Awaji Inyi Ebi Udun̄ Kè Jisọs Ekwukwu Mbuban

Akọp usen iraraka me lek Jisọs ogwube ikom ifo emen inyọn̄, ebi udun̄ kan̄ ebọbọkọ ekwukwu mbuban. Eyi ibọkọ irek me usen ijọk Pentikọs eyi acha 33 C.E., owuwa ebi ene enanan̄a me esese esese ere inu Jeruselem bak lek ijọk ya. Mkpọ obet lek efit ebi udun̄ kè Jisọs ge mè akọp ene iba etitiin̄ me agwut ge okup me uwu inyọn̄ ge. Inu ukechieen̄ ge obọbọkọ irek. Inu okup kubọk owuwa alọm ukan̄ okakana isibi inisọọk me ibot otutuuk ebi udun̄ kè Jisọs ge ge ikup me ere ya, otutuuk kiban̄ ebebene ikitumu esese esese ida usem. Ida ge okitaan̄ kubọk ida unye efet ojojot emen uwu ya.

Ebi inan̄a me esese esese ido inu Jeruselem cha enọnọ ida otataan̄ ya mè ilibi inin̄ emen uwu ya isi ikpọ inu okibọkọ irek. Ike ema chieen̄ mgbọ ema emun̄be ebi udun̄ kè Jisọs ekitumu esese esese ida usem. Ema etutumu ibe: ‘Ife chi ire ebi Galili. Ejeje ikitumu ikọ me ida usem kiji ge ge ni?’

Pita mè ebi otuchieen̄ kechilọ eneninan̄a ikeke me isi ebi urum ife cha. Pita otutumu inyi ema ubọk esabe ikpan̄ Jisọs mè ubọk Jioba osabe ijomo ọmọ me mkpa. Pita onenitumu inyi ema ibe: ‘Mgbọ keyi, Jisọs ikup me agan̄ ubọk ulom Awaji. Igwook si ekwukwu mbuban me lek kiji ike ichieekbe me use. Eya orọ enyi ekimun̄ mè ikinọ inu ukechieen̄ chi.’

Usem Pita ire ebi ife cha ejit, ema enenido ibe: “Ìre keke ke eji eberọ mgbọ keyi?” Pita otutumu inyi ema ibe: ‘Igwu ikom me lek ijo kinyi, mè ikaan̄ ntap-me-mun̄ me erieen̄ kè Jisọs. Enyi si mebọkọ ekwukwu mbuban eyi orere uche Awaji.’ Me usen ya, mkpọ obet lek obop ene ita ekakaan̄ ntap-me-mun̄. Bene me mgbọ ya fo isi, ebi udun̄ kè Jisọs ebebene ikiwa igbaalek me Jeruselem. Sa me ntap-ubọk ekwukwu mbuban, ebi otuchieen̄ ekekibene ntitiin̄ me esese esese ere inyi ekọt ejeen̄ ebi udun̄ Jisọs otutuuk inu Jisọs onyibe ema ida ibe ejeen̄.