Kɛ Gyisɛsɩ Ɩdɩ Ise a?

Mmɩlɩ mɔ yesumaa mɔɔ Gyisɛsɩ ɩyɛlɩ nɩɩ mɔɔ ɩhanlɩ wɔ azɩlɛ yɩ zʋ nwʋ dɩyɛ nɩ, sa yɛba yɛnwʋ subanɩ azʋlɔtʋ be wɔ yɩ nwʋ mɔɔ ɩkɔhwɩ̃ yɛ ikeɣike mɛyɩ nɩɩ yɩ Zɩ, Gyehova. Subanɩ ngɩnlɩma eyi ebiye yɛ lɛ mɩnla? Na kɛ ɩkɛyɛ na yɛazumazuma Gyisɛsɩ wɔ yɛ ɛbɩlawɔlɛ nu a?

1. Mɩnla ɔhʋanɩ zʋ yɛ Gyisɛsɩ ɩdɩ kɛɛ yɩ Zɩ a?

Mmɩlɩ mɔ Gyisɛsɩ ɩwɔ sʋlɔ nɩ, ɩvalɩ alʋbɔ abʋmɩ sʋ̃maa zɛ ihilalɩ yɩ Zɩ mɔɔ ɩwɔ ɔlɔlɛ nɩ na izumazumanlɩ yɩ. Iluwa ɔzɔ ti, kezimɔ ɩdwɩ̃, kezimɔ ɩtɩ nɣanlɩ nɩɩ kezimɔ ɩyɛ yɩ dɩyɛ nɩ ɩdɩ kɛɛ yɩ Zɩ la pɛpɛɛpɛ. (Kɩnga Dwɔɔnʋ 5:​19.) Nɔhʋanlɛ nu nɩ, Gyisɛsɩ ɩda yɩ Zɩ yɩ subanɩ ali pɛpɛɛpɛ nkʋ̃ʋ̃ ma ɩhanlɩ kɛɛ: “Abiyela mɔɔ ɩnwʋ mɩ nɩ ɩnwʋ Ɛzɩlɛ nɩ.” (Dwɔɔnʋ 14:9) Mmɩlɩ mɔ osumaa Gyisɛsɩ nwʋ dɩyɛ nɩ, ɛkɛɣa ɔkɔnwʋ Gyehova bʋwɔ. Kɛ ndianwʋ nɩ, ngokɛnwʋnlɛ mɔɔ Gyisɛsɩ ɩda yɩ ali nɩ ikile kɛɛ Gyehova ɩdwɩnɩ wʋ nwʋ.

2. Mɩnla yɛ Gyisɛsɩ ɩyɛ ɩva ihile kɛɛ ɩdɔ Gyehova a?

Gyisɛsɩ ɩhanlɩ kɛɛ: “Ɩwɔ kɛɛ oyuwadɩ nwʋ yɩ kɛɛ mʋdɔ Ɛzɩlɛ nɩ, meti mɩyɛ dɩyɛ bela mɔɔ Ɛzɩlɛ nɩ ikeze mɩ nɩ.” (Dwɔɔnʋ 14:​31) Mmɩlɩ mɔ Gyisɛsɩ ɩwɔ azɩlɛ yɩ zʋ nɩ, ɩlalɩ ɔlɔlɛ kezile mɔɔ nɩ ɩwɔ ɩma yɩ Zɩ nɩ ali iluwa sutiye mɔɔ ɩyɛlɩ ɩmanlɩ yɩ wɔ mmɩlɩ po mɔɔ nɩ ɩyɛ sɩ ɩma yɩ kɛɛ ɩkɛyɛ zɔ nɩ. Nɩ Gyisɛsɩ yɩ anyɩ ideli nwʋmɔ kɛɛ ɩkɛhã yɩ Zɩ nwʋ odwokɔ na ɩawʋwa mmenii mvʋlɔ ma bɛava yɩ ɔhɔnwʋ.​—Dwɔɔnʋ 14:23.

3. Mɩnla yɛ Gyisɛsɩ ɩyɛ ɩva ihile kɛɛ ɩdɔ mmenii a?

Bayɩbʋlʋ yɩ ɩkã kɛɛ “adasamaa bɛla Gyisɛsɩ yɩ ahʋnlɩnɩ zʋ.” (Ɛɣɛlɛwulɛ 8:​31) Ɩlalɩ ɔlɔlɛ eyi ali iluwa mmenii mvʋlɔ mɔɔ ɩhyɛlɩ bɛ ɛzɩzɩbɛ na ɩzʋ̃ yɩ ahʋnlɩnɩ nu ɩwʋwalɩ bɛ nɩ zʋ. Ɩáyɛ nnwʋánlɩ nninyeni ɩfa ɩda tumi mɔɔ ɩwɔ nɩ ali kɛkɛ, mfomi ɩvalɩ ihileli sʋ̃ kɛɛ ɩwɔ ɔlɔlɛ. (Maakɩ 1:​40-​42) Ɩ nɩɩ mmenii lili wɔ ɔhʋanɩ kɩnlɩma zʋ na ɩáyɛ anyunumihilalɛ. Yɩ ndwokɔ mɔɔ ɩhanlɩ nɩ ɩyɩkyɩlɩ bɛzabɛ mɔɔ bɛlɛ ahʋnlɩnɩba mɔɔ bediyeli yɩ nɩ munwatĩĩ bɛ ɛɣɛɛlɛ na ɩmanlɩ benyianlɩ anyɩnlɩlazʋ. Nɩ Gyisɛsɩ ɩwɔ ɛpɛ kɛɛ ɩkɔnwʋ amanɩyɛ na iawu ɩama adasamaa iluwakɛɛ ɩdɔ bo munwatĩĩ. Naasʋ̃ mmenii mɔɔ bɛfa yɩ ehilehilelɛ bɛyɛ egyima nɩ yɛ ɩdɔ bɛ paa.​—Kɩnga Dwɔɔnʋ 15:​13, 14.

SUMÁ SƲ̃MAA

4. Gyisɛsɩ ɩdɔ yɩ Zɩ

Gyisɛsɩ yɩ ndianwʋ nɩ ɩma yɛnwʋ kezimɔ yɛkɛla ɔlɔlɛ ali yekehile Nyamɩnlɩ. Kɩnga Luuku 6:​12 nɩɩ Dwɔɔnʋ 15:​10; 17:​26. Bɛkɩnga ɛhɛlɛlɛ odwokɔ yi nu ɔkʋ̃ bela bowie a, bozunzú odwokɔɣizialɛ eyi nwʋ:

• Kɛ ɩkɛyɛ na yɛazumazuma Gyisɛsɩ na yɛahile kɛɛ yɛdɔ Gyehova a?

6. Gyisɛsɩ yi ti nu ɩáyɛ sɩ

Nɩ Gyisɛsɩ yi ti nu ɩáyɛ sɩ ɩávalɩ nwʋmɔ kɛɛ nɩ íni nnwʋnlamɩ ɔfʋã nu nninyeni sʋ̃maa nɩ, na ɩhyɛlɩ yɛ ɛzɩzɩbɛ kɛɛ yɛla kunlumiba ali. Kɩnga Egyima 20:​35, na akʋ̃ bozunzú odwokɔɣizialɛ eyi nwʋ:

• Kɛmɔ Gyisɛsɩ ɩhanlɩ nɩ, kɛ ɩkɛyɛ na yɛanyia nyilalɛ anzɛnyɩɩ anyɩnlɩlelɛ a?

Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: “Anyɩnlɩlelɛ Sʋ̃maa Wɔ Ɛmanlɛ Nu”​—Yɩ Ɔfʋã Be (4:00)

• Sɛ yéni nnwʋnlamɩ ɔfʋã nu nninyeni sʋ̃maa po a, mɩnla ɔhʋanɩ azʋlɔtʋ yɛ sa yɛkʋla yeduwa ɔzʋlɔ yɛkyɛ dɩyɛ a?

Ezi a?

Bayɩbʋlʋ yɩ ikilehile yɛ kɛɛ yɛwɔ́ mpayɩ yehile Gyehova wɔ Gyisɛsɩ yi dima nu. (Kɩnga Dwɔɔnʋ 16:​23, 24.) Sɛ yɛbɔ mpayɩ wɔ ɔzɔ ɔhʋanɩ yɩ zʋ a, nɩ yɛdaa yɩ ali kɛɛ yɛ anyɩ ɩsɔ kezimɔ Gyisɛsɩ ɩwʋwa ma yɛɣa yɛyɛ Gyehova yɩ ɔhɔnwʋ nɩ.

YƖ DƆKƆWƆLƐ

Gyisɛsɩ ɩdɔ Gyehova, na ɩdɔ mmenii. Iluwakɛɛ Gyisɛsɩ ɩdɩ kɛɛ yɩ Zɩ nɩ ti, sɛ yɛnwʋ Gyisɛsɩ bʋwɔ a, sa ɩma yɛnwʋ Gyehova sʋ̃ bʋwɔ.

Kɛ Okowuwa Ekeze a?

• Kɛ ɩkɛyɛ na yɛala yɩ ali kɛɛ yɛdɔ Gyehova kɛmɔ Gyisɛsɩ ɩyɛlɩ nɩ a?

• Kɛ ɩkɛyɛ na yɛala yɩ ali kɛɛ yɛdɔ mmenii kɛmɔ Gyisɛsɩ ɩyɛlɩ nɩ a?

• Gyisɛsɩ yɩ subanɩ yi nu ɛhɩnla dɩyɛ yɛ wʋ anyɩ ideli nwʋmɔ paa?

PƖBƐ́ SƲ̃MAA

Kila Gyisɛsɩ yɩ subanɩ azʋlɔtʋ mɔɔ yɛkɔhʋla yekozuma nɩ be.

“Sumazuma Gyisɛsɩ, Na . . .” (Gyisɛsɩ​—Ɔhʋanɩ, Nɔhʋanlɛ nɩ, nɩɩ Nnwʋanlɩ nɩ, owukolɛ 317 wɔ Twi nu)

Sunzu sianti mɔɔ ihyinyia kɛɛ yɛbɔ mpayɩ wɔ Gyisɛsɩ yi dima nu nɩ nwʋ.

“Mɩnla Ti Mɔɔ Ɩsɛ Kɛɛ Yɛbɔ Mpayɩ Wɔ Gyisɛsɩ Yi Dima Nu a?” (Ɔwɩɛnɩlɛ Aɣanɩ, February 1, 2008)

Asʋ̃ Bayɩbʋlʋ yɩ ɩkã dɩyɛ be ɩfalɩ kezimɔ nɩ Gyisɛsɩ yɩ eniiwudo ɩdɩ nɩ nwʋ a?

“Nɩ Kɛ Gyisɛsɩ Ɩdɩ Ise a?” (Ndwokɔ mɔɔ ɩwɔ jw.org zʋ)

Kezimɔ Gyisɛsɩ ɩ nɩɩ mmaalɛ lili nɩ, mɩnla yɛ yɛkɔhʋla yekozuma wɔ nu a?

“Nyamɩnlɩ Ɩdwɩnɩ Bɔ Nwʋ, Ibu Bɛ, Na Ɩwɔ Annidi Ɩma Bɛ” (Ɔwɩɛnɩlɛ Aɣanɩ, September 1, 2012)