire ogwu ochuchubọk ikirọ ikeme Ebi Atikọ Jioba. César itumu ibe: “Nga n̄a ire ata nwa mè uga. Ikitoto Ama Ubọọn̄ Awaji kubọk adasi inu me ugwem kan̄, ikatele nte n̄a si mgbọ geege. Ijeen̄ emi mè ebi ngwan̄ n̄a ibe eji ekejeen̄ nte kiji ulibi. Ijeen̄ eji si ibe ekesiki ibot enyi ọmọ me inu geelek ikajege ikeme ikan Awaji.” Mgbọ acha acha orakabe, nte kè César obebene ikinwene eru kan̄. César itumu ibe: “Usen ge, eyi mbeekbe uriaak isan̄a, ndodo nte n̄a ibe mè ire moma ibe nkegọọk ọmọ nkween̄ Baibul. Mkpakọt ikpa mbet lek unwọọn̄ nkaan̄be me mgbọ ifọọkbe emi iin̄.” Ike mgbọ ojebe, nte kè César okakaan̄ ntap-me-mun̄. Ikare otutuuk ebi ikikup ikeme eji ekirọ mbet lek unwene okup ikeya, ire, usini kiban̄ mikinwene eru kiban̄ bak me lek ata eru kiji mè usem eji ekisa me ulibi itumu. Eji mikibele ejit ema esirọ mbet lek unwene okup ikeya! Ikilọk eji imumun̄ mgbọ Jioba, Awaji ogwu okijeen̄ nsan mè “ogwu ibot oyerebet otutuuk linyọn̄,” obotap ubọk inyi ebi ikup ikeya ibe enekween̄ mkpọ ofolek kan̄.​—Ibeb 18:25.

6. Igọọk me lek inu okup me ikpa Mak 13:​13, keke orọ ebi ene echabe eji?

⁶ Echa eji bak lek eji ekaan̄be ulibi me lek Jisọs. Jisọs itumu inyi ebi udun̄ kan̄ ibe ke ‘otutuuk ene mêcha eji mije eji echieekbe me lek kan̄.’ (Fuk Mak 13:13.) Keke ke erieen̄ kè Jisọs okeke ichit chieen̄? Ikeke ichit chieen̄ ogwu irebe mè unye ikaan̄be kubọk Ogwu Ubọọn̄ Ama Ubọọn̄ Awaji. Ebi ene echa eji bak me lek ema etoon̄ ejit me lek ebilene ebi ikikpulu ema kpan̄asi Jisọs Karais ogwu Jioba ogobobe ibe ikpulu inyọn̄ mè ijọn̄. Jisọs okikpulu kubọk Ogwu Ubọọn̄ Ama Ubọọn̄ Awaji karake acha 1914. Sọnja mgbọ, mosan̄a otutuuk mkpulu ebilene geelek okukup.

7-8. Keke orọ ekirọ usini ebi eyi Jioba mkpọ ochak? (Jọn 15:​18-20) (Kpọ si ogugo chi.)

⁷ Echa eji bak lek eji ejitbe inyọn̄ kè Setan. Jisọs ikpa iwele ibe ke mecha ebi udun̄ kan̄ bak me lek ema kpere ebi linyọn̄. (Fuk Jọn 15:​18-20.) Kubọk ebi eyi Karais me adasi ukot, eji ekijijit ijo eru mè usem ebi linyọn̄ yi. Bak lek eyi, ekirọ owuwa bọn ute irieen̄ mè ibaan̄ mkpọ ochak me ere ikwaan̄ kiban̄ mè iyaka ire, me uwu ikpa. (1 Pita 4:​3, 4) Ire, eji mibele ejit ibe ke usini ebi ikikup ikeme eji minwene ejit kiban̄ mè ibene ikijeen̄ ulibi me lek kiji.

⁸ Kpọ-nu ukpatu ofolek Ignacio, ogwu onan̄a me Central America. Isi uwu ikpa eyi ogwu ijejeen̄ kan̄ ge okisa ọmọ irọ mkpọ ochak mgbọ geelek bak lek igobobe iluluk ugwem ubọk Awaji oweekbe. Ire, sabum inan̄abe me uwu ikpa ya, ogwu ijejeen̄ ya otutumu ibe ikpa inyi ọmọ ubọk ikọtbe isa iluk igọọk onineen̄ Baibul ikerere ibe ke owuwa ene kpejeen̄ ọmọ ulibi. Ignacio okpakpa ibe ke ọmọ ikimun̄ ikan Awaji kubọk inu okibem ọmọ mè initumu inyi ogwu ijejeen̄ ya ibe inu nkween̄mkpọ ntitiin̄ kiji. Ike Ignacio chieen̄ ibe ke ogwu ijejeen̄ ya inu nkween̄mkpọ ntitiin̄. Bak lek ima ogwu ijejeen̄ ya omun̄be me eden̄ ebi bọn ute, itetet lek inye ikinu nkween̄mkpọ. Ike mgbọ ojebe, ogwu ijejeen̄ ya okakana ogwu eyaka ikirọ ikeme. Ire, itet lek inye ikikaan̄ nje-nnyi-isi mè iyaka ikaan̄ ntap-me-mun̄.

9-10. (a) Keke si orọ ibe ebi eyi Karais ekup esese me inyọn̄ kè Setan yi? (b) Keke ke eji ebekọt ikween̄ me lek akpat ukot kè Pọọlu?

⁹ Eji ekup esese si me inyọn̄ kè Setan yi bak lek eji kpekitap lek me lek rumurumun̄ mkpulu melek akọn̄. (Jọn 18:36) Igọọk me lek nteme okup me ikpa Ebi Rom 13:​1, eji ekisa iluluk igọọk ikan ebi mkpulu. Ikerere ikeya, kubọk ebi eyi Karais, eji kpekimọnọ agan̄ me lek rumurumun̄ mkpulu, eya orọ, eji kpekiweek ibe ekeme ubọk enyi eji, mè iyaka ire igọọk ikeme ubọk inyi ebi ofifi ife. Bak me lek keke ni? Mije ibe ke eji ekigbe utoon̄-ejit inyi Jioba mè Mkpulu kan̄. Mitap owuwa Ebi Ata-Ikọ Jioba me mkpọn bak lek ichechieek kiban̄. Ire, ikerere ibe ke ema ekup me mkpọn, bọn ute irieen̄ mè ibaan̄ chi ekukup inye ikilook ata etip. Ema ekigọọk akpat ukot ogwu otuchieen̄ Pọọlu, ogwu ofafiat owuwa acha me mkpọn. (Ikwaan̄ 24:27; 28:​16, 30) Pọọlu ikukup inye ikilook ata etip inyi ebi geelek ikiweek igbagban̄, kubọk ebi akọn̄ ikibem uwu mkpọn, ebi oyerebet, ebi ibot mkpulu, ebi ubọọn̄, mè ikerere ebi ikisi ikwaan̄ inyi Nero, ogwu ibot mkpulu ebi Rom.​—Ikwaan̄ 9:15.

¹⁰ Ubọk yaage si, me chereyi, ebi bọn ute ikup me mkpọn ekilook ata etip inyi otutuuk ebi geelek ikiweek inọnọ, kubọk ebi oyerebet, ebi mkpulu, mè ebi ikibem uwu mkpọn. Gwun̄ ute ge ogwu okukup iraka acha gweregwen me mkpọn bak me lek ikatapge lek me lek rumurumun̄ mkpulu itumu ibe ke ọmọ ikamun̄ okike mgbọ ọmọ okupbe me mkpọn kubọk ire osusut. Kpan̄asi ikeya, imun̄ irek ya kubọk irek isasa irọ ikwaan̄ Jioba onyibe ọmọ ibe iweek ebi ikakaan̄ ata ejit mè iweek irọriọọn̄ mkpọ ofolek Jioba. Eji mechubọk ibele ejit enenen ire Jioba isa eji ilook ata etip inyi mbet ebi ikup ikeya! (Kọl 4:3) Kè eji ekween̄ si ofifi inu orọrọ eji ebekibele ejit ikerere me mgbọ echabe eji bak me lek eji ekitọbọ ebum inyi Jioba.

INU ORỌRỌ EJI EBEKIBELE EJIT ME MGBỌ ECHABE EJI

11. Ike owa ke ijeje itibi tukutuku okisa irọ ibe ichechieek kiji inye? Nyi inu njeen̄.

¹¹ Eji miriọọn̄ ibe ke ochicha ejit ebi linyọn̄ ekaan̄be me lek kiji ikirọ nriran Baibul iso. Me adasi nriran okup me Baibul, Jioba itumu ibe ke Setan mè ebi melek kan̄ mecha ebi imama ọmọ mè ikitọbọ ebum inyi ọmọ. (Ibeb 3:15) Ike egebe me ikpa Matiyu, Mak, Luk, mè Jọn, Jisọs itumu ibe ke mecha ebi ikitọbọ ebum inyi Jioba. (Mat 10:22; Mak 13:​9-12; Luk 6:​22, 23; Jọn 15:20) Ofifi ebi igege Baibul mige mkpọ ofolek eyi si. (2 Tim 3:12; Jemis 1:2; 1 Pita 4:​12-14; Judu 3, 17-19) Eya orọ, esikitutuku eji, ikakike eji chieen̄. Kpan̄asi ikeya, eji ekibebele ejit ibe ke nriran Baibul okirọ iso. Eyi ikijeen̄ ibe ke eji ekitọbọ ebum inyi ata Awaji. Gwun̄ ute enenwaan̄ ge okiluk me ere echitbe ikwaan̄ kiji itumu ibe: “Me mgbọ nsabe lek n̄a inyi Jioba, nriọọn̄ ibe ke metutuku emi sọnja mgbọ mè iyaka ire ike mgbọ okije. Eya orọ, tukutuku ikarọ ibe ukpook itet emi mè iyaka ire ike emi chieen̄.” Ene ge me lek owuwa ebi ikukup ikeme ọmọ ire ogwu olom. Itutuku ọmọ mè iwọp Baibul mè ikpa ntitiin̄ kan̄. Ire, kpan̄asi isasa me ukpook ikpebe lek inyi udun̄, ichechieek gwun̄ ute enenwaan̄ yi inyenye igbaalek. (Iburu 10:39) Gwun̄ ute enenwaan̄ ya itumu si ibe: “Ebeben nriran ibe ke metutuku eji, eya orọ, nriọọn̄ ibe ke ire inu obobọkọ irek. Ijeje itibi inu yi orọ ibe nchieek nnye ibe ke eyi ore ata uwu uriaak.”

12. Keke otap ubọk inyi gwun̄ ute ge ikọt ime tukutuku?

¹² Ikerere ibe ke eji miriọọn̄ ibe ke metutuku eji, mokọt iyọt eji me lek imeme tukutuku. Ofolek mgbọ ikupbe me mkpọn, gwun̄ ute enerieen̄ ge ige ibe: “Usini mgbọ, nsikaan̄ uga ufieejit mè iyaka ire sasaak, mabebene ikito ito.” Keke otap ubọk inyi gwun̄ ute yi ikọt ime? Itumu ibe: “Nkibeek uriaak mgbọ geelek. Nkibene egwe geelek me lek uriaak. Ike usen ya okije, mgbọ geelek irek oyọyọt isi isibi, nkibeek uriaak. Ebi ene esirọ emi nnaan̄ me lek, manin̄ uwu asuk mè ibeek uriaak.” Gwun̄ ute enerieen̄ yi si igwu nkeek ikom me lek owuwa ebi imeme tukutuku me mgbọ oraraka mè ebi ikirọ ikeya si me chereyi. Eya otap ubọk inyi ọmọ ime tukutuku mè ikaan̄ esuuk eyi Jisọs ochieekbe ebi udun̄ kan̄.​—Jọn 14:27; 16:33.

13. Keke obokọt itap ubọk inyi eji etim egak ochicha?

¹³ Eji mikaan̄ ima onyenye igak ochicha ejit geelek. Mege isire mgbọ Jisọs ofuukbe ota efuuk, imama ogwu ute me otutuuk ejit kan̄. Jisọs ima si ebi unene kan̄. (Jọn 13:1; 15:13) Eji esikaan̄ mbet ima okup ikeya me lek Jioba mè ebi bọn ute irieen̄ mè ibaan̄, eji si metim igak ochicha ejit. Me oniin̄ okukup? Inyi eji ekaan̄ ufọọk-otu, kè eji ekween̄ inu enan̄a me lek akpat ukot ogwu otuchieen̄ Pọọlu.

14. Keke otap ubọk inyi Pọọlu ikọt ikup inye ikigbe utoon̄-ejit ikerere me mgbọ ebekpan̄ ọmọ?

¹⁴ Me ikafiin̄ge sabum ekpan̄be ọmọ, Pọọlu ige ikpa ijet ogwu unene kan̄ Timọti ibe: “Awaji ìkanyi eji ekwukwu eyi môrọbe inyi eji ere ebi ukpook owot. Awaji ìnyi eji ekwukwu eyi mônyibe eji unye mè imumechieen̄.” (2 Tim 1:7) Usem Pọọlu isibi keke? Isibi ibe ke ire ogwu eyi Karais ikaan̄ ima onyenye me lek Jioba, ima ya mobieen̄ ọmọ ibe ikime ntọ-mkpọ geelek. (2 Tim 1:8) Kpunu cheche ibe ke ire ima Pọọlu okaan̄be me lek Jioba otap ubọk inyi ọmọ ikọt igbe utoon̄-ejit me irek geelek ikerere ibe ke mokọt ikwu, me ikatelege ata ntọbọ-ebum.​—Ikwaan̄ 20:​22-24.

15. Ike owa ke bọn ute irieen̄ mè ibaan̄ ekijeen̄ ima me lek ge ge me chereyi? (Kpọ si ogugo.)

¹⁵ Eji michubọk ima ebi bọn nte kiji ebi ikukup inye ikigbe utoon̄-ejit me mgbọ ekitutuku ema. Usini bọn ute irieen̄ mè ibaan̄ me chereyi mikitap ugwem kiban̄ me ufe isasa itap ubọk inyi bọn ute ogbo kiban̄ ebi ekitutuku, ike Akwila mè Pirisila etapbe ugwem kiban̄ me ufe bak me lek Pọọlu. (Rom 16:​3, 4) Kubọk inu njeen̄, me Russia, owuwa ebi bọn ute misi uwu oyerebet inyi ema metap efuuk me owot bọn ute ebi efieekbe oyerebet mkpọn inyi. Me mgbọ gwun̄ ute enenwaan̄ ge ogwu etetbe omun̄be owuwa bọn ute irieen̄ mè ibaan̄ me uwu oyerebet, ikakaan̄ uga ukarajit eyi orọrọ ibe ikup dii me okike mgbọ ya. Ima ebi bọn ute ejeen̄be gwun̄ ute enenwaan̄ ya ichubọk itap ọmọ efuuk me owot me mgbọ ya iweekbe ntap-ubọk. Ikibele eji ejit ibe ke eji mikaan̄ ima eyi onyenye igak ochicha ebi ene!

16. Keke orọ Pita otumube ibe ke ebi ekitutuku bak lek ekitọbọ ebum inyi Awaji mekọt ikibele ejit? (Pita Eyi Adasi 4:14)

¹⁶ Eji miriọọn̄ ibe ke eji esikime ochicha ebi ene, ke Awaji ikibele ejit. (Fuk Pita Eyi Adasi 4:14.) Ogwu otuchieen̄ Pita itumu ibe ke ebi imeme tukutuku ike ema ekitọbọ ebum inyi Awaji mebele ejit. Bak me lek keke ni? Bak me lek mbet tukutuku okup ikeya ikijeen̄ ibe ke ekwukwu Awaji “îluk ibia me emen [kiji].” Pita iriọọn̄ ubọk ikakaan̄ nnwọn-isi Awaji mè imeme tukutuku okikup me lek ene. Sọnja mgbọ iraraka me lek ijọk Pentikọs 33 C.E., eraria ebi ene inan̄a me uwu mbuban ebi Ju ibe esi etet Pita mè ofifi ebi otuchieen̄ bak lek ema ekilook ata etip. Ire, Pita isasa me unye-ejit itumu ichechieek kan̄ isibi. (Ikwaan̄ 5:​24-29) Ikerere me mgbọ esulube ema isan̄a, ọmọ mè ebi otuchieen̄ ogbo kan̄ kpetele ikekilook ata etip. Kpan̄asi ikeya, ema ekibebele ejit ibe ke Awaji “îfuk ema kubọk ebi ìgbegbe ibọbọkọ esip mije erieen̄ kè Jisọs.” Eji si mekọt ikibele ejit me mgbọ eji ekime tukutuku.​—Ikwaan̄ 5:​40-42.

17. Keke ke Jisọs otumu inyi ebi udun̄ kan̄ me ikakwun̄ sabum ikwube?

¹⁷ Me ikakwun̄ sabum ikwube, Jisọs itumu inyi ebi udun̄ kan̄ ibe: “Ogwu geelek òmumun̄ emi me chieen̄, Nte n̄a mômun̄ ene ya me chieen̄. Emi si mâmun̄ ene ya me chieen̄.” (Jọn 14:21) More mkpọ unwọọn̄ enenen imumun̄ mgbọ ebi ene kpebeyaka icha eji, kpan̄asi ikeya, mema eji bak lek eji ekitọbọ ebum inyi Jioba! (2 Tes 1:​6-8) Mege ire mgbọ ya, kè eji etumu efieek ikekikeek owuwa inu orọrọ eji ebekibele ejit me mgbọ ebi ene echabe eji.