Yawˬ ha˗euˬ nymˇ dahˬ nehˬ˗ehˇ aˬ myah luꞈ yaw gʼoeˇ gʼoeˇ lehˇ jawˇ

1. Muiˬ˗eu cawˬ deuˬ aˬ jeˬ miˇ neh Yeˬhawˇbaˬ jawˇ gaˇ neh oe˗euˬ laꞈ sawˬ pyeuꞈ nga?

Muiˬ˗eu cawˬ heu naˇ, Yeˬhawˇbaˬ jawˇ gaˇ neh oe˗euˬ muiˬ˗eu laꞈ sawˬ pyeuꞈ meh. (Yaˬkoˆ 1:17) Muiˬ˗eu cawˬ deuˬ naˇ, Yeˬhawˇbaˬ˗ahˇ gaˬ˗awˇ aˬ dui˗ahˇ jiˇ gaˬ˗eu meh. Aˬ yawꞈ maꞈ aˬ dui laˬ kʼaˬ cehˇ ngeh cehˇ caw˗awˇ, aˬ dui noeˬ shaˬ kʼahˬ lahˇ ngeh jiˇ gʼaˬ biꞈ nehˬ laꞈ˗eu meh. Aˬ dui˗ahˇ ehˇ paˬ˗ehˇ gʼeh˗eu jeˬ jaˆ naˇ jiˇ dawˇ coe ni ehˇ nehˬ laꞈ˗eu meh. Aˬ yawꞈ maꞈ aˬ dui˗ahˇ aˬ myah luꞈ saˇ jaˇ ziꞈ˗awˇ, aˬ dui aˬ yawꞈ maꞈ˗ahˇ aˬ myah luꞈ nui ma taˬ nya meh. Heu loꞈ˗ehˇ gʼeh˗eu cawˬ deuˬ˗aˬ, aˬ dui˗ahˇ maˇ diˇ ‘laˬ kʼaˬ bi cehˇ˗eu’ meh.—Dawˬdaˬ 27:9.

2. Miˬ sawˇ yo zaˬ deuˬ tiˬ gʼaˬ tiˇ gʼaˬ yaw gʼoeˇ gʼoeˇ lehˇ jawˇ˗eu heu naˇ, aˬ jeˬ miˇ neh aˇ yeˇ huiˬ˗eu nga? (Maꞈtehˬ 19:6)

² Miˬ sawˇ yo zaˬ deuˬ tiˬ gʼaˬ tiˇ gʼaˬ gʼoeˇ˗eu heu naˇ, aˇ yeˇ huiˬ dui dui˗eu meh. Aˬ yawꞈ nyaꞈ gaˇ kawˆ heu˗ahˇ aˇ yeˇ ya taˬ huiˬ˗awˇ, tiˬ gʼaˬ tiˇ gʼaˬ gʼoeˇ ni ya leh jeh daˆ leꞈ˗eu meh. Gaˇ kawˆ heu˗ahˇ aˇ yeˇ maˬ taˬ huiˬ naˇ tiˬ poˆ cuiˆ cuiˆ˗ehˇ gʼawˬ˗iˇ nya˗awˇ, nymˇ gawˬ kʼawꞈ gawˬ laˇ, nui ma jiˇ pehˇ laˇ nya meh. Nyiˬ dzeˇ zaˬ yaw gʼoeˇ gʼoeˇ lehˇ jawˇ naˇ, tsawˇ haˬ nyiˬ gʼaˬ yaw kaˬ laꞈ kʼoeˇ kʼaˇ gʼoeˇ kʼaˇ gaˬ leˇ nya˗eu aˇ tiˆ˗ahˇ le keuˆ˗awˇ laˬ kʼaˬ cehˇ˗eu meh. (Maꞈtehˬ 19:6-ahˇ gui.) Heu kawˆ laꞈ kʼoeˇ miˬ sawˇ yo zaˬ deuˬ aˬ myah luꞈ yaw gʼoeˇ gʼoeˇ lehˇ aˬ joˆ˗ehˇ jawˇ nya˗eu nga lehˇ haw ma. Ehˇ kʼawꞈ, aˬ dui cawˬ maˬ shaˇ baw˗euˬ mehˇ nmˇ deuˬ aˬ myah luꞈ cawˬ pyeuꞈ daˆ leꞈ˗eu yawˬ ha˗euˬ aˇ gu˗ahˇ aˬ joˆ˗ehˇ tseˇ nya˗eu nga? lehˇ jeˬ hu haw ma.

Aˬ myah luꞈ dehꞈ daˆ leꞈ˗eu gʼoeˇ˗eu cawˬ aˬ joˆ˗ehˇ tseˇ nya˗eu nga?

3-4. Cawˬ maˬ shaˇ baw˗euˬ siˬ deuˬ muiˬ˗eu cawˬ aˬ joˆ˗ehˇ poˆ mawˇ nya˗eu nga? (Dawˬdaˬ 18:22)

³ Aˬ dui aˬ jeˬ˗euˬ aˇ yeˇ huiˬ˗eu gaˇ kawˆ˗ahˇ noeˬ tsehˆ˗eu maˬ kaˬ, teu loꞈ˗ehˇ noeˬ tsehˆ naˇ aˬ jeˬ jeˇ˗ahˇ deuˬ laˇ nya˗eu nga? Aˬ joˇ joˆ˗ehˇ pyeuꞈ laˇ nya˗eu nga lehˇ jeˬ hu ya shaˇ noeˬ˗eu meh. Aˬ dui neh noeˬ tsehˆ˗euˬ aˇ yeˇ huiˬ˗eu gaˇ kawˆ aˬ dui˗euˬ tiˬ ziˇ ziˇ lah ni˗ahˇ bi deuˬ laˇ nya˗eu miˇ neh, maˬ noeˬ tsehˆ mi naˆ˗ehˇ yaw muiˬ˗ehˇ shaˇ noeˬ˗eu heu naˇ aˇ yeˇ huiˬ dui dui meh.

⁴ Aˬ myah luꞈ dehꞈ daˆ leꞈ˗eu gʼoeˇ˗eu nymˇ dahˬ˗ahˇ tseˇ˗eu heu naˇ, aˬ dui dehꞈ ziˇ laꞈ kʼoeˇ ya noeˬ tsehˆ˗eu aˇ yeˇ huiˬ dui dui˗eu tiˬ jeˬ pyeuꞈ meh. Yeˬhawˇbaˬ sheuˬ dahˬ dzaˬ˗eu jeˬ˗ahˇ aˇ dahˬ beh˗euˬ gʼaˬ pyeuꞈ˗eu miˇ neh, gaˇ kawˆ heu nehˬ˗ehˇ taꞈ leˇ˗awˇ aˬ dui aˬ yawꞈ˗ahˇ nui noeˬ nui duˇ ya shaˇ˗eu meh.Yeˬhawˇbaˬ aˬ li deuˬ˗ahˇ muiˬ˗eu miˬ zaˬ bi za mawꞈ˗eu loꞈ˗ehˇ, aˬ buˇ deuˬ˗ahˇ jiˇ muiˬ˗eu kʼaˬ dzeˇ zaˬ bi za mawꞈ˗eu meh. Yeˬhawˇbaˬ aˬ dui˗euˬ gʼaˇ duˬ kʼaˇ muiˬ˗eu jeˬ˗ahˇ aˬ myah luꞈ siˬ nya˗eu meh. (Dawˬdaˬ 18:22-ahˇ gui; Iˇsaˬyaˇ 48:17, 18) Jaˇliꞈ zahˇ, cawˬ maˬ shaˇ baw˗euˬ Ka li zaˬ deuˬ˗ahˇ yawˬ ha nehˬ˗ehˇ tsaˬ leˇ˗eu cawˬ˗ahˇ poˆ mawˇ nya ni caw ba nehˬ nya meh.

5. Iˇ cuꞈ shawˇ dzeuˇ˗euˬ deuˬ nehˬ˗ehˇ sheuˬ dahˬ dzaˬ˗eu heu naˇ, aˬ jeˬ miˇ neh aˇ yeˇ huiˬ nga?

⁵ Aˬ dui iˇ cuꞈ shawˇ ngeh Yeˬhawˇbaˬ˗euˬ cawˬ pyeuꞈ laˇ˗euˬ ma. (Ja ceuˬ 25:14) Teu miˇ neh aˬ dui nymˇ dahˬ baw mawꞈ naˇ, Yeˬhawˇbaˬ˗euˬ cawˬ deuˬ laꞈ kʼoeˇ ya tseˇ˗eu meh. (1 Gawˇliˬtu 7:39) Nawˇ teu loꞈ˗ehˇ jahˇ naˇ, Yeˬhawˇbaˬ˗euˬ tsaˬ˗eu dawˇ˗eu zahˇ˗ahˇ aˇ poeˬ taˬ baw˗eu lehˇ mˇ mawˇ˗eu jeˬ pyeuꞈ˗awˇ, yawˬ ha˗euˬ nymˇ dahˬ Yeˬhawˇbaˬ jawˇ gaˇ neh oe˗euˬ laꞈ sawˬ pyeuꞈ gaˇ ya mawˇ˗eu meh. (Dawˬdaˬ 19:14) Kʼoeˇ naˇ Yeˬhawˇbaˬ˗ahˇ maˬ gaˬ˗eu deuˬ˗ahˇ yuˇ˗euˬ miˇ neh ya puˬ˗eu shaˬ zahˬ deuˬ˗ahˇ jiˇ yahˇ pyawˇ nya˗eu meh. (2 Gawˇliˬtu 6:14) Aˇ muˇ laꞈ kʼoeˇ ngaˬ nehˬ˗ehˇ tsaˬ leˇ˗eu gʼaˬ maˬ jawˇ nga lehˇ noeˬ˗awˇ jah˗eu jeˬ maˬ duˇ leˇ˗eu deuˬ nehˬ˗ehˇ zaˬ kʼaˬ taˬ˗eu maˬ ehˇ, teu gʼaˬ˗ahˇ Yeˬhawˇbaˬ˗euˬ Saˇ kiˇ pyeuꞈ laˇ ni caw ba nehˬ nya ma lehˇ noeˬ˗eu maˬ ehˇ, nui gahˇ maˬ ahˇ˗eu jeˬ pyeuꞈ meh.

6-7. Nawˇ tiˬ gʼaˬ gʼaˬ nehˬ˗ehˇ ngehˬ cawˬ luꞈ ngeh yawˬ ha˗ahˇ aˬ joˆ joˆ˗ehˇ naˇ haˬ nya˗eu nga?

⁶ Iˇ cuꞈ shawˇ dzeuˇ˗euˬ yawˬ gʼaˬ na luꞈ, aˬ dui nehˬ˗ehˇ tsaˬ leˇ˗eu nymˇ dahˬ pyeuꞈ˗eu maˬ ngeuˇ˗a. Nawˇ tiˬ gʼaˬ paˬ˗ahˇ nui ma ahˇ naˇ yawˬ ha˗ahˇ heu loꞈ˗ehˇ naˇ haˬ.a ‘Aˬ yawꞈ nymˇ jiˇ laꞈ kʼoeˇ˗euˬ deuˬ˗ahˇ aˬ joˆ˗ehˇ mˇ nehˬ˗eu nga? Aˬ yawꞈ aˬ cawˬ˗ahˇ noeˬ keuˆ nehˬ˗awˇ yaw zeu baw ngaˇ laˬ? Aˬ yawꞈ aˬ suˇ gʼaˬ nehˬ˗ehˇ cawˬ cawˬ˗eu nga? Aˬ cawˬ nehˬ˗ehˇ noeˬ˗eu jeˬ maˬ duˇ leˇ ngeh aˬ joˆ˗ehˇ jahˇ˗eu nga? Aˬ yawꞈ yawˬ ha˗euˬ nui noeˬ tehꞈ˗ehˇ geuꞈ nga laˬ? Jaˇliꞈ zahˇ˗ahˇ maˬ bahˬ˗euˬ taꞈ naˇ aˬ cawˬ˗euˬ nui noeˬ geuꞈ nehˬ ngaˇ laˬ? Aˬ yawꞈ pyuˇ˗euˬ gaˇ kawˆ˗ahˇ aˬ joˆ˗ehˇ haw˗eu nga?’

⁷ Kʼoeˇ naˇ yawˬ ha˗ahˇ jiˇ heu loꞈ˗ehˇ naˇ haˬ ‘Aˬ yawꞈ Yeˬhawˇbaˬ˗ahˇ yaw kʼaˆ˗ehˇ gaˬ ngaˇ laˬ? “Nui ma yaw shuiꞈ” dm paˇ luꞈ ngaˇ laˬ? Aˬ yawꞈ ngaˬ˗ahˇ Yeˬhawˇbaˬ˗euˬ gaˇ˗ahˇ heu naˆ maˬ tseˇ mˇ nya dzehˬ laˇ ni caw ba nehˬ ngaˇ laˬ? Miˬyehˇ gaˇ laꞈ kʼoeˇ aˇ pyaˇ daˬ taˬ˗euˬ jeˬ nawˬ˗euˬ nehˬ˗ehˇ duˇ leˇ ngaˇ laˬ? Aˬ yawꞈ ngaˬ˗euˬ cawˬ kʼaˇ gʼoeˇ˗eu gʼaˬ pyeuꞈ laˇ nya paˬ˗ehˇ gʼeh ngaˇ laˬ?’ (Gawˇlawˇsehˇ 3:9, 10) Nawˇ mehˇ nmˇ aˬ buˇ pyeuꞈ naˇ, nawˇ ngehˬ cawˬ luꞈ˗eu mehˇ nmˇ teu gʼaˬ muiˬ˗eu nymˇ sahˇ aˬ da hawˇ˗eu muiˬ˗eu cawˬ pyeuꞈ nya paˬ˗ehˇ gʼeh ngaˇ laˬ lehˇ shaˇ noeˬ. (1 Gawˇliˬtu 11:3) Nawˇ mehˇ nmˇ aˬ li pyeuꞈ naˇ, nawˇ ngehˬ cawˬ luꞈ˗eu mehˇ nmˇ teu gʼaˬ nawˇ maˬ byah kuꞈ kʼawꞈ nymˇ sahˇ aˬ da˗euˬ uˆ lahˇ˗eu uˬ moˆ nui ma keuˆ˗eu laꞈ kʼoeˇ jawˇ ngaˇ laˬ lehˇ haw. Gaˇ kawˆ heu deuˬ˗ahˇ si nya˗eu gʼaˇ duˬ aˇ yamˬ ya zmˬ meh. Teu miˇ neh zaˬ kʼaˬ taˬ ngeh yamˬ˗ahˇ tiˬ gʼaˬ tiˇ gʼaˬ yaw muiˬ˗ehˇ siˬ nya laˇ ni leh jeh.

8-9. Zaˬ kʼaˬ baw luꞈ˗eu deuˬ˗ahˇ yaw muiˬ˗ehˇ noeˬ tsehˆ nya ni caw ba nehˬ˗eu jeˬ naˇ aˬ jeˬ nga? (Aˇ baˇ˗ahˇ jiˇ haw.)

⁸ Zaˬ kʼaˬ taˬ ngeh yamˬ˗ahˇ nawˇ ngehˬ cawˬ luꞈ˗eu gʼaˬ aˬ joˆ˗ehˇ gʼeh˗eu tsawˇ haˬ pyeuꞈ˗eu lehˇ yaw muiˬ˗ehˇ siˬ nya naˇ, yaw muiˬ˗ehˇ noeˬ tsehˆ nya˗eu meh. Nawˬ˗euˬ zaˬ kʼaˬ nehˬ˗ehˇ taꞈ leˇ˗awˇ aˬ cawˬ deuˬ aˬ joˆ˗ehˇ noeˬ˗eu nga lehˇ naˇ haˬ haw. Aˬ yawꞈ aˬ joˆ˗ehˇ gʼeh˗eu tiˬ gʼaˬ pyeuꞈ˗eu gaˇ kawˆ hawˇ˗eu tsawˇ myahˇ aˬ joˆ˗ehˇ jaˆ luꞈ nga lehˇ naˇ haˬ haw. Yaw jeˬ ma jeˬ, aˬ cawˬ deuˬ aˬ yawꞈ˗ahˇ taˬ aw˗eu uˬ taꞈ, gʼawˬ shaˬ gaˬ˗awˇ, gaˇ kahˇ dahˇ˗eu tiˬ gʼaˬ lehˇ haw ngaˇ laˬ? Mehˇ nmˇ Dehˇniˬ˗oˬ˗ahˇ dahˬ dzaˬ˗iˇ˗euˬ Paˬ˗leˬ Giˬ˗yaˇnaˬ˗ahˇ jawˇ˗eu mehˇ nmˇ Saˬlaˇ heu loꞈ˗ehˇ ehˇ˗eu meh. “Ngaˇ Dehˇniˬ˗oˬ, aˬ joˆ˗ehˇ gʼeh˗eu tiˬ gʼaˬ pyeuꞈ˗eu lehˇ siˬ nya mawꞈ˗eu miˇ neh, aˬ yawꞈ˗ahˇ yaw muiˬ˗ehˇ siˬ nya˗eu gʼawˬ mya gʼaˬ˗ahˇ naˇ haˬ˗euˬ ma. Aˬ yawꞈ nehˬ˗ehˇ tiˬ kahˇ laꞈ kʼoeˇ jawˇ˗eu huˬ mehˬ mehˬ˗eu tiˬ gʼaˬ˗ahˇ maˬ ehˇ, aˬ yawꞈ˗euˬ aˇ muˇ laꞈ kʼoeˇ˗euˬ sheuˬ gʼeh˗eu deuˬ˗ahˇ maˬ ehˇ, nga nyaꞈ˗euˬ cawˬ deuˬ˗ahˇ maˬ ehˇ, aˬ yawꞈ˗euˬ aˇ muˇ laꞈ kʼoeˇ˗euˬ mehˇ nmˇ deuˬ˗ahˇ maˬ ehˇ, ngehˬ cawˬ˗iˇ˗euˬ ma.” Kʼoeˇ naˇ nawˬ˗euˬ zaˬ kʼaˬ˗ahˇ dzeuˇ laꞈ ngeh maˬ ehˇ, nymˬ˗mˇ maˬ ehˇ, bi siˬ mawꞈ˗eu gaˇ kawˆ jaˆ miˇ˗a laˬ lehˇ naˇ haˬ haw. Heu naˇ nymˇ dahˬ laꞈ kʼoeˇ gaˇ kawˆ bi doˆ laˇ nya˗eu miˇ neh, gaˇ kawˆ heu deuˬ˗ahˇ siˬ nya˗eu aˇ yeˇ huiˬ meh.

⁹ Nawˬ˗ahˇ nawˇ ngehˬ cawˬ luꞈ˗eu gʼaˬ nehˬ˗ehˇ taꞈ leˇ˗awˇ, nui ma maˬ saˇ˗eu tiˬ jeˬ paˬ jaˆ ngeh maˬ ehˇ, noeˬ dahˇ doe˗eu mehˇ nmˇ deuˬ tiˬ jeˬ na dawˇ coe ni ehˇ nehˬ laꞈ ngeh maˬ ehˇ, tiˬ jeˬ˗iˬ maˬ ngeuˇ˗a lehˇ noeˬ˗awˇ taˬ jawˇ. Gaˇ kawˆ heu naˇ, nawˬ˗ahˇ aˬ yawꞈ nehˬ˗ehˇ sheuˬ dahˬ dzaˬ˗eu laˬ, maˬ ngeuˇ naˇ gʼawˬ iˇ˗eu laˬ lehˇ yaw muiˬ˗ehˇ noeˬ tsehˆ nya ni caw ba nehˬ meh.b Nymˬ˗mˇ aˬ dui miˬ sawˇ yo zaˬ deuˬ yaw gʼoeˇ gʼoeˇ lehˇ jawˇ nya˗eu gʼaˇ duˬ, aˬ joˆ˗ehˇ ya jahˇ˗eu nga lehˇ haw ma.

Gʼoeˇ dzehˬ laˇ˗eu gʼaˇ duˬ tiˬ gʼaˬ tiˇ gʼaˬ aˇ yamˬ biꞈ

10. Miˬ sawˇ yo zaˬ tiˬ gʼaˬ tiˇ gʼaˬ aˇ yamˬ biꞈ˗eu aˬ jeˬ miˇ neh loˬ˗eu nga?

¹⁰ Miˬ sawˇ yo zaˬ deuˬ gaˇ aˇ naˆ myaˬ kʼawꞈ tiˬ gʼaˬ tiˇ gʼaˬ aˇ yamˬ biꞈ naˇ, aˬ myah luꞈ gʼoeˇ˗awˇ gaˬ˗awˇ nymˇ dahˬ ziꞈ dah ni gʼeh˗eu meh. Heu naˇ aˬ yawꞈ nyaꞈ˗ahˇ iˬ nah aˬ joˆ˗ehˇ nya lehˇ tiˬ gʼaˬ tiˇ gʼaˬ ngehˬ cawˬ˗eu aˇ yamˬ bi doˆ laˇ˗awˇ, nui ma˗ahˇ pyeuꞈ luꞈ˗eu jeˬ dzawˇ doˆ˗eu aˇ yamˬ, tiˬ gʼaˬ tiˇ gʼaˬ gʼoeˇ law gaˬ law˗ehˇ cawˬ cawˬ taꞈ˗eu aˇ yamˬ, gʼaˬ naˬ naˬ˗awˇ byawˬ gʼa cehˇ gʼa˗eu aˇ yamˬ bi doˆ laˇ˗eu meh.

11. Miˬ sawˇ yo zaˬ˗ahˇ maˬ bi gʼoeˇ maˬ bi gaˬ˗eu jeˬ naˇ aˬ jeˬ nga?

¹¹ Gʼoeˇ law gaˬ law˗ehˇ dehꞈ˗eu miˬ sawˇ yo zaˬ deuˬ naˇ tiˬ gʼaˬ tehꞈ˗ehˇ yaw ceuˆ ceuˆ lehˇ jawˇ˗eu maˬ leh jeh ni, tiˬ gʼaˬ tiˇ gʼaˬ aˇ yamˬ biꞈ˗eu meh. Tiˬ poˆ na nmˇ tiˬ gʼaˬ tiˬ gaˇ ya jawˇ laˇ˗eu jaˆ meh. Ehˇ kʼawꞈ tiˬ gʼaˬ tiˬ gaˇ gʼawˬ myahˇ ni jawˇ naˇ lehˬ laˇ ca laˇ nya meh. Yaw jeˬ ma jeˬ, tiˬ gʼaˬ na aˬ cawˬ˗euˬ miˇ kʼahˬ˗ahˇ gaˇ mˇ˗iˇ˗eu meh. Teu naˇ yawˬ ha˗euˬ nymˇ jiˇ nehˬ˗ehˇ aˬ yamˬ gʼawˬ myahˇ ni bi gʼawˬ˗iˇ˗eu meh. Pyuˇ gʼawˬ mya poˆ za nya˗eu nmˇ ngeuˇ kʼawꞈ, nymˇ dahˬ lehˬ laˇ ca laˇ nya meh.

12-13. (a) Miˬ sawˇ yo zaˬ tiˬ gu na tiˬ gʼaˬ tiˇ gʼaˬ aˇ yamˬ biꞈ˗eu gʼaˇ duˬ aˬ jeˬ jahˇ˗eu nga? (Aˇ ba˗ahˇ jiˇ haw.) (b) Aˬ dui yawˬ ha˗euˬ nymˇ dahˬ˗ahˇ dehꞈ ziˇ laꞈ kʼoeˇ aˇ naˆ ni aˇ yeˇ bi huiˬ paˬ˗ehˇ gʼeh˗eu nga? (“Nawˬ˗euˬ nymˇ dahˬ nawˬ˗euˬ dehꞈ ziˇ laꞈ kʼoeˇ aˇ naˆ ni aˇ yeˇ huiˬ˗a?” lehˇ ehˇ˗eu oeˬ coeˇ oeˬ bawˬ˗ahˇ haw.)

¹² Miˬ sawˇ yo zaˬ tiˬ gu na tiˬ gʼaˬ tiˇ gʼaˬ aˇ yamˬ biꞈ˗eu gʼaˇ duˬ aˬ joˆ˗ehˇ jahˇ˗eu nga? Guˬamˬ˗ahˇ jawˇ˗eu mehˇ nmˇ Leˇaˬ heu loꞈ˗ehˇ ehˇ˗eu meh. “Nga nyaꞈ dzeˇ zaˬ aˬ jeˬ jahˇ kʼawꞈ tiˬ kawˆ lo˗ehˇ jahˇ˗eu ma. Dzaˬ taꞈ dawˇ taꞈ gaˇ lawˬ muˇ jiˇ tiˬ gʼaˬ tehꞈ˗ehˇ iˇ˗eu lehˇ yaw kʼaˆ˗ehˇ maˬ baw.” Aˬmeˬliˇkaˬ miˇ kʼahˬ˗ahˇ jawˇ˗eu mehˇ nmˇ Lawˇsehˆ heu loꞈ˗ehˇ ehˇ˗eu meh. “Nga nyaꞈ aˇ yeˇ huiˬ˗eu gaˇ deuˬ mˇ˗eu gʼaˇ duˬ aˇ yamˬ laˆ baw taˬ˗euˬ loꞈ˗ehˇ, tiˬ gʼaˬ tiˇ gʼaˬ aˇ yamˬ aˬ geu ngeh biꞈ˗eu lehˇ laˆ baw taˬ˗eu ma. ” (Aˬmoˆ 3:3 nehˬ˗ehˇ sheu cehˆ.) Paˇlaˬ miˇ kʼahˬ˗ahˇ˗euˬ mehˇ nmˇ Deˇmiˬ˗yaˬ “Nga nyaꞈ aˬ jeˬ jahˇ˗eu ya leˇ˗eu nga lehˇ haw˗eu ma. Nga nyaꞈ teu˗ahˇ leh jeh˗awˇ mˇ daˆ leꞈ ngeh tiˬ jawˇ, uˬ duˬ duˬ leˇ ngeh ya leˇ˗eu jeˬ duˇ leˇ˗eu meh” lehˇ ehˇ˗eu meh. (Maꞈtehˬ 7:12) Aˬmeˬliˇkaˬ miˇ kʼahˬ˗ahˇ jawˇ˗eu mehˇ nmˇ Keˇtiˬ jiˇ heu loꞈ˗ehˇ ehˇ˗eu meh. “Nga nyaꞈ tiˬ gʼaˬ tiˇ gʼaˬ aˇ yamˬ biꞈ˗awˇ byawˬ nya˗eu gʼaˇ duˬ tiˬ poˆ na naˬ gaˬ gaˇ mahˇ kaˬ gaˇ yuˇ taˬ˗euˬ ma.”

¹³ Aˇ yeˇ kʼaˇ huiˬ˗eu jeˬ naˇ, nyiˬ dzeˇ zaˬ luꞈ Ka li zaˬ˗euˬ mˇ jeˬ shaˇ kawˆ deuˬ˗ahˇ tiˬ kawˆ loꞈ˗ehˇ mˇ˗eu heu pyeuꞈ meh. Paˇlaˬ miˇ kʼahˬ˗ahˇ jawˇ˗eu mehˇ nmˇ Miˇliꞈ˗amˬ heu loꞈ˗ehˇ ehˇ˗eu meh. “Nga nyaꞈ uˬ shawˬ yawˬ shawˬ na luꞈ Jaˇliˬ tiˬ kawˆ loꞈ˗ehˇ gui˗eu ma. Kʼoeˇ naˇ aˬ geu tsahˇ˗ahˇ ya leˇ˗awˇ, dehꞈ ziˇ laꞈ kʼoeˇ aˬ joˆ˗ehˇ zmˬ˗iˇ paˬ nga lehˇ ja sawˇ˗eu ma. Ngaˬ˗ahˇ heu loꞈ˗ehˇ ya jahˇ gaˇ ya leˇ˗eu lehˇ miˇ˗a. Ngaˬ˗ahˇ guiˬ lahˬ tiˬ kawˆ loꞈ˗ehˇ ya shaˇ˗eu aˇ yamˬ˗ahˇ zawˇ˗ehˇ ya leˇ nya. Ngaˬ˗euˬ kʼaˬ dzeˇ zaˬ aˬ yawꞈ Yeˬhawˇbaˬ˗ahˇ aˇ naˆ ni gaˬ˗eu lehˇ ngehˬ gaˇ ya gaˬ˗eu meh.” Uˬ soe ngehˬ keuˆ taˬ˗euˬ mehˇ nmˇ Keˇtiˬ heu loꞈ˗ehˇ ehˇ˗eu meh. “Ngaˬ˗ahˇ naˇ Miˬyehˇ˗euˬ gaˇ tiˬ kawˆ loꞈ˗ehˇ ya mˇ taꞈ˗iˇ gaˇ ya leˇ nya. Aˬ jeˬ miˇ neh ehˇ naˇ, teu ngeh ngaˬ˗euˬ nymˇ dahˬ aˬ yawꞈ˗euˬ nui jah gaˇ kawˆ nehˬ˗ehˇ taꞈ leˇ˗awˇ dzawˇ nehˬ˗eu ya gaˬ˗awˇ, tiˬ gʼaˬ tiˇ gʼaˬ yaw shuiꞈ gʼawˬ mya jeˬ dzaw geuꞈ nya˗eu miˇ neh.”—Dawˬdaˬ 27:17.

Shaˬ zahˬ gaˇ kawˆ jaˆ ngeh kʼawꞈ yaw gʼoe gʼoeˇ lehˇ jawˇ

14-15. Miˬ sawˇ yo zaˬ deuˬ nymˇ dahˬ laꞈ kʼoeˇ gaˇ kawˆ doˆ laˇ ngeh aˬ jeˬ miˇ neh leh jeh˗awˇ deuˆ gʼaˬ paˬ˗ehˇ gʼeh˗eu nga? Yaw jeˬ ma jeˬ ehˇ haw.

¹⁴ Aˬ dui yawˬ gʼaˬ na luꞈ maˬ byah kuꞈ˗eu tsawˇ haˬ pyeuꞈ ma. Teu miˇ neh nymˇ dahˬ laꞈ kʼoeˇ gaˇ kawˆ jaˆ laˇ˗eu yaw duˬ baw meh. Jaˇliꞈ laꞈ kʼoeˇ “sheuˬ dahˬ dzaˬ˗euˬ tsawˇ haˬ deuˬ miˇ tsaˬ heu kʼoeˇ taˆ ya puˬ˗eu shaˬ zahˬ deuˬ˗ahˇ ya puˬ meh” lehˇ dawˇ coe ni ehˇ taˬ˗euˬ meh. (1 Gawˇliˬtu 7:28) Shaˬ zahˬ gaˇ kawˆ˗ahˇ ya pu ngeh, miˬ sawˇ yo zaˬ deuˬ gaˇ kawˆ teu deuˬ˗ahˇ deuˆ gʼaˬ nya˗awˇ, yaw gʼoeˇ yaw gaˬ gaˬ˗ehˇ dehꞈ daˆ leꞈ˗eu aˬ jeˬ miˇ neh aˇ yeˇ hui˗eu nga?

¹⁵ Yaw jeˬ ma jeˬ gaˇ kawˆ heu˗ahˇ shaˇ noeˬ haw. Nymˇ goˇ maˬ ngeuˇ naˇ tsawˇ myahˇ doˆ˗eu aˇ baˇ tiˬ hmˬ cawˆ˗iˇ˗euˬ lehˇ ehˇ˗awˬ. Yaw sahˇ gʼaˬ pyuˇ aˇ myaˆ jiˇ˗awˇ, aˇ yamˬ aˇ myah ni ga leˇ kʼawꞈ, laˆ saˆ˗eu meh. Aˬ jeˬ miˇ neh nga? Teu naˇ aˬ yawꞈ˗euˬ gʼaˇ duˬ aˇ poeˬ baw dui dui˗eu jeˬ pyeuꞈ˗eu miˇ neh meh. Teu gaˇ duˇ ni nymˇ dahˬ heu jiˇ aˇ poeˬ baw dui dui˗eu meh. Teu miˇ neh gaˇ kawˆ jaˆ laˇ ngeh kʼawꞈ, maˬ gʼawˬ˗iˇ ni yaw muiˬ˗ehˇ ya laˆ saˆ geuꞈ˗eu meh. Nymˇ dahˬ laꞈ kʼoeˇ gaˇ kawˆ jaˆ laˇ˗eu yaw duˬ baw meh. Gaˬ dui gʼoeˇ dui dui˗eu nymˇ dahˬ deuˬ kʼawꞈ gaˇ kawˆ jaˆ nya meh. Cawˆ˗iˇ˗euˬ nymˇ goˇ hawˇ˗eu aˇ baˇ laˆ saˆ muiˬ kʼoꞈ nya˗eu loꞈ˗ehˇ, nymˇ dahˬ deuˬ jiˇ muiˬ kʼoꞈ laˇ ni jahˇ nya meh. Miˬ sawˇ yo zaˬ deuˬ yawˬ ha˗euˬ nymˇ dahˬ˗ahˇ laˆ saˆ daˆ leꞈ naˇ, Yeˬhawˇbaˬ nui kʼahˇ shiˇ˗eu yaw duˬ baw meh. (Maˬlaˬkiˇ 2:16) Nyiˬ dzeˇ zaˬ luꞈ nymˇ dahˬ˗ahˇ laˆ saˆ˗eu leh jeh naˇ, yaw ha˗euˬ nymˇ dahˬ˗ahˇ gaˬ˗awˇ aˇ poeˬ taˬ baw˗eu lehˇ mˇ mawˇ˗eu jeˬ pyeuꞈ meh. Kʼoeˇ naˆ maˬ tseˇ sheuˬ dahˬ dzaˬ˗eu jeˬ˗ahˇ beh˗euˬ yaw sahˇ pyeuꞈ˗eu Yeˬhawˇbaˬ˗ahˇ gaˬ˗awˇ yaw zeu baw˗eu lehˇ mˇ mawˇ˗eu jeˬ pyeuꞈ meh.

16. Nymˇ dahˬ laꞈ kʼoeˇ gaˇ kawˆ jaˆ laˇ naˇ, 1 Gawˇliˬtu 13:4-8 laꞈ kʼoeˇ˗euˬ nui noeˬ nui duˇ aˬ joˆ˗ehˇ caw ba nehˬ nya˗eu nga? (Aˇ baˇ hawˇ˗eu “Aˬ myah luꞈ gʼoeˇ ni gaˬ ni caw ba nehˬ˗eu jeˬ” lehˇ˗eu oeˬ coeˇ oeˬ bawˬ˗ahˇ haw.)

¹⁶ Nymˇ dahˬ laꞈ kʼoeˇ gaˇ kawˆ jaˆ laˇ naˇ, gʼawˬ˗eu taˬ tehˬ. (1 Gawˇliˬtu 7:10, 11) Teu loꞈ˗ehˇ jahˇ ngeh to˗aˬ, yawˬ ha˗ahˇ ‘Nga nyaꞈ yaw kaˬ gʼoeˇ dzehˬ laˇ ni aˬ jeˬ jeˇ jahˇ nya˗eu nga?’ lehˇ naˇ haˬ. Jaˇliꞈ˗ahˇ nui gaˬ mˇ mawˇ˗eu gaˇ kawˆ nehˬ˗ehˇ taꞈ leˇ˗awˇ aˬ joˆ˗ehˇ ehˇ taˬ˗euˬ nga lehˇ haw˗awˇ, yawˬ ha˗ahˇ 1 Gawˇliˬtu 13:4-8 (Gui.) laꞈ kʼoeˇ˗euˬ nui noeˬ nui duˇ˗ahˇ huiˬ laˇ mahˇ laˇ ni jahˇ nya miˇ˗a laˬ lehˇ naˇ haˬ haw. Gʼawˬ˗eu lehˇ tehꞈ˗ehˇ leh jeh ngeh to˗aˬ, muiˬ kʼoꞈ gaˬ kʼoꞈ laˇ ni leh jeh. Nymˇ dahˬ bi ziꞈ˗eu gʼaˇ duˬ yawˬ ha aˬ jeˬ jahˇ nya˗eu nga lehˇ haw tsoˆ taˬ. Yeˬhawˇbaˬ neh bi sheuˬ hehˇ˗eu gʼaˇ duˬ guiˬ lahˬ shaˇ. Nawˇ nui noeˬ nui duˇ, aˇ maꞈ aˇ muˇ˗euˬ paˇ dmˬ deuˬ hawˇ˗eu biˬdiˬoˬ deuˬ˗ahˇ haw nya˗eu uˬ taꞈ, aˇ muˇ˗ahˇ sheuˬ gʼeh˗eu deuˬ hawˇ˗eu noeˬ dahˇ doe˗eu mehˇ nmˇ deuˬ˗ahˇ neh jiˇ shaˇ nya meh. Naw nyaꞈ nymˇ dahˬ laꞈ kʼoeˇ Yeˬhawˇbaˬ˗ahˇ aˇ yeˇ taˬ huiˬ dui dui naˇ, naw nyaꞈ˗euˬ nymˇ dahˬ “maˬ gʼeu tsehˆ coeˇ˗eu” “aˇ caˆ smˬ caˆ yeuꞈ taˬ˗euˬ” caˆ yeuꞈ nehˬ˗ehˇ duˇ˗eu meh.—Dawˬtsoˆ 4:12.

17. Sheuˬ dahˬ dzaˬ˗eu lehˇ noeˬ˗eu deuˬ hawˇ˗eu sheuˬ dahˬ dzaˬ dzeuˇ˗euˬ deuˬ laˬ kʼaˬ aˬ joˆ˗ehˇ cehˇ nya˗eu nga?

¹⁷ Yeˬhawˇbaˬ sheuˬ dahˬ dzaˬ˗eu lehˇ gʼeh˗eu deuˬ˗ahˇ maˬ ehˇ, sheuˬ dahˬ dzaˬ dzeuˇ˗euˬ deuˬ˗ahˇ maˬ ehˇ, laˬ kʼaˬ tiˬ cehˇ bi dehꞈ mawꞈ˗eu meh. Nawˇ sheuˬ dahˬ dzaˬ˗eu lehˇ shaˇ noeˬ luꞈ naˇ, yaw muiˬ paˬ˗ehˇ haw˗awˇ tseˇ. Aˬ jeˬ miˇ neh ehˇ naˇ, nawˇ sheuˬ dahˬ dzaˬ˗eu lehˇ gʼeh˗eu teu gʼaˬ naˇ, nawˬ˗euˬ maˬ shiˇ tiˬ ziˇ cawˬ pyeuꞈ gʼeh˗eu miˇ neh meh. Nawˇ sheuˬ dahˬ dzaˬ dzeuˇ˗euˬ tiˬ gʼaˬ pyeuꞈ naˇ, yawˬ ha˗euˬ nymˇ dahˬ nehˬ˗ehˇ gʼoeˇ law gaˬ law˗ehˇ dehꞈ daˆ leꞈ. Dahˬ dzaˬ ngeh ya puˬ˗eu shaˬ zahˬ deuˬ˗ahˇ deuˆ gʼaˬ˗awˇ, Yeˬhawˇbaˬ˗ahˇ gʼoe. Nawˇ heu deuˬ dawˬ tawˆ luꞈ˗ahˇ jahˇ caw naˇ, nawˇ yawˬ ha gaˬ˗eu gʼaˬ nehˬ˗ehˇ laˬ kʼaˬ tiˬ cehˇ ya dehꞈ meh.—Dawˬtsoˆ 9:9.