Ema Kpetọbọ Ebum Inyi Mkpọ Ebotbe

Ike mgbọ orakabe, eyi ogwu ubọọn̄ Nebukadineja omun̄be ilaak ofolek inu ebotbe ya isan̄a, inenisa alata araran̄ ibot ikpele mkpọmfaka ge. Irọ eyi me lek ijọn̄ Dura mè igwen ebi ikukup ufiak ichit me Babilọn. Igwen si Sedarak, Mesak, mè Abedinego ibe enetitiin̄ me isi inu ebotbe ya. Ogwu ubọọn̄ onyinyi ida ibe: ‘Mgbọ geelek enyi isinọ ida otita, mè odu, mè uneen̄ isi ita, mè uneen̄ ile, mè uneen̄ ija, mè oduk, mè esese ida nkwukwak ekigbaan̄ itaan̄, enyi otutuuk ene megele igwook me ijọn̄, mè itọbọ ebum inyi mkpọmfaka yi! Ene geelek ogwu ikagele igwook me ijọn̄, mè itọbọ ebum inyi mkpọmfaka yi, ebetọtọp ene ya mgbọ yaage itap me emen orioon̄ ukan̄, eyi unye ukan̄ okisak me emen.’ Ire ebi Iburu ita chi megele igwook me ijọn̄ itọbọ ebum inyi mkpọmfaka, mè iyaka ire, ire ema metọbọ ebum inyi Jioba gaalek ni?

Ogwu ubọọn̄ onyinyi ida ibe efit okwa. Otutuuk ene egegele igwook me ijọn̄, mè itọbọ ebum inyi mkpọmfaka ya ilọ me lek Sedarak, Mesak, mè Abedinego. Usini ene emumun̄ eyi mè isi ikpa inyi ogwu ubọọn̄ ibe: ‘Ikaan̄ usini ebi Ju ebi kpechieek itọtọbọ ebum inyi mkpọmfaka ya owu orombe.’ Nebukadineja oraria ibe egwen ema mè itumu inyi ema ibe: ‘Makpọk inyi enyi ofifi irek itọtọbọ ebum inyi mkpọmfaka ya. Ire enyi kperọ, matọp enyi itap me emen orioon̄ ukan̄ yi. Kpunu awaji obokọt inyan̄a enyi isibi me ubọk n̄a.’ Ema efọfọọk ọmọ ibe: ‘Eji kpeweek ofifi irek. Awaji kiji mokọt inyan̄a eji. Ire, ikerere ibe ke ikanyan̄a eji, eji ekiweek ibe owu ogwu ubọọn̄ oriọọn̄ ibe ke eji kpebetọbọ ebum inyi mkpọmfaka ya.’

Nebukadineja onanaan̄ ejit enenen. Inenitumu inyi ebi ikwaan̄ kan̄ ibe: ‘Irọ inyi ukan̄ emen orioon̄ ya iyok mgbọ jaaba igak ike iwuukbe lek ikup!’ Ineninyi ebi akọn̄ kan̄ ida ibe: ‘Ibọp ebirieen̄ chi, mè itọp ema itap me emen!’ Ukan̄ ya iyok enenen ire lek ikpan̄be ebi akọn̄ cha mgbọ yaage ema ejebe igbet. Ebi ene ita cha erọrọn̄ inin̄ emen ukan̄ ya. Ire mgbọ Nebukadineja okpọbe, imumun̄ ibe ke ene ini ekije ikana me emen ukan̄ ya kpan̄asi ene ita. Ukpook onenikitet ọmọ, inenido ebi ikwaan̄ kan̄ ibe: ‘Ire ikare ene ita ke eji etọp itap emen ukan̄ yi ni? Nkimun̄ ene ini, ge me lek kiban̄ si ikup kubọk ogwu osat!’

Nebukadineja ojeje igbet orioon̄ ukan̄ ya, mè itaan̄ ukpo ibe: ‘Inan̄a isibi enyi ebi ikwaan̄ Awaji Ogwu Òbebene Ichit!’ Ikeke otutuuk ene chieen̄ imumun̄ Sedarak, Mesak, mè Abedinego, ekije isibi inan̄a me emen ukan̄ ya me ekasakge unan geege. Akpa kiban̄, ijeek kiban̄, mè ofọnti kiban̄ ikataka ukan̄, olu oduku geege ikadun̄u me lek kiban̄.

Nebukadineja otutumu ibe: ‘Awaji kè Sedarak mè Mesak mè Abedinego ikaan̄ unye enenen. Iria ogwu osat kan̄ ibe ininyan̄a ebi ikwaan̄ kan̄ isibi. Kpunu ofifi awaji geege okup kubọk Awaji kiban̄.’

Kubọk ebi Iburu ita chi, ire otumu ifieek ikekigbe utoon̄-ejit inyi Jioba me ekakpọge chieen̄ me lek inu geelek obọbọkọ irek ni?