Awaji Isut Ogwu Ubọọn̄ Enenwaan̄ Ge Osusut

Ogwu ubọọn̄ Eyabu mokọt ikup me otu nruruk kan̄ me uwu ubọọn̄ kan̄ okup me Jesereli ikimun̄ uko ogwu enerieen̄ ge ekigwen Nebọt. Eyabu ima uko yi mè iweek ilelep me ubọk Nebọt. Ire, Nebọt ikachieek inyanyam ijọn̄ ya inyi Eyabu, bak lek irọrọ ikeya ije ikeme ikan Jioba ofolek ijọn̄ ekaan̄be me irot. Nebọt irọ mkpọ otatat. Ire, ire Eyabu ibele ejit ni? In̄-in̄. Kpan̄asi ikeya, inanaan̄ ejit iso lek. Inaan̄ ejit ire lek ikachieekge inanan̄a isibi me agwut kan̄, ikachechieek si irerie inorie.

Jeseben ogwu orere nwa kè Eyabu mè ire si ogwu mkpikpak otutumu inyi Eyabu ibe: ‘Owu ore ogwu ubọọn̄ okikpulu Ijeren. Owu mokọt ikaan̄ inu geelek oweekbe. Emi mabọkọ uko ya isa inyi owu.’ Jeseben oneniria etip ijet ebi ugane ama kè Nebọt, mè ibe me ema ekan̄ ataak etoon̄ Nebọt ibe ke itumu Awaji ifiat mè etọbọ ọmọ ekpan̄. Mgbọ ebi ugane cha erọbe inu Jeseben otumube inyi ema ibe erọ, Jeseben onenitumu inyi Eyabu ibe: ‘Nebọt ikwu, mgbọ keyi, uko kan̄ ya ikana eyi kwun̄.’

Isan̄a me lek Nebọt, Jeseben ikpan̄ si ebi ofifi ife ebi kperọ inu geege ilọ. Ikpan̄ owuwa ebi imama Jioba. Jeseben ikitọbọ ebum inyi mkpọ ekọkọ mè irọ owuwa ijo inu. Jioba imun̄ otutuuk ijo inu Jeseben orọbe. Keke ke Jioba oborọ Jeseben ni?

Mgbọ Eyabu okwube iraka, ogwu gwun̄ Joram okakana ubọọn̄. Jioba oraria ogwu enerieen̄ ge ekigwen Jewu ibe isi ikpan̄ Jeseben mè ebi ototun̄ ukan̄ kan̄.

Jewu onenikọp uji akọn̄ kan̄ isi Jesereli, ere Jeseben okiluk. Joram okọkọp uji akọn̄ kan̄ si isi itut Jewu mè ido ọmọ ibe: ‘Ire okinu me esuuk?’ Jewu ofọfọọk ibe: ‘Esuuk ibojeje ikup me mgbọ nga kwun̄ Jeseben okpọkpọk ikup inye ikirọ inu ikpak?’ Joram ogwugwu isi uji akọn̄ kan̄ ikom mè ibolibi inan̄a. Ire, Jewu ososook oraan̄ kan̄ itat me lek Joram, Joram okwukwu.

Jewu osisi uwu ubọọn̄ kè Jeseben. Mgbọ Jeseben onọbe ibe ke Jewu okinu, ibebene ikibala lek kan̄, inen̄e ijeek kan̄ isun̄ ijaan̄, mè ikup me agba lek otu nruruk kan̄ ikikup ikpọ Jewu. Mgbọ Jewu orebe, Jeseben obebene ikitumu usem inyi Jewu ubọk geelek. Jewu otataan̄ ukpo igwen ebi usun̄ Jeseben igọgọọk ọmọ ikeke me ere ya ibe: “Ìtọp ogwu enenwaan̄ ya ìto me ijọn̄!” Ema ebebieen̄ Jeseben, inanan̄a me otu nruruk ya irọn̄ me ijọn̄ mè ikwu.

Mgbọ eya orakabe, Jewu okpakpan̄ akọp bọn ebirieen̄ jaaba kè Eyabu mè isan̄a Baali mè ebi ikitọbọ ebum inyi Baali isan̄a. Ire omun̄ ibe ke Jioba iriọọn̄ otutuuk inu okibọkọ irek, mè ikisulu ebi ikirọ ijo inu osusut me mgbọ otatat ni?