Omokọt Itim Igak Lọlọ Nkeek

1-2. Usini mgbọ, inu ikikukup me lek ogwu otuchieen̄ Pọọlu? Me irek echi owa ke eji esa ikup kubọk Pọọlu? (Ebi Rom 7:​21-24)

KEKE okinu owu me ejit osikeek mkpọ ofolek ogwu otuchieen̄ Pọọlu? Ire okikeek ọmọ kubọk ogwu osasa me unye-ejit ikikpa ikọ Awaji me esese esese ido, ata ogwu ijejeen̄, mè iyaka ire ogwu osasa me ugbalachieen̄ ige owuwa ikpa me Baibul? Ichubọk ire inu echi irọbe ire echa. Ire, Pọọlu ire ogwu ochuchubọk ikaan̄ sasaak mè ufieejit. Kubọk owuwa kiji me chereyi, Pọọlu irurumun̄ me lek lọlọ nkeek.

² Fuk Ebi Rom 7:​21-24. Me ikpa igebe ijet ebi Rom, Pọọlu ikpa ubọk inu okisa ikup ọmọ me lek, ike ikikup owuwa kiji me lek me chereyi si. Ikerere ibe ke Pọọlu ire ogwu eyi Karais ogbegbe utoon̄-ejit, mè iweek isisiki ibot inyi Awaji, ekasoge kan̄ irọ ibe iyọt ọmọ me lek irọrọ inu Awaji oweekbe usini mgbọ. Isọkọ me lek, mgbọ Pọọlu okeekbe mkpọ ofolek inu echi irọbe sabum ikanabe ogwu eyi Karais, ifieek ọmọ ejit enenen. Efuuk ita ọmọ me owot si me mgbọ ufialek ge ikaan̄be ikachieek itata.

3. Keke ke eji ebekween̄ me ibot usem yi? (Kpọ si “Usem Ekpabe Iwele.”)

³ Ikerere ibe ke Pọọlu ikikaan̄ ufieejit usini mgbọ, irọ mkpọ eyi otatap ubọk inyi ọmọ ikakpọkpọ ibia me irek ufieejit me ujọn̄ọ mgbọ.a Me ibot usem yi, eji mekween̄ inu orọrọ Pọọlu otobe lek kan̄ njijin, inu orọrọ Pọọlu ikabia me irek ufieejit, mè ubọk eji ebesa itim igak lọlọ nkeek.

KEKE ORỌ IBE PỌỌLU IKIFIEEK EJIT USINI MGBỌ?

4. Keke orọ ibe Pọọlu ifieek ejit?

⁴ Inu echi irọbe me mgbọ oraraka. Sabum ikanabe ogwu eyi Karais, Pọọlu ogwu ewuukbe lek iriọọn̄ kubọk Sọọlu, irọ owuwa ijo inu. Kubọk inu njeen̄, ibieen̄ inye mè ikpọ ubọk esabe ewuuk itọbọ Sitibin ogwu ogbegbe utoon̄-ejit inyi Awaji ikpan̄. (Ikwaan̄ 7:58; 8:1) Isọkọ me lek, Sọọlu itutuku owuwa ebi eyi Karais.—Ikwaan̄ 8:3; 26:​9-11.

5. Ike owa ke inu Pọọlu orọbe me mgbọ oraraka osa ikaan̄ mgbaan̄ me lek kan̄?

⁵ Mgbọ ikanabe ogwu eyi Karais, Pọọlu ikikaan̄ sasaak usini mgbọ bak me lek inu echi irọbe me mgbọ oraraka. Ike acha okije me lek Pọọlu okanabe ogwu eyi Karais, ikeya si ke ikikaan̄ sasaak ofolek inu irọbe. Kubọk inu njeen̄, mgbọ Pọọlu ogebe adasi ikpa ijet ebi Kọrint me mkpọ obet lek acha 55 C.E., itumu ibe: “Me atikọ, emi ǹkagbe ogwu ebegwen ogwu otuchieen̄, mije, nsisaak ntitiin̄ Awaji enenen.” (1 Kọr 15:9) Acha go iraraka me lek, Pọọlu ogwegwen lek kan̄ ogwu “òsisip ichit me etete otutuuk bọn Awaji” me ikpa igebe ijet ebi Efesọs. (Efes 3:8) Mgbọ Pọọlu ogebe ikpa ijet Timọti, itumu inyi ọmọ ibe: “Me mgbọ òraraka, nkitumu ijo ikọ ibak Okaan̄-ene Jisọs, mè ikirọ ikeme ọmọ, mè ikirọ ọmọ inu esip.” (1 Tim 1:13) Ire omokọt ikeek ubọk ibokup me lek Pọọlu mgbọ isibe ntitiin̄ ge ibosi itap efuuk me owot ebi ikup me ere ya mè inimun̄ ebi irọbe ikeme mè iyaka ire ebi ototun̄ ukan̄ kiban̄ ni?

6. Keke ore ofifi inu orọrọ ibe Pọọlu ikaan̄ sasaak? (Kpọ inu egebe me agan̄ ijọn̄.)

⁶ Pọọlu ikaan̄ ufialek eyi onyinyi ọmọ sasaak. Pọọlu isa mkpọ ge okinyi ọmọ sasaak itọt me lek “ukpak ge ochichim inwaan̄ ọmọ me emen ufuk.” (2 Kọr 12:7) Ogwu otuchieen̄ yi ikabak mkpọ orọrọ ikikaan̄ sasaak yi, ire, usem isabe irọ mkpọ ikijeen̄ ibe ke ufialek ya ire eyi anam akpalek, mè iyaka ire ofifi ufialek eyi ochuchubọk irọ ibe ikikaan̄ sasaak.b

7. Keke orọ ikafetbe inyi Pọọlu irọrọ inu otatat mgbọ geelek? (Ebi Rom 7:​18, 19)

⁷ Ekasoge kan̄. Pọọlu irurumun̄ me lek ekasoge kan̄. (Fuk Ebi Rom 7:​18, 19.) Ikerere ibe ke iweek irọrọ inu otatat, akpalek ekasoge kan̄ ikachieek ibe ikọt irọ inu ikaan̄be me nkeek iso. Itumu ibe ke ulọk anam akpalek kan̄ ikititim igak ulọk kan̄ irọrọ inu otatat mgbọ geelek. Ikerere ikeya, Pọọlu itap efuuk ikirọ inu otatat. (1 Kọr 9:27) Kpolọlọ, ejit ira ikifieek ọmọ enenen isitumu mè iyaka ire irọ inu olọlọ ikerere ibe ke ikitap efuuk irọrọ inu otatat!

IKE OWA KE PỌỌLU OSA ITIM IGAK UFIEEJIT?

8. Keke ke inu Pọọlu ogebe ojeen̄ ofolek ubọk isabe itim igak ekasoge kan̄?

⁸ Inan̄a me lek ikpa igebe, Pọọlu ijeen̄ ubọk ọmọ mè ebi eyi Karais ogbo kan̄ ebekọt isa itim igak ijo olilọk sa me lek ntap-ubọk ekwukwu mbuban Awaji. (Rom 8:13; Gal 5:​16, 17) Pọọlu imalek ikpa mkpọ ofolek ijo olilọk mè eru echi ebi eyi Karais ebekitim igak. (Gal 5:​19-21, 26) Kpunu cheche ibe ke Pọọlu ikeek mkpọ idọk ofolek iwọwọ kan̄, mè iweek nteme onan̄a me emen Baibul, mè itaba iman̄ me lek usini mkpọ iborọ isasa itim igak ekasoge kan̄. Eji michieek inye ibe ke Pọọlu itap nteme ikebinyi ebi ofifi ife me ikwaan̄.

9-10. Keke otap ubọk inyi Pọọlu ikọt itim igak lọlọ nkeek? (Ebi Efesọs 1:7) (Kpọ si ogugo.)

⁹ Ikerere ibe ke Pọọlu ikifieek ejit usini mgbọ, ikisa ikekibele ejit owuwa mgbọ. Kubọk inu njeen̄, ikima inọnọ ata etip ofolek ubọk ntitiin̄ echi okup me ujọn̄ọ ere ekirọ inan̄a me otu ebi ikisi ikpọ ntitiin̄ ogbo kan̄. (2 Kọr 7:​6, 7) Ikinwọọn̄ irọrọ unene melek bọn ute irieen̄ mè ibaan̄. (2 Tim 1:4) Iriọọn̄ si ibe ke ọmọ ikaan̄ nnwọn-isi Jioba. Me atikọ, Pọọlu ibele ejit bak me lek ikọtbe ikitọbọ ebum inyi Awaji melek utọn̄ọ nkeek. (2 Tim 1:3) Ikerere mgbọ ikupbe me mkpọn me Rom, Pọọlu itap efuuk me owot bọn ute irieen̄ mè ibaan̄ ibe ekenwọọn̄ unwọọn̄. (Filip 4:4) Inu Pọọlu ogebe ikasibi ibe ke ikikeek mkpọ ofolek ufialek mè iwọwọ kan̄ owuwa mgbọ. Isibi utoon̄ ibe ke isikaan̄ sasaak, mogwat lek inwene nkeek kan̄ mè ibene ikikeek mkpọ obonyi ọmọ unwọọn̄.

¹⁰ Ofifi mkpọ otatap ubọk inyi Pọọlu ire ngwugwa mkpenwene. Ikeek ibe ke Jioba ima ọmọ mè inyi ngwugwa mkpenwene mije kan̄ si. (Gal 2:20; fuk Ebi Efesọs 1:7.) Pọọlu ikaan̄ utoon̄-ejit onyenye ibe ke ọmọ mokaan̄ ntele-nnyi Jioba bak me lek mkpenwene kè Jisọs. (Rom 7:​24, 25) Me ekakpọge chieen̄ me lek ekasoge kan̄ mè ijo inu echi irọbe me mgbọ oraraka, Pọọlu ikup inye ikisa me unwọọn̄ ikitọbọ ebum inyi Awaji.—Iburu 9:​12-14.

11. Keke orọ inu orọrọ Pọọlu okitap eji efuuk me owot?

¹¹ Kubọk Pọọlu, mokọt ikikup eji me lek kubọk ekititim akọn̄ me emen kiji, akọn̄ ofolek mkpọ eji ekikeek, inu eji ekebirọ, mè iyaka ire mkpọ eji ekitumu. Mokọt ikup eji me lek kubọk ke ‘njijin lek kiji imin’ ike ikupbe me lek Pọọlu si. Ofolek rumurumun̄ ikikaan̄, gwun̄ ute enenwaan̄ ge ekigwen Elizac ogwu okup akọp acha iba mè gweregwen itumu ibe: ‘Ibele emi ejit irọriọọn̄ ibe ke ikare emi gaalek nkirọ unwene me ugwem n̄a, ene obet lek Pọọlu si irọ usini unwene me ugwem kan̄. Eyi ire ofifi inu okijeen̄ emi ibe ke Jioba iriọọn̄ inu ebi eyi kan̄ ekije itibi.’ Kubọk Pọọlu, keke ke eji ebekọt irọ inyi eji mekọt ikikaan̄ utọn̄ọ nkeek mè ikibele ejit ikerere ibe ke eji ekifieek ejit usini mgbọ?

IKE OWA KE EJI EBEKỌT ISA ITIM IGAK UFIEEJIT?

12. Keke ke eji ebekirọ inyi eji ekebele ejit?

¹² Kup nye kitap lek jaan̄ me lek inu echi emen ekwukwu. Eji kpelọlọ ikekirọ inu echi obokitaba eji iriaak me lek Jioba. Eji mekọt isa inu chi eji ebekirọ itọt me lek inu eji ekirọ inyi lek kiji inye kubọk, irerie ata inorie, irọrọ inu isasa ikpọk lek mè ilalaak ijaan̄ si. Ikibele eji ejit irọrọ inu chi bak lek oruru eji ekikaan̄ inan̄a me lek. Ubọk yaage si, ikekifuk Usem Awaji usen geelek, ikekilook ata etip, ikekineen̄ lek iban mè ikisi nkween̄mkpọ ntitiin̄, mè ikekifọọk ikọ me nkween̄mkpọ ntitiin̄ ikibele eji ejit enenen. Ire eji ikirọ inu chi, motap ubọk irọ mè eji ekekeek ata mkpọ echi oborọ ibe eji ekebele ejit kpan̄asi ikekikeek mkpọ echi oborọ inyi eji ekefieek ejit.—Rom 12:​11, 12.

13-14. Ike owa ke usini ebi eyi Karais igbegbe utoon̄-ejit esa ikaan̄ oruru me lek irọrọ mkpọ obotaba ema iriaak me lek Jioba?

¹³ Kpọ-nu inu orọrọ John, ogwu okup akọp acha ita mè onaan̄ge mgbọ iweekbe iriọọn̄ ibe ke ọmọ ikaan̄ orukan̄ ge okup unye unye. Me adasi mgbọ, ukpook itet ọmọ enenen, ikaan̄ sasaak si mije, acha ikajeje me lek kan̄. Me okike mgbọ keyi, gwun̄ kan̄ enerieen̄ ikup acha ita. Keke otap ubọk inyi John inyi ikakifieek ejit mgbọ geelek? Itumu ibe: ‘Ikerere ibe ke lek ikiwọ emi, nkimun̄ ijaan̄ ibe ke emi mè ebi ototun̄ ukan̄ n̄a mikisi otutuuk nkween̄mkpọ ntitiin̄, ikisibi uko, mè ikikaan̄ nkween̄mkpọ ototun̄ ukan̄ nde geelek. Eji mikup inye ikirọ inu chi ikerere me mgbọ iyọtbe irọrọ ema.’ John itumu si ibe: ‘Me irek oyọyọt, eji mekọt ikaan̄ ukpook mè sasaak. Ire, ike mgbọ okije, eji mekimun̄ ibe ke Jioba ima eji enenen mè ikitap eji efuuk me emen. Jioba mokọt itap ubọk inyi owu ike irọbe inyi emi.’

¹⁴ Gwun̄ ute Eliza, ogwu ewuukbe lek ikpa mkpọ ofolek itumu ibe: ‘Nkween̄mkpọ ntitiin̄ nkisi mè nkween̄mkpọ eyi agaga nkirọ ikikeek emi ibe ke Jioba ikinọ ida n̄a mè ichubọk ima emi. Eyi ikibele emi ejit.’ Nolan, ogwu Sekut ge me Africa ikpa mkpọ okitap ubọk inyi ọmọ mè ogwu nwa Diane, itumu ibe: ‘Eji etetet lek inye ikibeek uriaak, ikikween̄ Baibul, ikisi nkween̄mkpọ ntitiin̄, mè ikisibi uko ikerere me mgbọ efuuk otabe eji me owot. Eji esikirọ inu chi, Jioba ikitap ubọk inyi eji ekebele ejit. Ikekikeek ibe ke Jioba motap ubọk inyi eji mè igbana eji ubọk geelek ibe ke eji kperiọọn̄ ubọk ibosa irọ ikeya okitap ubọk inyi eji me mgbọ eji ekifieek ejit.’

15. Keke ke eji ebekọt irọ si igbaalek inyi eji ekọt etim egak ufieejit? Nyi inu ntọt-me-lek.

¹⁵ Ire eji ekpọkpọk ikup inye ikifieek ejit, eji mekọt irọ ofifi ofifi inu igbaalek. Kubọk inu njeen̄, ire udun̄ kwun̄ ikinaan̄ owu, omokọt ije ikana ikinyana lek. Irọrọ ikeya mokọt itap ubọk inyi owu, ire, igbe ibe orọ ofifi mkpọ si. Ufuna oriọọn̄ inu orọrọ okikaan̄ unaan̄ ya, omowọlọ iweek mkpọ obokọt irọ ibe ene ikaan̄ mbet lek unaan̄ ya mè isi lek ogwu ofia ebeke si. Ubọk yaage si, eji mekọt iwọlọ Baibul, mè ikpa ntitiin̄ ikpọ inyi eji eriọọn̄ inu orọrọ eji ekikaan̄ ufieejit mè ubọk eji ebesa itim igak. Eji mekọt igọọk gwun̄ ute ge ogwu obokọt inyi eji ata nteme ikpa usem si. Ikaan̄ usini ofifi ofifi inu obotap ubọk inyi eji si.

16. Keke obotap ubọk inyi owu okọt oriọọn̄ inu orọrọ okikaan̄ sasaak? (Okwa Itọn̄ 139:​1-4, 23, 24) (Kpọ si ogugo.)

¹⁶ Beek Jioba ibe itap ubọk inyi owu oriọọn̄ inu ochubọk iweek. Ogwu ubọọn̄ Debit iriọọn̄ ibe ke Jioba iriọọn̄ ọmọ ijaan̄. Eya ọrọ, ibeek Jioba ibe itap ubọk inyi ọmọ iriọọn̄ inu orọrọ ikikaan̄ sasaak me ekiket kan̄. (Fuk Okwa Itọn̄ 139:​1-4, 23, 24.) Owu si mokọt ibeek Jioba ibe itap ubọk inyi owu oriọọn̄ inu orọrọ nkeek kwun̄ okisisaak owu mè ogobo otet inu obokọt irọ isasa itim igak sasaak ya. Omokọt ido lek kwun̄ ibe: ‘Keke ke nchubọk ikikaan̄ sasaak ofolek? Ire ikaan̄ inu okimalek irọ ibe ekiket n̄a ikisisaak emi ni? Nsibene ikikaan̄ sasaak, ire nkekigwat lek iyaka ikeek inu oborọ ibe mbele ejit ni? Ibot usem echi owa me emen ikpa kiji obokọt itap ubọk inyi emi?’

17. Ibot usem echi owa ke eji ebekọt ikween̄ echi obotap ubọk inyi eji ekekeek mkpọ obokinama eji inye?

¹⁷ Kween̄ mkpọ obotap ubọk inyi owu me irek kwun̄. Inan̄a me mgbọ ire mgbọ, inwọn ibe eji ekween̄ mkpọ ofolek ge me lek eru Jioba eyi obotap eji efuuk me owot. Kubọk inu njeen̄, ogwu otuchieen̄ Pọọlu ikaan̄ oruru enenen inan̄a me lek igwugwu nkeek ikom me lek ngwugwa mkpenwene mè ubọk Jioba okisa itele inyi ene. Eji mekọt igọọk akpat ukot Pọọlu mè ikween̄ mkpọ obotap ubọk inyi eji igọọk me lek ufiak kiji. Wọlọ ikpa Research Guide for Jehovah’s Witnesses, Watch Tower Publications Index mè iyaka ire ofifi ofifi ikpa ekisa ikween̄ Baibul okup me ida usem kwun̄ kpọ mè kween̄ mkpọ ofolek ubọk Jiọba okisa ijeen̄ nsan mè ima ogbegbe utoon̄-ejit, mè ubọk ikisa itele inyi ene. Osimun̄ ibot usem echi obokọt ikaan̄ oruru me lek, ge sibi. To inu ogebe isibi cha me ere obokọt imun̄, mè kween̄ mkpọ ofolek ibot usem cha osibene ikikaan̄ sasaak. Sa inu okween̄be sa rọ mkpọ me irek okupbe me emen.—Filipai 4:8.

18. Kpasi ibot usem ke usini ebi eyi Karais ekween̄ mkpọ ofolek?

¹⁸ Eliza, ogwu ewuukbe lek ikpa mkpọ ofolek, iwọlọ iweek mkpọ ofolek Jobu me Baibul. Itumu ibe: ‘Nchichini owuwa ufialek me mgbọ yaage kubọk Jobu. Eya orọ, nkwekween̄ mkpọ ofolek kan̄. Jobu ikaan̄ owuwa ufialek onyinyi ọmọ uga ufieejit. Ire, ikerere ibe ke ikariọọn̄ mkpọ orọrọ ikibọkọ ukwook, ikukup inye ikiyaka lek imaan̄ me lek Jioba ibe itap ubọk inyi ọmọ.’ (Jobu 42:​1-6) Diane, ogwu ewuukbe lek ikpa mkpọ ofolek, itumu ibe: ‘Emi mè nlom n̄a ekisa ikpa Draw Close to Jehovah ikween̄ mkpọ ofolek eru Jioba. Eji minwọọn̄ ubọk Jioba okisa ikpukpo eji inyi eji ekup kubọk kan̄. Kpan̄asi eji ebekito chieen̄ me lek inu eji ekarọbe ijaan̄ me mgbọ oraraka, eji ekisa imumun̄ ubọk Jioba okisa ikpukpo eji inyi eji ekana ata ife. Eyi ikirọ ibe mgbaan̄je kiji melek kan̄ ikinye.’—Asaya 64:8.

EJI MEKỌT ITOON̄ EJIT IBE KE JIOBA MOTAP UBỌK INYI EJI MÈ IGBANA EJI

19. Ike owa ke inu obokikup eji me lek usini mgbọ, ire, kpasi utoon̄-ejit ke eji ekaan̄?

¹⁹ Ikerere ibe ke eji misa otutuuk nteme enyibe me ibot usem yi irọ mkpọ, eji mekọt ikifieek ejit mè iyaka ire ikikaan̄ sasaak usini mgbọ. Eji mekọt ikito lek kiji njijin usini usen si. Ire, sa me ntap-ubọk Jioba, eji mekọt itim igak lọlọ nkeek. Eji mikaan̄ utoon̄-ejit ibe ke eji menwọọn̄ ugwem kiji mè ikibele ejit owuwa usen, mije eji ekaan̄be ata mgbaan̄je melek Jioba mè iriọọn̄ ibe ke inu eji ekirọ ikineme ọmọ.

20. Keke ke otumu ifieek ikukup inye ikirọ?

²⁰ Eji ekachieek ibe lọlọ nkeek ofolek inu eji erọbe me mgbọ oraraka, ufialek, mè ekasoge kiji igban eji ibe ekanwọọn̄ ugwem. Sa me ntap-ubọk Jioba, eji mekọt ikitọ ikọ inyi inu okinu eji me nkeek. (Itọn̄ 143:10) Eji ekikup ikpọ mgbọ ikekikeek mkpọ otatat ikpoboyaka ire rumurumun̄ inyi eji, mgbọ eji ebekinan̄a ikeke ewelegwe geelek me ekakaan̄ge sasaak geege, mè ikisa me ubelejit ikitọbọ ebum inyi Jioba Awaji ogwu ima!