Ichichili Eyi Jisọs Ochilibe Ijeen̄ Jọn

Mgbọ Jọn okupbe me mkpọn me Patimọs, Jisọs ijeen̄ ọmọ mkpọ oborọ me mgbọ okup me isi me emen akọp mè ilaak ọkpọchieen̄ gweregwen. Ilaak ọkpọchieen̄ chi ijeen̄ ubọk Jioba obosun̄ erieen̄ kan̄ me mbuban, isa ama ubọọn̄ kan̄ inu mè irọ nkeek kan̄ iso me linyọn̄ yi ike ikupbe me emen inyọn̄.

Me emen ilaak ọkpọchieen̄ ge, Jọn imun̄ Jioba me inyọn̄ ogbọọn̄ ubọọn̄ kan̄ eyi okakaan̄ ujamgbugbo. Imun̄ si akọp ebi ugane iba mè ini ikukup ikana ogboon̄ ubọọn̄ ya. Ebi ugane cha etap ofọnti okuket mè ikwuun̄ okpibot ubọọn̄ alata araran̄. Utoon̄ okekikebe ikana me lek ogboon̄ ubọọn̄ ya, isinyọn̄ okekisook si. Akọp ebi ugane iba mè ini cha etọtọbọ ekpe me isi Jioba mè ikitọbọ ebum inyi ọmọ. Me ofifi ilaak ọkpọchieen̄, Jọn imun̄ ogbogbo ene inan̄a me ido geelek, mè etete ebi ife geelek, mè otu usem geelek ikitọbọ ebum inyi Jioba. Jisọs ogwu egwenbe si Gwun̄ Arọọn̄ ya okikpukpo ema kubọk ogwu okpukpo arọọn̄ mè ikisa ema ije isi ere ogbuuruk eyi mun̄ ugwem okupbe. Jọn iyaka imun̄ si ofifi ilaak ọkpọchieen̄ eyi Jisọs obenebe ikikpulu me ama ubọọn̄ emen inyọn̄ melek akọp ebi ugane iba mè ini. Me ilaak ọkpọchieen̄ ogọgọọk, Jọn imun̄ Jisọs okitim akọn̄ melek Setan orere ikpele ijijinu ya melek ebi ijo ekwukwu kan̄. Jisọs irieen̄ ema isibi me emen inyọn̄ ito me linyọn̄.

Jọn onenimun̄ ujuja inu ge si, orere, Gwun̄ Arọọn̄ ya mè efit mè akọp obop ene ini mè obop ini (144,000) me inyọn̄ ogoon̄ Sayọn. Imun̄ si ogwu osat ge okiwulu me lek efet mè ikilook ebi ife geelek ibe etet ukpook me lek Awaji, mè enyi ọmọ umin mè itọn̄.

Me ilaak ọkpọchieen̄ ogọgọọk, Jọn imun̄ ubọk etimbe akọn̄ Amagedọn. Me akọn̄ ya, Jisọs mè ebi melek kan̄ mitim igak Setan mè ebi melek kan̄. Me ota ilaak ọkpọchieen̄ kan̄, Jọn imun̄ mgbaan̄-mbọp mè esuuk me emen inyọn̄ mè linyọn̄. Imun̄ si ubọk efiatbe Setan mè otutuuk ebi ikup me agan̄ kan̄ isan̄a. Imun̄ si ubọk otutuuk ebi ikup me emen inyọn̄ mè linyọn̄ ekisun̄ erieen̄ Jioba me mbuban mè ikitọbọ ebum inyi Jioba gaalek.