Jisọs Ikwu me Gọligọta

Ebi ibot ngwugwa esasa Jisọs isi uwu kè Pailet ogwu ibot mkpulu ebi Rom. Pailet ododo ema ibe: ‘Kpasi ikan ke ogwu enerieen̄ yi orọn̄?’ Ema efọfọọk ibe: ‘Ikitumu ibe ke ọmọ ire ogwu ubọọn̄ ebi Ju!’ Pailet ododo Jisọs ibe: “Ìre owu ore ogwu ubọọn̄ ebi Ju?” Jisọs ofọfọọk ọmọ ibe: “Mkpulu n̄a ìkare eyi linyọn̄ keyi.”

Pailet oneniria Jisọs isi lek Erọdu ogwu okikpulu Galili, mè ire mokaan̄ mkpọ ibotumu ikeme ọmọ. Erọdu ikamun̄ inu geege Jisọs orọbe ilọ, ineniria ọmọ igwu ikom isi lek Pailet. Pailet otutumu inyi ebi Ju cha ibe: ‘Ikerere Erọdu ikamun̄ inu geege ogwu enerieen̄ yi orọbe ilọ. Matele ibe ifo.’ Ebi ife cha ekekitaan̄ ukpo itumu ibe: ‘Kpan̄ ọmọ! Kpan̄ ọmọ!’ Ebi akọn̄ enenisulu ọmọ me njijan̄, icho ataak igwook ọmọ me lek, mè igon ọmọ. Ema enenisa ukpak ilọk okpibot ubọọn̄ mè isa ikwuun̄ ọmọ me ibot mè ikirọ ọmọ mkpọ ochak ikitumu ibe: ‘Ogwu ubọọn̄ ebi Ju, eji minyi owu amọn.’ Pailet okpọkpọk itumu inyi ema ibe: ‘Nkamun̄ inu geege ogwu enerieen̄ yi orọbe ilọ.’ Ire, ema ekekitaan̄ ukpo itumu ibe: “Ìtet ìje! Ìgon ìkpan̄ me inyọn̄ uti!” Eya orọ, Pailet osasa Jisọs inyi ibe ekpan̄.

Esasa Jisọs isi ere ekigwen Gọligọta, igon ọmọ me inyọn̄ uti, mè ibene uti ya ifo inyọn̄. Jisọs obebeek uriaak ibe: ‘Ute, tele nyi ema, mije, ema kperiọọn̄ inu ema ekirọ.’ Ebi ene ekekisa Jisọs irọ mkpọ ochak, mè ikitumu ibe: ‘Ire owu ire Gwun̄ Awaji, nan̄a sibi ijọn̄ me inyọn̄ uti ya mè nyan̄a lek kwun̄.’

Ge me lek ebi inọ iba egonbe me agba lek Jisọs otutumu inyi ọmọ ibe: “Jisọs, keek emi mgbọ owu mômọnọbe irek ubọọn̄ kwun̄.” Jisọs ochechieek ọmọ use ibe: “Owu melek n̄a mêkup me Paradais!” Me ikarek usen ya, uga udun okakana ichit otutuuk ido ya mè ikup iso mbubak mgbọ ita. Usini ebi udun̄ kè Jisọs melek nga kan̄ Meri ekekeke iriak me lek uti esabe igon ọmọ. Jisọs onenitumu inyi Jọn ibe ikpọ chieen̄ me lek Meri kubọk ire nga kan̄.

Me ota kan̄, Jisọs otutumu ibe: “Îta!” Igegele ibot isiki mè ikwu. Mgbọ yaage, ijọn̄ osisisik unye unye. Me emen uwu mbuban, ulobo ekwut esabe iche ere okup mbuban isan̄a me lek ere okup mbuban ichit otọtọbọ ibum. Ogwu akọn̄ ge otutumu ibe: ‘Ene yi ichubọk ire Gwun̄ Awaji me atikọ.’