Mgban Ama Jeruselem

Ikaan̄ ogwu enerieen̄ ge oluluk me okike mgbọ Ejira okupbe me ugwem ekigwen Neyemaya. Neyemaya iluk me ido Pesia me uga ama Susa, ọmọ ire ogwu Ijeren mè ire si ogwu usun̄ ogwu ubọọn̄ Atejakisis. Ngwan̄ kè Neyemaya isa ijo etip inan̄a me Juda inu, itumu ibe: ‘Ebi inan̄a me Babilọn ika inu me Jeruselem ekup me ujaralek. Kpeyayaka inama mgban ama ya mè otunchit ebi Babilọn efiatbe.’ Neyemaya ifieek ejit, iweek si isisi Jeruselem isi itap ubọk irọ ikwaan̄ ya, eya orọ, ibebeek uriaak inyi Jioba ibe itap ubọk irọ mè ogwu ubọọn̄ ichieek ibe ọmọ isi Jeruselem.

Usen ge, ogwu ubọọn̄ omumun̄ ibe ke Neyemaya ikitataka isi. Itutumu inyi ọmọ ibe: ‘Nkawuwuuk lek imun̄ owu ikeyi. Keke orọ ni?’ Neyemaya ofọfọọk ibe: ‘Keke orọ mkpabataka isi me mgbọ ejijakabe ama n̄a Jeruselem igwook?’ Ogwu ubọọn̄ onenido ọmọ ibe: ‘Keke ke oweek ibe emi nrọ nnyi owu?’ Mgbọ yaage, Neyemaya obebeek uriaak me ejit kan̄. Inenifọọk ibe: ‘Soso tele ibe nsi Jeruselem nsi mkpọk nnama mgban ama ya.’ Ogwu ubọọn̄ Atejakisis ochechieek ibe Neyemaya isi ama kan̄. Ineen̄ ebi mbem inyi Neyemaya me oniin̄ ije kan̄. Irọ Neyemaya ogwu ibot mkpulu me Juda mè inyi ọmọ uwot si ibosa inama otunchit ama ya.

Mgbọ Neyemaya orebe Jeruselem, ijeje ikana ikikpọ mgban ama ya. Inenititiin̄ ebi ngwugwa mè ebi mkpulu mè itumu inyi ema ibe: ‘Ere yi isak enenen. Igbe ibe eji ebene ikwaan̄.’ Otutuuk ene echechieek me lek inu itumube. Ema enenibene ikinama mgban ama ya.

Ire, usini ebi ochicha ebi Ijeren ekekirọ ema mkpọ ochak, mè ikitumu ibe: ‘Ikerere ekpuuruk ìbogbugbugbọ mgban ewuuk kinyi yi igwook.’ Ebi ikirọ ikwaan̄ ya etetet lek inye ikirọ ikwaan̄ kiban̄ mè ekakpọge chieen̄ me lek itiik ebi ochicha kiban̄ cha. Mgban ya okekibene mè ikinye.

Ebi ochicha kiban̄ inan̄a me esese esese agan̄ me Jeruselem enenitọt ititim ema etim me lek. Mgbọ ebi Ju enọbe mkpọ ofolek otitọt kiban̄, ukpook otetet ema. Ire, Neyemaya otutumu inyi ema ibe: ‘Ikatet ukpook. Jioba omaan̄ melek kiji.’ Neyemaya onenito ebi ibekibem ebi ikisi ikwaan̄. Eyi orọrọ ibe ebi ochicha kiban̄ ekayaka ikọt initim ema etim me lek.

Me akọp usen go mè iba gaalek, enanama mgban mè otunchit ama ya isan̄a. Neyemaya onenititiin̄ otutuuk ebi Libai me Jeruselem ibe enefaka mgban ama ya etap me ubọk Awaji. Ineen̄ ema me urum iba ibe ekekọt okwa. Ema enenene otitop ekisa inene itoon̄ me inyọn̄ mgban ya okup me agan̄ Otunchit Ogbuuruk mè ije ikana esese esese agan̄ me ama ya. Ema ekekifit uneen̄, otita, mè mkpamkpa ikisa itọn̄ Jioba. Ejira okekigọọk urum ge ije me mgbọ Neyemaya okigọọk urum eyi keyilọ, mege ema ejebe isi ire uwu mbuban. Otutuuk ene​—ebirieen̄, ebibaan̄, mè nsabọn​—egwagwa ngwugwa inyi Jioba mè irie ijọk. Okput unwọọn̄ kiban̄ me Jeruselem otataan̄ ijọn̄ọ ere enenen.