Kaan̄ Ukpook Awaji Kubọk Obidaya

Obidaya ire ogwu okikpọ chieen̄ me lek uwu ogwu ubọọn̄ Eyabu, ogwu ubọọn̄ otetele ibe ntọbọ-ebum Baali ijot ido Ijeren. Ire, Obidaya ikaan̄ ata ukpook me lek Jioba “karake ijija” kan̄. (1 Ubọọn̄ 18:​1-13) Eya orọ, me mgbọ Jeseben nwa ogwu ubọọn̄ onyibe ida ibe ekpan̄ otutuuk ebi nriran Jioba, Obidaya iriọọn̄ ibe ke igbe ibe ọmọ isa me unye-ejit irọ mkpọ inyi ikọt ibem ema. Ilelet ge me lek ebi nriran cha mokọt isibi mkpọ unan, ire, Obidaya ilet efit ebi nriran ge mè isa inorie ijet ema me mgbọ unye akan̄ okupbe! Keek-nu ubọk ibosa iyọt ire ilelet ebi nriran cha inyi efit efit ebi ataak nriran mè ogwu ubọọn̄ mè ogwu nwa ekamun̄ ema.​​—1 Ubọọn̄ 18:19.

Keke ke eji ebekọt ikween̄ inan̄a me lek ogwu enerieen̄ yi okakaan̄ ukpook Awaji? Ikerere ibe ke Obidaya itet ukpook me lek Eyabu, ukpook ikaan̄be me lek Awaji imin igak ukpook ikaan̄be me lek Eyabu. Eyi orọ ibe ikọt isa me unye-ejit itap ugwem kan̄ me ufe inyi ikọt ibem ebi nriran cha. Igbe ibe eji si ekaan̄ ata ukpook me lek Jioba, ogak ge, ire eji iluk me ere echitbe ikwaan̄ kiji. Mbet lek ukpook yi obobieen̄ eji ibe etap ubọk enyi ebi bọn ute irieen̄ mè ibaan̄ ikichichini ufialek.