“Kè Ama Ubọọn̄ Kwun̄ Inu”

Jioba ichieek use ibe ke ito mè unan mè mkpa ikpoyaka ikup. Ke ọmọ motuku mun̄ ito isan̄a me chieen̄ otutuuk ene. Ke ebi ene mewuuk ijo inu geelek orọrọ me oka ukot.

Jioba ito Adam mè Îfu me ogọ Iden mije iweekbe ibe ema ekaan̄ unwọọn̄ mè eluk me esuuk. Iweek si ibe ema etọbọ ebum enyi ọmọ mè ekaan̄ bọn ejot linyọn̄ yi. Ubọk geelek ibe ke Adam mè Îfu kpesiki ibot inyi Jioba, nkeek kan̄ ikanwene. Eji mikween̄ me ikpa yi ibe ke Jioba ikirọrọ use geelek ichieekbe iso. Ike Jioba ochieekbe Ebereyam me use, mogbana otutuuk ene me linyọn̄ yi inan̄a me lek ama ubọọn̄ kan̄.

Sọnja mgbọ, Jioba mofiat Setan, ebi ijo ekwukwu melek otutuuk ebi mkpikpak. Otutuuk ebi ibeluk me mgbọ ya ebekitọbọ ebum inyi Jioba gaalek. Orukan̄ mè mkpa ikpoyaka ikup. Kpan̄asi ikeya, usen geelek eji enan̄abe ikeke me ilaak, eji mekinwọọn̄ unye-akpalek mè ikibele ejit. Otutuuk linyọn̄ yi mokana paradais. Otutuuk ene mekinwọọn̄ ata inorie mè ikiluk me utelelek. Ebi ene mekirọ ata inu inyi ebi melek kiban̄, ikare ijo inu. Ebi kè anam oron kpebekikaan̄ ukpook me lek kiji, eji si kpebekitet ukpook me lek kiban̄.

Uga ubelejit mokup mgbọ Jioba obobene ijomo ebi ene me mkpa. Ebi iluluk me ukot ikaan̄ kubọk Eben, Nuwa, Ebereyam, Sera, Mosis, Rufu, Esita, mè Debit esinan̄a ikeke me mkpa, eji mebọkọ ema itap. Ema megọọk eji isi ikwaan̄ inyi inyọn̄ ijọn̄ yi ikana paradais. Eji mekaan̄ owuwa ikwaan̄ eji ebenwọọn̄.

Jioba iweek ibe onwọọn̄ ugwem me paradais. Omochubọk iniriọọn̄ ọmọ ijaan̄ igak ubọk owuukbe lek iriọọn̄ ọmọ. Kè eji ekweek enye eketaba lek eriaak me lek Jioba usen geelek, bene me mgbọ keyi isi ire mgbọ geelek!