“Nɔhʋanlɛ Nyamɩnlɩ” Nɩ Ma Yi Tile Nu Pɔkɔ Ba Numɔ Mmɩlɩ Munwala

1. Kɛmɔ Ndwomi 31:​2-5 kã nɩ, mɩnla ti mɔɔ yɛkɔhʋla kenyia Gyehova nu anwʋlazʋ a?

ILUWAKƐƐ Setanɩ yɛ idii oyuwadɩ eyi zʋ nɩ ti, awohwi nɩɩ nnahɩlɩbɛ wulu zʋlɔ na ɩyɛ sɩ kɛɛ yekele abiye yekeli po. Kualɛlilɛmaa sizi mmenii. Mmenii sʋ̃maa wɔ kɛnɩ mɔɔ sɛ bɔtɔnɩɩ dɩyɛ na ɩ́dɩ baaba po a, bɔbɔ nwʋmɔ ɛlawulo dɩkɛɛ mɔɔ ɩdɩ baaba kɛmɔ ɩkɛyɛ a, mmenii sʋ̃maa kɔdɔ. Na ɩyɛ sɩ ɩma mmenii mvʋlɔ sʋ̃ kɛɛ bekele bɔ ɔhɔnwʋmmɔ mɔɔ bebike bɛ paa bo ndwokɔ bekeli. Naasʋ̃, anyɩnlɩlelɛ odwokɔ yɛ lɛ kɛɛ Gyehova mɛyɩ, sa yɛkʋla yenyia yi nu anwʋlazʋ mmɩlɩ bela iluwakɛɛ mɛyɩ yɛ lɛ “nɔhʋanlɛ Nyamɩnlɩ” nɩ! (Kɩnga Ndwomi 31:​2-5.) Gyehova iáli awohwi, mɔɔ ɩkã bela nɩ dɩ nɔhʋanlɛ. Na yɛkɔhʋla kenyia yi nu anwʋlazʋ kɛɛ mɔɔ ɩhã bela nɩ kɛɣa numɔ pɛpɛɛpɛ.

2. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

² Wɔ dɩyɛzumanlɛ eyi nu nɩ, yekeli bɔmʋnlɩ yekozunzu sianti mɔɔ yɛkɔhʋla kɛva yɛ nwʋ kediã Gyehova zʋ kʋlakʋla nɩ nwʋ. Akʋ̃ sʋ̃, yekezia yekozunzu kezimɔ Gyehova kɛzɩkɛ oyuwadɩ nhyɩhyɛlɩyɛ tanɩ eyi, nɩɩ mɔɔ ɩyɛɛ yɩ sikalɛyɩ na ama yi tile nu pɔkɔ ɩaɣa numɔ nɩ nwʋ. Eyi kɔwʋwa yɛ ma yɛkɛva akɛnɣazɩzɩbɛ yekeli Gyehova nwʋ dasɩlɛ mɔɔ ye kunlu lótu.

SIANTI MƆƆ YƐKƆHƲLA KƐVA YƐ NWƲ KEDIÃ NƆHƲANLƐ NYAMƖNLƖ YƖ ZƲ

3. Mɩnla ti mɔɔ yɛkɔhʋla yekenyia Gyehova nu anwʋlazʋ kʋlakʋla a?

³ Yɛkɔhʋla yekenyia Gyehova nu anwʋlazʋ iluwakɛɛ mɛyɩ yɛ lɛ Dɩyɛwɔlɛvʋlɔ nɩ. Mɛyɩ yɛ ɩwɔlɩ sʋlɔ nɩɩ azɩlɛ yɩ nɩɩ dɩyɛ bela mɔɔ nnwʋanlɩ wɔ numɔ nɩ a. (Gyn. 1:1; Ndw. 36:9; Yik. 4:11) Ɩwɔlɩ azɩlɛ yɩ wɔ ɔhʋanɩ be zʋ mɔɔ ɩma yɛ sa kã dɩyɛ bela mɔɔ yehyinyia na ama yɛahɔ zʋlɔ yɛawʋwa nnwʋanlɩ nu. Ɔzɔ nninyeni yi be yɛ lɛ anwʋma nɩɩ nzulo. Amansɔnɩ yɩ munwala dɩ yɩ dɩyɛ, na yɩzayɩ nkʋ̃tɩnyɩɩ yɛ ɩlɛ zʋlɔ tumi a. Iluwakɛɛ mɛyɩ yɛ nyɛlɛbɛ nɩɩ tumi munwala zʋ̃ yɩ kɛnɩ nɩ ti, yɛkɔhʋla kɛma ikehile ɔhʋanɩ yɛ wɔ yɛ ɛbɩlawɔlɛ nu na yeanyia anwʋlazʋ kɛɛ ɩkɛma yɛ eɣile be baaba.

4. Mɩnla yɛ ɩma yɛnwʋ yɩ kɛɛ Gyehova dɔ yɛ a?

⁴ Yɛkɔhʋla yekenyia Gyehova nu anwʋlazʋ iluwakɛɛ ɩdɔ yɛ. Sianti mɔɔ Gyehova wɔlɩ enii yɛ lɛ kɛɛ, ɩpɛ kɛɛ enii nyia nnwʋanlɩ nɩɩ anyɩnlɩlelɛ mɔɔ ɩwɔ nɩ be. Gyehova wɔlɩ yɛ wɔ ɔhʋanɩ be zʋ mɔɔ ɩkʋla ɩma yɛda yi subanɩ ngɩnlɩma be dɩkɛɛ ɔlɔlɛ nɩɩ kunlumiba ali. (Gyn. 1:26) Gyehova va ye nu ɔkʋ̃ bela yɩ pɛ ɩma yɩ. Akʋ̃ sʋ̃, ɩma yenyia azɩlɛ kɩnlɩma yɛwʋwa zʋlɔ. (Ndw. 115:16) Gyehova yilalɩ yɛ awʋvʋlɔ mɔɔ beli bɔmʋnlɩ yɩ, na ɩhanlɩ kɛɛ bɛmá azɩlɛ yɩ munwala ɩlanɩ paladayɩsɩ. (Gyn. 1:28; 2:15) Ɩvalɩ dɩyɛ bela mɔɔ bekehyinyia nɩ ɩmanlɩ bɛ na ama bɛ anyɩ iale wɔ bɛ ɛbɩlawɔlɛ nu. Eyi munwala da yɩ ali kɛɛ “Gyehova yɩ ɔlɔlɛ mɔɔ nnahɩlɩbɛ íni numɔ nɩ wɔ kɛnɩ daabaa.”—Ndw. 103:17.

5. (a) Mmɩlɩ mɔ Adamɩ nɩɩ Yifi yɛlɩ Gyehova zʋ azʋ̃nzɩzɩbɛ nɩ, mɩnla yɛ Gyehova yɛlɩ a? (b) Mɩnla anʋhʋba azʋlɔtʋ be yɛ Nyamɩnlɩ ma ɩɣa nu a? (Kila alɩka mɔɔ ise “Dasɩlɛ Mɔɔ Ikile Kɛɛ Nyamɩnlɩ Kã Nɔhʋanlɛ.”)

⁵ Yɛkɔhʋla yekenyia Gyehova nu anwʋlazʋ iluwakɛɛ mɔɔ ɩkã bela nɩ ba numɔ. Gyehova ɩábɔ azɩlɛ yɩ “zʋzɔ na mfomi ɩwɔlɩ kɛɛ bɔwʋwá zʋlɔ.” (Ayɩ. 45:​18, 19) Mmɩlɩ mɔ Adamɩ nɩɩ Yifi yɛlɩ Gyehova zʋ azʋ̃nzɩzɩbɛ nɩ, nɩ ɩsɛ kɛɛ bowu. Meti nɩ ɩdɩ kɛɛ mɔɔ Nyamɩnlɩ yi tile nu pɔkɔ ɩlɛ́ba nu. Naasʋ̃ Gyehova mɛyɩ, ɩma mɔɔ ɩhã nɩ munwatĩĩ ba numɔ. (Ayɩ. 46:​10, 11) Gyehova lɛ́sɩnzanlɩ yi tile nu pɔkɔ mɔɔ mɛyɩ yɛ lɛ kɛɛ enii kɔwʋwa azɩlɛ yɩ zʋ daabaa nɩ. Eyi ti yɛ Gyehova manlɩ Adamɩ nɩɩ Yifi wʋlɩ nnwuakula a. Na ɩvalɩ yɩ Ɣa ɔkʋ̃ kyeinyii nɩ ɩmanlɩ kɛɛ elelɛdɩyɛ na ama Adamɩ yɩ tʋmaa bɛanyia anyɩnlɩlazʋ kɛɛ bɔkɔwʋwa azɩ daabaa.—Dwɔ. 3:16.

NƆHƲANLƐ NYAMƖNLƖ YƖ MA YI TILE NU PƆKƆ BA NUMƆ

6. Mmɩlɩ mɔ Adamɩ nɩɩ Yifi dwodwuli diyialɩ Gyehova nɩ, mɩnla yɛ Gyehova hanlɩ kɛɛ ikezi a?

⁶ “Ɔwɔkɩ ɔwɔlɔ nɩ mɔɔ bɔfʋlɛ yɩ Abɔnsamɩa nɩ” yɛ ɩmanlɩ Adamɩ nɩɩ Yifi dwodwuli diyialɩ Nyamɩnlɩ a. (Yik. 12:9; Gyn. 3:​4, 5; Dwɔ. 8:44) Iluwa mɔɔ Setanɩ yɛlɩ nɩ ti, Gyehova hanlɩ kɛɛ ɩkɛzɩkɛ yɩ wɔ eɣile be. (Gyn. 3:15) Naasʋ̃ ansaana eyi kɛɣa numɔ nɩ, mmenii sʋ̃maa kɔhɔ kɛhɩnla Setanɩ nwʋ na bɛayɛ bɛ dɩyɛ dɩkɛɛ yɩzayɩ la. Na mbiyemmɔ sʋ̃ kɔhɔlɩ zʋlɔ kɛva nɔhʋanlɛlilɛ kɔvʋãmɩ Gyehova nwʋ.

7. Aninyiammɔ yɛ bɔhɔ beli Setanɩ yi ndianwʋ tanɩ yɩ mɛda a, na mɩnla yɛ ɩkɔdʋ bɛ a?

⁷ Mmenii sʋ̃maa hɔ li Setanɩ yi ndianwʋ tanɩ yɩ mɛda. Ɔzɔ la yɛ awɔvʋlɔ be sʋ̃ dwodwu diyia Gyehova na bɔhɔ beli Setanɩ yɩ mɛda a. Iluwakɛɛ bodwodwu bediyia Gyehova nɩ ti, bɛɣa bɛyɛ Setanɩ yɩ tʋmaa. Naasʋ̃ wɔ Nyamɩnlɩ yɩzayɩ yɩ mmɩlɩ baaba nu nɩ, ɩkɛzɩkɛ Setanɩ nɩɩ yɩ mɛdalilɛmaa munwala.—Da. 2:44; Wul. 16:20.

8. Mɩnla yɛ Gyisɛsɩ yɛlɩ wɔ 1914 a? (Kila mfonyini yi sʋ̃.)

⁸ Nyamɩnlɩ yi tile nu pɔkɔ mɔɔ mɛyɩ yɛ lɛ kɛɛ ɩkɛzɩkɛ Setanɩ nɩɩ yɩ mɛdalilɛmaa yɩ nɩ, mɩnla dasɩlɛ yɛ ɩma yɛnwʋ kɛɛ ɩkɛɣa numɔ a? Wɔ 1914 nɩ, Gyehova yɛlɩ Gyisɛsɩ bulombunli, na Gyisɛsɩ ɩ nɩɩ Setanɩ Abɔnsamɩ nɩɩ yɩ awɔvʋlɔ tanɩ yɩ hʋnlɩ na ɩdʋlɩ bɛ igualɩ azɩlɛ yɩ zʋ. (Yik. 12:​7-9) Ɩwɔ numɔ kɛɛ kʋnɛ eyi hɔlɩ zʋlɔ wɔ sʋlɔ dɩyɛ, naasʋ̃ ɩhã mmenii mɔɔ bɔwɔ azɩlɛ yɩ zʋ nɩ. Bayɩbʋlʋ yɩ kã kɛɛ, “Bɛzabɛ mɔɔ bɛda azɩlɛ yɩ zʋ, nɩɩ bɛzabɛ mɔɔ bɛda ngyemvile yɩ nu nɩ, mɛyɩ, bɔ twɔkʋ̃! Sianti yɛ lɛ kɛɛ, Abɔnsamɩ ɩva ɛya kezile idwu ɩɣa mʋnlʋmmɔ bɔ nwʋ ɛkɛnɩ. Na izi kɛɛ yɩ mmɩlɩ ɩha ɛgyɩkɩ̃ɩ̃ be.” (Yik. 12:12) Ɔzʋmɩ 1914 nɩ, Setanɩ va ziye yɩ anyɩ zʋ kɛɛ ɩkɛma mmenii sʋ̃maa kɛɣa keli yɩ mɛda, iluwa eyi ti ɔhawʋ nɩɩ atɩɩtɩɩ sʋ̃maa hyɛ oyuwadɩ eyi nu manlɩ. Naasʋ̃ ɩlɛ́kyɛ, Gyisɛsɩ kɛyɩ Setanɩ mɔɔ idii oyuwadɩ yɩ zʋ nɩ wɔ kɛnɩ na ɩazɩkɛ yɩ mɛdalilɛmaa munwala sʋ̃. (Yik. 6:2) Gyisɛsɩ koluwa eyi zʋ kɛdɩ Gyehova yi dima nwʋ kʋlakʋla. (Ndw. 45:​4-6) Na abiyela kɔnwʋ kɛɛ Gyehova yɛ lɛ nɔhʋanlɛ Nyamɩnlɩ nɩ!—Izi. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

NƆHƲANLƐ NYAMƖNLƖ NƖ IKUNWAHUNWAA BƐZABƐ MƆƆ BƆDƆ NƆHƲANLƐ YƖ NƖ MUNWA

9. Aninyiammɔ yɛ Gyehova ikunwahunwaa bo munwa wɔ nnɛ a?

⁹ Gyehova ikunwahunwaa “abɔdɩ munwatĩĩ mɔɔ bɔwɔ sʋlɔ nɩɩ azɩ nɩ bo munwa.” (Ɛfɩ. 1:10) “Abɔdɩ munwatĩĩ mɔɔ bɔwɔ sʋlɔ” nɩ gyĩ kɛnɩ ma bɛzabɛ mɔɔ bɔvɔ ngɔlɔ bɛ mɔɔ Gyehova ɩyɩ bɛ kɛɛ bɛ nɩɩ Gyisɛsɩ lí dɩyɛ wɔ sʋlɔ nɩ. Na “abɔdɩ munwatĩĩ mɔɔ bɔwɔ azɩ nɩ” sʋ̃ gyĩ kɛnɩ ma bɛzabɛ mɔɔ bɔkɔwʋwa azɩ daabaa wɔ Paladayɩsɩ azɩlɛ yɩ zʋ nɩ. Gyehova yɩ azʋ̃mɩvʋlɔ eyimmɔ munwala bɛlɛ ɛhyɩmɛ bɔbʋwaa mmenii ma bɔkɔnwʋ kɛɛ Gyehova yɛ ɩdɩ nɔhʋanlɛvʋlɔ a, na Setanɩ dɩ awohwivʋlɔ mɔɔ yi ti nu yɛ sɩ.

10. Mɩnla ɔhʋanɩ zʋ yɛ Gyehova bʋwa mmenii ma bɔnwʋ nɔhʋanlɛ yɩ a? (Yikile 14:​6, 7)

¹⁰ Bɛzabɛ mɔɔ bɔdɔ nɔhʋanlɛ yɩ nɩ, Gyehova iduwaa dasɩlɛlilɛ egyima kezile mɔɔ ɩkɔlɩɩ zʋlɔ wɔ oyuwadɩ munwala nɩ zʋ ikunwahunwaa bo munwa. (Kɩnga Yikile 14:​6, 7.) Ɩwɔ numɔ kɛɛ Gyehova duwa mmenii zʋ kã odwokɔba yɩ dɩyɛ, naasʋ̃ awɔvʋlɔ yɩ yɛ bɔbʋwa bɛ ma bɔnwʋ ahʋnlɩnɩbamaa na bɔtwɩ̃ bɛ bɛba asafʋ yɩ nu a. Dasɩlɛlilɛ egyima eyi bʋwa ma mmenii sʋ̃maa ba nwʋ nɔhʋanlɛ odwokɔ mɔɔ ɩfalɩ Gyehova nwʋ nɩ. Akʋ̃ sʋ̃, yeduwa zʋ yɛbʋwa mmenii mvʋlɔ ma bɔnwʋ kɛɛ Setanɩ luwa awohwi ɔzʋ̃mɩnlɛ zʋ ɩhɩnhã awohwi ndwokɔ ɩvalɩ Gyehova nwʋ alʋbɔ sʋ̃maa. (Yik. 18:​2, 4) Ɩlɛ́kyɛ na bɛazɩkɛ awohwi ɔzʋ̃mɩnlɛ kʋlakʋla, na mmenii mɔɔ bɔdɔ nɔhʋanlɛ Nyamɩnlɩ nɩ kɛva animinyiamɩ mɔɔ ɩfata yɩ nɩ kɛma yɩ.—Yik. 17:16.

11. Kɛ ɩkɛyɛ na yɛanwʋ Gyehova yɩ nɔhʋanlɛ azʋ̃mɩvʋlɔ a?

¹¹ Gyehova twɩ̃ mmenii mɔɔ bɔwɔ oyuwadɩ yɩ ɔfʋã nnɩka azʋlɔtʋ nɩ ma bɛba yɩ asafʋ yɩ nu. (Yik. 7:​9, 10) Sɛ bɛtɩ Gyehova nwʋ odwokɔ wɔ mmɩlɩ mɔ ili bɔmʋnlɩ a, bɛba bɔnwʋ yɩ petee kɛɛ mɔɔ bosumaa nɩ dɩ nɔhʋanlɛ na bɛba bɛkɩnla Gyehova yi mmenii yi nwʋ. (Mk. 13:10) Nnɛ, yɛnwʋ bɛzabɛ mɔɔ bɔsʋ̃mɩɩ Gyehova wɔ ɔhʋanɩ mɔɔ ɩfata zʋ nɩ petee. Nkɔmɩhyɛnii Malaki hyɛlɩ nkɔmɩ kɛɛ: “Ɔkɔnwʋ sʋnʋnkʋ̃ mɔɔ ɩwɔ ɛdɩnɣɛlɛnii nɩɩ tanɩyɛlɛnii bɛ avinli, nɩɩ abiye mɔɔ ɩsʋ̃mɩ Nyamɩnlɩ nɩɩ mɔɔ ɩázʋ̃mɩ yɩ nɩ bɛ avinli.” (Mal. 3:18) Gyehova Dasɩvʋlɔmaa duwa bɛ nyɛlɩyɛ nɩɩ dasɩlɛlilɛ egyima yɩ zʋ da yɩ ali kɛɛ bɔsʋ̃mɩɩ nɔhʋanlɛ Nyamɩnlɩ yɩ.

12. Mɩnla ɔhʋanɩ zʋ yɛ dasɩlɛlilɛ egyima yɩ bʋwa ma Gyehova yi tile nu pɔkɔ ba numɔ a?

¹² Sɛ yɛkã “Bulombunlililɛ yɩ nwʋ odwokɔba” yɩ a, nɩ ikile kɛɛ yedidili Gyisɛsɩ yɩ ahyɛdɩ zʋ na mmɩlɩ kʋ̃ yɩ nu la sʋ̃, nɩ yɛmaa Nyamɩnlɩ yɩ nkɔmɩhyɛ kɛɣa nu. (Mt. 24:14; Mt. 28:​18-20, NWT) Na iluwa odwokɔba yɩ ti, mmenii sʋ̃maa bɛɣa bɛyɛ Gyisɛsɩ yɩ mɛdalilɛmaa na bekilaa mmɩlɩ mɔ bɔkɔhʋla kɔzʋ̃mɩ Gyehova daabaa nɩ ɔhʋanɩ. Kila ɔnwʋmɔ ɔhʋanɩ kezile ɔkʋ̃ mɔɔ yenyia kɛɛ yɛbʋwaa ma Gyehova yi tile nu pɔkɔ kɛɣa nu!

FA ANWƲLAZƲ KILA EƔILE BE ƆHƲANƖ

13. Aninyiammɔ yɛ Setanɩ twodwu tiyia bɛ paa a, na mɩnla ti a?

¹³ Setanɩ Abɔnsamɩ nyia ɛya paa, iluwakɛɛ “izi kɛɛ yɩ mmɩlɩ ɩha ɛgyɩkɩ̃ɩ̃ be.” (Yik. 12:​12, 13) Bɛzabɛ mɔɔ bɔvɔ ngɔlɔ bɛ nɩ titili yɛ itwodwu itiyia bɛ a. Sianti yɛ lɛ kɛɛ ɔzɔ mmenii yi “bedi Nyamɩnlɩ mmɛla nɩ zʋ, na bede nɔhʋanlɛ nɩ mɔɔ Gyisɛsɩ Kɩlayɩsɩ ɩyɩ ihile nɩ bedi.” (Yik. 12:17; 14:12) Na abiyela sʋ̃ mɔɔ ɩwɔ ɔzɔ mmenii yi bɔ ɔfʋã na ɩbʋwa egyima mɔɔ bɛyɛɛ yɩ sʋ̃ nɩ, Setanɩ twodwu tiyia yɩ.

14. Sɛ Setanɩ tʋ hyɛ Gyehova yi mmenii zʋ a, mɩnla yɛ ikezi a? (Kila mfonyini yi sʋ̃.)

¹⁴ Wɔ Babilɔnʋ Kezile yi yɩ ɛzɩkɛlɛ mɛda nɩ, Setanɩ yɩ mɛdalilɛmaa kɔdʋ kɛhyɛ Gyehova yi mmenii zʋ. Na eyi kɔhɔ kowieli Amagadɔnʋ kʋnɛ yɩ nu. (Yik. 16:​13, 14, 16) Gyisɛsɩ nɩɩ yɩ sʋlɔ awɔvʋlɔ yɩ kele Gyehova yɩ azʋ̃mɩvʋlɔ na ɩázɩkɛ dɩyɛ bela mɔɔ ɩwɔ Setanɩ yi oyuwadɩ yɩ nu nɩ kʋlakʋla. (Yik. 19:​19-21) Bɛkɛzɩkɛ tanɩyɛlɛmaa nɩɩ nnahɩlɩbɛmaa munwala. (Yik. 21:8) Na abiyela kɔnwʋ kɛɛ Gyehova dɩ nɔhʋanlɛvʋlɔ na ɩyɛ mɔɔ ɩtɩnɣɛ mmɩlɩ munwala.

15. Mɩnla ti mɔɔ yɛkɔhʋla kenyia anwʋlazʋ kɛɛ Gyehova yɩ anʋhʋba mɔɔ ɩfalɩ eɣile be nwʋ nɩ kɛɣa numɔ pɛpɛɛpɛ a? (Ayɩzaya 65:​16, 17) (Kila mfonyini yi sʋ̃.)

¹⁵ Nnɛ, iluwa kʋnɛ nɩɩ nnahɩlɩbɛ ti mmenii nu hyɩhyɛ dɛla mmɩlɩ bela mɔɔ ɩɣa ɩzɩ̃ ɩhɔ. Naasʋ̃, Gyehova kɔ zʋlɔ bʋwa yi mmenii ma ɔkʋ̃yɛlɛ bʋwa bɛ avinli. Gyehova igua zʋlɔ ɩtwɩ̃ɩ̃ bɛzabɛ mɔɔ bɔdɔ nɔhʋanlɛ yɩ nɩ ɩba yɩ abusunwa yɩ nu. Akʋ̃ sʋ̃, iyilaa yi mmenii nɩɩ egyima mɔɔ bɛyɛɛ bɛma yɩ nɩ zʋ, na dɩyɛ bela íni kɛnɩ mɔɔ ɩkɔhʋla ikezi Gyehova ɔhʋanɩ kyɩ̃. (Kɩnga Ayɩzaya 65:​16, 17.) Yɛkɔhʋla kenyia anwʋlazʋ kɛɛ mɔɔ ɩhã bela nɩ kɛɣa numɔ pɛpɛɛpɛ. Mɩnla ti a? Iluwakɛɛ sʋ̃mavʋlɔ Pɔɔlʋ yi ndwokɔ mɔɔ ɩwɔ Wulomimaa 8:​38, 39 ma yɛnwʋ yɩ petee kɛɛ: “Owulo o, nnwʋanlɩ o, Nyamɩnlɩ awɔvʋlɔ o, oyumi adumivʋlɔ o, nninyeni mɔɔ bɔwɔ ɛkɛnɩ nnɛ o, nninyeni mɔɔ bɛbaɣa aɣinzi nɩ o, nninyeni mɔɔ bɛlɛ tumi nu o, dɩyɛ bela íni oyuwadɩ yɩ nu, sʋlɔ, anzɛnyɩɩ azɩlɛ yi ti kunlu, anzɛnyɩɩ oyuwadɩ yɩ nu dɩyɛ bela íni ɛkɛnɩ mɔɔ ɩkɔhʋla ɩkɛyɩ amɩyɛ wɔ Nyamɩnlɩ yɩ ɔlɔlɛ nɩ mɔɔ iluwa ye Niibenyia Gyisɛsɩ Kɩlayɩsɩ yɩ zʋ yenyia yɩ nɩ nwʋ.”

16. Mɩnla ti mɔɔ ɛlɛ anwʋlazʋ kezile paa wɔ Gyehova nu a?

¹⁶ Yɛwɔ sianti baaba ti mɔɔ ɩsɛ kɛɛ yenyia Gyehova, nɔhʋanlɛ Nyamɩnlɩ yɩ nu anwʋlazʋ. Mɛyɩ yɛ ɩwɔlɩ yɛ a, na ɩdɔ yɛ paa. Na Gyehova ikohunwahunwaa ɔlɔmɩ sʋ̃maa mɔɔ bɔwɔ oyuwadɩ yɩ ɔfʋã dɩka bela nɩ bo munwa ma bɔkɔzʋ̃mɩ yɩ wɔ ɔhʋanɩ mɔɔ ɩfata zʋ. (Ayɩ. 60:22; Zak. 8:23) Yezi kɛɛ Gyehova kɛma yi tile nu pɔkɔ kɛɣa numɔ na ɩayɩ Setanɩ wɔ kɛnɩ na ama nnahɩlɩbɛ tʋ iadua wɔ oyuwadɩ yɩ nu. Devidi wɔlɩ mpayɩ kɛɛ: ‘Ayɛlɛyɩlɛ hã Gyehova Nyamɩnlɩ, yɩzayɩ nkʋ̃tɩnyɩɩ yɛ ɩyɛ nnwʋánlɩ nninyeni a. Ayɛlɛyɩlɛ hã yi dima kezile nɩ daabaa. Na yɩ animinyiamɩ ɩhyɛ́ azɩlɛ yɩ zʋ manlɩ.’ Na amɩyɛ sʋ̃, yɛ mpayɩ la nɩ.—Ndw. 72:​18, 19.