Kakɛ Kɛɛ Ɔkɔwɔ Mpayɩ Kɛma Mmenii Mvʋlɔ

1. Mɩnla yɛ ɩma yɛnwʋ kɛɛ yɛ mpayɩwɔlɛ nwʋ hyinyia Gyehova a?

MPAYƖ dɩ akyɛdɩ mɔɔ ɩyɛ nnwʋánlɩ paa. Mɔwʋ dwɩnɩ eyi nwʋ kila: Gyehova ma awɔvʋlɔ ɔnwʋmɔ ɔhʋanɩ azʋlɔtʋ be. (Ndw. 91:11) Ɩva egyima azʋlɔtʋ mɔɔ nwʋmɔ hyinyia sʋ̃ iwula yɩ Ɣa yɩ sa. (Mt. 28:18) Naasʋ̃, sɛ ɩbayɩ nɩ mpayɩwɔlɛ a, aninyia yɛ ɩva iwula yɩ sa kɛɛ idiye a? Ɩ́dɩ abiyela kɛɛ yɩzayɩ munli yi. Gyehova dɩ “mpayɩ Diyelɛvʋlɔ,” na itiye ye nu ɔkʋ̃ bela yɩ mpayɩ.—Ndw. 65:2.

2. Mɩnla ndianwʋ yɛ sʋ̃mavʋlɔ Pɔɔlʋ yɛlɩ wɔ mpayɩ mɔɔ bɔbɔ bɛma mmenii mvʋlɔ nɩ nwʋ a?

² Sa yɛkʋla yɛkã mɔɔ ɩhawʋ yɛ nɩ yekile Gyehova, naasʋ̃ ɩsɛ kɛɛ yɛbɔ mpayɩ yɛma mmenii mvʋlɔ sʋ̃. Ɔzɔ yɛ sʋ̃mavʋlɔ Pɔɔlʋ yɛlɩ a. Kɛ ndianwʋ nɩ, ɩhɛlɛlɩ ɩhɔ ɩmanlɩ Ɛfɩsɛsɩmaa nɩ kɛɛ: ‘Miléyiakili kɛɛ mɩkɛhakɛ mʋnlʋmmɔ wɔ mɩ mpayɩ nu.’ (Ɛfɩ. 1:16) Pɔɔlʋ wɔlɩ mpayɩ manlɩ mmenii nkʋ̃kʋ̃ sʋ̃. Kɛ ndianwʋ nɩ, ɩhã ihileli Timoti kɛɛ: “Eɣile bela, ohunluma o, oyuwa o, sɛ mʋbɔɔ mpayɩ misiãã Nyamɩnlɩ a, mɩkakɛ wʋ, na mɩda Nyamɩnlɩ asɩ wɔ mɔwʋ ti.” (2 Tim. 1:3) Nɩ Pɔɔlʋ wɔ yɩzayɩ yɩ ndwokɔzɩzɩbɛ mɔɔ ɩkɔwɔ nwʋmɔ mpayɩ. (2 Kɔl. 11:23; 12:​7, 8) Naasʋ̃ ileli mmɩlɩ ɩwɔlɩ mpayɩ ɩmanlɩ mmenii mvʋlɔ.

3. Mɩnla yɛ ɩkɛma yɛ ɛɣɛɛlɛ kevi kɛɛ yɛkɔwɔ mpayɩ kɛma mmenii mvʋlɔ a?

³ Ɩyɛ a, yɛ ɛɣɛɛlɛ kevi kɛɛ yɛkɔwɔ mpayɩ kɛma mmenii mvʋlɔ. Mɩnla ti a? Eliyema baalɛ be mɔɔ bɔfʋlɔ yɩ Sabrinaa kã sianti ɔkʋ̃ ti mɔɔ ɩma yɛyɛ ɔzɔ. Ɩkã kɛɛ: “Nnɛ alagyɩ íni kɛnɩ kʋlaa. Sa yɛkʋla yɛfa yɛ adwɩnɩ yesiye ye ndwokɔzɩzɩbɛ zʋ nkʋ̃ʋ̃ ma mɛyɩ la yɛ yɛkɔwɔ nwʋmɔ mpayɩ a.” Asʋ̃ ɩyɛ a eyi be tʋ wʋ a? Sɛ zɔ a, dɩyɛzumanlɛ eyi kɔwʋwa wʋ paa. Ɩkɛma ɔkɔnwʋ (1) sianti mɔɔ ihyinyia kɛɛ ɔbɔ mpayɩ ma mmenii mvʋlɔ nɩɩ (2) adwɩnɩhilelɛ be mɔɔ ɩkɔwʋwa wʋ ma ɛkɛyɛ zɔ.

SIANTI MƆƆ IHYINYIA KƐƐ ƆBƆ MPAYƖ MA MMENII MVƲLƆ

4-5. Mpayɩ mɔɔ yɛbɔ yɛma mmenii mvʋlɔ nɩ, mɩnla ɔhʋanɩ zʋ yɛ “tumi ɩwɔ nu” a? (Gyemisi 5:16)

⁴ Mpayɩ mɔɔ yɛbɔ yɛma mmenii mvʋlɔ nɩ, “tumi ɩwɔ nu.” (Kɩnga Gyemisi 5:16.) Sɛ yɛbɔ mpayɩ yɛma mmenii mvʋlɔ a, asʋ̃ ɩkɔhʋla kɛma bɔ bʋwabɩlɛ kɛzɩnza a? Nyɛ, sa ɩkʋla. Nɩ Gyisɛsɩ zi kɛɛ ɩlɛ́kyɛ na sʋ̃mavʋlɔ Pita ɩayɩ yɩ ɩama, meti ɩhanlɩ kɛɛ: ‘Mʋwɔ mpayɩ mɩma wʋ, ama wʋ dedi ɩádɔlɩ sini.’ (Lk. 22:32) Nɩ Pɔɔlʋ sʋ̃ zi kɛɛ mpayɩwɔlɛ kɔhʋla kɛzɩnza abiye yɩ bʋwabɩlɛ. Mmɩlɩ mɔ bedianlɩ yɩ fiyiadɩ wɔ Wulomi nɩ, ɩhɛlɛlɩ hɔ manlɩ Fɩlɩmɔnʋ kɛɛ: “Mɩ anyɩ ɩla kɛɛ Nyamɩnlɩ ibadiye bo munwala bɛ mpayɩwɔlɛ ama ɩama mɩahʋla miazia mɩ nɩɩ bɛ yɛaɣa yɛawʋwa.” (Flm. 22) Na ɔzɔ yɛ izili a, bɛyɩlɩ Pɔɔlʋ wɔ fiyiadɩ ma izia ɩwɔlɩ yɩ dasɩlɛlilɛ egyima yɩ tʋ.

⁵ Naasʋ̃ eyi iáhile kɛɛ yɛkɔhʋla kɛhyɛ Gyehova wɔ yɛ mpayɩwɔlɛ nu kɛɛ ɩyɛ́ mɔɔ yɛpɛ bela ɩma yɛ. Ɩnwʋ kezimɔ yɩ azʋ̃mɩvʋlɔ da yɩ ali kɛɛ behyinyia mɔɔ bɔbɔɔ nwʋmɔ mpayɩ nɩ, na ɩyɛ a isi pɔkɔ kɛɛ ikediye bɛ. Eyi bʋwa yɛ ma yɛnwʋ yɩ kɛɛ yɛkɔhʋla kɔwɔ Gyehova mpayɩ wɔ bʋwabɩlɛ bela nu, na yenyia anwʋlazʋ kɛɛ ikediye yɛ.—Ndw. 37:5; kila 2 Kɔlɛntɩmaa 1:11.

6. Mɩnla ɔhʋanɩ zʋ yɛ mpayɩ mɔɔ yɛbɔ yɛma mmenii mvʋlɔ nɩ kile kezimɔ yɛdwɩnɩ bɔ nwʋ a? (1 Pita 3:8)

⁶ Mpayɩ mɔɔ yɛbɔ yɛma mmenii mvʋlɔ nɩ bʋwa yɛ ma yenyia ‘nwɔkɛnwʋnlɛ’ yɛma bɛ. (Kɩnga 1 Pita 3:8.) Enii mɔɔ ɩwɔ nwɔkɛnwʋnlɛ nɩ, ɩnwʋ mɔɔ enii fʋlɔ iduwaa nu na inyia ɛpɛ kɛɛ ɩyɛ́ debe ɩwʋwa yɩ. (Mk. 1:​40, 41) Asafʋ nu ebani be mɔɔ bɔfʋlɔ yɩ Michael kã kɛɛ: “Sɛ mʋbɔ mmenii mvʋlɔ bɛ ahyinyiadɩ nwʋ mpayɩ a, ɩma mɩtɩ bo ndwokɔzɩzɩbɛ mɔɔ beyiyiaa nɩ tʋ na ɩma ɔlɔlɛ mɔɔ mʋwɔ mɩma bɛ nɩ yɛ kezi. Ɩma mɩtɩ nɣanlɩ kɛɛ mibike bɛ paa ɩávalɩ nwʋmɔ kɛɛ bɛánwʋ yɩ nɩ.” Asafʋ nu ebani be mɔɔ bɔfʋlɔ yɩ Richard sʋ̃ kã kɛɛ: “Sɛ yɛbɔ mpayɩ yɛma abiye a, ɩkã yɛ ma yɛyɛ debe yɛbʋwa yɩ.” Ɩva ɩhɩnlanlɩ nwʋmɔ kɛɛ: “Sɛ yɛyɛ debe yɛbʋwa enii mɔɔ yɛbɔɔ mpayɩ kɛma yɩ nɩ a, ɔhʋanɩ be zʋ nɩ, nɩ yɛbʋwaa ma ikenyia mpayɩ mɔɔ yɛbɔɔ kɛma yɩ nɩ nwʋ munwalɩyɛ.”

7. Mɩnla ɔhʋanɩ zʋ yɛ sɛ yɛbɔ mpayɩ yɛma mmenii mvʋlɔ a, ɩbʋwa yɛ ma yenyia ye ndwokɔzɩzɩbɛ nwʋ adwɩnɩba a? (Fɩlɩpɩmaa 2:​3, 4) (Kila mfonyini yi sʋ̃.)

⁷ Mpayɩ mɔɔ yɛbɔ yɛma mmenii mvʋlɔ nɩ bʋwa yɛ ma yenyia ye ndwokɔzɩzɩbɛ nwʋ adwɩnɩba. (Kɩnga Fɩlɩpɩmaa 2:​3, 4.) Iluwakɛɛ Abɔnsamɩ yɛ idii oyuwadɩ yɩ zʋ nɩ ti, ye munwala yeyiyia ndwokɔzɩzɩbɛ. (1 Dwɔ. 5:19; Yik. 12:12) Sɛ yɛbɔ mpayɩ yɛma mmenii mvʋlɔ a, ɩma yɛkakɛ kɛɛ ye “mmeliyema dedimaa mɔɔ bɔwɔ oyuwadɩ yɩ nu dɩka bela nɩ, bɔnwʋʋ ɔzɔ amanɩyɛ nɩ be.” (1 Pit. 5:9) Katherine dɩ ɔhʋanɩbukolɛvʋlɔ. Ɩkã kɛɛ: “Mpayɩ mɔɔ mʋbɔ mɩma mmenii mvʋlɔ nɩ kakɛ mɩ kɛɛ abiyemmɔ sʋ̃ beyiyiaa ndwokɔzɩzɩbɛ. Eyi bʋwa mɩ ma mɩáva mɩ adwɩnɩ misiye mʋ ndwokɔzɩzɩbɛ zʋ sʋ̃maa.”

BEHYINYIA YƐ MPAYƖ

8. Aninyiammɔ yɛ yɛkɔhʋla kɔwɔ mpayɩ kɛma bɛ a?

⁸ Aninyiammɔ yɛ yɛkɔhʋla kɔwɔ mpayɩ kɛma bɛ a? Sa yɛkʋla yɛbɔ mpayɩ yɛma mmenii be dɩkɛɛ bɛzabɛ mɔɔ bɔ nwʋ ba bɛ, mmɩlantɩyɛ nɩɩ nɣɛdɛkɛ mɔɔ bɛ atipɛnɩmaa sɩlɩ bɛ anzɛnyɩɩ bɛfa odwohilalɛ bɛba bɔ zʋ wɔ sukuulu, anzɛnyɩɩ bɛzabɛ mɔɔ iluwa ebaniyɛlɛ ti beyiyiaa ndwokɔzɩzɩbɛ nɩ. Ye mmeliyema sʋ̃maa beyiyiaa odwodwudiyialɛ wɔ bo mmusunwamaa anzɛnyɩɩ aɣanɩ mbanimbani bɛ kɛnɩ. (Mt. 10:​18, 36; Egy. 12:5) Ye mmeliyema be sʋ̃ du wɔ bɛ awudo iluwa bɛsabɛsayɛlɛ mɔɔ ɩkɔlɩɩ zʋlɔ wɔ bɛ manlɩ nu nɩ ti. Iluwa asianɩ azʋlɔtʋ ti, abiyemmɔ sʋ̃ bɔnwʋʋ amanɩyɛ. Ebiye a, yézi mmeliyema eyimmɔ dɩyɛ, naasʋ̃ sɛ yɛbɔ mpayɩ yɛma bɛ a, nɩ yɛlɛ Gyisɛsɩ yɩ ahyɛdɩ mɔɔ ise ‘yɛlʋlɔ́ yɛ nwʋ nkʋ̃kʋ̃’ nɩ yɛyɛɛ egyima.—Dwɔ. 13:34.

9. Mɩnla ti mɔɔ ɩsɛ kɛɛ yɛbɔ mpayɩ yɛma bɛzabɛ mɔɔ beli nninyeni anyunu wɔ Gyehova yɩ ahyɩhyɛdɩ yɩ nu nɩɩ bɛ yɩmmɔ a?

⁹ Sa yɛkʋla sʋ̃ yɛbɔ mpayɩ yɛma bɛzabɛ mɔɔ beli nninyeni anyunu wɔ Gyehova yɩ ahyɩhyɛdɩ yɩ nu nɩ. Bo nu be yɛ lɛ Ɔhʋanɩhilelɛ Okuwu yi nɩɩ bɛ awʋwavʋlɔ, Egyimayɛlɛdɩka Kɔmitii nu maa, mmenyia mɔɔ bedi nninyeni anyunu wɔ Bɛtɩlɩ, mansini zʋ ehilalɛmaa, asafʋ nu mbanimbani nɩɩ azʋ̃mɩvʋlɔ. Ɩwɔ numɔ kɛɛ mmeliyema eyimmɔ bɔbʋwaa yɛ dɩyɛ, naasʋ̃ bɛzabɛ sʋ̃ beyiyiaa bo ndwokɔzɩzɩbɛ dɩyɛ. (2 Kɔl. 12:15) Kɛ ndianwʋ nɩ, mansini zʋ hilalɛvʋlɔ be mɔɔ bɔfʋlɔ yɩ Mark kã kɛɛ: “Mʋ ndwokɔzɩzɩbɛ ɔkʋ̃ mɔɔ miyiyiaa yɛ lɛ kɛɛ, miáɣike mɩ awʋvʋlɔ mɔɔ bɛ alʋbɔ hɔ anyunumi nɩ. Bɛzabɛ anwɩ̃ munwala bɛádɩ pɔkɔ. Ɩwɔ numɔ kɛɛ mi anlima baalɛ nɩɩ yi hũ kila bɛ dɩyɛ, naasʋ̃ ɩyɛ ɛyɛkɛ mɩ kɛɛ mɩáhʋla mɩyɛ sʋ̃maa mʋbʋwa bɛ.” Kɛ yezi ndwokɔzɩzɩbɛ mɔɔ ye mmeliyema eyimmɔ mɔɔ bɛyɛ egyimazɩzɩbɛ beyiyiaa anzɛnyɩɩ yézi nɩ, ɩsɛ kɛɛ yɛbɔ mmɔdɩnɩ yɛkakɛ bɛ wɔ yɛ mpayɩwɔlɛ nu. (1 Tɛs. 5:​12, 13) Sa yɛkʋla yɛbɔ mpayɩ sʋ̃ yɛma bɛ yɩmmɔ iluwakɛɛ bɔ nɔhʋanlɛlilɛ bʋwa bo hũmmɔ ma bɔkɔ zʋ bɛyɛ be egyimalilɛ yɩ.

10-11. Asʋ̃ Gyehova tiye mpayɩ mɔɔ yɛbɔ yɛma mmeliyema mɔɔ yézi bɛ ahyinyiadɩ nɩ a? Kilehile numɔ.

¹⁰ Kɛmɔ yezunzu nwʋmɔ nɩ, yɛta yɛbɔ mpayɩ yɛma ye mmeliyema mmenyia nɩɩ mmaalɛ mɔɔ beyiyiaa bʋwabɩlɛ azʋlɔtʋ. Kɛ ndianwʋ nɩ, sɛ yéni abiye pɔkyɩɩ wɔ yɛ adwɩnɩ nu mɔɔ yɛkɔhʋla kɔwɔ mpayɩ kɛma yɩ po a, sa yɛkʋla yesiã Gyehova kɛɛ ɩwʋwá bɛzabɛ mɔɔ bediã be fiyiadɩ anzɛnyɩɩ ɩyɩkyɩ́ bɛzabɛ mɔɔ bɛ alɔvʋlɔ wuwu nɩ bɛ ɛɣɛɛlɛ. Donald mɔɔ ɩdɩ asafʋ nu ebani nɩ kã kɛɛ, “Ye mmeliyema mmenyia nɩɩ mmaalɛ sʋ̃maa wɔ kɛnɩ mɔɔ beyiyiaa ndwokɔzɩzɩbɛ azʋlɔtʋ mɔɔ sɛ yɛbɔɔ mpayɩ a yɛbɔ ebiye yɛma bɛ.”

¹¹ Asʋ̃ Gyehova tiye mpayɩ mɔɔ ɩdɩ zɔ a? Nyɛ, itiye! Debe yɩzayɩ, yézi ye mmeliyema yɩ bo nu ɔkʋ̃ bela yɩ ahyinyiadɩ. Meti ɩkɛyɛ baaba kɛɛ yɛkɛdɛlɛ yɛ mpayɩ nu na yɛaziã Gyehova kɛɛ ɩwʋwá bɛ. (Dwɔ. 17:20; Ɛfɩ. 6:18) Mpayɩ mɔɔ ɩdɩdɩ zɔ nɩ da yɩ ali kɛɛ ‘yɛdɔ yɛ ɔhɔnwʋmmɔ dedimaa.’—1 Pit. 2:17.

MPAYƖ MƆƆ YƐBƆ YƐMA MMENII NKƲ̃KƲ̃

12. Mɩnla ɔhʋanɩ zʋ yɛ sɛ yɛfa yɛ anyɩ yetiã azɩ a, ɩkɔwʋwa yɛ ma yɛkɔwɔ nninyeni pɔkyɩɩ be nwʋ mpayɩ kɛma ye mmeliyema a?

¹² Fa wʋ anyɩ tiã azɩ. Mpayɩ mɔɔ yɛbɔ yɛma ye mmeliyema munwatĩĩ nɩ la ahanlɩ a, ɩkɛyɛ baaba kɛɛ yɛkɔwɔ mmenii nkʋ̃kʋ̃ bɛ anlima wɔ yɛ mpayɩwɔlɛ nu. Asʋ̃ adimakɛlɛ ididee abiye wɔ wʋ asafʋ nu a? Asʋ̃ kuakula be wɔ wʋ asafʋ nu mɔɔ yi padi golɔ iluwa odwohilalɛ mɔɔ iyiyiaa wɔ sukuulu nɩ ti a? Asʋ̃ ezi ɔwʋvʋlɔ be mɔɔ ɩyɛ sɩ ɩma yɩ kɛɛ ‘ɩkɛdɩdɩ yɩ ɣa na iahilehile yɩ kɛmɔ ye Niibenyia ɩpɛ yɩ nɩ’ a? (Ɛfɩ. 6:4) Sɛ ɛfa wʋ anyɩ tiã azɩ a, ɩkɛma ɔlɔlɛ mɔɔ ɔwɔ ma mmenii mvʋlɔ nɩ kɛyɛ kezi na ɩkɛhã wʋ ma ekenyia ɛpɛ kɛɛ ɔwɔ́ mpayɩ ma bɛ.b—Wul. 12:15.

13. Kɛ ɩkɛyɛ na yɛawɔ mpayɩ yɛama ye mmeliyema mɔɔ yeléyiyialɩ bɛ kyɩ̃ po nɩ a?

¹³ Bɔ mmenii nkʋ̃kʋ̃ bɛ anlima wɔ wʋ mpayɩ nu. Sa yɛkʋla yɛyɛ zɔ yɛma mmenii mɔɔ yeléyiyialɩ bɛ kyɩ̃ po nɩ. Kɛ ndianwʋ nɩ, kila mmeliyema mɔɔ bediã be fiyiadɩ wɔ nnɩka be dɩkɛɛ Crimea, Eritrea, Russia, nɩɩ Singapore nɩ. Sɛ ɔkɔ jw.org zʋ a, ɔkɔnwʋ ɔzɔ mmeliyema yɩ bɛ anlima wɔ kɛ.c Mansini zʋ ehilalɛvʋlɔ be mɔɔ bɔfʋlɔ yɩ Brian kã kɛɛ: “Mʋnwʋ yɩ kɛɛ sɛ mɩkɛlɛ mmeliyema mɔɔ bediã be fiyiadɩ nɩ bɛ anlima na mʋbɔ ma ifinde mu munwa a, ɩbʋwa ma mɩkakɛ bɛ na mʋbɔ mpayɩ mɩma bɛ.”

14-15. Mɩnla dɔkʋ̃ yɛ yɛyɛ a ɩkɛma yekenyia debe pɔkyɩɩ mɔɔ yɛkɔwɔ nwʋmɔ mpayɩ kɛma ye mmeliyema a?

¹⁴ Bɔ debe pɔkyɩɩ nwʋ mpayɩ. Michael mɔɔ yeli bɔmʋnlɩ yɛhã yɩ odwokɔ nɩ kã kɛɛ: “Sɛ mɩkɩnga ye mmeliyema mɔɔ bediã be fiyiadɩ nɩ nwʋ odwokɔ wɔ jw.org zʋ a, mʋbɔ mmɔdɩnɩ kɛɛ mɩkɛva mʋ nwʋ kowula bɔ bʋwabɩlɛ yɩ nu. Mizi kɛɛ sɛ mamɩ a, ankɩ mɩ yɩ nwʋ adwɩnɩndwɩnɩ kɛhyɛ mʋ zʋ, na mɩkɛbɛ yɩ kɛɛ ikenyia mɔɔ ihyinyia nɩ. Eyi ma minyia nninyeni pɔkyɩɩ mɔɔ mʋkɔwɔ nwʋmɔ mpayɩ kɛma mmeliyema mɔɔ begyia mɔɔ bediã be fiyiadɩ nɩ.”—Hib. 13:3.

¹⁵ Akʋ̃ sʋ̃, sɛ yɛdwɩnɩndwɩnɩ kezimɔ ɛbɩlawɔlɛ dɩ ma ye mmeliyema mɔɔ bediã be fiyiadɩ nɩ nwʋ a, ɩkɔwʋwa yɛ ma yekenyia debe pɔkyɩɩ mɔɔ yɛkɔwɔ nwʋmɔ mpayɩ kɛma bɛ. Kɛ ndianwʋ nɩ, sa yɛkʋla yɛbɔ mpayɩ kɛɛ abolisimaa mɔɔ bɔwɩɛnɩ fiyiadɩ kɛnɩ nɩ kɛla kunlumiba ali kehile bɛ na mbanimbani mɔɔ bɔwɔ fiyiadɩ kɛnɩ nɩ sʋ̃ bɛama ɔhʋanɩ ma bɛazʋ̃mɩ. (1 Tim. 2:​1, 2) Sa yɛkʋla sʋ̃ yɛbɔ mpayɩ kɛɛ mmeliyema mɔɔ bogua fiyiadɩ nɩ bɛ ndianwʋba yɩ kɛhyɛ asafʋ azʋlɔtʋ yɩ ɛzɩzɩbɛ na bo subanɩba mɔɔ bɛda yɩ ali nɩ sʋ̃ ɩahã bɛzabɛ mɔɔ bɛ́dɩ Dasɩvʋlɔmaa nɩ ma bɛadiye odwokɔba yɩ. (1 Pit. 2:12) Ɔzɔ la yɛ sɛ yɛfa yɛ nwʋ yewula mmeliyema mɔɔ beyiyiaa odwohilalɛ mvʋlɔ nɩ bɔ bʋwabɩlɛ nu a, ɩkɔwʋwa ma yɛkɔwɔ mpayɩ kɛma bɛ a. Sɛ yɛfa yɛ anyɩ yetiã azɩ, yɛbɔ mmenii nkʋ̃kʋ̃ bɛ anlima wɔ yɛ mpayɩ nu, na yɛbɔ debe pɔkyɩɩ nwʋ mpayɩ yɛma bɛ a, ɩkɛla ali kɛɛ ‘yɛwɔ ɔlɔlɛ yɛma yɛ nwʋ nkʋ̃kʋ̃ nkʋ̃kʋ̃.’—1 Tɛs. 3:12.

NYIA WƲ MPAYƖ NWƲ ADWƖNƖBA

16. Kɛ ɩkɛyɛ na yeanyia yɛ mpayɩ nwʋ adwɩnɩba a? (Matiyu 6:8)

¹⁶ Kɛmɔ yɛnwʋ yɩ nɩ, mpayɩ mɔɔ yɛbɔ yɛma mmenii mvʋlɔ nɩ kɔhʋla kɛzɩnza bɔ bʋwabɩlɛ. Naasʋ̃ ɩsɛ kɛɛ yenyia yɛ mpayɩ nwʋ adwɩnɩba. Sɛ yɛbɔɔ mpayɩ a, íni kɛɛ yɛma ɩyɛ kɛmɔ Gyehova ízi mɔɔ yɛkãã nɩ nwʋ hwɩɩ, yɛɛ íni kɛɛ yekile yi kezimɔ ilí bʋwabɩlɛ be nwʋ egyima a. Gyehova zi mɔɔ yɩ azʋ̃mɩvʋlɔ hyinyia ansaana bɛaɣizia yɩ po. (Kɩnga Matiyu 6:8.) Mɛyɩ nɩ mɩnla ti mɔɔ ɩsɛ kɛɛ yɛbɔ mpayɩ yɛma mmenii mvʋlɔ a? Sɛ yɛyɩ sianti azʋlɔtʋ mɔɔ yɛhã nwʋmɔ odwokɔ wɔ dɩyɛzumanlɛ eyi nu nɩ yetiã ahanlɩ a, ɔzɔ yɛ abiye mɔɔ ɩdwɩnɩ mmenii nwʋ nɩ yɛ a. Ɔlɔlɛ kã yɛ ma yɛbɔ mpayɩ yɛma mmenii mvʋlɔ. Sɛ Gyehova nwʋ yɩ kɛɛ yɩ asʋ̃mɩvʋlɔ bɛdaa yɩ ɔlɔlɛ yɩ be ali a, ɩma yɩ anyɩ de paa.

17-18. Ma ndianwʋ fa kehilehile mpayɩ mɔɔ yɛbɔ yɛma ye mmeliyema nɩ nu.

¹⁷ Sɛ yɛ mpayɩwɔlɛ ɩásɩnza ye mmeliyema bɔ bʋwabɩlɛ po a, ɩda yɩ ali kɛɛ yɛdɔ bɛ na Gyehova nwʋ yɩ. Sa yɛkʋla yɛfa ndianwʋ eyi yekilehile numɔ: Fa yɩ kɛɛ ɛzɩlɛ be wɔ nnwuakula anwɩ̃, benyia ɔkʋ̃ nɩɩ baalɛ ɔkʋ̃. Kuakula benyia yɩ nwʋ ba yɩ. Yɩ anlima baalɛ yɩ siã yɩ papa kɛɛ: “Misiãã wʋ yɛ debe bʋwa mi anlima benyia yɩ. Yɩ nwʋ ba yɩ paa!” Ɩwɔ numɔ kɛɛ ɛzɩlɛ yɩ ɩyɛɛ bʋwabɩlɛ yɩ nwʋ debe iluwakɛɛ ɩdɔ yɩ ɣa benyia yɩ na ɩbɔɔ mmɔdɩnɩ kɛɛ ikehila yɩ dɩyɛ, naasʋ̃ sɛ ɩnwʋ kɛɛ yɩ ɣa baalɛ yɩ dwɩnɩ yi anlima yɩ nwʋ ma meti isiãã yɩ kɛɛ ɩwʋwá yɩ a, yɩ anyɩ kele paa.

¹⁸ Ɔzɔ yɛ Gyehova hyɛ yɛ ɛzɩzɩbɛ kɛɛ yɛyɛ a, kɛɛ yɛkɔdwɩnɩ ye mmeliyema nwʋ na yɛawɔ mpayɩ yɛama bɛ. Sɛ yɛyɛ zɔ a, yɛ mpayɩ kɛla yɩ ali kɛɛ yɛwɔ ɔlɔlɛ kanyɩɩ yɛma mmenii mvʋlɔ na Gyehova nwʋ yɩ. (2 Tɛs. 1:3; Hib. 6:10) Akʋ̃ sʋ̃, kɛmɔ yezunzu nwʋmɔ nɩ, itwu mmɩlɩ be a, yɛ mpayɩwɔlɛ kɔhʋla kɛma mmenii mvʋlɔ bɔ bʋwabɩlɛ kɛzɩnza. Meti bɛmá yɛyɛ mɔɔ yɛkɔhʋla bela yɛwɔ mpayɩ yɛma yɛ nwʋ yɛ nwʋ.