Kpechieek Ibe Inu Geege Igban Ema

Ikaan̄ ogwu enerieen̄ ge orere akọọk okikweek irek mè ikibeek mkpọ usen geelek me otunchit uwu mbuban. Me ikarek usen ge, ogwu enerieen̄ ya omumun̄ Pita mè Jọn ekije inin̄ emen uwu mbuban. Itutumu inyi ema ibe: ‘Soso iche mkpọ inyi emi.’ Pita ofọfọọk ọmọ ibe: ‘Nkaan̄ mkpọ onwọnwọn igak ikpoko eyi mbanyi owu. Me erieen̄ kè Jisọs, nan̄a keke mè je ije!’ Pita otatap ubọk inyi ọmọ ibe inan̄a ikeke, ogwu enerieen̄ ya obebene ikije ije! Ebi imumun̄ inu ukechieen̄ yi mibele ejit enenen, owuwa me lek kiban̄ echechieek me lek Jisọs.

Ire, ebi ngwugwa mè ebi Sadusi enanaan̄ ejit. Ema etataba ebi otuchieen̄ cha isi uwu oyerebet mè ido ema ibe: ‘Ire ekene onyi enyi unye isasa igwa ogwu enerieen̄ yi?’ Pita ofọfọọk ema ibe: ‘Ire Jisọs Karais ogwu enyi ekpan̄be onyi eji unye eji esabe igwa ogwu enerieen̄ yi.’ Ebi ibot uwu uriaak cha etataan̄ ukpo ibe: ‘Ikayaka itumu mkpọ ofolek Jisọs!’ Ire, ebi otuchieen̄ cha etutumu inyi ema ibe: ‘Eji metet lek inye ikitumu mkpọ ofolek kan̄. Eji kpeberiaan̄ ere.’

Mgbọ yaage etelebe Pita mè Jọn ibe efo, ema esisi lek ebi udun̄ Jisọs kechilọ mè itumu inyi ema mkpọ obọbọkọ irek. Ema egbagbaan̄ ibeek uriaak. Ema ebeek Jioba ibe: ‘Soso tap ubọk nyi eji ekaan̄ unye-ejit inyi eji ekup enye ekerọ ikwaan̄ kwun̄.’ Jioba onyinyi ema ekwukwu mbuban kan̄, ema ekukup inye ikilook ebi ene ata etip mè ikigwa ebi ene si. Owuwa ebi ene ekakana ebi udun̄ kè Jisọs. Ebi Sadusi ekakaan̄ mba-ejit mè itet ebi otuchieen̄ cha itap me mkpọn. Ire, me ejit eririeen̄, Jioba oraria ogwu osat ge ibe isi ichili isotu mkpọn ya mè itumu inyi ema ibe: ‘Igwu ikom isi ijeen̄ ebi ene mkpọ me uwu mbuban.’

Me ofit iwele kan̄, ebi eriabe ibe esi esan̄a ebi otuchieen̄ cha esibi me mkpọn etutumu inyi ebi Oru ebi Ju, orere, ebi oyerebet inyi ebi ibot uwu uriaak ibe: ‘Egogon isotu uwu mkpọn ya ikam, ire, ebirieen̄ cha enyi etetbe kpekup me emen mkpọn ya!’ Ofifi ene otutumu ibe: ‘Ema ekup me uwu mbuban, ikijeen̄ ebi ene mkpọ!’ Ekpọkpọk itet ebi otuchieen̄ cha mè isa ema inu me isi ebi Oru ebi Ju. Ogwu ibot ebi ngwugwa otutumu ibe: ‘Eji minyi enyi ida ibe enyi ekayaka itumu mkpọ ofolek Jisọs!’ Ire, Pita ofọfọọk ibe: “Eji ebesiki ibot inyi Awaji, ikare ebilene.”

Ebi ibot uwu uriaak enanaan̄ ejit enenen ire lek ekiweek ikpakpan̄ ebi otuchieen̄ cha. Ire, ogwu Farisi ge ekigwen Gamalien onanan̄a ikeke mè itumu ibe: ‘Igbala chieen̄! Awaji mokọt ikup melek ebirieen̄ chi. Ire enyi michubọk iweek ititim ikeme Awaji me lek kan̄ ni?’ Ema ebọbọkọ nteme kan̄ itap. Esasa njijan̄ isulu ebi otuchieen̄ cha, mè inyi ema ida ibe ekayaka ilook ata etip, mè itele ema ibe efo. Ire, eya ikarọ ibe ema ekayaka ilook ata etip. Ema ekukup inye ikisa me unye-ejit ikilook ata etip ya. Milook inan̄a me uwu ire uwu, milook si me uwu mbuban.