OZUMALƐDƖYƐ 18
Kɛ Ɩkɛyɛ Na Yɛanwʋ Nɔhʋanlɛ Kilisinyiamaa?
Mmenii abʋmɩ abʋmɩ sʋ̃maa kã kɛɛ bɛdɩ Kilisinyiamaa. Naasʋ̃ ɩsʋnɩ bo nu bela yi dedi nɩɩ mmɛla mɔɔ bɛfa bɔbɔ bɛ ɛbɩla. Meti kɛ ɩkɛyɛ na yɛanwʋ nɔhʋanlɛ Kilisinyiamaa?
1. Aninyia yɛ lɛ Kilisinyianii a?
Kilisinyiamaa bɛdɩ Gyisɛsɩ Kɩlayɩsɩ yɩ adʋwavʋlɔ anzɛnyɩɩ yɩ mɛdalilɛmaa. (Kɩnga Egyima 11:26.) Mɩnla ɔhʋanɩ zʋ yɛ bɛda yɩ ali kɛɛ bɛdɩ Gyisɛsɩ yɩ adʋwavʋlɔ a? Ɩhanlɩ kɛɛ: “Sɛ mʋnlʋmmɔ bedidi mʋ odwokɔ nɩ zʋ a, nɩ mʋnlʋmmɔ bɛdɩ mɩ adʋwavʋlɔ amba.” (Dwɔɔnʋ 8:31) Eyi ikile kɛɛ ɩsɛ kɛɛ nɔhʋanlɛ Kilisinyiamaa bɛfa Gyisɛsɩ yɩ ehilehilelɛ bɛyɛ egyima. Na kɛmɔ nɩ Gyisɛsɩ yɩ ehilehilelɛ igyĩ Ɛhɛlɛlɛ Odwokɔ yɩ zʋ nɩ, ɔzɔ la yɛ nɔhʋanlɛ Kilisinyiamaa sʋ̃ bɛfa be dedi bekyina Bayɩbʋlʋ yɩ zʋ a.—Kɩnga Luuku 24:27.
2. Mɩnla ɔhʋanɩ zʋ yɛ nɔhʋanlɛ Kilisinyiamaa bɛda ɔlɔlɛ ali a?
Gyisɛsɩ ɩhanlɩ ihileli yɩ adʋwavʋlɔ yɩ kɛɛ: “Bɔlɔ bɔ nwʋ nkʋ̃kʋ̃ nkʋ̃kʋ̃ kɛmɔ mʋdɔ mʋnlʋmmɔ nɩ.” (Dwɔɔnʋ 15:12) Mɩnla ɔhʋanɩ zʋ yɛ Gyisɛsɩ ɩlalɩ ɔlɔlɛ ali ihileli yɩ adʋwavʋlɔ yɩ a? Inyianlɩ mmɩlɩ ɩmanlɩ bɛ, ɩhyɛlɩ bɛ ɛzɩzɩbɛ, na ɩwʋwalɩ bɛ. Ɩvalɩ yɩ nnwʋanlɩ po idianlɩ ɛkɛnɩ ɩmanlɩ bɛ. (1 Dwɔɔnʋ 3:16) Ɔzɔ la yɛ nɔhʋanlɛ Kilisinyiamaa bɛáva bo munwa bɛkã kɛkɛ kɛɛ bɔwɔ ɔlɔlɛ, mfomi bɛfa bo munwa ndɛnɩ nɩɩ bɛ nyɛlɩyɛ bekile kɛɛ bɔdɔ bɔ nwʋ nkʋ̃kʋ̃ nkʋ̃kʋ̃.
3. Mɩnla egyima yɛ Nɔhʋanlɛ Kilisinyiamaa bɔbɔ mmɔdɩnɩ bɛyɛ a?
Gyisɛsɩ ɩvalɩ egyima be iwulalɩ yɩ adʋwavʋlɔ nɩ mmɔ bɛ sa. “Ɩzʋ̃manlɩ bɛ kɛɛ bɔhɔ́ bɔwɔ Nyamɩnlɩ Bulombunlililɛ nɩ nwʋ ɛlawulo.” (Luuku 9:2) Ɔwɔkɩ Kilisinyiamaa nɩ, bɛákã odwokɔba yɩ wɔ dɩka mɔɔ beyiyia numɔ bɔsʋ̃mɩ la, mfomi bɛhanlɩ wɔ kua zʋ nɩɩ mmenii bɛ abika nu sʋ̃. (Kɩnga Egyima 5:42; 17:17.) Nnɛ sʋ̃, nɔhʋanlɛ Kilisinyiamaa bɛkã Bayɩbʋlʋ nu nɔhʋanlɛ odwokɔ bekile mmenii wɔ dɩka bela. Bɔdɔ mmenii, meti bɔzʋ̃ bɛ ahʋnlɩnɩ nu bɛfa bɛ mmɩlɩ nɩɩ bɛ anwʋzɩzɩbɛ bɛkã Bayɩbʋlʋ nu odwokɔ bekile mmenii ma benyia anyɩnlɩlazʋ nɩɩ ɛɣɛɛlɛyɩkyɩlɛ.—Maakɩ 12:31.
SUMÁ SƲ̃MAA
Sumá mɔɔ ɩkɛma ɔkɔnwʋ nɔhʋanlɛ Kilisinyiamaa nɩɩ bɛzabɛ mɔɔ bɛáva Gyisɛsɩ yɩ ehilehilelɛ nɩɩ ndianwʋ bɛyɛ egyima nɩ.
4. Bɛpɩbɛ nɔhʋanlɛ mɔɔ ɩwɔ Bayɩbʋlʋ yi nu
Ɔwɔkɩ Kilisinyiamaa nɩ, nɩ Nyamɩnlɩ Odwokɔ yɩ ɩtʋ bʋlɔ ɩma bɛ
Kɛ bɛzabɛ mɔɔ bɛkã kɛɛ bɛdɩ Kilisinyiamaa munwala yɛ bɛfa Bayɩbʋlʋ nu nɔhʋanlɛ yɩ bɛyɛ egyima a. Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
Mɩnla nninyeni yɛ asɔlɩ sʋ̃maa mɔɔ bɔfʋlɔ bɔ nwʋ Kilisinyiamaa nɩ bekilehile mɔɔ ɩ nɩɩ Kɩlayɩsɩ yɩ ehilehilelɛ iáyiyia a?
Gyisɛsɩ ihilehileli nɔhʋanlɛ mɔɔ ɩwɔ Nyamɩnlɩ Odwokɔ yi nu. Kɩnga Dwɔɔnʋ 18:37, na akʋ̃ bozunzú odwokɔɣizialɛ eyi nwʋ:
Kɛmɔ Gyisɛsɩ ɩhanlɩ nɩ, kɛ ɩkɛyɛ na yɛanwʋ Kilisinyiamaa mɔɔ bɔwɔ nɔhʋanlɛ yɩ afʋã a?
5. Bɛkã Bayɩbʋlʋ nu nɔhʋanlɛ bekile mmenii
Ɔwɔkɩ Kilisinyiamaa nɩ bɛhanlɩ odwokɔba yɩ behileli mmenii
Ansaana Gyisɛsɩ ɩkɔhɔ sʋlɔ nɩ, ɩvalɩ egyima be ɩmanlɩ yɩ adʋwavʋlɔ yɩ, na ɩla nwʋ la ɩkɔlɩ ɔzʋlɔ wɔ nnɛ. Kɩnga Matiyu 28:19, 20 nɩɩ Egyima 1:8, na akʋ̃ bozunzú odwokɔɣizialɛ eyi nwʋ:
Ɛhɩnla dɩka yɛ bɛkɛyɛ dasɩlɛlilɛ egyima yɩ bɔkɔhɔ bokodwu a?
6. Bɛfa mɔɔ bekilehile nɩ bɔbɔ bɛ ɛbɩla
Mɩnla yɛ ɩmanlɩ benyia be mɔɔ bɔfʋlɔ yɩ Tom ileli ilili kɛɛ ɩnwʋ nɔhʋanlɛ Kilisinyianɩ ɔzʋ̃mɩnlɛ yɩ a? Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.
Wɔ vidiyo yi nu nɩ, mɩnla yɛ ɩmanlɩ Tom yɩ padi igolɔlɩ wɔ Nyamɩnlɩ ɔzʋ̃mɩnlɛ nwʋ a?
Mɩnla ti mɔɔ ide idi kɛɛ ɩnwʋ nɔhʋanlɛ yɩ a?
Yɛ nyɛlɩyɛ yɛ ikile enii kʋ̃ mɔɔ yɛdɩ ankasa a. Kɩnga Matiyu 7:21, na akʋ̃ bozunzú odwokɔɣizialɛ eyi nwʋ:
Mɩnla yɛ nwʋmɔ ihyinyia Gyisɛsɩ paa—ɩdɩ mɔɔ yɛkã kɛɛ yede yedi anzɛnyɩɩ nyɛlɩyɛ mɔɔ yɛda yɩ ali?
7. Bɔdɔ bɔ nwʋ nkʋ̃kʋ̃ nkʋ̃kʋ̃
Ɔwɔkɩ Kilisinyiamaa nɩ, nɩ bɔdʋdɔ bɔ nwʋ nkʋ̃kʋ̃ nkʋ̃kʋ̃
Asʋ̃ ɩdɩ nɔhʋanlɛ kɛɛ Kilisinyiamaa bɛfa bɔ nnwʋanlɩ betiã asianɩ nu bɛma bɔ ɔhɔnwʋmmɔ Kilisinyiamaa a? Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.
Wɔ vidiyo yi nu nɩ, mɩnla yɛ ɩhanlɩ Lloyd ma ɩvalɩ yɩ nnwʋanlɩ idianlɩ asianɩ nu ɩmanlɩ Aliyema Johansson a?
Ekila a, ɩyɛlɩ yɩ dɩyɛ kɛɛ nɔhʋanlɛ Kilisinyianii a?
Kɩnga Dwɔɔnʋ 13:34, 35, na akʋ̃ bozunzú ndwokɔɣizialɛ eyimmɔ nwʋ:
Mɩnla ɔhʋanɩ zʋ yɛ Gyisɛsɩ yɩ adʋwavʋlɔ (nɔhʋanlɛ Kilisinyiamaa) bɛ nɩɩ mmenii mɔɔ ɩsʋnɩ bɔ nnwʋnlamɩ anyɩ kɔla anzɛnyɩɩ manlɩ mɔɔ bɔzʋ̃ numɔ nɩ keli a?
Mɩnla ɔhʋanɩ zʋ yɛ bɛkɛyɛ eyi wɔ mmɩlɩ mɔ kʋnɛ be izi nɩ a?
ABIYEMMƆ BƐKÃ KƐƐ: “Kilisinyiamaa munwatĩĩ Nyamɩnlɩ ɔkʋ̃ la yɛ bɔsʋ̃mɩ yɩ a, ɩávalɩ nwʋmɔ asɔlɩ kʋ̃ mɔɔ ɔkɔ nɩ.”
Mɩnla ɛhɛlɛlɛ odwokɔ yɛ sa ɔkʋla ɛfa ɔbʋwa abiye ma ɩnwʋ kezimɔ ɩkɔnwʋ nɔhʋanlɛ Kilisinyiamaa?
YƖ DƆKƆWƆLƐ
Nɔhʋanlɛ Kilisinyiamaa bɛfa Bayɩbʋlʋ ehilehilelɛ bɛyɛ egyima, bɛda ɔlɔlɛ kanyɩɩ ali, na bɛkã Bayɩbʋlʋ nu nɔhʋanlɛ odwokɔ bekile mmenii.
Kɛ Okowuwa Ekeze a?
Nninyeni mɔɔ nɔhʋanlɛ Kilisinyiamaa bede dedi nɩ igyĩ mɩnla zʋ a?
Mɩnla subanɩ yɛ bɛfa bɔnwʋ nɔhʋanlɛ Kilisinyiamaa?
Mɩnla egyima yɛ nɔhʋanlɛ Kilisinyiamaa bɛyɛ a?
PƖBƐ́ SƲ̃MAA
Sumá sʋ̃maa falɩ mmenii be mɔɔ bɔbɔ mmɔdɩnɩ kɛɛ bɛkɛva Gyisɛsɩ Kɩlayɩsɩ yɩ ndianwʋ nɩɩ yɩ ehilehilelɛ bɔkɔwɔ bɛ ɛbɩla nɩ nwʋ.
Kila mɔɔ baalɛ be mɔɔ nɩ ɩdɩ Roman sister ɩva ɩnwʋnlɩ “nɔhʋanlɛ abusunwa yɩ.”
“Bɛvalɩ Bayɩbʋlʋ Yɩ Bɛyɩlɩ Mʋ Ndwokɔɣizialɛ Munwatĩĩ Yi Munwa!” (Ɔwɩɛnɩlɛ Aɣanɩ, April 1, 2014)
Sumá kezimɔ nɔhʋanlɛ Kilisinyiamaa bɛda ɔlɔlɛ ali bekile bɔ ɔhɔnwʋmmɔ Kilisinyiamaa mɔɔ behyinyia mmʋwalɩyɛ nɩ.
Mmʋwalɩyɛ Mɔɔ Yɛfa Yɛma Ye Mmeliyema Wɔ Asianɩ Mmɩlɩ Nu—Yɩ Ɔfʋã Be (3:57)
Kila kezimɔ ɔwɔkɩ Kilisinyiamaa nɩɩ nɔhʋanlɛ Kilisinyiamaa mɔɔ bɔwɔ ɛkɛnɩ nnɛ nɩ bɛyɛ mɔɔ Gyisɛsɩ ɩhanlɩ kɛɛ mmenii kɛva kɔnwʋ yɩ adʋwavʋlɔ nɩ.
“Mɩnla Yɛ Ɩma Yɛnwʋ Nɔhʋanlɛ Kilisinyiamaa?” (Ɔwɩɛnɩlɛ Aɣanɩ, March 1, 2012)