Jisọs Igobo Akọp mè Ebi Otuchieen̄ Iba

Eyi Jisọs olookbe ata etip iso mkpọ obet lek acha ge mè okpọkọ, ikaan̄ ntumu-mfieek okukup ufiak iborọ. Ire ebi owa ke ibogobo ibe egọọk ọmọ erọ ikwaan̄ yi? Ire ebi owa ke ibokpukpo inyi ekeje me isi me ntitiin̄ ebi eyi kan̄? Inyi ikọt irọ ntumu-mfieek chi, Jisọs iweek ntap-ubọk Jioba. Eya orọ, ijeje isi inyọn̄ ogoon̄ ge, ọmọ gaalek, isi ikibeek uriaak otutuuk eririeen̄. Me ewelegwe, Jisọs onenigwen usini ebi udun̄ kan̄ mè igobo akọp mè ene iba ibe ere ebi otuchieen̄ kan̄. Erieen̄ ekene mè ekene ke okeek me lek kiban̄? Erieen̄ kiban̄ ire Pita, Anduru, Jemis, Jọn, Filip, Batolomi, Tọmọs, Matiyu, Jemis gwun̄ kè Alifiọs, Tadiọs, Saimọn, mè Judas Isikariọt.

Akọp mè ene iba chi migọọk ọmọ ikije ikana. Eyi ikpukpobe ema isan̄a, iraria ema isibi ibe esi elook ata etip ema gaalek. Jioba onyinyi ema unye isasa ilap ijo ekwukwu mè isasa igwa orukan̄.

Jisọs igwen akọp mè ebi udun̄ kan̄ iba cha ebi unene kan̄, itoon̄ ema ejit me lek si. Ebi Farisi ekimun̄ ebi otuchieen̄ cha kubọk ebi ikike mè ebi kpebọkọ ikween̄-inu geege. Ire, Jisọs inyi ema kpokpo inyi ema ekọt erọ ikwaan̄ kiban̄. Ema mikup melek Jisọs me mgbọ okukup ufiak ichit me ugwem kan̄, orere, sabum ikwube mè mgbọ inan̄abe ikeke me mkpa. Kubọk Jisọs, owuwa me lek ebi akọp mè otuchieen̄ iba cha enan̄a me Galili. Isọkọ me lek si, usini me lek kiban̄ mikaan̄ nwa.

Ebi otuchieen̄ chi ire ebi ekasoge, ebi ikirọrọ ilọ. Usini mgbọ, ema mitumu usem eyi ema kpedasi ikeek mkpọ ofolek, mirọ usini ntumu-mfieek ikanwọnge si. Usini mgbọ si, ema kpekikaan̄ ime. Migbini si mkpọ ofolek ogwu omimin ichit. Ire, ema ire ebi ata ife imama Jioba. Ema ebekana àta ntitiin̄ ebi eyi Karais Jisọs isi ifo emen inyọn̄.