Elisabet Iman Gwun̄

Iraka efit acha ini karake ekpọkbe inama mgban ama Jeruselem. Ikaan̄ ogwu ngwugwa ge ekigwen Jekaraya mè ogwu nwa Elisabet ikiluk iriaak ama ya. Owuwa acha iraka karake ema ebatbe, ire, ema kpekaan̄ gwun̄ geege. Usen ge, ike Jekaraya okiwọp nsensi me uwu mbuban, Geberen ogwu osat Awaji okakana isibi. Ukpook itet Jekaraya mgbọ imun̄be ọmọ, ire, Geberen otutumu inyi ọmọ ibe: ‘Katet ukpook. Nsa ata etip onan̄a me ubọk Jioba ijet owu. Elisabet nwa kwun̄ moman gwun̄ enerieen̄ ge, erieen̄ kan̄ more Jọn. Jioba iweek isasa gwun̄ ya irọ ikwaan̄ osibi esese.’ Jekaraya ododo ogwu osat ya ibe: ‘Mbajeje ichieek me lek inu yi otumube? Emi mè nwa n̄a mikan enenen ikakaan̄ gwun̄.’ Geberen ofọfọọk ọmọ ibe: ‘Awaji oria emi ibe ǹnenlook owu ata etip yi. Ire, mije owu okachieekge ikọ n̄a, owu mônin̄ mbuuk mege ire mgbọ memanbe gwun̄ ya iraka.’

Jekaraya ikup ifiin̄ igak ubọk iwuukbe lek ikikup me uwu mbuban. Mgbọ inan̄abe isibi, ebi ikup me oyet ekekiweek irọriọọn̄ inu orọrọ. Ire, Jekaraya ikakọt itumu ikọ, iyaka ikisa ubọk ubọk ikitọ ijeen̄ ema. Ema eneniriọọn̄ ibe ke Jekaraya ira ibọkọ etip inan̄a me ubọk Awaji.

Ike mgbọ ojebe, Elisabet oninin̄ owot mè iman gwun̄ enerieen̄ ge ike ogwu osat ya otumube. Ebi unene mè ebi uwu kan̄ enunu ikinikpọ gwun̄ ya. Ema mibele ejit enenen inyi Elisabet. Elisabet otutumu ibe: ‘Erieen̄ kan̄ ibore Jọn.’ Ema etutumu ibe: ‘Kpunu ene geege me ototun̄ ukan̄ kinyi ekigwen Jọn. Sa erieen̄ ogwu ute Jekaraya gwen ọmọ.’ Ire, Jekaraya ogege ibe: ‘Jọn ore erieen̄ kan̄.’ Mgbọ yaage, Jekaraya okpọkpọk ibene ikitumu usem! Etip ofolek gwun̄ yi otataan̄ ikana otutuuk Judia, ebi ene ekekidido ibe: ‘Keke ke gwun̄ yi obomin ikana?’

Ekwukwu mbuban onenijot emen Jekaraya, itutumu ibe: ‘Itọn̄ ikup inyi Jioba ogwu ochechieek Ebereyem use ibe ke moria ogwu unyan̄a orere, ogwu Mesaya, ibe ininyan̄a eji isibi. Jọn more ogwu nriran, ogwu obonen̄e oniin̄ isun̄ inyi ogwu Mesaya.’

Inu ge osibi esese irọ Meri ngwan̄ kè Elisabet. Eji mekween̄ inu ofolek eyi me ibot usem ogọgọọk.