Jioba Inyan̄a Jiosefat

Jiosefat ogwu ubọọn̄ Juda ifiat ntook Baali mè otutuuk mkpọmfaka okup me ido Ijeren. Iweek ibe ebi ene eriọọn̄ ikan kè Jioba. Eya orọ, iraria ebi ugane ama mè ebi Libai isi otutuuk ere me Juda ibe esi ejeen̄ ebi ene ikan kè Jioba.

Ebi ido ikup me agba lek Juda mitet ukpook ititim etim melek ebi Juda mije, ema miriọọn̄ ibe ke Jioba okitim etim inyi ebi eyi kan̄. Ema misa inyinyi ijet ogwu ubọọn̄ Jiosefat. Ire, ebi Mowabu, ebi Amọn, mè ebi inan̄a me agan̄ Seya misa akọn̄ inu me lek ebi Juda. Jiosefat iriọọn̄ ibe ke ọmọ iweek ntap-ubọk Jioba. Inenitumu inyi otutuuk ebirieen̄, ebibaan̄, mè nsabọn ibe etitiin̄ me Jeruselem. Me isi otutuuk kiban̄, Jiosefat obebeek uriaak ibe: ‘Jioba, ire okakup melek kiji eji kpebekọt itim igak ife chi. Soso kpa nyi eji inu eji eberọ.’

Jioba ofọfọọk ibe: ‘Ikatet ukpook, ke matap ubọk inyi enyi. Imọnọ irek kinyi, mè ikeke inye, mè ikpọ ubọk mbasa inyan̄a enyi isibi.’ Ike owa ke Jioba osa inyan̄a ema?

Me ofit iwele kan̄, Jiosefat ogogobo ebi ikikọt okwa mè itumu inyi ema ibe ekeje me isi ebi akọn̄ kan̄. Ema ejeje inan̄a me Jeruselem isi ire ere ebetim akọn̄ ekigwen Tekowa.

Ike ebi ikikọt okwa ekisa me ida onyenye mè ejit unwọọn̄ ikitọn̄ Jioba, Jioba otitim akọn̄ ya inyi ebi eyi kan̄. Jioba irọ ibe wọlọwọlọ inin̄ me eden̄ ebi Amọn mè ebi Mowabu, ema ebebene ikikpan̄ ge ge, irek lek otutuuk kiban̄ ekwaan̄be isan̄a. Ire, Jioba inyan̄a ebi Juda, ebi akọn̄, mè ebi ngwugwa si. Mgbọ otutuuk ebi ido echi okukup iriaak Juda enọbe mkpọ Jioba orọbe inyi ebi Juda, ema erọriọọn̄ ibe ke Jioba okitim akọn̄ inyi ebi eyi kan̄. Ike owa ke Jioba okisa inyan̄a ebi eyi kan̄? Jioba ikaan̄ owuwa oniin̄ ikisa inyan̄a ebi eyi kan̄. Ikakiweek ntap-ubọk ebilene inyi ikọt inyan̄a ebi eyi kan̄.