Jisọs Ijomo me Mkpa

Mgbọ Jisọs okwube isan̄a, ogwu enerieen̄ ge obọbọọn̄ ubọọn̄ ekigwen Josefu otutumu inyi Pailet ibe itele mè ọmọ isan̄a nkwukwu kè Jisọs me inyọn̄ uti. Josefu onenisa aran̄ ekisa inen̄e nkwukwu ene isun̄ ichiọọk ọmọ mè isa aya ekwut ojajaan̄ ikat ọmọ mè ifuun̄ ọmọ me aya udọn̄-ufuun̄ me emen ewuuk ge. Inenikpukpọt ikpele ewuuk ge isa ichit udọn̄ ya. Ebi ibot ngwugwa etutumu inyi Pailet ibe: ‘Eji mikaan̄ ukpook ibe ke usini ebi udun̄ kè Jisọs meniben nkwukwu kan̄ efuun̄be mè initumu inyi eji ibe ke ijomo me mkpa.’ Pailet otutumu inyi ema ibe: ‘Ichọkọ otu udọn̄-ufuun̄ ya ichit mè ito ebi mbem me ere ya.’

Mgbọ egwe ita orakabe, me agan̄ egwe, usini ebibaan̄ ejeje isi udọn̄-ufuun̄ ya mè imun̄ ibe ke mikpukpọt ewuuk ya isan̄a. Me emen udọn̄-ufuun̄ ya, mimun̄ ogwu osat ge ogwu otutumu inyi ema ibe: ‘Ikafieek owot ke Jisọs ijomo me mkpa. Ije isi ilook ebi udun̄ kan̄ ibe ke mochichini ema me Galili.’

Meri ogwu Magidala ogwagwat lek isi iweek Pita mè Jọn, mè itumu inyi ema ibe: ‘Ene ge iniben nkwukwu kè Jisọs!’ Pita mè Jọn elilibi isi udọn̄-ufuun̄ ya. Me mgbọ ema emun̄be ibe ke ikup ukpukpọk, ema egwugwu ikom ifo uwu kiban̄.

Me mgbọ Meri ogwube ikom inu udọn̄-ufuun̄ ya, imumun̄ ebi osat iba me emen udọn̄-ufuun̄ ya mè itumu inyi ema ibe: ‘Nkariọọn̄ ere ebenbe Ogwukaan̄ n̄a isi isun̄.’ Meri onenimun̄ ogwu enerieen̄ ge, mè nkeek ibe ke ikisi ikwaan̄ me uko ya, itutumu inyi ogwu enerieen̄ ya ibe: ‘Ogwu nte, soso sa emi si jeen̄ ere osun̄be ọmọ.’ Ire, mgbọ ogwu enerieen̄ ya ogwenbe ọmọ “Meri!” ineniriọọn̄ ibe ke ire Jisọs. Itataan̄ ukpo ibe: “Ogwu ijejeen̄!” mè igọbọ Jisọs ikaan̄. Jisọs otutumu inyi ọmọ ibe: ‘Je si look ebi ngwan̄ n̄a ibe ke omun̄ emi.’ Mgbọ yaage, Meri olilibi isi lek ebi udun̄ kan̄ mè itumu inyi ema ibe ke ọmọ imun̄ Jisọs.

Ike mgbọ ojebe me usen ya, ene iba me lek ebi udun̄ kè Jisọs ekekije inan̄a me Jeruselem isi ere ekigwen Emayọs. Ogwu enerieen̄ ge onenikigọọk ema igbaan̄ ije mè ido ema inu ema ekikpa mkpọ ofolek. Ema etutumu inyi ọmọ ibe: ‘Ire okanọnọ? Egwe ita oraraka ke ogwu ibot ngwugwa okpan̄ Jisọs. Mgbọ keyi, usini ebibaan̄ ekitumu ibe ke Jisọs owa me ugwem!’ Ogwu enerieen̄ ya ododo ema ibe: ‘Ire enyi kpechieek me lek inu ebi nriran etumube ni? Ema etumu ibe ke Karais mokwu mè ijomo si.’ Ikpakpa ikpa mbuban iwele inyi ema. Me mgbọ ema erebe Emayọs, ebi udun̄ kè Jisọs cha etutumu inyi ogwu enerieen̄ ya ibe igọọk ema. Mgbọ ema eberie inorie ikakwun̄, ogwu enerieen̄ ya obebeek uriaak, mgbọ ibeekbe uriaak ya isan̄a, ema eneniriọọn̄ ibe ke ire Jisọs. Jisọs onininiin̄ ichep me chieen̄ kiban̄.

Ema ene iba egwagwat lek isi uwu ebi otuchieen̄ etitiin̄be me Jeruselem mè itumu inyi ema inu obọbọkọ irek. Ike ema ekupbe me emen uwu ya, Jisọs okakana isibi me isi otutuuk kiban̄. Ebi otuchieen̄ cha kpekọt ichieek ibe ke ire Jisọs. Jisọs onenitumu inyi ema ibe: ‘Ikpọ ubọk iba n̄a; ina inichak emi ubọk me lek. Mige me Ikpa Mbuban ibe ke Karais mojomo me mkpa.’