Jisọs Ikana Isibi me Isi Ebi Mbọm

Ike mgbọ orakabe eyi Jisọs okanabe isibi me isi ebi otuchieen̄, Pita otutumu ifieek isisi mbọm me okwaan̄ Galili. Tọmọs, Jemis, Jọn mè usini ebi udun̄ kè Jisọs egọgọọk Pita. Ire, otuuk eririeen̄ usen ya, ema kpetet kubọk ufuk irin̄ ge.

Me otu ewelegwe, ema emumun̄ ogwu enerieen̄ ge okekebe me agba okwaan̄ ya. Ikukup me ere ya ikido ema ibe: ‘Ire enyi mitet irin̄ geege ni?’ Ema efọfọọk ibe: “In̄-in̄!” Ogwu enerieen̄ ya otutumu inyi ema ibe: “Ìtọp njin me agan̄ ubọk ulom kinyi.” Mgbọ ema etọpbe njin kiban̄, irin̄ ojojot me emen ire lek kpekọtbe itaba njin ya itap me uji. Mgbọ yaage, Jọn orọriọọn̄ ibe ke ire Jisọs mè itumu ibe: “Kpọ, Okaan̄-ene ke îre!” Mgbọ yaage, Pita owuwulu irọn̄ me mun̄ mè igwọk isi ire otu ijọn̄. Ebi udun̄ kan̄ kechilọ ekọkọp me uji isi ire ijọn̄.

Mgbọ ema erebe ijọn̄, ema emumun̄ irin̄ me ukan̄ mè fituru si. Jisọs otutumu inyi ema ibe etap usini irin̄ ema etetbe egbaalek eyi okup me ukan̄ ya. Inenitumu inyi ema ibe: ‘Ina inirie inorie ewelegwe.’

Mgbọ ema eriebe inorie ya isan̄a, Jisọs ododo Pita ibe: ‘Ire oma emi igak isisi mbọm?’ Pita ofọfọọk ọmọ ibe: ‘Iin̄, Okaan̄-ene, owu oriọọn̄ ibe ke mma owu.’ Jisọs otutumu inyi ọmọ ibe: ‘Kpọ chieen̄ me lek bọn arọọn̄ n̄a.’ Jisọs okpọkpọk ido ọmọ ibe: ‘Pita ire omun̄ emi me chieen̄?’ Pita ofọfọọk ibe: ‘Iin̄, Okaan̄-ene owu oriọọn̄ ibe ke mma owu.’ Jisọs otutumu ibe: “Kpukpo arọọn̄ n̄a.” Jisọs ododo ọmọ òso mgbọ ita. Pita ofefieek ejit mè ifọọk ọmọ ibe: ‘Okaan̄-ene owu oriọọn̄ otutuuk inu. Owu oriọọn̄ si ibe ke mma owu.’ Jisọs otutumu ibe: “Nyi arọọn̄ n̄a inorie.” Inenitumu inyi Pita ibe: ‘Tet lek nye kigọọk emi.’