Iˇsaˬyaˇ sahˬ boꞈ˗ahˇ neh gʼaˬ za

1-2. Yeˬhawˇbaˬ aˬ dui nui ma nyiˇ nui ma cawˆ ngeh gʼaˬ baˬ ngeh aˬ joˆ˗ehˇ jahˇ˗eu nga?

Yaw jeˬ ma jeˬ zaˬ tiˬ gʼaˬ maˬ taˬ leˇ ni ngoeˇ˗eu lehˇ ehˇ˗awˬ. Aˬ yawꞈ teu loꞈ˗ehˇ ngoeˇ˗eu teu naˇ, aˬ yawꞈ pehˬ yawˬ gaˇ yawˬ ya pawˇ˗iˇ˗awˇ cawˬ deuˬ nehˬ˗ehˇ ya gʼawˬ˗iˇ˗eu miˇ neh kʼawꞈ pyeuꞈ nya meh. Dzaˇ˗i tiˬ hmˬ naˇ zaˬ tiˬ gʼaˬ aˬ yawꞈ neh mˇ bahˬ˗euˬ jeˬ baˬ da neh nui ma aˇ dzehˬ˗ehˇ cawˆ˗eu lehˇ ehˇ˗awˬ. Teu ngeh aˬ ma gʼaˬ aˬ joˆ˗ehˇ jahˇ˗eu nga? Aˬ ma gʼaˬ zaˬ˗ahˇ byaˇ tawꞈ˗awˇ zaˬ myaˆ biˇ ju ju˗ehˇ ngoeˇ ngoeˇ˗ehˇ jawˇ gaˇ yaw muiˬ˗ehˇ naˇ haˬ nehˬ˗awˇ, zaˬ˗ahˇ aˬ yawꞈ aˇ naˆ ni gaˬ˗eu gaˇ kawˆ bi siˬ duˬ˗eu yaw duˬ baw meh.

² Jaˇliꞈ˗ahˇ Yeˬhawˇbaˬ aˬ yawꞈ˗ahˇ zaˬ˗ahˇ gaˬ˗awˇ kʼahˬ lahˇ˗eu aˬ ma nehˬ˗ehˇ sheu cehˆ taˬ˗euˬ meh. Aˬ yawꞈ ‘Aˬ ma zaˬ˗ahˇ bo saˆ nehˬ˗eu loꞈ˗ehˇ, naw maꞈ˗ahˇ ngaˇ bo saˆ nehˬ ma’ lehˇ ehˇ taˬ˗euˬ meh. (Iˇsaˬyaˇ 66:13) Yeˬhawˇbaˬ˗euˬ nui gaˬ naˇ, aˬ da aˬ ma aˬ geu gʼaˬ˗euˬ nui gaˬ naˆ maˬ tseˇ maˬ kaˬ dzehˬ˗eu meh. (Iˇsaˬyaˇ 49:15) Aˬ dui nui ma gʼaˬ baˬ ngeh maˬ ehˇ, nui ma nyiˇ nui ma cawˆ ngeh maˬ ehˇ, Yeˬhawˇbaˬ aˬ dui˗ahˇ Jaˇliꞈ˗ahˇ neh tiˬ tiˆ nui saˇ biꞈ nehˬ laꞈ˗awˇ, gʼaˬ kʼaˆ laˇ ni caw ba nehˬ˗eu meh.—Loˇmaˆ 15:4.

3. Aˬ dui heu kawˆ laꞈ kʼoeˇ aˬ jeˬ jeˇ˗euˬ gaˇ kawˆ˗ahˇ ja sawˇ˗eu nga?

³ Iˇsaˬyaˇ sahˬ boꞈ laꞈ kʼoeˇ Yeˬhawˇbaˬ jawˇ gaˇ neh oe˗euˬ gʼaˬ biꞈ˗eu dawˬ gʼawˬ mya ni ahˇ˗eu meh. (Iˇsaˬyaˇ 40:1) Aˬ dui˗euˬ gaˬ˗eu Aˬda Yeˬhawˇbaˬ sahˬ boꞈ heu dmˬ˗ahˇ muiˬ˗eu shawˇ˗eu yaw sahˇ sheuˬ gʼeh˗eu laꞈ kʼoeˇ shaˬ zahˬ puˬ luꞈ˗eu Yuˇdaˆ tsawˇ haˬ deuˬ˗ahˇ gʼaˬ biꞈ˗eu gʼaˇ duˬ bi boꞈ˗euˬ meh. Teu gaˇ duˇ ni nymˬ˗mˇ iˬ nah aˬ dui jiˇ “shaˬ dui dui˗eu aˇ yamˬ” laꞈ kʼoeˇ jawˇ luꞈ˗eu ma. Teu miˇ neh aˬ dui Miˬyehˇ neh gʼaˬ biꞈ nehˬ laꞈ˗eu jeˬ˗ahˇ loˬ˗eu meh. (2 Tiˆmoˇseˬ 3:1) Aˬ dui Iˇsaˬyaˇ sahˬ boꞈ laꞈ kʼoeˇ˗euˬ Jaˇliꞈ aˇ deuˆ tiˬ deuˆ na˗ahˇ haw kaˇ˗euˇ. Jaˇliꞈ aˇ deuˆ heu deuˬ naˇ aˬ dui˗ahˇ (1) maˬ noeˬ˗euˬ gaˇ poˆ laˇ paˇ laˇ ngeh (2) nui ma cawˆ˗eu maˬ taˬ leˇ ngeh (3) yawˬ ha gaˬ˗eu gʼaˬ shiˇ˗euˬ miˇ neh shaˬ zahˬ mˇ˗eu maˬ jiˇ leˇ ngeh, gʼaˬ aˬ joˆ˗ehˇ bi ahˇ laˇ˗eu nga lehˇ haw ma.

Maˬ noeˬ˗euˬ gaˇ poˆ laˇ paˇ laˇ ngeh

4. Maˬ noeˬ˗euˬ gaˇ poˆ laˇ paˇ laˇ˗eu jeˬ heu naˇ aˬ dui˗ahˇ aˬ joˆ˗ehˇ deuˬ laˇ nya˗eu nga?

⁴ Tiˬ poˆ na aˬ dui maˬ noeˬ maˬ duˇ˗ehˇ jawˇ gaˇ duiˬ lehˇ poˆ laˇ paˇ laˇ nya˗eu meh. (Dawˬtsoˆ 9:11; 1 Gawˇliˬtu 7:31) Yaw jeˬ ma jeˬ, maˬ noeˬ maˬ duˇ˗ehˇ jawˇ gaˇ ja pyuˬ ni naˇ laˇ nya˗eu meh. Pyuˇ shaˬ laˇ nya˗eu meh. Miˇ kʼahˬ˗ahˇ sahˬ paˬ sahˬ ma deuˬ uˆ lahˇ˗eu jeˬ poˆ laˇ paˇ laˇ nya˗eu meh. Aˇ maꞈ aˇ muˇ˗euˬ gaˇ laꞈ kʼoeˇ nui jeˬ˗ahˇ ya mˇ paˇ˗iˇ˗eu kʼawꞈ pyeuꞈ nya meh. Heu loꞈ˗ehˇ poˆ laˇ paˇ laˇ˗eu jeˬ baˬ da neh aˬ dui˗ahˇ kʼahˬ lahˇ laˇ nya˗awˇ, noeˬ maˬ doˆ ni pyeuꞈ laˇ nya meh. Teu ngeh aˬ dui˗ahˇ ‘Ngaˇ aˬ joˆ˗ehˇ jahˇ paˬ nga’ lehˇ noeˬ laˇ˗eu heu naˇ yaw lehˬ jeˬ maˬ ngeuˇ˗a. Yoˇsehˆ lehˇ kuˇ˗eu mehˇ nmˇ aˬ li tiˬ gʼaˬ Beˬdeˬlaˇ˗ahˇ uˬ taꞈ 17 kʼoꞈ byah ni mˇ laꞈ˗euˬ meh. Ehˇ kʼawꞈ maˬ noeˬ˗euˬ gaˇ aˬ yawꞈ deh yaˇ˗ahˇ Miˬyehˇ gaˇ mˇ gaˇ ya mˇ paˇ˗iˇ˗euˬ meh. Aˬ yawꞈ heu loꞈ˗ehˇ ehˇ˗eu meh. “Ngaˬ˗ahˇ tiˬ jeˬ˗iˬ shaˇ noeˬ maˬ doˆ nya. Ngaˬ˗ahˇ Beˬdeˬlaˇ˗ahˇ uˬ taꞈ gʼawˬ mya kʼoꞈ mˇ laꞈ˗euˬ miˇ neh yawˬ gaˇ yawˬ dahˬ beh paˇ˗awˇ ya mˇ˗eu heu naˇ shaˇ noeˬ maˬ doˆ nya. Heu naˇ ngaˬ˗euˬ gʼaˇ duˬ yaw duiˇ ma˗ehˇ shaˬ˗eu jeˬ pyeuꞈ miˇ˗a. Ngaˬ˗ahˇ aˬ gaˇ neh dahˬ ya beh˗eu maˬ paˇ siˬ miˇ˗aˇ.” Aˬ dui maˬ noeˬ˗euˬ gaˇ poˆ laˇ paˇ laˇ˗eu jeˬ˗ahˇ ya puˬ ngeh Iˇsaˬyaˇ sahˬ boꞈ laꞈ kʼoeˇ˗euˬ Yeˬhawˇbaˬ˗euˬ dawˬ heu naˇ aˬ dui˗ahˇ aˬ joˆ˗ehˇ caw ba nehˬ nya nga?

5. Iˇsaˬyaˇ 42:16 laꞈ kʼoeˇ Yeˬhawˇbaˬ aˬ dui˗ahˇ aˬ jeˬ˗euˬ saˇ jaˇ dzaˬ taˬ˗euˬ nga? (Aˇ baˇ˗ahˇ jiˇ haw.)

⁵ Iˇsaˬyaˇ 42:16-ahˇ gui. Yeˬhawˇbaˬ myaˆ behꞈ deuˬ˗ahˇ maˬ iˇ haw˗euˬ gaˇ ma˗ahˇ sheuˬ gʼeh˗awˇ, yaw zahˇ˗ahˇ yaw shehꞈ bi bya laˇ ma lehˇ saˇ jaˇ dzaˬ taˬ˗euˬ meh. “Myaˆ behꞈ” “maˬ iˇ haw˗euˬ gaˇ ma” “yaw zahˇ” “duˬ kʼahˬ duˬ kʼawꞈ” lehˇ ehˇ˗eu dawˬ heu deuˬ naˇ, maˬ noeˬ˗euˬ gaˇ poˆ laˇ paˇ laˇ ngeh noeˬ˗eu jeˬ nehˬ˗ehˇ duˇ leˇ˗eu meh. Aˬ dui˗ahˇ bawˇ tsahˬ bawˇ dahˇ˗ahˇ maˬ siˬ nya˗eu gaˇ ma˗ahˇ cah luꞈ˗eu loꞈ˗ehˇ bi gʼeh laˇ nya˗eu meh. Ehˇ kʼawꞈ Yeˬhawˇbaˬ aˬ dui aˬ jeˬ gaˇ kawˆ˗ahˇ ya tahˬ puˬ˗eu maˬ kaˬ, aˬ dui˗ahˇ sheuˬ hehˇ nehˬ˗awˇ tiˬ jawˇ˗iˬ maˬ byehˇ dzeh lehˇ kamˬ taˬ˗euˬ meh. Miˬyehˇ aˬ dui˗euˬ aˬ laꞈ˗ahˇ nyehꞈ tehˬ˗awˇ zahˇ cui ni gʼeh˗eu gaˇ ma˗ahˇ cah cehˆ nya ni sheuˬ gʼeh nehˬ laꞈ meh. Aˬ dui˗euˬ gaˇ ma˗ahˇ yaw shehꞈ bya nehˬ˗awˇ duˬ kʼahˬ duˬ kʼawꞈ jaˆ˗eu gaˇ ma jiˇ saˇ lehˆ ni bi gʼeh laˇ˗eu meh. Yeˬhawˇbaˬ teu loꞈ˗ehˇ aˬ joˆ˗ehˇ jahˇ˗eu nga? Jaˇliꞈ hawˇ˗eu aˬ yawꞈ˗euˬ aˇ maꞈ aˇ muˇ˗ahˇ neh tiˬ tiˆ zaˬ siˬ nui gahˇ ahˇ˗eu nui noeˬ nui duˇ biꞈ˗eu heu neh meh. (Ja ceuˬ 119:105; Iˇsaˬyaˇ 30:21) Kʼoeˇ naˇ Miˬyehˇ mehˇ nmˇ deuˬ hawˇ˗eu nui deuˬ˗ahˇ zmˬ˗awˇ aˬ dui˗ahˇ caw ba nehˬ laꞈ meh. Aˬ dui mehˬ hu paw aˬ jeˬ˗euˬ shaˬ zahˬ˗ahˇ ya puˬ˗eu maˬ siˬ nya kʼawꞈ Yeˬhawˇbaˬ aˬ dui˗ahˇ gʼawˬ shaˬ gaˬ˗eu laꞈ kʼoeˇ gʼoˆ shaw nehˬ˗awˇ aˬ dui˗ahˇ aˬ myah luꞈ ngehˬ gʼeh nehˬ meh lehˇ jah ziꞈ nya meh.—Iˇsaˬyaˇ 41:10; 1 Beˬtuˆluˆ 5:6, 7.

6. Gaˇ kawˆ deuˬ aˬ dui maˬ noeˬ˗euˬ gaˇ poˆ laˇ paˇ laˇ kʼawꞈ aˬ dui aˬ jeˬ˗ahˇ jah ziꞈ nya nga?

⁶ Uˬ soe ngehˬ keuˆ taˬ˗euˬ mehˇ nmˇ Yoˇsehˆ Yeˬhawˇbaˬ aˬ yawꞈ nyaꞈ dzeˇ zaˬ˗ahˇ nui gaˬ aˬ joˆ˗ehˇ mˇ mawˇ˗euˬ gaˇ kawˆ hawˇ˗eu Beˬdeˬlaˇ˗ahˇ neh doˆ le gʼaˬ ngeh aˬ yawꞈ nyaꞈ˗ahˇ aˬ joˆ˗ehˇ ngehˬ gʼeh nehˬ˗euˬ gaˇ kawˆ ja keuˆ˗euˬ meh. Aˬ yawꞈ “Laꞈ nyiˇ paw daˬ laˇ˗eu gʼaˇ duˬ leh jeh luꞈ˗eu aˇ yamˬ laꞈ kʼoeˇ Yeˬhawˇbaˬ nga nyaꞈ˗ahˇ maˇ diˇ gaˬ gaˇ ya mawˇ˗euˬ ma. Yeˬhawˇbaˬ gaˬ laˇ paˬ˗ehˇ gʼeh˗eu mehˇ nmˇ deuˬ˗ahˇ neh tiˬ tiˆ caw ba nehˬ laꞈ˗awˇ, loˬ ngeh loˬ˗eu jeˬ jaˆ ni caw ba nehˬ laꞈ˗awˇ, gʼaˬ baˬ ngeh gʼaˬ jiˇ biꞈ nehˬ laꞈ˗euˬ meh. Miˬyehˇ nymˬ˗mˇ iˬ nah keuˆ ni teu loꞈ˗ehˇ caw ba nehˬ luꞈ meh” lehˇ ehˇ˗eu meh. Nawˇ maˬ noeˬ˗euˬ gaˇ poˆ laˇ paˇ laˇ˗eu jeˬ˗ahˇ ya puˬ˗awˇ, cah daˆ leꞈ˗eu gaˇ ma aˇ dzehˬ˗ehˇ shaˬ gaˇ duˇ kʼawꞈ Yeˬhawˇbaˬ nawˬ˗ahˇ gʼaˬ bi kʼaˆ laˇ˗awˇ sheuˬ hehˇ nehˬ˗eu yaw duˬ baw meh. (Iˇsaˬyaˇ 54:10; 58:11) Kʼoeˇ naˇ aˬ yawꞈ “Dawˬ caˇ tiˬ tsehˆ˗ahˇ ‘Ni shawˬ aˬ jeˬ keuˆ le˗eu maˬ siˬ kʼawꞈ Yeˬhawˇbaˬ caw ba nehˬ˗eu yaw duˬ baw’ lehˇ ehˇ taˬ˗euˬ maˇ diˇ ngeuˇ miˇ˗a.a Gaˇ kawˆ deuˬ aˬ dui neh noeˬ˗euˬ loꞈ˗ehˇ maˬ pyeuꞈ kʼawꞈ Yeˬhawˇbaˬ aˬ dui nehˬ˗ehˇ aˬ myah luꞈ jawˇ˗awˇ caw ba nehˬ˗eu yaw duˬ baw meh” lehˇ ehˇ˗eu meh.

Nui ma cawˆ˗eu maˬ taˬ leˇ ngeh

7. Huiˬ˗eu iˬ baˇ mˇ haw˗euˬ tiˬ gʼaˬ na aˬ joˆ˗ehˇ noeˬ luꞈ nga siˬ?

⁷ Aˬ dui yawˬ ha˗euˬ huiˬ˗eu iˬ baˇ gaˇ kawˆ aˇ muˇ˗ahˇ sheuˬ gʼeh˗eu deuˬ˗ahˇ dzawˇ nehˬ ngeh aˇ muˇ˗ahˇ sheuˬ gʼeh˗eu deuˬ caw ba nehˬ laꞈ˗eu meh. Kʼoeˇ naˇ aˬ dui jiˇ maˬ mˇ poˆ˗iˇ˗eu gʼaˇ duˬ kʼaˇ gʼeh nya gaˇ neh ya leh jeh meh. (Dawˬdaˬ 28:13; Yaˬkoˆ 5:14-16; 1 Yoˇhaˬ 1:9) Aˬ dui Yeˬhawˇbaˬ neh gʼawˬ shaˬ gaˬ nehˬ laꞈ˗eu jeˬ˗ahˇ za˗euˬ kʼawꞈ, aˬ dui yawˬ ha neh mˇ˗euˬ yaw lehˬ˗ahˇ nui ma cawˆ˗eu maˬ taˬ leˇ ni gʼeh nya˗eu meh. Aˬ dui˗ahˇ ‘Ngaˬ neh mˇ˗euˬ yaw lehˬ heu naˇ aˇ dzehˬ˗ehˇ huiˬ dzeuˇ˗eu miˇ neh Yeˬhawˇbaˬ iˬ baˇ pyehˬ˗eu lehˇ ehˇ˗eu heu naˇ maˬ pyeuꞈ leˇ nya˗a’ lehˇ noeˬ laˇ nya meh. (2 Gawˇliˬtu 2:7) Aˬ dui neh mˇ˗euˬ yaw lehˬ jeˬ teu˗ahˇ nui ma laꞈ kʼoeˇ shaꞈ dawˇ luꞈ˗eu siˬ miˇ neh maˬ ehˇ, nui ma laꞈ kʼoeˇ maˬ ngehˇ leˇ coeˇ˗eu miˇ neh maˬ ehˇ, teu loꞈ˗ehˇ noeˬ laˇ nya meh. Sahˬpaˬ Daˬbiˇ ‘Ngaˬ neh mˇ˗euˬ iˬ baˇ baˬ da, yoeˬ tsuiꞈ yoeˬ laꞈ gawˇ dui dui nya. Maˬ luˆ maˬ laˆ nya ni ga˗euˬ ma’ lehˇ boꞈ taˬ˗euˬ meh. (Ja ceuˬ 38:3, 8) Nawˬ˗ahˇ dzeuˇ yaꞈ ngeh mˇ lehˬ˗euˬ jeˬ baˬ da neh teu loꞈ˗ehˇ noeˬ laˇ naˇ Iˇsaˬyaˇ sahˬ boꞈ nawˬ˗ahˇ caw ba nehˬ nya meh.

8-9. Iˇsaˬyaˇ 1:18-ahˇ Yeˬhawˇbaˬ iˬ baˇ pyehˬ˗eu gaˇ kawˆ nehˬ˗ehˇ taꞈ leˇ˗awˇ aˬ jeˬ ehˇ taˬ˗euˬ nga?

⁸ Iˇsaˬyaˇ 1:18-ahˇ gui. Yeˬhawˇbaˬ aˬ dui˗euˬ iˬ baˇ˗ahˇ maˇ diˇ pyehˬ nehˬ jiˇ˗euˬ lehˇ maˇ jawˆ ni bi siˬ laˇ˗eu yaw jeˬ ma jeˬ˗ahˇ zmˬ taˬ˗euˬ meh. Miˬyehˇ aˬ dui˗euˬ iˬ baˇ “neˇ tseuˆ ni gʼeh” kʼawꞈ, “saˬ laˬ naˆ maˬ tseˇ pyuˇ laˇ” ni jahˇ nehˬ ma lehˇ ehˇ taˬ˗euˬ meh. Aˬ myah myah naˇ doeˬ yaw neˇ heu laˆ lehꞈ shaw˗euˬ naˇ laˆ shawˇ˗eu yaw shaˬ meh. Ehˇ kʼawꞈ Yeˬhawˇbaˬ naˇ aˬ dui˗ahˇ iˬ baˇ pyehˬ nehˬ shaw˗euˬ naˇ maˇ diˇ pyehˬ nehˬ jiˇ˗awˇ, aˬ dui neh mˇ˗euˬ iˬ baˇ dehꞈ ziˇ laꞈ kʼoeˇ maˇ byawꞈ pyeuꞈ˗eu lehˇ maˬ haw˗a.

⁹ Daˬbiˇ˗euˬ gaˇ kawˆ˗ahˇ shaˇ noeˬ haw sheˇ. Aˬ yawꞈ dehꞈ bahˬ dehꞈ muˆ˗awˇ tsawˇ haˬ sehꞈ haw˗euˬ meh. Ehˇ kʼawꞈ aˬ yawꞈ noeˬ poˆ noeˬ paˇ ngeh Yeˬhawˇbaˬ aˬ yawꞈ˗ahˇ iˬ baˇ pyehˬ nehˬ˗awˇ, aˇ nah naˇ Yeˬhawˇbaˬ Daˬbiˇ naˇ saˇ jaˇ ziꞈ˗eu tsawˇ haˬ pyeuꞈ meh lehˇ ehˇ˗eu meh. (2 Saˬmeuˬlaˆ 11:3, 4, 14, 15; 12:13; 1 Sahˬpaˬ 9:4, 5) Yeˬhawˇbaˬ Daˬbiˇ neh mˇ lehˬ˗euˬ jeˬ˗ahˇ tehꞈ˗ehˇ maˬ haw˗a. Daˬbiˇ neh ziˇ lah ni mˇ laꞈ˗euˬ yaw muiˬ jeˬ˗ahˇ tehꞈ˗ehˇ haw˗eu meh. Teu gaˇ duˇ ni aˬ dui iˬ baˇ noeˬ poˆ noeˬ paˇ ngeh Yeˬhawˇbaˬ nui gaˬ keuˆ˗eu laꞈ kʼoeˇ iˬ baˇ pyehˬ nehˬ˗awˇ, mehˬ hu paw siˬ nya˗eu nui ma shawˇ jehˆ ni cah daˆ leꞈ nya ni caw ba nehˬ˗eu meh. Iˇsaˬyaˇ sahˬ boꞈ laꞈ kʼoeˇ aˬ dui nui ma cawˆ˗eu maˬ taˬ leˇ ngeh gʼaˬ biꞈ nehˬ˗eu aˬ jeˬ˗euˬ gaˇ kawˆ paˇ ahˇ nga siˬ?

10. Iˇsaˬyaˇ 38:17 laꞈ kʼoeˇ˗euˬ Yeˬhawˇbaˬ˗euˬ dawˬ heu aˬ dui˗ahˇ gʼaˬ aˬ joˆ˗ehˇ bi ahˇ laˇ˗eu nga?

¹⁰ Iˇsaˬyaˇ 38:17-ahˇ gui. “Ngaˬ˗euˬ iˬ baˇ dawˬ tawˆ pyehˬ dzeh nehˬ laꞈ˗euˬ meh” lehˇ ehˇ˗eu heu dawˬ˗ahˇ “ngaˬ˗euˬ iˬ baˇ dawˬ tawˆ Miˬyehˇ˗euˬ mehˬ shi maˬ paˇ bi jaˆ” lehˇ jiˇ yuˇ paˇ nya meh. Jaˇliꞈ heu deuˆ naˇ Yeˬhawˇbaˬ noeˬ poˆ noeˬ paˇ˗euˬ deuˬ˗euˬ iˬ baˇ maˬ mawˇ laˇ gaˇ biˬ dzeh gʼeh˗eu lehˇ bi siˬ laꞈ˗eu meh. Jaˇliꞈ dawˬ tsuiꞈ puiˇ kʼawˬ˗eu paˇ dmˬ tiˬ dmˬ laꞈ kʼoeˇ dawˬ heu dawˬ˗ahˇ “Miˬyehˇ ngaˬ neh mˇ˗euˬ iˬ baˇ˗ahˇ tiˬ jawˇ˗iˬ maˬ pyeuꞈ laˇ haw˗euˬ loꞈ˗ehˇ jahˇ˗eu meh” lehˇ dzawˇ nehˬ taˬ˗euˬ meh. Teu miˇ neh Yeˬhawˇbaˬ aˬ dui˗ahˇ iˬ baˇ pyehˬ nehˬ ngeh aˬ dui tiˬ jawˇ˗iˬ iˬ baˇ maˬ mˇ haw˗euˬ loꞈ˗ehˇ pyeuꞈ˗iˇ˗eu meh. Kʼoeˇ naˇ Miˬyehˇ iˬ baˇ teu gaˇ kawˆ˗ahˇ maˬ paˇ ngehˬ keuˆ meh. Iˬ baˇ teu baˬ da neh aˬ dui˗ahˇ yaˇ kʼaˬ maˬ paˇ daˇ meh. Yeˬhawˇbaˬ aˬ dui neh mˇ˗euˬ iˬ baˇ˗ahˇ siˆ byoˆ dzeh jiˇ˗eu meh. Miˬyehˇ ‘Naw maꞈ˗euˬ yaw lehˬ˗ahˇ ngehˇ ma’ lehˇ saˇ jaˬ dzaˬ taˬ˗euˬ meh. (Iˇsaˬyaˇ 43:25) Gaˇ kawˆ heu aˬ dui˗ahˇ gʼaˬ bi ahˇ laˇ dui dui miˇ˗a. Yaˇ kʼaˬ daˇ˗eu kʼaˇ huiˬ˗eu gʼaˬ pyeuꞈ˗eu Yeˬhawˇbaˬ aˬ dui neh mˇ˗euˬ iˬ baˇ˗ahˇ maˬ noeˬ taˬ naˇ, aˬ dui ngehˬ˗ehˇ dzehˬ aˬ jeˬ miˇ noeˬ taˬ noeˬ taˬ˗ehˇ paˇ jawˇ˗eu.

11. Aˬ dui dzeuˇ yaꞈ ngeh mˇ bahˬ haw˗euˬ kʼawꞈ Yeˬhawˇbaˬ aˬ jeˬ˗ahˇ haw tsoˆ taˬ˗eu nga? (Aˇ baˇ˗ahˇ jiˇ haw.)

¹¹ Yawˬ ha neh mˇ˗euˬ iˬ baˇ˗ahˇ nui ma kʼaˇ noeˬ cawˆ laˇ ngeh Yeˬhawˇbaˬ aˬ dui˗ahˇ aˇ naˆ ni gaˬ˗eu gaˇ kawˆ saˇ tiˇ ya biꞈ˗eu meh. Yeˬhawˇbaˬ aˬ dui˗ahˇ iˬ baˇ pyehˬ naˇ maˇ diˇ pyehˬ nehˬ˗eu meh. Dzeuˇ laꞈ ngeh aˬ dui mˇ bahˬ haw˗euˬ kʼawꞈ, Yeˬhawˇbaˬ aˬ dui˗ahˇ aˬ yawꞈ˗euˬ gaˇ bi mˇ gaˇ maˬ shaꞈ dawˇ˗a. Miˬyehˇ naˇ nui ma pehˇ˗eu maˬ taˬ leˇ˗eu iˬ baˇ zaˬ loꞈ˗ehˇ maˬ duˇ˗a. (Iˇsaˬyaˇ 57:16) Yeˬhawˇbaˬ˗euˬ gʼaˇ duˬ aˇ yeˇ huiˬ˗eu jeˬ naˇ, aˬ dui neh dzeuˇ yaꞈ ngeh pyeuꞈ yaꞈ˗euˬ gʼaˬ maˬ ngeuˇ ni nymˬ˗mˇ hawˇ˗eu mehˬ hu paw pyeuꞈ daˆ leꞈ˗eu gʼaˬ pyeuꞈ meh. (Iˇsaˬyaˇ 55:7) Aˬ dui˗euˬ Miˬyehˇ Yeˬhawˇbaˬ aˬ dui˗ahˇ gaˬ dui dui˗awˇ, aˬ dui mˇ bahˬ ngeh iˬ baˇ pyehˬ nehˬ mawꞈ˗eu meh. Aˬ dui Yeˬhawˇbaˬ˗euˬ nui gaˬ˗ahˇ noeˬ taˬ luꞈ˗uˇ. Aˬ dui neh mˇ lehˬ sahˇ ca˗euˬ jeˬ neh nymˬ˗mˇ laˬ kʼaˬ cehˇ˗eu jeˬ˗ahˇ taˬ bi laˆ cawˆ laˇ. Mehˬ hu paw za˗eu laꞈ sawˬ deuˬ˗ahˇ taˬ bi laˆ tsoeˬ laˇ.

Yawˬ ha gaˬ˗eu gʼaˬ shiˇ˗euˬ miˇ neh nui ma cawˆ ngeh

12. Gaˬ˗eu gʼaˬ shiˇ nehˬ laꞈ ngeh aˬ dui˗ahˇ aˬ joˆ˗ehˇ noeˬ laˇ nya˗eu nga?

¹² Yawˬ ha gaˬ˗eu gʼaˬ shiˇ nehˬ laꞈ ngeh noeˬ shaˬ˗awˇ nui ma cawˆ˗eu maˬ taˬ leˇ˗a. Tiˬ poˆ na aˬ dui˗ahˇ Yeˬhawˇbaˬ aˬ jeˬ miˇ neh gaˇ kawˆ heu bi pyeuꞈ laˇ˗euˬ nga lehˇ noeˬ laˇ nya˗eu meh. Aˬ da aˬ ma miˬ dzaˬ bi puiˆ sehꞈ˗euˬ Maiˇkeuˬ heu loꞈ˗ehˇ ehˇ˗eu meh. “Ngaˬ˗euˬ nui ma tsawˬ paˆ tsawˬ shaˆ jiˇ miˬ˗aˇ. Ngaˬ˗ahˇ Yeˬhawˇbaˬ˗ahˇ nui ma pehˇ nya. Ngaˬ da ngaˬ ma bi shiˇ nehˬ laꞈ˗euˬ miˇ neh. Ngaˇ siˬ nya ma, heu naˇ Yeˬhawˇbaˬ neh jahˇ˗euˬ maˬ ngeuˇ˗a lehˇ. Ehˇ kʼawꞈ aˬ yawꞈ aˬ jeˬ miˇ neh ngaˬ da ngaˬ ma˗ahˇ maˬ haw piˇ nehˬ˗eu nga?” Tiˬ poˆ na nawˬ˗ahˇ jiˇ teu loꞈ˗ehˇ noeˬ laˇ haw˗euˬ tehꞈ˗a. Teu loꞈ˗ehˇ noeˬ laˇ ngeh Yeˬhawˇbaˬ nawˬ˗ahˇ gʼaˬ hawˇ˗eu noeˬ tmˬ˗eu jeˬ aˬ joˆ˗ehˇ biꞈ˗eu nga?

13. Iˇsaˬyaˇ 25:8-ahˇ Yeˬhawˇbaˬ aˬ jeˬ lehˇ saˇ jaˇ dzaˬ taˬ˗euˬ nga?

¹³ Iˇsaˬyaˇ 25:8-ahˇ gui. Yeˬhawˇbaˬ ‘shiˇ˗eu jeˬ˗ahˇ mˬ maˬ maˬ byaˆ zaˇ ziˇ laˆ cawˆ nehˬ ma’ lehˇ saˇ jaˇ dzaˬ taˬ˗euˬ meh. Shiˇ˗eu jeˬ maˬ paˇ jaˆ˗eu aˇ nah˗ahˇ noeˬ mawˇ haw. Yawˬ ha gaˬ˗eu gʼaˬ shiˇ˗euˬ miˇ neh ngoeˇ˗eu lehˇ maˬ paˇ jaˆ meh. (Iˇsaˬyaˇ 35:10) Nawˇ yawˬ ha gaˬ˗eu gʼaˬ˗euˬ lmˬ bymˇ mehˬ shi ngoeˇ˗eu maˬ paˇ loˬ meh. Toˆ˗ehˇ maˬ pyeuꞈ˗eu uˬ taꞈ, yawˬ ha gaˬ˗eu gʼaˬ nehˬ˗ehˇ tiˬ poˆ paˇ ya jawˇ dzoeˇ kʼoꞈ meh. Dehꞈ˗eu jeˬ za˗awˇ jawˇ saˇ doˆ dui dui meh. Dawˬ ma saˇ jaˇ heu naˇ maˬ duˬ maˬ deuˆ˗ehˇ gʼeh˗eu gaˇ kawˆ maˬ ngeuˇ˗a. Gaˇ kawˆ heu˗ahˇ tiˬ gʼaˬ tehꞈ˗ehˇ maˇ diˇ bi pyeuꞈ laˇ nya˗eu Yeˬhawˇbaˬ jawˇ gaˇ neh oe˗euˬ saˇ jaˇ dawˬ pyeuꞈ meh.—Pah mehˬ˗eu 21:4, 5.

14. Nawˬ˗ahˇ gʼoꞈ dehꞈ laˇ˗eu gaˇ kawˆ˗ahˇ shaˇ noeˬ ngeh aˬ joˆ˗ehˇ gʼeh laˇ nya? (Iˇsaˬyaˇ 26:19) (Aˇ baˇ˗ahˇ jiˇ haw.)

¹⁴ Iˇsaˬyaˇ 26:19-ahˇ gui. Yeˬhawˇbaˬ naˇ shiˇ˗eu jeˬ˗ahˇ laˆ cawˆ˗eu tehꞈ maˬ ngeuˇ˗a. Yawˬ ha gaˬ˗eu shiˇ dzeuˇ˗euˬ deuˬ˗ahˇ jiˇ paˇ bi gʼoꞈ dehꞈ laˇ˗eu meh. Gaˇ kawˆ heu nehˬ˗ehˇ taꞈ leˇ˗awˇ Yeˬhawˇbaˬ “Shiˇ dzeuˇ˗euˬ nga maꞈ tsawˇ haˬ deuˬ, paˇ gʼoꞈ doˆ laˇ tehꞈ˗a” lehˇ ehˇ taˬ˗euˬ meh. Heu gaˇ haw ngeh Yeˬhawˇbaˬ shiˇ dzeuˇ˗euˬ tsawˇ haˬ deuˬ˗ahˇ laˆ dehꞈ˗eu heu naˇ aˬ yawꞈ˗ahˇ doˇ˗eu gaˇ pyeuꞈ˗eu lehˇ haw˗eu lehˇ siˬ laˇ˗eu meh. Miˬyehˇ aˬ yawꞈ maꞈ˗ahˇ noeˬ taˬ˗awˇ aˇ yamˬ tsaˬ laˇ ngeh aˬ yawꞈ maꞈ˗ahˇ bi gʼoꞈ dehꞈ laˇ˗eu meh. Gaˇ kawˆ heu nyoeˬ˗iˇ taˬ˗euˬ aˇ bawˬ deuˬ˗ahˇ bi zoˇ kʼoꞈ laˇ˗eu ceuˬ nehˬ˗ehˇ sheu cehˆ nya meh. Dehꞈ˗eu jeˬ˗euˬ dawˬ pehˬ duˬ puˇ pyeuꞈ˗eu Yeˬhawˇbaˬ shiˇ dzeuˇ˗euˬ deuˬ˗ahˇ paˇ bi gʼoꞈ dehꞈ laˇ˗eu meh. Aˬ dui aˬ yawꞈ maꞈ˗ahˇ ya ha gaˇ laˬ kʼaˬ cehˇ˗eu yaw duˬ baw meh.—Maˬkuˆ 5:42 nehˬ˗ehˇ sheu cehˆ.

15. Gʼoꞈ dehꞈ laˇ˗eu saˇ jaˇ dawˬ gaˇ kawˆ heu naˇ aˬ dui˗ahˇ nui ma cawˆ˗eu jeˬ˗ahˇ deuˆ gʼaˬ nya ni aˬ joˆ˗ehˇ caw ba nehˬ nga?

¹⁵ Gʼoꞈ dehꞈ laˇ˗eu saˇ jaˇ dawˬ gaˇ kawˆ heu aˬ dui˗ahˇ nui ma cawˆ˗eu jeˬ maˬ laˆ byoˆ nehˬ tsehˆ tsehˆ jiˇ nya kʼawꞈ, Yeˬhawˇbaˬ shiˇ dzeuˇ˗euˬ aˬ dui gaˬ˗eu deuˬ˗ahˇ maˬ ngehˇ ngaˬ lehˇ ya siˬ˗eu miˇ neh gʼaˬ ahˇ laˇ miˇ˗a. Noeˬ tmˬ˗eu jeˬ heu naˇ uˬ soe ngehˬ keuˆ taˬ˗euˬ Maiˇkeuˬ˗ahˇ caw ba nehˬ˗euˬ meh. Aˬ yawꞈ heu loꞈ˗ehˇ ehˇ˗eu meh. “Iˇsaˬyaˇ 26:19 heu naˇ ngaˬ˗ahˇ ngaˬ da ngaˬ ma Yeˬhawˇbaˬ˗euˬ mehˬ shi aˇ poeˬ baw ngaˇ lehˇ bi siˬ nehˬ laꞈ˗eu meh. Miˬyehˇ ngaˬ da ngaˬ ma˗ahˇ yaw muiˬ˗ehˇ noeˬ taˬ˗euˬ yaw duˬ baw meh. Aˬ yawꞈ maꞈ˗ahˇ bi gʼoꞈ dehꞈ laˇ˗eu aˇ yamˬ˗ahˇ keuˆ ni teu loꞈ˗ehˇ noeˬ taˬ˗eu yaw duˬ baw meh. Noeˬ tmˬ˗eu jeˬ heu naˇ ngaˬ˗ahˇ gʼaˬ bi kʼaˆ laˇ˗awˇ gʼaˬ biꞈ dui dui miˇ˗a.” Aˬ dui yawˬ ha gaˬ˗eu gʼaˬ nehˬ˗ehˇ ya mawˇ dzoeˇ kʼoꞈ meh lehˇ ehˇ˗eu saˇ jaˇ dawˬ˗ahˇ Aˬ myah luꞈ noeˬ mawˇ luꞈ˗uˇ. Heu loꞈ˗ehˇ jahˇ naˇ nui ma cawˆ˗eu jeˬ˗ahˇ gʼaˬ leˇ nya meh.

16. Shaˬ zahˬ puˬ ngeh nawˬ˗ahˇ gʼaˬ bi ahˇ laˇ˗eu Jaˇliꞈ aˇ deuˆ aˬ geu deuˆ nya?

¹⁶ Aˬ dui Iˇsaˬyaˇ sahˬ boꞈ˗ahˇ neh maˬ noeˬ˗euˬ gaˇ poˆ laˇ paˇ laˇ˗eu jeˬ˗ahˇ ya puˬ ngeh, nui ma cawˆ˗eu maˬ taˬ leˇ ngeh, yawˬ ha gaˬ˗eu gʼaˬ bi shiˇ˗euˬ miˇ neh nui ma cawˆ ngeh, gʼaˬ biꞈ nehˬ˗eu Jaˇliꞈ aˇ deuˆ deuˬ˗ahˇ ya mawˇ˗euˬ ma. Yeˬhawˇbaˬ aˬ dui˗ahˇ Jaˇliꞈ˗ahˇ neh tiˬ tiˆ gʼaˬ biꞈ˗awˇ nui ma laˆ saˇ nehˬ laꞈ˗eu miˇ neh guiˬ lahˬ huiˬ dui dui miˇ˗a. (Ja ceuˬ 94:19) Nawˬ˗ahˇ gʼaˬ baˬ luꞈ ngeh gʼaˬ bi kʼaˆ laˇ˗eu Jaˇliꞈ aˇ deuˆ aˬ geu deuˆ nya? Nawˇ gʼeh nya naˇ Jaˇliꞈ aˇ deuˆ teu˗ahˇ yaw muiˬ˗ehˇ noeˬ taˬ. Nawˬ˗euˬ sahˬ boꞈ paˇ dmˬ˗ahˇ boꞈ ahˇ taˬ. Maˬ ngeuˇ naˇ yaw awˬ˗ehˇ haw mawˇ nya˗eu jawˇ duˬ˗ahˇ dehˬ myahˬ taˬ˗awˇ bi jaˆ. Nawˇ nawˬ˗ahˇ gaˬ˗eu mˬ taˆ Aˬda Yeˬhawˇbaˬ jawˇ gaˇ neh oe˗euˬ dawˬ heu˗ahˇ neh gʼaˬ za luꞈ˗uˇ.