Mmeliyema Anwɩ̃ Mɔɔ Bɛva Bɛ Bɛhɩnla Ɔhʋanɩhilelɛ Okuwu Yi Nwʋ

WƆ OCTOBER 5, 2024, yɛ ɔlʋbɔ ɔlʋbɔ ayiyialɩyɛ yɩ tʋ nɩ, bɛvalɩ amanɩyɛwɔlɛ sʋnʋnkʋ̃ be bedianlɩ kua. Mɛyɩ yɛ lɛ kɛɛ, bɛyɩ Eliyema Jody Jedele nɩɩ Jacob Rumph kɛɛ Gyehova Dasɩvʋlɔmaa bɔ Ɔhʋanɩhilelɛ Okuwu yi nu maa. Mmeliyema mmenyia anwɩ̃ eyimmɔ munwala bɛva nɔhʋanlɛlilɛ bɔzʋ̃mɩ Gyehova bɛhyɛ.

Bɔwʋlɩ Eliyema Jedele wɔ Missouri, U.S.A. na bɛdɩdɩlɩ yɩ wɔ nɔhʋanlɛ yɩ nu. Nɩ ɩ nɩɩ yɩ abusunwa da dɩka mɔɔ Gyehova Dasɩvʋlɔmaa ɛgyɩkɩ̃ɩ̃ be yɛ bɔwɔ kɛ a. Meti iyiyialɩ mmeliyema sʋ̃maa mɔɔ ɔsʋnɩ dɩka mɔɔ bɔzʋ̃ mɔɔ bɛɣa bɛyɛlɩ dasɩlɛlilɛ egyima wɔ kɛnɩ nɩ. Ɔlɔlɛ nɩɩ ɔkʋ̃yɛlɛ mɔɔ nɩ ɩwɔ bɛ avinli nɩ hanlɩ yɩ paa. Inlumanlɩ wɔ October 15, 1983. Nɩ yɩ anyɩ deli dasɩlɛlilɛ egyima yɩ nwʋ, meti iwieli sukuulu nɩ, ɩwɔlɩ ɔhʋanɩbukolɛ egyima yɩ tʋ wɔ September 1989.

Wɔ Eliyema Jedele yi nnwuakula nu nɩ, nɩ yɩ awʋvʋlɔ bɛ nɩɩ mɛyɩ nɩɩ yi anlima baalɛ ta kɔ kyela Bɛtɩlɩ. Eyi hyɛlɩ nnwuakula yɩ ɛzɩzɩbɛ ma bɛvalɩ Bɛtɩlɩ ɔzʋ̃mɩnlɛ bɛyɛlɩ bɔ bʋtayɩ na bɛzabɛ anwɩ̃ munwala bɔhɔ zʋ̃mɩnlɩ wɔ kɛ. Eliyema Jedele hɔlɩ Wallkill Bɛtɩlɩ wɔ September 1990. Ilili bɔmʋnlɩ ɩyɛlɩ egyima wɔ Azʋkɔlɩyɛ Mɔɔ Bekila Besiyeziye Bɛtɩlɩ na aɣinzi yi ɩ nɩɩ mmeliyema mɔɔ bekila Bɛtɩlɩmaa bɔ pɔkɔdɩlɛ nwʋ ndwokɔ hɔ yɛlɩ egyima.

Ɔzɔ mmɩlɩ yɩ, nɩ asafʋ azʋlɔtʋ mɔɔ bɛkã Spanish mɔɔ ɩwɔ kɛnɩ nɩ benyiaa anyunumihɔlɛ na nɩ behyinyia mmeliyema sʋ̃maa. Meti Eliyema Jedele hɔlɩ asafʋ yi ɔkʋ̃ nu. Ɩákyɛ yɛ iyiyialɩ Damaris mɔɔ nɩ ɩdɩ ɔhʋanɩbukolɛvʋlɔ wɔ mansini yi nu a. Begyialɩ, na ɩɣa ɩhɩnlanlɩ yɩ nwʋ wɔ Bɛtɩlɩ.

Wɔ 2005 nɩ, bɔzʋ̃ Bɛtɩlɩ bɛyɩlɩ bɔ nwʋ bɔhɔ behilalɩ bɛ awʋvʋlɔ. Wɔ ɔzɔ mmɩlɩ yɩ nɩ, bɔzʋ̃mɩnlɩ kɛɛ ɔhʋanɩbukolɛmaa. Eliyema Jedele wʋwalɩ ma behileli dɩyɛ wɔ Ɔhʋanɩbukolɛmaa Sukuulu tʋ, na ɩzʋ̃mɩnlɩ kɛɛ Asʋpiti Nkitanwʋlilɛ Kɔmitii nɩɩ Amanlɩ-Avinli Aliyiagyinanlɛ Kɔmitii nu enii.

Wɔ 2013 nɩ, bezia bɔvʋlɔlɩ Eliyema Benyia nɩɩ Eliyema Baalɛ Jedele ma bɛɣalɩ Bɛtɩlɩ bɛɣa bɛyɛlɩ Warwick aliyiagyinanlɛ egyima yɩ be. Ɔzʋmɩ ɔzɔ mmɩlɩ yɩ nɩ, bɔzʋ̃mɩ sʋ̃ wɔ Patterson nɩɩ Wallkill. Eliyema Jedele ɩyɛ egyima wɔ Aliyiagyinanlɛ Azʋkɔlɩyɛ (LDC) nɩɩ Asʋpiti Nwʋ Ndwokɔ Egyimalilɛdɩka. Wɔ March 2023 nɩ, bɛyɩlɩ yɩ kɛɛ bʋwavʋlɔ ma Ɔzʋ̃mɩnlɛ Egyima Kɔmitii. Mmɩlɩ mɔ ɩdwɩnɩndwɩnɩɩ yi egyimalilɛ azʋlɔtʋ nwʋ nɩ, ɩhanlɩ kɛɛ: “Sɛ enyia egyimalilɛ mvʋlɔ a, ɩkʋla ɩma wu kunlu tu. Naasʋ̃ ɛkɛnɩ yɛ ɩsɛ kɛɛ ɛfa wʋ nwʋ etiã Gyehova zʋ a, iluwakɛɛ mɛyɩ yɛ ɩma yɛkʋla yɛyɛ dɩyɛ bela a.”

Bɔwʋlɩ Eliyema Rumph wɔ California wɔ U.S.A. Ɩdɩ kuakula nɩ, nɩ yɩ maamɩ ɩyɛ mɛlɛkɛ wɔ sunzuma ɔfʋã nu, naasʋ̃ ɩwɔlɩ mmɔdɩnɩ ihilelihileli yi Bayɩbʋlʋ nu nɔhʋanlɛ yɩ. Akʋ̃ sʋ̃, ɔlʋbɔ bela, nɩ ɩkɔ ikyela yɩ nlabaalɛ mɔɔ nɩ ɩdɩ Dasɩvʋlɔ nɩ. Ɩwʋwalɩ yɩ ma yɩ anyɩ ɣa leli nɔhʋanlɛ yɩ nwʋ, na inyianlɩ ɔlʋbɔ 13 nɩ, ɩhanlɩ kɛɛ bɛ nɩɩ yɩ zumá Bayɩbʋlʋ. Inlumanlɩ wɔ September 27, 1992. Anyɩnlɩlelɛ odwokɔ yɛ lɛ kɛɛ, yɩ maamɩ zia wɔlɩ dasɩlɛlilɛ nɩɩ dɩyɛzumanlɛhɔlɛ tʋ, na yɩ papa nɩɩ yi mmenlima sʋ̃ nlumanlɩ.

Eliyema Rumph dɩ kuakula nɩ, ɩnwʋnlɩ kezimɔ nɩ ɔhʋanɩbukolɛmaa nɩ wɔ anyɩnlɩlelɛ. Meti iwieli sukuulu nɩ, ɩwɔlɩ ɔhʋanɩbukolɛ egyima yɩ tʋ wɔ September 1995. Wɔ ɔlʋbɔ 2000 nɩ, iduli ɩhɔlɩ Ecuador mɔɔ nɩ behyinyia ɛlawulowɔlɛmaa sʋ̃maa nɩ. Ɛkɛnɩ yɛ iyiyialɩ eliyema baalɛ ɔhʋanɩbukolɛvʋlɔ be mɔɔ bɔfʋlɔ yɩ Inga mɔɔ ɩzʋ̃ Canada a, na begyialɩ. Begyialɩ mɛda nɩ, bɔhɔ bɔzʋ̃mɩnlɩ wɔ twonwa be nu wɔ Ecuador, nɩ ɛlawulowɔlɛmaa ɛgyɩkɩ̃ɩ̃ be yɛ bɔwɔ kɛ a. Nnɛ bɛɣa bɛyɛ asafʋ mɔɔ bɔbɔ ɛhyɩmɛ.

Ɩákyɛ, bɛyɩlɩ Eliyema Benyia nɩɩ Eliyema Baalɛ Rumph kɛɛ ɔhʋanɩbukolɛmaa aditili, na aɣinzi yi bɔhɔ bɛyɛlɩ mansini egyima. Wɔ 2011 nɩ, bɔdʋlɩ salɛ bɔvʋlɔlɩ bɛ ma bɔhɔlɩ Giliyadɩ sukuulu mɔɔ ɩtɔ zʋlɔ 132 nɩ be. Bowieli sukuulu yi nɩ, bɔhɔ zʋ̃mɩnlɩ wɔ amanlɩ azʋlɔtʋ nu, na bɛyɛlɩ egyimalilɛ azʋlɔtʋ dɩkɛɛ Bɛtɩlɩ ɔzʋ̃mɩnlɛ, odwokɔbadɛlɛlɛmaa nɩɩ mansini egyima. Akʋ̃ sʋ̃, Eliyema Rumph nyianlɩ ɔnwʋmɔ ɔhʋanɩ hileli dɩyɛ wɔ Bulombunlililɛ Odwokɔbahanlɛmaa Sukuulu tʋ.

Iluwa COVID-19 adimakɛlɛ yɩ ti, Eliyema Benyia nɩɩ Eliyema Baalɛ Rumph zia hɔlɩ United States. Bɔdʋlɩ salɛ bɔvʋlɔlɩ bɛ wɔ Wallkill Bɛtɩlɩ, na ɛkɛnɩ yɛ Eliyema Rumph nyianlɩ ɛdɩdɩlɛ wɔ Ɔzʋ̃mɩnlɛ Egyima Azʋkɔlɩyɛ kɛnɩ a. Aɣinzi yi, bɛmanlɩ bezia bɔhɔlɩ Ecuador Bɛtɩlɩ, na Eliyema Rumph zʋ̃mɩnlɩ kɛɛ Egyimayɛlɛdɩka Kɔmitii nu enii. Wɔ 2023 nɩ, bɛmanlɩ bɔhɔlɩ Warwick. Wɔ January 2024 nɩ, bɛyɩlɩ Eliyema Rumph kɛɛ bʋwavʋlɔ ma Ɔzʋ̃mɩnlɛ Egyima Kɔmitii. Ɩdwɩnɩndwɩnɩɩ nnɩka azʋlɔtʋ mɔɔ ɩzʋ̃mɩ nwʋ nɩ, ɩkã kɛɛ, “Kɛ dɩka mɔɔ ɔsʋ̃mɩ nɩ yɛ ɩma wu egyimalilɛ be yɛ sʋnʋnkʋ̃ a, mfomi mmenii mɔɔ ɛ nɩɩ bɔ sʋ̃mɩ nɩ.”

Yɛ anyɩ sɔ egyima ɛzɩzɩbɛ mɔɔ mmeliyema mmenyia eyi yɛ nɩ, na yɛkɔ zʋ ‘yedi mmenii mɔɔ bɛdɩ zɔ nɩ nni.’—Fɩl. 2:29.