Кандык ай

Кижи јажын-чакка јӱрерге турган болзо, ого Иисустыҥ толынты тайылгазына бӱдер керек (Эф. 1:7). Иисустыҥ «ӧскӧ койлор» деп айткан улузы Кайраканныҥ Эҥиринде калашты јибес ле кызыл аракыны ичпес учурлу (Иоанн 10:16). Је олор «јӱрӱм берер калашты» јип јат. Олор оны Христостыҥ толынты тайылгазына бӱткениле эдет (Иоанн 6:53). Је Кайраканныҥ Эҥиринде турушкан улус јаҥы јӧптӧжӱниҥ туружаачылары ла теҥеридеги Башкаруныҥ каандары болор деп кӧргӱзет. Бистиҥ ончобыска — майлаткандарга да, ӧскӧ койлорго до — толынты тайылгага бӱдер керек. Нениҥ учун дезе јӱк ле анайып этсеес, бис ӱргӱлји јӱрӱм аларыс. w24.12 13, абз. 14, 16

Кайраканныҥ Эҥиринде Иисус апостолдорына ачытпаган калаш берип, бу оныҥ эди-канын темдектеп турган деп айткан. Оноҥ ол кызыл аракыны берип, бу «јӧптӧжӱниҥ каанын» темдектеп турган деп јартаган (Марк 14:22—25; Лука 22:20; 1 Кор. 11:24). Иисус јӧптӧжӱ керегинде айткан. Бу јаҥы јӧптӧжӱни Иегова кӧгӱс Израильле, «Кудайдыҥ Башкарузында» Иисусла кожо башкаратан улусла тургускан (Евр. 8:6, 10; 9:15). Кайраканныҥ Эҥиринде Иисустыҥ сӧстӧри јӱк ле «ас ӱӱрге» айдылган. Бу бӧлӱкке озо баштап ол эҥирде Иисусла болгон чындык апостолдоры кирген. Шак ла бу улуска теҥериде Иисустыҥ јанында болотон јер белетелген. w24.12 11, абз. 9, 10

Иисусты јуук најызы садып ийген. Оноҥ оны арестке алып, актуга ла јамандап бурулагандар. Кийнинде ӧлӱмге јаргылап, кыйнагандар. Јуучылдар оны ӧлтӱретен јерге апарала, колы-будын столмого кадап салган. Бу ончо кыйын-шыраны Иисус чыдажып ӧткӧн. Је Иеговага дезе оноҥ ачу болгон. Ол ончо немени токтодып ийер аргалу да болгон болзо, токтотпогон. Нениҥ учун? Бир сӧслӧ айтса, сӱӱжинеҥ улам. Иисустыҥ тайылгазы Иегова сени тыҥ сӱӱп турган деп јарт кӧргӱзет. Ол сени кинчектеҥ ле ӧлӱмнеҥ јайымдаарга, бойыныҥ сӱӱген Уулын сен учун берген. Бу ого коркышту јаан ачу јетирер деп билген де болзо, ол сени аргадап аларга кӱӱнзеген (1 Иоанн 4:9, 10). Мынаҥ Иегова бистерге кажыбыска ла кинчекле тартыжып, јеҥӱ аларга болужар деп кӧрӱнет. w24.08 6, абз. 13, 14

Иеговага Уулыныҥ шыралаганын кӧрӧргӧ коркышту кӱч болгон. Бу керегинде шӱӱп сананзаас, Кудай бисти кандый тыҥ сӱӱп турганын оноҥ јакшы оҥдоорыс. Сатана кӱчтердиҥ ӧйинде бир де кижи Кудайга чындык артпас деп айдат. Иегова Сатананыҥ сӧстӧрин тӧгӱн деп кӧргӱзерге, Уулы божоор алдында шыралап јадарда, бир де киришпеген (Иов 2:1—5). Иегова кудай јаҥныҥ ӧштӱлериниҥ Иисуска каткырып турганын, јуучылдардыҥ тыҥ камчылаганын, оны тӧҥӧшкӧ кадап салала, шыралап божозын деп артыргызып салганын кӧргӧн (Матф. 27:28—31, 39). Иегова бу ончо немени токтодып ийер аргалу болгон (Матф. 27:42, 43). Је ол тушта толынты да эдилбес эди, бисте де ижемји јок болор эди. Оныҥ учун Иегова Уулыныҥ шыразын учына јетире токтотпогон. w25.01 22, абз. 7

Бистиҥ эраныҥ 33-чи јылы, 16-чы нисан. Иисустыҥ ӱренчиктери коркып, санааркап, эмди болуш јок артып калдыс деп сананган. Олордыҥ экӱзи Иерусалимнеҥ Эммаус деп јурт тӧӧн сӱри тӱжӱп калган баргылап јатты. Је јолой ӱренчиктерге таныш эмес кижи јолыккан. Олор ого Иисусла не болгонын ла олор неге санааркап турганын куучындаган. Таныш эмес кижи олорды јазап угуп, олордыҥ јӱрӱмин чек солыгадый неме куучындады. Ол «Моисейдеҥ ле ончо судурчылардаҥ баштайла», нениҥ учун Мессия кыйналып божоор учурлу болгонын јартаган. Олор Эммауска једип келерде, бу таныш эмес эр кижи — тирилген Иисус деп оҥдоп ийген! (Лука 24:13—35). Иисус теҥериге барардаҥ озо 40 кӱнниҥ туркунына ӱренчиктериле кӧп катап кӧрӱшкен. Бу ӧйгӧ коркып калган, кӱӱни ӧчӱп калган эр ле ӱй улус Кудайдыҥ Башкарузыныҥ јалтанбас сӱӱнчилӱ јарчылары ла ӱредӱчилери болуп калгандар. w24.10 12, абз. 1—3

Баланыҥ эди-каны бойы ла ӧзӱп јат. Је кижи кӧгӱс јанын бойы ӧскӱрер учурлу. Темдектезе, Коринфтеги христиандар сӱӱнчилӱ јарды алынган, сууга чӧҥӱрилген, агару тын алган. Анайда ок олорды Павел ӱреткен (Ап. ижи 18:8—11). Је канча да јылдаҥ олордыҥ кӧп сабазыныҥ кӧгӱс ӧзӱми јаҥыс јерге туруп калган (1 Кор. 3:2). Тереҥ кӧгӱстӱ болорын кӱӱнзеер керек. Нениҥ учун дезе бӱдӱҥкей ле ченемел јок болорын јарадып турган улус кӧгӱс јанынаҥ ӧспӧй, јаш бала болуп артып калар (Укаа 1:22). Бис дезе јаан кижи болуп та калган болзоос, ада-энегистиҥ айдып берерин сакып турган јаш бала болуп отурарга кӱӱнзебей јадыс. Кӧгӱс јанынаҥ ӧзӧри бойыстыҥ молјугыс болор керек. Оныҥ учун кажы јанынаҥ тӱзединетенин кӧрӱп ийзеес, Иеговага биске кӱӱн де, ийде-кӱч те берзин деп мӱргӱп турактар (Флп. 2:13). w24.04 4, абз. 9, 10

Иегова јаргылар чыгарып турза, нени сезип турган деп биске куучындайт (Иез. 33:11). Бистиҥ Кудайыс јаан шылтак јогынаҥ кижиниҥ јӱрӱмин јажын-чакка ӱспей јат. Карын ол — килеҥкей Кудай. Иегова бу кылык-јаҥын керек тушта кӧргӱзип јат. Кем тирилбезин бис билерис пе? Агару Бичикте кезик ле улус тирилбес деп айдылып калган. Иисус Христос Иуда Искариот тирилбес деп јарт айткан (Марк 14:21; Иоанн 17:12 база кӧрӱгер). Нениҥ учун дезе ол Иегова ла Иисуска биле тура удура барган. (Марк 3:29 ла «Агару Бичиктиҥ ӱренетен чыгармазында» бу ӱлгердиҥ јартамалын кӧрӱгер). Анайда ок Иисус ого удурлашкан кудай-јаҥныҥ кезик башчылары качан да тирилбес деп айткан (Матф. 23:33). Апостол Павел јана баскандар бурузын алынбаза, база тирилбес деп бичиген (Евр. 6:4—8; 10:29). w24.05 4, абз. 10, 11

Бис Иегованыҥ байканынаҥ чыкпазаас, Сатана биске каршу јетирип болбос (1 Иоанн 3:8). Карын, бисти келер ӧйдӧ Иегова кӧгӱс каршунаҥ корулаар, керек дезе ӧлӱмнеҥ де корулаар (Ачыл. 21:4). Иегованыҥ байканына кирген кижи оныҥ јуук најызы болот. Мындый колбулар јажын-чакка улалар аргалу (Иез. 37:27). Бу биске сӱреен јаан кӱндӱ болот. Мындый кӱндӱ учун быйанысты канайып кӧргӱзерис? Темдектезе, слерди кем-кем айылына кычырза, слер ондо бойоордыҥ ээжилереерди тургуспай јадаар не. Анайда ла ок Иегова бойыныҥ айылчыларына некелтелер тургузат. Бис Иегованы сӱӱп турганыстаҥ улам, «оныҥ кӱӱнин бӱдӱрерге» турганыстаҥ улам бу некелтелерди бӱдӱрип јадыс (Кол. 1:10). Биске оноҥ айап јӱрер керек. Айап јӱрзеес, Иегованы керектерисле ачындырбазыс ла јаман немедеҥ тууралап турарыс. Нениҥ учун дезе бистиҥ амаду — Кудайысла кожо «јобош болуп јӱрери» (Мих. 6:8). w24.06 4, абз. 8, 9

Бир катап Иегова Авраам деп кижини бойыныҥ уулын, Исаакты, тайылгага экелзин деп сураган. Бу јакылтаны бӱдӱрерге Авраамга не аайлу кӱч болгон. Андый да болзо, ол оны бӱдӱрерге белен болды. Је Иегова Авраамды, Исаакты тайылгага берерге ле јадарда, токтодып ийген. Бу учурал Кудай келер ӧйдӧ база андый неме эдер деп — бойыныҥ сӱӱген Уулын тайылгага берер деп — кӧргӱскен. Иегова улусты кандый тыҥ сӱӱп турган! (Баш. 22:1—18). Канча чактардыҥ кийнинеҥ Иегова Израиль албатыга јасак берген. Бу јасакла болзо, албатыга кинчектери ташталзын деп, тайылгалар эдер керек болгон (Лев. 4:27—29; 17:11). Бу дезе келер ӧйдӧ улусты кинчектеҥ бӱдӱнге јайымдайтан тайылга эдилер деп кӧргӱскен. Судурчылар Кудайдыҥ тынына башкартып, судурлалган калдык — Кудайдыҥ аҥылу Уулы — улусты, ол тоодо сени де, кинчектеҥ ле ӧлӱмнеҥ јайымдап аларга, шыралап ӧлӧр учурлу деп јартаган (Иса. 53:1—12). w24.08 4, абз. 7, 8

Агару Бичикти кычырып јадала, билип алганаарды канайып тузаланарын сананыгар. Кандый бир ӱзӱкти кычырып ийеле, бойоордоҥ сурагар: «Бу јетирӱ меге эмди эмезе келер ӧйдӧ канайып болужар?» Темдектезе, слер 1 Фессалоникадагыларга 5:17, 18 кычырып јадаар, оноҥ токтой тӱжеле, бойоордоҥ мынайда сурайдаар: «Мен кӱнине канча катап мӱргӱйдим? Акту јӱрегимнеҥ мӱргӱйдим бе?» Оноҥ Иеговага не учун быйанду болгоноорды шӱӱп сананала, темдектезе, Иегованыҥ кандый бир ӱч сыйы учун быйаныгарды айдадыгар. Эмди сананып ийзеер де: слер јаҥы ла, тоолу ла минутка Агару Бичикти кычырып, Иегованыҥ айткан сӧстӧрин јӱк ле уккан эмезигер, је укканаарды тузаланып та ийдигер. Не аайлу кайкамчылу дезеер?! А кажы ла кӱн мынайып этсеер, слерге Кудайдыҥ Сӧзи аайынча јӱрерге там ла там јеҥил болор. w24.09 4—5, абз. 9, 10

Иегова бисти улустаҥ болуш алганыстаҥ сӱӱнчи алар эмес, је улуска болушканыстаҥ сӱӱнчи алар эдип јайаган. Бис ака-эјелериске акту кӱӱнистеҥ болужадыс. Олордоҥ быйанду сӧстӧр угарга биске сӱреен јарап јат. Је олор быйанын айтпаза да, бис сӱӱнчилӱ артар аргалу. Нениҥ учун дезе «Иегова... [слерге] оноҥ кӧпти берер аргалу» деген сӧстӧрди ундыбай јадыс (2 Лет. 25:9). Оныҥ кысканбазына кем де тӱҥейлежип болбос! Быйанды Иегованаҥ артык кем јетиретен эмеш? Оныҥ учун теҥеридеги кысканбас Адабыстаҥ оноҥ ло ары тем алактар! w24.09 31, абз. 20, 21

Иегова килеҥкей ле јалакай (Сар. 103:13; Иса. 49:15). Качан биске ачу болзо, ого до ачу болот (Зах. 2:8). Ол биске оныҥ најылары болорго болужат (Сар. 25:14; Ап. ижи 17:27). Анайда ок ол јобош Кудай. «Ол јер ле ле теҥерини кӧрӧргӧ, эҥчейип јат. Јокту-јойуны... тобрактаҥ... кӧдӱрет» (Сар. 113:6, 7). Мындый Кудайды не мактабас! Бис Иегованы улус ол керегинде чынды билип алзын деп кӱӱнзеп турганыстаҥ улам мактайдыс. Кӧп улус Кудай керегинде чынды билбес. Нениҥ учун дезе Сатана ол керегинде коркышту јаман тӧгӱн таркадып, улустыҥ сагыжын сокортып салган (2 Кор. 4:4). Сатана улусты Кудай кижини кажы ла эткен кереги учун кату каруузына тургузат ол эмезе улус Кудайга керек те јок деп тӧгӱндейт. Анайда ок улустыҥ кӧп саба кыйын-шыразында Кудай бурулу деп айдат. Је бис теҥеридеги Адабыс керегинде чынды билерис! Мыны улуска куучындаарга кӱӱнзейдис. Анайып, Адабысты мактап јадыс (Иса. 43:10). w25.01 3, абз. 6, 7

Иисус Кудайдыҥ Уулы болгон ло кинчек јок то болгон болзо, анайда ок кӧп кайкалдар эткен де болзо, Сатана тӱҥей ле ол керегинде улус ажыра тӧгӱн неме јайган. Темдектезе, тӧгӱн кудай јаҥныҥ башчыларыныҥ айтканыла болзо, Иисус «шилемир бийиниҥ кӱчиле» кӧрмӧстӧрди чыгара сӱрӱп турган (Марк 3:22). Оноҥ Иисус јаргыда болордо, кудай јаҥныҥ башчылары Иисус Кудайдыҥ адын быјарсыдып турган деп бурулап, албатыны оныҥ ӧлӱмин суразын деп тукурып ийген (Матф. 27:20). А кийнинде, Христостыҥ ӱренчиктери сӱӱнчилӱ јарды јарлап турарда, Кудайдыҥ ӧштӱлери еврей эмес улусты «тӱймедип, карындаштарга удурлаштырып ийдилер» (Ап. ижи 14:2, 19). 1998 јылдыҥ јаҥар айыныҥ баштапкы кӱниниҥ «Каруулчы шибеезинде» Апостолдордыҥ ижи 14:2 керегинде мындый сӧстӧр бичилген: «Иудейлер христиан јаҥды јектеп, улусты Христостыҥ ӱренчиктерине бӱтпезин деп, коркышту јаман немелер куучындагылаар болгон». Сатана бӱгӱнги де кӱнде тӧгӱн неме јайат. Ол эмдигенче ле «бастыра телекейди мекеле[йт]». w24.04 11, абз. 15; 13, абз. 16

Кижи јажын-чакка јӱрер бе, јок по оныҥ качан божогонынаҥ камаанду эмес. Иегова толо кеминде справедливый Јаргычы. Ол качан да јастыра јаргы этпей јат (Сар. 33:4, 5). Оныҥ учун «јер ӱстиниҥ Јаргычызыныҥ» јаргылары бир де јек јок болор деп алаҥзыбай јадыс. Анайда ок кижи ӱргӱлјиге јӱрер бе, јок по оныҥ кайда јадып турганынаҥ камаанду эмес. Бӱгӱнги кӱнде канча миллион улус Кудайдыҥ Башкарузы керегинде сӱӱнчилӱ јар угатан арга јок ороондордо јадат. Бистиҥ јалакай Кудайыс ол улусты капшай ла «эчкилердиҥ» тоозына канай кожуп салатан?! (Матф. 25:46). Бастыра јер ӱстиниҥ чындык Јаргычызы олор керегинде бистеҥ тыҥ санааркап јат. Улу тӱбектиҥ ӧйинде Иегова айалгаларды канайып башкарарын бис билбезис. Је Иегованыҥ ады агарулалган тушта ол улустыҥ кезиги ого бӱдӱп, оныҥ јанына туруп алар болор (Иез. 38:16). w24.05 11—12, абз. 14, 15

Иегованыҥ ишчилерине бой-бойына болужарга јарап јат (2 Кор. 8:4). Је кезикте, темдектезе, јуу-согуштыҥ ӧйинде, олорго бой-бойына сӱӱжин кӧргӱзерге коркымчылу болот. Андый ӧйдӧ ака-эјелерис Агару Бичик, ого тӧзӧлӧнгӧн бичиктер, кийим-тудум ла курсак-тамак јок артып калардаҥ айабас. Оныҥ учун бистиҥ сӱӱштӱ аксагалдарыс олорго керектӱ немени јетирерге, бойыныҥ јӱрӱмин де јылыйтарга белен. Мындый кӱч ӧйдӧ биске бирлик болор керек. Оныҥ учун јербойыныҥ Бет-Элинеҥ келген башкартулар аайынча эдигер (Евр. 13:17). А аксагалдар дезе јуун кӱч айалгага белен болзын деп, башкартуларды јаантайын шӱӱжип турар учурлу (1 Кор. 14:33, 40). Јалтанбас, је ајарыҥкай болугар (Укаа 22:3). Нени-нени эдердеҥ озо, јазап сананып ийигер. Меҥдебегер. Јӱрӱмеерди јеткерлӱ айалгага тургуспагар. Иеговага иженигер. Ака-эјелерге канайып болушса јакшы болорын оҥдоп ийерге, ол слерге болужып берер. w24.07 4, абз. 8; 5, абз. 11

Давид каан Иегованы сӱреен јакшы билген. Ол ого бӱдӱп туратан. Ол Саулдаҥ ла ӧскӧ дӧ ӧштӱлердеҥ качып турала, болушты Иегованаҥ сакыган . Оноҥ Иегова ого болужып берерде, Давид сӱӱнгенине мынайып айткан: «Иегова — тирӱ Кудай!» (Сар. 18:46). Ол бу сӧстӧриле јӱк ле Кудай чын ла бар деп эмес, је бир справочникте айдылганыла, Иегова — «бойыныҥ албатызына јаантайын болужып турган тирӱ Кудай» — деп айдарга сананган. Не дезе Давид Иегованы тирӱ Кудай деп, јӱрӱминде канча катап кӧргӧн. Оныҥ учун ол Иеговага оноҥ ло ары иштеп, оны мактаарга бек шӱӱп алган (Сар. 18:28, 29, 49). Иегованы тирӱ Кудай деп бӱдӱп турганы́с биске де ого эрчимдӱ иштеерге болужар. Анайып ченелтелерди де ӧдӧргӧ јеҥил болор, Кудайыска да оноҥ ары иштеер кӱӱнис тыҥыыр. Анайда ок бисти Иегованаҥ не де туураладып болбос. w24.06 20—21, абз. 3, 4

Павелдиҥ Фессалоникадагы ака-эјелерге бичиген самаразынаҥ бис неге ӱренедис? Бис те кайкамчылу солун эмезе библиялык чындыкка келишпей турган неме угар болорыс. Бу айалгада бис нени эдерис? Биске ойгор болор керек. Советский Союзтыҥ ӧйинде акалар тӧс башкарунаҥ келген деп бичилген самара алгандар. Бу самара акаларды алдынаҥ бойы организация тӧзӧзин деп кӱӱнзеткен. Бу самараны бистиҥ акалар бичиген деп билдирген, је чынынча болзо, оны ӧштӱлер бичиген. Чындык акалар бого тӧгӱндетпеди. Олор самарада бичилгени организацияныҥ ӱредӱзине келишпей турган деп оҥдоп ийгендер. Бӱгӱнги кӱнде чындыктыҥ ӧштӱлери бисти де булгап саларга эмезе чагыштырып саларга, эмдиги ӧйдиҥ технологияларын тузаланардаҥ айабас. Олордыҥ тӧгӱнине тӱрген ле кирбеске, биске кӧргӧн-уккан немегис библиялык чындыкка келижип турган ба деп кӧрӱп турар керек (2 Фес. 2:2; 1 Иоанн 4:1). w24.07 12, абз. 14, 15

Талдайтан сурактардыҥ кезиги јаан учурлу болот, а кезиктери андый ла јаан эмес. Је эҥ јаан учурлу неме дезе — ол качан кижи бойыныҥ јӱрӱмин Иеговага учурлап, оныҥ билезине кожулганы. Иегова улуска нениҥ учун андый арга берген? Нениҥ учун дезе ол улусты оныла јуук колбуларлу болгонына сӱӱнип, јажын-чакка јӱрзин деп кӱӱнзейт (Јаҥ. т. 30:19, 20; Гал. 6:7, 8). Је Иегова ого иштезин деп, кемди де албадабай јат. Мындый шӱӱлтеге кажы ла кижи бойы келер учурлу. Је чӧҥӱрилип калган кижи Иегованыҥ јасагын бузуп, уур кинчек эткен болзо, канайдар? Андый кижи кинчегин алынбаза, оны јууннаҥ туураладып салар керек (1 Кор. 5:13). Је мындый да учуралда кижи кинчегин алынып, кайра келер деп, Иегова иженет. Оныҥ да учун кинчегин алынып турган улустыҥ јаманы ташталзын деп, Иегова толынты тайылга берген. Бистиҥ сӱӱштӱ Адабыс уур кинчек эткен улусты кинчегин алынзын деп кӱӱнзедип јат (Зах. 1:3; Рим. 2:4; Иак. 4:8). w24.08 14, абз. 1, 2

Апостол Иоанн бойыныҥ ӱчинчи самаразын бичип салган тушта, тӧгӱн ӱредӱлер таркадып турган ла јуунды бӧлӱп турган улус табылган. Је «чындыктыҥ јолында» јӱрӱп турган улус база болгон. Олор Иегованыҥ сӧзин угуп «Кудайдыҥ јакылталарыла» јӱрген (2 Иоанн 4, 6). Бу чындык христиандар јаҥыс Иоаннды эмес, Иегованы да сӱӱндирген (Укаа 27:11). Бис мынаҥ кандый ӱредӱ аладыс? Чындык болоры јаан сӱӱнчи экелет (1 Иоанн 5:3). Темдектезе, Иеговага јарап турган керектер эдип турзаас, бис ырысту болодыс. Бу телекейдиҥ ченелтелерине кирбей, оныҥ јасактарын бӱдӱрип јӱрзеес, Иегова сӱӱнип јат. Теҥериде ангелдер де база сӱӱнет (Лука 15:10). Анайда ок ака-эјелердиҥ Кудайга чындык артып турганы учун бис олорло оморкойдыс (2 Фес. 1:4). Качан Сатананыҥ телекейи јоголып калза, бис Иеговага чындык артканыс учун тыҥ сӱӱнерис. w24.11 12—13, абз. 17, 18

Сеге јарай берген кижини тууразынаҥ кӧрӱп тура, сезимдериҥ керегинде канча ӧйдӧҥ айдарга јараар? Тӱргедеп ийзеҥ — чыданыкпас кижи деп кӧрӱнер болорыҥ (Укаа 29:20). А ӧйди узак чӧйзӧҥ, ол кижи сени арылык-берилик деп сананар болор, анчада ла сениҥ сезимдериҥди билип ийген болзо (Эккл. 11:4). Је мындый немени ундыбас керек: сезимдериҥди айткалагыҥда, ол кижиле эмди ле алыжып јадыс деп сананба. Андый да болзо, сен биле тӧзӧӧргӧ белен ле ол кижи сеге јарап турган деп алаҥзу сенде бир де болбос учурлу. А кем-кем сени јарадып ийген болзо, канайдарыҥ? Сеге ол јарабай турган болзо, јарт айдып сал. Нениҥ учун дезе кижиниҥ сезимдериле ойноп, калас ижемји берери јакшыга экелбес (Эф. 4:25). w24.05 22—23, абз. 9, 10

Јӱк ле чыннаҥ Кудайдыҥ агару тыныла майлалган ла учына јетире чындык арткан христиандар Иисусла кожо башкарарга теҥеридеги Башкаруга алылар. Майлаткандардыҥ кажы бирӱзи кӧгӱс јанынаҥ ойгу болбозо, ангелдер талдалгандарды јууп келген тушта, теҥери дӧӧн алылбас (Матф. 24:31). Је Иисустыҥ сӧстӧрин јерде де ӱргӱлјиге јадатан ижемјилӱ улус ајаруга алар учурлу. Олорго до ойгу болор керек ле чындык артар керек. Бис Иегованы јакшы билерис ле оныҥ чыгарган јӧптӧри ончозы чын. Оныҥ учун бӱгӱнги кӱнде јаҥы майлаткандар кожылза, бис санааркабайдыс. Иисустыҥ виноградту садта бир саат иштеген улус керегинде нени айтканын эске алып ийектер (Матф. 20:1—16). Бир де саат иштеген улустыҥ, бӱдӱн де кӱн иштеген улустыҥ јалы бир тӱҥей болгон. Анайып ла майлаткан христиандарла: Иегова олорды качан да талдаган болзо, олордыҥ ӱзези теҥеридеги кайралын алар. w24.09 24, абз. 15—17

Иисус справедливость јок болзо, бойын канайып тудунарыныҥ сӱреен јакшы темин артыргыскан. Улус оны не ле деп јамандаган, бурулаган, јууктары да оны јӱӱлип калган деп сананган. А кудай јаҥныҥ башчылары оны кӧрмӧстӧрлӧ тудуш деп айдышкан. Римниҥ јуучылдары дезе ого каткырыжып, оны кыйнап, учы-учында ӧлтӱрип салгандар (Марк 3:21, 22; 14:55; 15:16—20, 35—37). Иисус бу ончо ченелтелерди турумкай ӧдӱп чыгала, ӧчин аларга бир де албаданбаган. Бу бисти неге ӱредет? (1 Пётр 2:21—23). Улус биске јаман баштанза, бис Иисустаҥ тем алар аргалу. Ол качан айдарын, качан айтпазын билген (Матф. 26:62—64). Улус ол керегинде тӧгӱн немелер айдып турза, кезикте унчукпайтан (Матф. 11:19). Је айдар тушта, истежип турган улусты јамандабаган да, коркытпаган да. w24.11 5, абз. 9, 10

Слер јуук најыгарга јараш, тузалу сый сыйлаганаар деп сананып ийзеер де. Је ол, сыйды шкафка сугала, ундып салган. Најыгардыҥ мынайып эткенинеҥ улам слерге јаман болор. Је најыгар слердиҥ сыйлаган сыйыгарды тузаланып турган болзо, слер сӱӱнип јадыгар. Бу тем нени кӧргӱзет? Иегова база биске сый сыйлаган — ол бис учун Уулын берген. Бис оныҥ сыйын ла сӱӱжин баалап турзаас, ол сӱӱнип јат! (Иоанн 3:16; Рим. 5:7, 8). Бир канча ӧйдӧҥ бис толынтыны баалу сый деп кӧрбӧй барардаҥ айабазыс. Бу Кудайдыҥ баалу сыйын шкафка јажырып салганына тӱҥей: озо баштап бис бу сыйга сӱӱнип јадыс, је оноҥ бу керегинде база сананбай барадыс. Бу сыйды оноҥ ло ары баалап јӱрерге нени эдер керек? Биске Кудай ла Иисус нени эткенин јаантайын ла эске алынып турар керек. w25.01 26, абз. 1, 2

Аксагал болорго турган аканыҥ эмезе карындаштыҥ сууга чӧҥӱрилгени удабаган болбос учурлу. Је бу дезе аканыҥ эмезе карындаштыҥ чӧҥӱрилгенинеҥ бери кӧп јылдар ӧдӱп калган болор керек деп кӧргӱспей јат. Андый да болзо, кӧгӱзи тереҥ христиан болуп каларга кӧп ӧй керек эмей. Оныҥ учун Иисустаҥ тем ал. Бу сеге јобош болорго, јуундагы кандый ла јакылталарды бӱдӱрерге ле Иегова сеге ӧскӧ дӧ јакылталар берерин чыдажып сакыырга болужар (Матф. 20:23; Флп. 2:5—8). Анайда ок аксагал кудайзак болор учурлу. Ӧскӧртӧ айтса, ол Иегованыҥ чындык нормаларыла јӱрӱп, оныҥ организациязы ажыра берилип турган башкартуларын бӱдӱрер учурлу. Агару Бичикте айдылганыла болзо, аксагал ӱредип билер учурлу. Бу дезе эмди сеге куучын-эрмектерди сӱреен јакшы айдып турган кижи болор керек деп кӧргӱзет пе? Јок. Кезик аксагалдарга улусты сценадаҥ ӱредерге јакшы келишпей јат. Андый да болзо, аксагалга јарлап јӱрген тушта эмезе кӱдӱчиниҥ ижин бӱдӱрген тушта Агару Бичикле јакшы тузаланып билер керек. w24.11 23—24, абз. 14, 15

Агару Бичикти кычырып јаткан тушта, јарт эмес ӱлгер туштаган болзо, оны шиҥдегер. Оноҥ билип алганаарды кӱнниҥ туркунына шӱӱп сананып јӱригер. Анайда ок Иегова, Иисус, олордыҥ слерге сӱӱжи керегинде нени билип алганаарды база шӱӱп сананыгар (Сар. 119:97, сноска). Агару Бичикти кычырып, шиҥдеер тушта слер кандый да јаҥы эмезе јилбилӱ немелер табып албай турган болзоор, кунукпагар. Слерди алтын бедиреп турган кижиге тӱҥдештирерге јараар. Алтынды бедиреерге, канча саат эмезе кӧп кӱндер барардаҥ айабас, је ол анайып ла неме таппас болор. Андый да болзо, ол колын бош салбай, бир де кичинек алтын табып алза, сӱреен сӱӱнип јат. Агару Бичиктиҥ чындыктары оноҥ баалу эмей! (Укаа 8:10). Оныҥ учун чыдамкай болуп, оноҥ ло ары Агару Бичикти кычырып, андагы јажырылган эрјинелерди табыгар (Сар. 1:2). w25.01 24—25, абз. 14, 15

Иегова бисти улустыҥ јаманын таштаарга белен болзын деп сурайт, олор биске ачу эткен де болзо (Сар. 86:5; Лука 17:4; Эф. 4:32). Улустыҥ сӧстӧри эмезе керектери бисти коркышту тыҥ ачындырардаҥ айабас. Анчада ла јуук најыбыс эмезе билегистеҥ кем-кем ачындырган болзо (Сар. 55:12—14). Керек дезе кезикте бисти чек ле бычакла сайып ийгендий коркышту ачу болот (Укаа 12:18). Андый ӧйдӧ бис сезимдеристи ајаруга албай, не де болбогон немедий јӱрер аргалу. Је анайып јӱрзе, бычакты шырканаҥ кодорбогон немеге тӱҥей. Оныҥ учун ичисте сезимдеристи туй базала јӱрзеес, биске јеҥил боло берер деп сакыбас керек. Је кем-кем јаман баштанза, бис тыҥ ачына берердеҥ айабазыс. Агару Бичикле болзо, мында јаман неме јок, је тыҥ ачына берзеес, јаман керектер эдердеҥ айабазыс (Сар. 4:4; Эф. 4:26). Нениҥ учун дезе ачыныш качан да јакшы немеге экелбей јат (Иак. 1:20). Ундыбагар, ачына берери ле ачынып јӱрери эки башка неме. Баштапкызы, кӧп сабада, бистеҥ камаанду эмес, је экинчизи бистеҥ камаанду. w25.02 15, абз. 4—6

Иисус укаа сӧзиниҥ бирӱзинде кижи акча јууп, је «Кудайдыҥ кӧзинде бай болорго албаданбай» турган болзо, андый кижи ойгор эмес деп айткан (Лука 12:16—21). Бир де кижи эртенги кӱнде не болорын билбей јат (Укаа 23:4, 5; Иак. 4:13—15). Анайда ок Иисус оныҥ ӱренчиктери болорго турган улуска акча-јӧӧжӧзин артыргызарга белен болор керек деп айдып салган (Лука 14:33). Баштапкы чакта Иудеядагы христиандардыҥ акча-јӧӧжӧзин айрып аларда, олор сӱӱнчизин јылыйтпаган болгон (Евр. 10:34). Бистиҥ ӧйдӧги акалар политикага турушпаганынаҥ улам иштерин јылыйтып салган (Ачыл. 13:16, 17). Олорго не болушкан? Иегованыҥ «сени артырбазым, сени таштабазым» деп айткан сӧстӧрин бӱдӱрер деп, олор бир де алаҥзыбагандар (Евр. 13:5). Айдарда, бойысты канайып јеткилдеерис деп сананып тура, нени эдер аргалу болгонысты эдип, арткан немени Иегованыҥ колына берип ийерис. Нениҥ учун дезе айалга канайып та солынза, Иегова бисти кичеер деп бӱдӱп јадыс. w25.03 29, абз. 13, 14

Иегова биске кӧгӱзисти тыҥыдарга болушпай турган деп айдып болорыс па? Јок, андый эмес. Темдектезе, ол биске христиан јуунда кӱдӱчилер ле ӱредӱчилер берген. Кӧгӱзи тереҥ бу акалар биске «Христостыҥ толо кемине» једерге болужат (Эф. 4:11—13). Анайда ок Иегова биске агару тынын берет. Бу тынныҥ болужыла бис «Христос чылап сананып јадыбыс» (1 Кор. 2:14—16). Бого ло коштой бисте Евангелиениҥ тӧрт бичиги бар. Бу бичиктердеҥ бис Иисус јерде јӱрерде нени айтканын, нени эткенин, оныҥ сезимдерин билип алар аргалу. Христостыҥ кӧрӱм-санаазын алынып, оныҥ темиле јӱрерге албаданзаас, амадубыска јединип аларыс — кӧгӱзи тереҥ христиан болуп каларыс. Је тереҥ кӧгӱстӱ христиан болорго, јӱк ле «Христостыҥ баштаҥы ӱредӱлериле», ӧскӧртӧ айтса христиан јаҥныҥ тӧс ӱредӱлериле, болорзынбас керек. w24.04 4—5, абз. 11, 12

Бис ончобыс кажы ла кӱн јӧптӧр чыгарып јадыс. Олордыҥ кезиги тегин болуп јат, темдектезе эртен тура нени јиир эмезе канча саатта јадып уйуктаар. Кезик јӧптӧрди чыгарардаҥ озо јакшы шӱӱп сананар керек. Не дезе оноҥ бистиҥ су-кадыгыс, ырызыс, билегистиҥ амыры ла Кудайга бажырары камаанду. Чыгарган јӧптӧристеҥ биске де, јуук улузыска да јакшы болзын деп кӱӱнзейдис. Је эҥ ле керектӱзи — Иегованы сӱӱндирери болот (Рим. 12:1, 2). Јӧп чыгарардаҥ озо айалганы јазап билип алар керек. Нениҥ учун? Мындый тем сананып ийектер, кижи тыҥ оорыйла, врачка келген болзын. Врач ол кижини кӧрбӧй, бир де сурак бербей јадып, кандый бир эм-тус бичибес, дезеер? Анайып ла биске эдер керек. Јӧпти чыгарардаҥ озо айалганы јазап билип алар керек. w25.01 14, абз. 1—3

Иегованыҥ килемкейи керегинде бис нени билерис? Ол «кемди де ӧлӱп калбазын» деп кӱӱнзеп турганын канайып кӧргӱскен? (2 Пётр 3:9). Кезик улусты Кудай килеген. Олордыҥ бирӱзи — Давид каан. Ол бир канча уур кинчектер эткен. Ӧскӧ кижиниҥ ӱйиле конгон, анайда ок кижи ӧлтӱрген. Је Давид кинчегин алынарда, Иегова ого буурзап, кинчегин таштаган (2 Сам. 12:1—12). Манассия каан јӱрӱминде коркышту јаман кинчектер эткен. Је Иегова мындый да кижи бурузын алынарда, кинчегин таштаган (2 Лет. 33:9—16). Бу темдер эске алындырып јат, улустыҥ кинчегин таштайтан тӧзӧлгӧ бар болзо, Иегова јаманды таштап салат. Ол мындый улусты тиргизер, нениҥ учун дезе олор кинчектериниҥ уурын оҥдоп, јастыразын алынган. w24.05 4, абз. 12