Kaan̄ Unye-Ejit mè Kigbe Utoon̄-Ejit Kubọk Benaya

Benaya ire ogwu akọn̄ okakaan̄ unye-ejit, ogwu osisi ikwaan̄ inyi ogwu ubọọn̄ Debit mè ogwu ubọọn̄ Solomọn. Benaya ire gwun̄ ogwu ngwugwa. Ebi ngwugwa mè ebi Libai kpekimalek igọọk itim akọn̄, mè iyaka ire isa mkpọ akọn̄ irọ mkpọ. Ire, Benaya ire ogwu okakaan̄ unye-ejit. Kubọk inu njeen̄, ikpan̄ egbe àtat me emen udọn̄ odọdọk ge mè itim igak ikpele ogwu ochicha ge okakaan̄ mkpọ akọn̄ me ubọk. Debit itoon̄ ejit me lek Benaya ire lek irọbe ọmọ ogwu ibot ebi akọn̄ ikibem ọmọ.​—2 Sam 23:​20-23.

Benaya ikukup inye ikigbe utoon̄-ejit inyi Debit ikerere me mgbọ Abusolọm mè Adonija ekirọ ikeme Debit. (2 Sam 8:18; 15:18; 1 Ubọọn̄ 1:8) Benaya ibieen̄ inye si ibe erọ Solomọn ubọọn̄ me mgbọ Debit onin̄be ugane. (1 Ubọọn̄ 1:​32-40) Iin̄, Benaya igbe utoon̄-ejit inyi Jioba mè ebi uboon̄ Jioba ogobobe ikerere me mgbọ usini ene ekikpaka ibot inyi ọmọ.

Eji si miweek unye-ejit isasa itim igak ogwu ochicha kiji okakaan̄ unye orere, Setan mè ebi melek kan̄. Kè eji esibi efieek ikukup inye ikiluk igọọk onineen̄ Jioba. (Efes 6:11; 1 Pita 5:​8, 9) Ikerere ibe ke usini ene migobo itetele Jioba, eji kpetele ọmọ, kpan̄asi ikeya, eji metoon̄ ejit me lek kan̄ mije eji eriọọn̄be ibe ke ọmọ mokpe eji mkpukpe.​—2 Sam 22:26.