Geberen Isi Imun̄ Meri

Ikaan̄ ogwu uwu ebi Elisabet ge ekigwen Meri. Gwun̄ enenwaan̄ yi ikiluk me ama ekigwen Najeret eyi okup me Galili. Josefu ogwu usọ itetet Meri itele ibodo me lek nwa. Me òso onyan̄ gweregwen eyi Elisabet onin̄be owot, ogwu osat Geberen okakana isibi inu lek kè Meri mè itumu ibe: ‘Ntọp owu amọn Meri. Jioba ichubọk ijeen̄ owu nnwọn-isi kan̄.’ Meri ikagobo inu Geberen otumube itet. Geberen onenitumu inyi ọmọ ibe: ‘Owu mônin̄ owot, mè iman gwun̄ enerieen̄. Erieen̄ gwun̄ ya more Jisọs. Ọmọ mokpulu kubọk ogwu ubọọn̄. Mkpulu kan̄ mokup ire mgbọ geelek.’

Meri onenido ogwu osat ya ibe, ‘Ìre inu yi ìbojeje irọ ni? Mije, emi ǹkariọọn̄ enerieen̄.’ Geberen ofọfọọk ibe: ‘Kpunu inu geege òyọyọt igak Jioba irọrọ. Ekwukwu mbuban mônu me lek kwun̄, owu moneniman gwun̄ enerieen̄. Elisabet, ogwu uwu kinyi si, înin̄ owot.’ Meri onenitumu ibe: ‘Emi ìre gwun̄ usun̄ Jioba. Ike owu otumube, ikup si ikeya me lek n̄a.’

Meri onenisi ikpọ Elisabet me ama ge okup me inyọn̄ ogoon̄. Mgbọ yaage Elisabet onọbe amọn kè Meri, gwun̄ òkup me owot kan̄ okpọkpọ itọp lek ikana. Ekwukwu Mbuban oninin̄ ijot emen kè Elisabet. Itutumu ibe: ‘Meri, Jioba igbana owu. Ire mkpọ umin ikakaan̄ nga ogwukaan̄ n̄a me uwu n̄a.’ Meri onenitumu ibe: ‘Nsa otutuuk ejit n̄a itọn̄ Jioba.’ Meri ogọgọọk Elisabet ikup iso onyan̄ ita, sabum inigwu ikom ifo uwu kan̄ me Najeret.

Mgbọ Josefu oriọọn̄be ibe ke Meri inin̄ owot, ikayaka iweek idodo ọmọ. Ire, Josefu omumun̄ ogwu osat ge me ilaak. Ogwu osat ya itumu inyi ọmọ ibe: ‘Katet ukpook imọmọnọ Meri kubọk nwa. Ikarọ inu geege ilọ.’ Eya orọ, Josefu omọmọnọ Meri ogwu nwa isa ifo uwu kan̄.