Укаа сӧстӧрдиҥ 7-чи бажалыгында айдылган учурал Иегованыҥ ишчилериниҥ кажызында ла болордоҥ айабас. Кинчек эткен кижи: «Бу мен канай јастырып ийдим?» — деп кайкаар болор. Је ол кинчек эдердеҥ озо кандый алтамдар эдип турганын шӱӱп сананып ийзе, оҥдоп ийер. Ол, байла, Иегованы сӱӱбей турган улусла најылажып баштаган. Оныҥ болуп турган јерлери, амыражы, кирип турган сайттары христиандардыҥ нормаларына келишпей турган болор. Эмезе ол мӱргӱбей турган, Агару Бичик кычырбай турган, јуундарга ла јарлаар ишке јӱрбей турган болордоҥ айабас. Айдарда, Укаа сӧстӧрдӧги учуралды кӧрзӧ, кинчек јок ло јердеҥ болбой јат. Бис бу учуралдаҥ неге ӱренедис? Кинчек этпеске турган болзоос, биске јӱк ле кинчектиҥ бойынаҥ эмес, је ого экелгедий не ле немедеҥ тууралаар керек. Шак ла мындый ӱредӱ јиит уул ла балыр ӱй кижи керегинде куучында бичилип калган (Матф. 5:29, 30). w24.07 16, абз. 10, 11

Павел кандый эрјине керегинде айткан? Бу дезе сӱреен баалу јарлаар иш (2 Кор. 4:1). Нениҥ учун дезе бис Каандык керегинде јарлап тура, улустыҥ јӱрӱмин аргадап јадыс. А той балкаш јыракылар кемдерди темдектейт? Кудайдыҥ ишчилерин. Павел нениҥ учун мындый тӱҥдештирӱ эткен? Оныҥ ӧйинде садучылар баалу немелерди, темдектезе, курсак-тамакты, кызыл аракыны ла акча-манатты той балкаш јыракыларда тартып туратан. Бис база улуска сӱреен баалу немени јетиредис — Иегованыҥ берген сӱӱнчилӱ јарын куучындайдыс. А Иегова биске бу ишти бӱдӱрерге керектӱ ийде-кӱчти берип јат. Је кезикте улус биске јаман та нени де айдып ийер эмезе эдип ийер деп коркып, јарлабай јадыс. Коркыбаска не болужар? Апостолдорды јарлабазын деп кезеткилеп турарда, олор не керегинде мӱргӱгенин сананып ийигер. Олор коркып калган отургылабай, Иегова олорго јалтанбай јарлаарга болужып турзын деп мӱргӱген. Иегова тӱрген ле олорго каруу берген (Ап. ижи 4:18, 29, 31). Сен кезикте коркып турган болзоҥ, база Иеговага мӱргӱп, болуш сура. Ол тушта улустаҥ коркыбай, карын олорды сӱӱриҥ. w24.04 16, абз. 8, 9

Бис Иегованы сӱӱп јадыс, бу сӱӱш бисти оныҥ адын агарулаарга кӱӱнзедет. Кудайдыҥ адын Сатананыҥ јескинчилӱ јабарынаҥ арутаарга кӱӱнзейдис (Баш. 3:1—5; Иов 2:4; Иоанн 8:44). Сӱӱнчилӱ јарды угарга тургандарга Кудайыс керегинде чынды куучындаарга албаданадыс, нениҥ учун дезе чындыкты улус бис ле чилеп билзин деп кӱӱнзейдис. Иегованыҥ эҥ јаан кылык-јаҥы — сӱӱш. Оныҥ башкарузы чындык ла чын. Кудайдыҥ Башкарузы удабас кыйын-шыраны јоголтып салар, улуска амыр ла сӱӱнчи экелер (Сар. 37:10, 11, 29; 1 Иоанн 4:8). Иегова керегинде чындыкты куучындап турзаас, оныҥ адын агарулайдыс. Биске Кудайыстыҥ адын аданарга бойыска да јарап јат. w24.05 18, абз. 12