Nyia Dɩyɛ Munwala Zʋ Tumivʋlɔ Yi Nu Anwʋlazʋ

1. Mɩnla ɔhawʋ azʋlɔtʋ yɛ Dwoobu yiyialɩ a?

NNINYENI ɛyɛlɛyɛlɛ be dʋdʋlɩ Dwoobu aɣilemvile nu. Yi nnwuakula wuwuli, yɩ nwʋ balɩ yɩ ɛzɩzɩbɛ ɛzɩzɩbɛ, na yɩ agyiapadɩ munwatĩĩ sʋ̃ vili yɩ sa. Akʋ̃ sʋ̃, iluwa mɔɔ nɩ ɩdʋdʋ Dwoobu nɩ ti, nɩ mmenii bɛáwu yi dɔkʋ̃. Yɩ “ɔhɔnwʋmmɔ” asã yɩ sʋ̃ hɩnhanlɩ ndwokɔ be mɔɔ nɩ ikolɔ abɔkɔ hileli yi. Mɔɔ nɩ ɩkɔlɩɩ zʋlɔ nɩ lileli yɩ yɩ nkʋ̃ʋ̃ ma ɩhanlɩ kɛɛ ‘ɩdɩndɛ́ idiyia Nyamɩnlɩ na iwu.’ (Dwb. 2:9; 15:​4, 5; 19:​1-3) Ankɩ ndwokɔzɩzɩbɛ mɔɔ Dwoobu yiyialɩ nɩ kɔhʋla kɛhã yi dedi mɔɔ ɩlɛ wɔ Gyehova nu nɩ azɩ na ianyia adwɩnɩ po kɛɛ Gyehova iáwɔ bɛzabɛ mɔɔ bɔdɔ yɩ na bɔsʋ̃mɩ nɩ nwʋ banɩ.

2-3. Sɛ yɛnwʋʋ amanɩyɛ be a, mɩnla adwɩnɩ yɛ yɛkɔhʋla kenyia a, na mɩnla yɛ yɛkɔhʋla kozuma wɔ Dwoobu yi buuku yi nu a?

² Itwu mmɩlɩ be a, yɛkʋla yeyiyia ndwokɔzɩzɩbɛ azʋlɔtʋ be mɔɔ ɩkʋla itwe anwʋlazʋ mɔɔ yɛwɔ wɔ Gyehova nu nɩ ikila. Iluwakɛɛ Bayɩbʋlʋ yɩ kã kɛɛ “wɔ mmɩlɩ mɔ ili awielɩyɛ nɩ nu nɩ, anwʋhyɩlɩlɛ sʋ̃maa ɩkɛɣa.” (2 Tim. 3:1) Sɛ yeyiyiaa ndwokɔzɩzɩbɛ sʋ̃maa a, ɩkʋla ɩma ye padi kolɔ na ɩma ɩyɛ sɩ kɛɛ yekegyina numɔ. Ɔzɔ ndwokɔzɩzɩbɛ yɩ kʋla ma mbiyemmɔ nyia adwɩnɩ kɛɛ Gyehova ɩálɔ bɛ anzɛnyɩɩ ɩádwɩnɩ bɔ nwʋ.

³ Sɛ ɔzɔ yɛ ɛtɩ nɣanlɩ a, mɛyɩ áma wu padi kolɔ. Dwoobu ɣa nwʋnlɩ kɛɛ Gyehova iáyiaki bɛzabɛ mɔɔ bedi nɔhʋanlɛ bɛma yɩ nɩ kyɩ̃. Amɩyɛ sʋ̃, yɛkɔhʋla yɛkɛhyɛ anwʋlazʋ mɔɔ yɛlɛ wɔ Gyehova nu kɛɛ ɩkɔwʋwa yɛ na iayila yɛ nɩ nu ɛzɩzɩbɛ. Mɔɔ ɩkɛyɛ na yeadwu ɔzɔ bʋtayɩ yɩ nwʋ nɩ, yekehila kezimɔ Dwoobu buuku yi kɔwʋwa yɛ ma yɛkɔnwʋ kɛɛ Gyehova yɛ ɩdɩ Dɩyɛ Munwala Zʋ Tumivʋlɔ yɩ a, na ɩsɛ kɛɛ yenyia yi nu dedi. Akʋ̃ sʋ̃, yɛkɔnwʋ kɛɛ iluwakɛɛ Gyehova dɩ dɩyɛ munwala zʋ tumivʋlɔ Nyamɩnlɩ nɩ ti, dɩyɛ bela mɔɔ ɩkɛhã nɩ ba numɔ pɛpɛɛpɛ. Biyekʋ̃ sʋ̃, ɩbɔ yɛ nwʋ banɩ ma yenyia mɔɔ yehyinyia na ama yɛahɔ zʋlɔ yɛ nɩɩ yɩ yɛanyia abusunwawɔlɛ baaba.

SETANƖ HƆ VƲLALƖ BO NU

4. Mmɩlɩ mɔ Gyehova nɩɩ yɩ awɔvʋlɔ yiyialɩ nɩ, mɩnla yɛ izili a?

⁴ Eɣile kʋ̃ be, “nɔhʋanlɛ Nyamɩnlɩ mmalɛ” nɩ hɔ yiyialɩ numɔ wɔ Gyehova anyunu wɔ sʋlɔ. Na Bayɩbʋlʋ yɩ kã kɛɛ: “Setanɩ sʋ̃ vʋlalɩ bo nu ɣalɩ biye.” (Dwb. 1:6) Eyi yɛ ɩdɩ mmɩlɩ mɔ ili bɔmʋnlɩ mɔ yɛnwʋ dima “Setanɩ” wɔ Bayɩbʋlʋ yɩ nu a. Inyianlɩ dima eyi iluwakɛɛ itwodwu itiyia Gyehova. Mmɩlɩ mɔ nɩ bɛyɛɛ ɔzɔ ayiyialɩyɛ yɩ mɛyɩ, nɩ Setanɩ ɩáhɩnla Nyamɩnlɩ yi nnwuakula nɔhʋanlɛmaa nɩ nwʋ dɔkʋ̃. Setanɩ ɣa yɛlɩ Gyehova, awɔvʋlɔ nɔhʋanlɛmaa nɩɩ adasamaa nɔhʋanlɛmaa munwatĩĩ bɛ tamvʋlɔ. Eyi ma yɛnwʋ yɩ kɛɛ nɩ Setanɩ ɩáhɩnla Gyehova yɩ abusunwa yɩ nwʋ dɔkʋ̃ iluwa odwokɔ mɔɔ Nyamɩnlɩ hanlɩ valɩlɩ yɩ nwʋ wɔ Gyɛnɛsɩsɩ 3:15 nɩ ti. Meti Setanɩ ɩáhɩnla “baalɛ yɩ,” mɔɔ Gyɛnɛsɩsɩ 3:15 kã yɩ nwʋ odwokɔ mɔɔ igyĩ kɛnɩ ɩma Gyehova yɩ awɔvʋlɔ mɔɔ nɩ “yɩ tʋnii” yi zʋ̃ yi nu kɛɣa nɩ nwʋ.

5. Mɩnla yɛ yesuma wɔ mɔɔ Setanɩ hanlɩ nɩɩ kezimɔ Gyehova yɩlɩ yi munwa nɩ nu a?

⁵ Wɔ ayiyialɩyɛ mɔɔ Gyehova nɩɩ yɩ awɔvʋlɔ yɛlɩ wɔ sʋlɔ nɩ, nɩ ɩpɛ kɛɛ ɩma yɛnwʋ mɔɔ izili meti ɩmanlɩ bɛhɛlɛlɩ nwʋmɔ odwokɔ wɔ Bayɩbʋlʋ yɩ nu. Mɔɔ Setanɩ hanlɩ nɩ da yɩ ali petee kɛɛ ɩdɩ tinuzɩzɩbɛvʋlɔ na ɩkɩhã awohwi ndwokɔ ɩfalɩ bɛzabɛ mɔɔ bɔsʋ̃mɩ Gyehova nɩ nwʋ. (Dwb. 1:9; fa tindiã Yikile 12:10 nwʋ.) Mɔɔ ɩhɔlɩ zʋlɔ wɔ ɔzɔ ayiyialɩyɛ yɩ tʋ nɩ, ɩma yɛnwʋ ɛɣɛɛlɛyɩkyɩlɛ odwokɔ be paa, mɛyɩ yɛ lɛ kɛɛ Gyehova fa yi tumi mɔɔ íni awielɩyɛ nɩ di egyima wɔ ɔhʋanɩ mɔɔ ɩtɩnɣɛ zʋ. Akʋ̃ sʋ̃, yɛnwʋ yɩ kɛɛ iluwakɛɛ Gyehova yɛ ɩdɩ Dɩyɛ Munwala Zʋ Tumivʋlɔ nɩ ti, mɛyɩ yɛ isi pɔkɔ wɔ mɔɔ abiye kɔhʋla kɛyɛ nɩɩ mɔɔ ɩlɔ́kʋla ɩkɛyɛ nwʋ a.

GYEHOVA YƐ IKILE MƆƆ ABIYE KƆHƲLA KƐYƐ ANZƐNYƖƖ ƖLƆ́KƲLA KƐYƐ A

6. Mɩnla ɔhʋanɩ zʋ Gyehova hileli kɛɛ mɛyɩ yɛ nɩ ikezi pɔkɔ wɔ mɔɔ nɩ ɩkɔhɔlɩ zʋlɔ wɔ ayiyialɩyɛ mɔɔ ɩhɔlɩ zʋlɔ wɔ sʋlɔ nɩ tʋ a? (Dwoobu 1:​7, 8)

⁶ Kɩnga Dwoobu 1:​7, 8. Gyehova lalɩ yɩ ali kɛɛ mɛyɩ yɛ nɩ ikezi pɔkɔ wɔ mɔɔ nɩ ɩkɔhɔlɩ zʋlɔ wɔ ɔzɔ ayiyialɩyɛ yɩ nɩ tʋ a. Iɣizialɩ Setanɩ kɛɛ: “Asʋ̃ ɔdwɩnɩ mʋ sʋ̃mɩvʋlɔ Dwoobu nwʋ anzɛnyɩɩ?” Amba, nɩ Gyehova zi kɛɛ Setanɩ ɩwɔ Dwoobu nwʋ pɔkɔ tanɩ be. Bɛmá yezunzu kezimɔ Gyehova valɩ yi tumi mɔɔ íni awielɩyɛ nɩ lili manlɩ Dwoobu nɩ nwʋ.

7. Wɔ Dwoobu 1:​10, 11 nu nɩ, mɩnla yɛ Setanɩ hanlɩ valɩlɩ mmenii mɔɔ bɔsʋ̃mɩ Gyehova nɩ nwʋ a?

⁷ Kɩnga Dwoobu 1:​10, 11. Gyehova dɩ Dɩyɛ Munwala Zʋ Tumivʋlɔ,na ɩwɔ tumi mɔɔ ɩfa ɩyɛ mɔɔ ɩpɛ bela. Akʋ̃ sʋ̃, izi mɔɔ ɩdɩ baaba wɔ bʋwabɩlɛ bela nu. (Gyɛ. 32:17; Da. 4:35) Naasʋ̃, Setanɩ hanlɩ kɛɛ Gyehova ɩáva yi tumi idi egyima wɔ ɔhʋanɩ baaba zʋ. Setanɩ hanlɩ kɛɛ Nyamɩnlɩ ma mmenii, mɔɔ Dwoobu kɩnla nwʋmɔ nɩ nninyeniba na ama bɛazʋ̃mɩ yɩ. Nɩ Setanɩ ɩpɛɛ kehile kɛɛ iluwa nninyeni mɔɔ Gyehova yɩ azʋ̃mɩvʋlɔ nyia wɔ yɩ ɛkɛnɩ nɩ ti mɔɔ bɔsʋ̃mɩ yɩ a. Mɩnla ɔhʋanɩ zʋ yɛ Gyehova yɩlɩ yi munwa a?

8-9. Mɩnla yɛ Gyehova hanlɩ hileli Setanɩ kɛɛ ɩkɔhʋla kɛyɛ a, na mɩnla yɛ nɩ ɩlɔ́kʋla kɛyɛ a, na mɩnla ti a? (Dwoobu 1:12) (Kila mfonyini yi sʋ̃.)

⁸ Kɩnga Dwoobu 1:12. Gyehova manlɩ Setanɩ ɔhʋanɩ kɛɛ idwé Dwoobu ihila kɛɛ sɛ ɩálɔ yɩ amba a. Naasʋ̃ Gyehova manlɩ Setanɩ ahyɛdɩ be mɔɔ nɩ ɩsɛ kɛɛ ididili zʋlɔ. Nyamɩnlɩ hã hileli Setanɩ petee kɛɛ: “Yɩzayɩ [Dwoobu] munli yi mɛyɩ, áma ɛfa wʋ sa kã yɩ!” Wɔ awɔvʋlɔ yɩ munwatĩĩ bɛ anyunu nɩ, Gyehova manlɩ Setanɩ nwʋnlɩ dɩka mɔɔ odwohilalɛ mɔɔ ɩlɛ ɩkɔɔ Dwoobu zʋ nɩ ɩkɔ itwu. Meti nɩ Setanɩ íni tumi kɛɛ ikowuli Gyehova yɩ ahyɛdɩ yɩ zʋ. Na ɔzɔ la yɛ ɩdɩ wɔ nnɛ sʋ̃ a, Setanɩ lɔ́kʋla kɛyɛ dɩyɛ bela gyɩsɛ Gyehova ma nwʋmɔ ɔhʋanɩ yɩ ansa. Gyehova valɩ yi tumi wɔlɩ Dwoobu nwʋ banɩ, na ihileli kɛɛ ɩdɩ pɛlɩpɛlɩ nɩɩ ɔlɔlɛ Nyamɩnlɩ.

⁹ Setanɩ yɩ sa zili azɩ. Dwoobu hɔlɩ zʋlɔ lili nɔhʋanlɛ manlɩ yɩ sʋlɔ Ɛzɩlɛ yɩ. (Dwb. 1:22) Naasʋ̃, nɩ Setanɩ lówieli odwohilalɛ mɔɔ nɩ ɩlɛ ɩkɔɔ Dwoobu zʋ nɩ.

10. Mɩnla ti mɔɔ Gyehova manlɩ ɔhʋanɩ ma Setanɩ zia dweli Dwoobu hilalɩ a? (Dwoobu 2:​2-6)

¹⁰ Kɩnga Dwoobu 2:​2-6. Ɔzɔ mmɩlɩ eyi nu mɛyɩ, Setanɩ minyianlɩ odwohilalɛ mɔɔ nɩ ɩlɛ ɩkɔɔ Dwoobu zʋ nɩ nu, na ama Dwoobu yi padi iagolɔ na iayiaki Gyehova ɔzʋ̃mɩnlɛ. Nɩ Setanɩ yɩ adwɩnɩ yɛ yɩ kɛɛ sɛ Dwoobu nwʋ kɛɛ ibawu a, sa Gyehova nwʋ yɛ yɩ ahyĩ na iayiaki kɛɛ ɩsʋ̃mɩɩ yɩ. Mɔɔ ɩkɛyɛ na yɛanwʋ nɔhʋanlɛ mɔɔ ɩwɔ odwokɔ yɩ nu nɩ, Gyehova manlɩ ɔhʋanɩ wɔ Setanɩ ma ɩvalɩ adimakɛlɛ ɩwɔlɩ Dwoobu. Naasʋ̃, Gyehova zia manlɩ Setanɩ ahyɛdɩ fʋlɔ, ɩhã ihileli Setanɩ kɛɛ: “Áma ede yɩ nnwʋanlɩ wɔ yɩ sa nu!” Mɔɔ nɩ Setanɩ kɔhʋla kɛyɛ yɛ lɛ kɛɛ ikediye Gyehova, meti nɩ ɩlɔ́kʋla kohũ Dwoobu. Meti, Gyehova hileli kɛɛ mɛyɩ yɛ lɛ Sʋlɔ Sʋlɔnii Nyamɩnlɩ nɩ, iluwakɛɛ nɩ Setanɩ lɔ́kʋla kɛyɛ dɩyɛ bela wɔ Dwoobu mmɩlɩ mɔ Gyehova ɩlɛ́manlɩ ɔhʋanɩ yɩ nɩ.

GYEHOVA MANLƖ DWOOBU YƖ AMANƖYƐNWƲNLƐ YƖ ƔALƖ AWIELƖYƐ

11. Wɔ Dwoobu yi odwohilalɛ mɛda nɩ, mɩnla ɔhʋanɩ zʋ yɛ Gyehova yilalɩ yɩ a? (Dwoobu 42:​10-13)

¹¹ Kɩnga Dwoobu 42:​10-13. Mmɩlɩ mɔ Dwoobu lalɩ yɩ ali kɛɛ ɩkɔhɔlɩ zʋlɔ ikeli nɔhʋanlɛ nɩ, Gyehova áma ɔhʋanɩ wɔ Setanɩ ma ɩkɔ zʋlɔ itwe yi kila. Gyehova manlɩ Dwoobu yɩ amanɩyɛnwʋnlɛ yɩ munwala ɣalɩ awielɩyɛ. Nɩ Setanɩ lɔ́kʋla kezi Gyehova yɩ ɔhʋanɩ kɛɛ ɩkɔwɔ Dwoobu nwʋ banɩ na iayila yɩ.

12. Ma ndianwʋ fa kilehile mɔɔ Gyehova kʋla yɛ ma bɛzabɛ mɔɔ bɛfa bɔ nwʋ betiã yɩ zʋ nɩ nu.

¹² Gyehova va yi tumi wʋwa yɩ azʋ̃mɩvʋlɔ sʋ̃maa wɔ awielɩyɛ mmɩlɩ eyi nu. Kɛ ndianwʋ nɩ, wɔ 1945 nɩ, azogyiamaa hyɛlɩ Gyehova Dasɩvʋlɔmaa 230 ma bodualɩ ɔhʋanɩ tɩndɩnlɩ na bɛvalɩ bɛ boluwalɩ nnɩka ɛyɛlɛyɛlɛ kɛɛ bɛ nɩɩ bɛ kɔ ngyemvile yi munwa na bɛahɔ bɛahũhũ bɛ. Naasʋ̃ bo nu ɔkʋ̃ po iáwu. Bɛhanlɩ bo ozumalɛnwʋnlɛ nɩ nwʋ odwokɔ kɛɛ, Gyehova wʋwalɩ bɛ kezimɔ ɩwʋwalɩ Hibulu mmɩlantɩyɛ asã mɔɔ bɛvalɩ bɛ bogualɩ sɩnɩ yɩ nu naasʋ̃ bɛátɩ kɛɛ ezike ileli bɔ nwʋ nɩ. Ɔzɔ la, yɛ ye mmeliyema yɩ sʋ̃ luwalɩ atɩɩtɩɩ sʋ̃maa nu a, naasʋ̃ be dedi yɛlɩ sɩ paa. Na Gyehova manlɩ benyianlɩ anwʋzɩzɩbɛ. Akʋ̃ sʋ̃, bɛdɩlɩ nɣanlɩ kɛɛ Gyehova ile bɛ wɔ gyata bɛ obuwu nu, dɩkɛɛ mɔɔ ileli Danɩyɛlɩ nɩ la. Ɔzʋmɩ ɔzɔ mmɩlɩ yɩ nɩ, bezili bɛ kɛɣa kɛɛ bɔkɔzʋ̃mɩ Gyehova daabaa. Na bɛva bɛhɩnlanlɩ nwʋmɔ kɛɛ nyilalɛ kezile mɔɔ bɔkɔhʋla kenyia wɔ Gyehova kɛnɩ yɛ lɛ kɛɛ bɔkɔhɔ zʋlɔ bɔkɔzʋ̃mɩ yɩ daabaa.—Fa tindiã Danɩyɛlɩ 3:27; 6:22 nwʋ.

13. Mɩnla anwʋlazʋ yɛ ɔkɔhʋla kenyia mmɩlɩ mɔ eyiyiaa ndwokɔ ɛzɩzɩbɛ nɩ a? (Kila mfonyini yi sʋ̃.)

¹³ Itwu mmɩlɩ be a, amɩyɛ sʋ̃ iluwa odwodwudiyialɛ mɔɔ numɔ yɛ sɩ anzɛnyɩɩ ɔhawʋ azʋlɔtʋ be mɔɔ yeyiyiaa nɩ ti, yɛkʋla yɛnwʋ amanɩyɛ. (1 Pit. 5:​8-10) Ɩyɛ a, yɛtɩ nɣanlɩ kɛɛ ye padi golɔ iluwakɛɛ ɩdɩ kɛɛ mɔɔ ye odwohilalɛ tʋ lótua kyɩ̃. Wɔ bʋwabɩlɛ mɔɔ ɩdɩ zɔ nu nɩ, sɛ yɛkakɛ Dwoobu yi ozumanlɛnwʋnlɛ yɩ a, ɩkɔwʋwa yɛ paa. Yɛkɔhʋla yekenyia anwʋlazʋ kezile wɔ Gyehova yi tumi yi nu kɛɛ ɩkɛma yɛ amanɩyɛnwʋnlɛ kɛɣa awielɩyɛ. Ebiye a, ɩkɛyɛ zɔ wɔ oyuwadɩ eyi nu anzɛnyɩɩ oyuwadɩ fʋlɔ mɔɔ ɩbaa nɩ nu. Sɛ mmɩlɩ mɔ Gyehova hyɛ kɛɛ ɩkɛva kɛzɩkɛ oyuwadɩ eyi nɩ twu a, ɩlɛ́ma ɩkɛba nwʋmɔ eɣile kʋ̃ po!

GYEHOVA DƆ YƖ AZƲ̃MƖVƲLƆ NƆHƲANLƐMAA

14-15. Mɩnla yɛ Gyehova pɛ kɛɛ ɩyɛ ɩma yɩ azʋ̃mɩvʋlɔ nɔhʋanlɛmaa a, na mɩnla ti a? (Dwoobu 14:15) (Kila mfonyini yi sʋ̃.)

¹⁴ Kɩnga Dwoobu 14:15. Yɛ sʋlɔ Ɛzɩlɛ yɩ dɔ bɛzabɛ mɔɔ bedi nɔhʋanlɛ bɛma yɩ nɩ. Ɩdɔ bɛ nkʋ̃ʋ̃ ma sɛ bowu po a, ikezia ikodunwo bɛ ɩkɛɣa nnwʋanlɩ nu. Eyi kɛma ye munwala yɛ anyɩ kele paa.—Ayɩ. 65:17.

¹⁵ Dwoobu yɩ atɩɩtɩɩ munwala mɛda nɩ, nɩ ɩlanwʋ la ɩda Setanɩ oyuwadɩ tanɩ yi nu. Naasʋ̃ Bayɩbʋlʋ yɩ kã kɛɛ, Gyehova yilalɩ Dwoobu wɔ ɔhʋanɩ sʋnʋnkʋ̃ be zʋ. Ɩzalɩ Dwoobu adimakɛlɛ na ɩmanlɩ inyianlɩ nninyeni sʋ̃maa ɩdɛlalɩ mɔɔ nɩ ɩwɔ yɩ ahyɛasɩ nɩ po. Eyi kile kɛɛ, eɣile be sa Gyehova yila Dwoobu paa. Gyehova yɛlɩ eyi va hileli kɛɛ ɩpɛ kɛɛ yɩ azʋ̃mɩvʋlɔ nɔhʋanlɛmaa bɛ anyɩ de wɔ bɛ ɛbɩlawɔlɛ nu. Nɔhʋanlɛ nu nɩ, Gyehova kɛma bɛzabɛ mɔɔ bedi nɔhʋanlɛ bɛma yɩ nɩ nnwʋanlɩ mɔɔ íni awielɩyɛ wɔ paladayɩsɩ azɩlɛ yɩ zʋ. (Yik. 21:​3, 4) Kɛ Dɩyɛ Munwala Zʋ Tumivʋlɔ nɩ, ɩwɔ ɛpɛ kɛɛ ɩkɛyɛ debe mɔɔ ɩdɩ zɔ ɩkɛma yɩ nɔhʋanlɛ azʋ̃mɩvʋlɔ. Sɛ yɛdwɩnɩndwɩnɩ kezimɔ Gyehova keyila yɛ nɩ nwʋ a, ɩkɔwʋwa yɛ ma yekegyina yɛ amanɩyɛnwʋnlɛ munwa wɔ nnɛ oyuwadɩ tanɩ eyi nu!

16. Mɩnla sianti fʋlɔ ti yɛ ɩsɛ kɛɛ yenyia Gyehova nu anwʋlazʋ kɛɛ mɛyɩ yɛ ɩdɩ Dɩyɛ Munwala Zʋ Tumivʋlɔ a?

¹⁶ Ɩwɔ numɔ kɛɛ Dwoobu wʋwalɩ azɩ hyɛlɩ dɩyɛ, naasʋ̃ iwuli. Naasʋ̃ Gyehova wɔ tumi mɔɔ ɩkɔhʋla ikodunwo yi kɛɣa nnwʋanlɩ nu dɔkʋ̃ iluwakɛɛ ɩdɩ Dɩyɛ Munwala Zʋ Tumivʋlɔ. (Dit. 32:39) Sɛ mmɩlɩ mɔ Gyehova hyɛ kɛɛ ikodunwo yɩ alɔvʋlɔ mɔɔ bowuwu nɩ twu a, abiyela íni kɛnɩ mɔɔ ɩkɔhʋla ikezi yɩ ɔhʋanɩ.—Wul. 8:​38, 39.

FA WƲ NWƲ TIÃ GYEHOVA ZƲ KƲLAKƲLA

17. Kɛ ɩyɛ mɔɔ yɛnwʋ kɛɛ Setanɩ lɔ́kʋla kɛzɩkɛ Gyehova yi mmenii a?

¹⁷ Dwoobu buuku yi wʋwa yɛ ma yɛnwʋ sianti azʋlɔtʋ be ti mɔɔ ɩsɛ kɛɛ yenyia Gyehova nu anwʋlazʋ kʋlakʋla. Kila kezimɔ yɛ anyɩ de paa kɛɛ Gyehova ɩlɛ́manlɩ ɔhʋanɩ wɔ Setanɩ ma ɩlɛ́sɩkɛlɩ yi mmenii! Nnɛ, mmenii kɛyɛ miliyɔnʋ ahɔnla yɛ bɛlɛ nɔhʋanlɛlilɛ bɔsʋ̃mɩɩ Gyehova a, iluwakɛɛ mɛyɩ yɛ ɩdɩ Dɩyɛ Munwala Zʋ Tumivʋlɔ Nyamɩnlɩ nɩ a. Akʋ̃ sʋ̃, aɣanɩ mɔɔ bɛlɛ tumi nɩɩ Nyamɩnlɩzʋ̃mɩnlɛ nu mbanimbani bɔ mmɔdɩnɩ kɛɛ bɛkɛma yekeyiaki Gyehova yɩ ɔzʋ̃mɩnlɛ nɩɩ dasɩlɛlilɛ egyima yɩ. Naasʋ̃ bɛáhʋla besi yɛ ɔhʋanɩ iluwakɛɛ Gyehova kɔ zʋlɔ fa yi tumi bʋwa yɛ. (Ayɩ. 54:17) Na dɩyɛ bela lɔ́kʋla kezi yɛ ɔhʋanɩ kɛɛ yɛkɛma mmenii kɔnwʋ kɛɛ Setanɩ dɩ wudivʋlɔ nɩɩ awohwivʋlɔ, na Gyehova yɛ ɩdɩ nɔhʋanlɛ Nyamɩnlɩ nɩ a. Owulo po lɔ́kʋla kezi yɛ ɔhʋanɩ iluwakɛɛ Gyehova kɛva yɩ nɔhʋanlɛmaa mɔɔ bowuwu nɩ kɛɣa nnwʋanlɩ nu dɔkʋ̃.—Ho. 13:14.

18. Mɩnla ti mɔɔ íni kɛɛ yɛma ye kunlu tu wɔ mɔɔ ikezi wɔ eɣile be nɩ nwʋ a?

¹⁸ Sɛ yɛdwɩnɩndwɩnɩ Dwoobu buuku yi nwʋ a, ɩkɛma yekenyia anwʋlazʋ kezile paa kɛɛ ɩávalɩ nwʋmɔ mɔɔ ikezi wɔ eɣile be nɩ, Gyehova kɛhɩnla yɛ nwʋ meti íni kɛɛ yɛma ye kunlu tu kʋlaa. Wɔ anwʋhyɩlɩyɛ kezile yi nu nɩ, Setanɩ nɩɩ yi mmenii bɛ adwɩnɩ kɛyɛ bɛ kɛɛ Nyamɩnlɩ yi mmenii béni banɩwɔlɛ bela na bɔkɔdʋ bɛkɛhyɛ yɛ zʋ. Naasʋ̃ Gyehova kɛva yi tumi kɔwʋwa yɛ kɛmɔ ɩwʋwalɩ Dwoobu nɩ. Ɩlɛ́ma ɔhʋanɩ ma Setanɩ kɛzɩkɛ yi mmenii kʋlakʋla. Ɩlɛ́kyɛ bela Gyehova kɛma amanɩyɛnwʋnlɛ mɔɔ Setanɩ va ɣa adasamaa zʋ nɩ yɩ tʋ kodua. Gyisɛsɩ kɛva Setanɩ Abɔnsamɩ nɩɩ yɩ awɔvʋlɔ tanɩ nɩ kogua kuma kulonwuu kolonwuu nu alʋbɔ 1,000. (Lk. 8:31; Yik. 20:​1-3) Mɛyɩ mɛda nɩ, Setanɩ nɩɩ bɛzabɛ mɔɔ botwodwu betiyia Gyehova nɩ bɛ awielɩyɛ kɛɣa kɛmɔ Gyehova hã nɩ.—Gyn. 3:15; Wul. 16:20; Yik. 20:10.

19. Mɩnla ɔhʋanɩ zʋ yɛ Gyehova keyila bɛzabɛ mɔɔ benyia yi nu anwʋlazʋ nɩ a? (Kila mfonyini yi sʋ̃.)

¹⁹ Yɛlɛ anyɩnlɩlelɛ yekilaa oyuwadɩ fʋlɔ yɩ ɔhʋanɩ paa, iluwakɛɛ ɔzɔ mmɩlɩ yɩ nu nɩ, yekeli munli na yɛ anyɩ kele paa. Anyɩnlɩlelɛ nɩɩ azʋ̃nudwolɩyɛ mɔɔ yekenyia wɔ yɛ ɛbɩlawɔlɛ nu mɛyɩ, yɛlɔ́kʋla yɛkɛhã. Gyehova bɔ anʋhʋba kɛɛ: “Kila! Mɩyɛɛ nninyeni munwatĩĩ mvʋlɔ.” (Yik. 21:5) Mɩnla ɔhʋanɩ zʋ a? Eyi yɛ ɩdɩ mmɩlɩ mɔ ili bɔmʋnlɩ wɔ adasamaa bɛ abakɔsɛmɩ nu mɔɔ Setanɩ nɩɩ yɩ awɔvʋlɔ nɩ bɔlɔ́kʋla bɛkɛyɛ mmenii tanɩ a. Na yɛ ahʋnlɩnɩ kɔdɔ ye kunlu paa! Sa enyia wʋ azʋ̃nudwolɩyɛ da ma wʋ nwʋ tɔ wʋ, iluwakɛɛ nninyeni dadampɔ mɔɔ ɩwɔ oyuwadɩ eyi nu mɔɔ ɩma adwɩnɩndwɩnɩ hyɛ yɛ zʋ nɩ munwala dua numɔ. Bɛzabɛ mɔɔ bekenyia be ti bekelili numɔ wɔ Amagadɔnʋ nɩ kɔnwʋ nnwʋánlɩdɩyɛ sʋ̃maa. Mmenii mɔɔ bɔ nwʋ ba bɛ nɩ kenyia pɔkɔdɩlɛ baaba. Akʋ̃ sʋ̃, yɛ alɔvʋlɔ mɔɔ bowuwu nɩ kɛɣa nnwʋanlɩ nu dɔkʋ̃. Ɔzɔ mmɩlɩ yɩ nɩ, yekenyia anyɩnlɩlelɛ ankasa wɔ yɛ ɛbɩlawɔlɛ nu kɛmɔ yɛ sʋlɔ Ɛzɩlɛ Gyehova pɛ kɛɛ yenyia nɩ la!

20. Mɩnla yɛ ezi wʋ kɛnɣa kɛɛ ɛkɛyɛ a?

²⁰ Wɔ awielɩyɛ mmɩlɩ eyi nu nɩ, yɛkɔhʋla yekeyiyia odwohilalɛ sʋ̃maa, meti bɛmá yɛhɔ zʋlɔ yenyia Gyehova nu anwʋlazʋ kʋlakʋla na yegyina yi tumililɛ mɛda. Akʋ̃ sʋ̃, bɛmá yɛhɔ zʋlɔ yɛva yɛ ɛbɩlawɔlɛ yehile kɛɛ yɛdɔ Gyehova na mɔɔ Setanɩ hã valɩ Gyehova nɩɩ yɩ azʋ̃mɩvʋlɔ nwʋ nɩ dɩ awohwi. Sa yɛkʋla yenyia anwʋlazʋ paa kɛɛ, sɛ yɛkɔ zʋlɔ yedi Gyehova mɔɔ ɩdɩ Dɩyɛ Munwala Zʋ Tumivʋlɔ nɩ nɔhʋanlɛ a, yekenyia ɛbɩlawɔlɛ mɔɔ anyɩnlɩlelɛ wɔ numɔ wɔ eɣile be. Akʋ̃ sʋ̃, yezi kɛɛ Gyehova pɛ paa kɛɛ ikeyila yɩ nɔhʋanlɛ azʋ̃mɩvʋlɔ na ɔzɔ pɛpɛɛpɛ la yɛ ɩkɛyɛ a!