Kɛ Gyehova Dasɩvʋlɔmaa Bu Agyiahʋnlɩyiakilɛ Se a?
Yɛfa mɔɔ Bayɩbʋlʋ kã wɔ agyiahʋnlɩ nɩɩ agyiahʋnlɩyiakilɛ nwʋ nɩ yɛyɛ egyima. Nyamɩnlɩ hyɩhyɛlɩ agyiahʋnlɩ kɛɛ benyia nɩɩ baalɛ bɔwʋwá daabaa. Nna nu ɛbɩlazɩkɛlɛ nkʋ̃ la yɛ ɩkɔhʋla kɛma abiye keyiaki agyiahʋnlɩ a.—Matiyu 19:5, 6, 9.
Asʋ̃ Gyehova Dasɩvʋlɔmaa bʋwa bɛzabɛ mɔɔ bɛ agyiahʋnlɩ ɩyɛɛ ikogu nɩ a?
Nyɛ, boduwa ahʋanɩ sʋ̃maa zʋ bɛyɛ zɔ:
Awuuku azʋlɔtʋ. Awuuku eyimmɔ kã nninyeni mɔɔ ɩhyɛ agyiahʋnlɩ nu ɛzɩzɩbɛ nwʋ odwokɔ, na bɛzabɛ mɔɔ ɩdɩ kɛɛ mɔɔ bɛ agyiahʋnlɩ ɩlɛ́yɛ bʋwɔ kyɩ̃ nɩ po nyia zʋlɔ mfasʋ. Kɛ ndianwʋ nɩ, kila ndwokɔ mɔɔ ise “Nya Ahofama wɔ W’aware Mu,” “Sɛnea Wɔde Mfomso Firi,” nɩɩ “Nea Ɛbɛma Moasan Agye Mo Ho Adi.”
Yɛ asafʋ ayiyialɩyɛ azʋlɔtʋ. Yesunzu fʋlɔdulɛba mɔɔ Bayɩbʋlʋ yɩ fa ma wɔ agyiahʋnlɩ nwʋ wɔ yɛ Kilisinyianɩ ayiyialɩyɛ azʋlɔtʋ tʋ.
Asafʋ nu mbanimbani. Asafʋ nu mbanimbani fa mmʋwalɩyɛ ma agyiahʋnlɩmaa na bɔtwɩ̃ bɛ adwɩnɩ bɔkɔ ɛhɛlɛlɛ ndwokɔ be dɩkɛɛ Ɛfɩsɛsɩmaa 5:22-25 zʋ.
Sɛ Dasɩvʋlɔ be pɛ kɛɛ iyiaki agyiahʋnlɩ a, asʋ̃ ɩsɛ kɛɛ asafʋ nu mbanimbani de tiã nu ansaana a?
Anhã. Sɛ bɛkã bekile asafʋ mbanimbani po kɛɛ bɔwʋwá agyiahʋnlɩmaa be mɔɔ beyiyiaa ɔhawʋ wɔ bɛ agyiahʋnlɩ nu a, béni tumi kɛɛ bɛkɛhã kehile bɛ kɛɛ beyiakí agyiahʋnlɩ. (Galatiyiamaa 6:5) Naasʋ̃ sɛ abiye kyina debe mɔɔ Bayɩbʋlʋ yɩ iále itiã nu zʋ yiaki agyiahʋnlɩ a, Bayɩbʋlʋ ɩáma ɔhʋanɩ yɩ kɛɛ ikegyia dɔkʋ̃.—1 Timoti 3:1, 5, 12.
Kɛ Dasɩvʋlɔmaa bu agyiahʋnlɩ mɔɔ bɛtɩdɩ numɔ se a?
Bayɩbʋlʋ yɩ hyɛ agyiahʋnlɩmaa ɛzɩzɩbɛ kɛɛ bɔhɔ́ zʋlɔ bɔwʋwa, mmɩlɩ po mɔɔ nninyeni ɩáhyɛda kɔ bʋwɔ baaba nɩ. (1 Kɔlɛntɩmaa 7:10-16) Agyiahʋnlɩ nu ndwokɔzɩzɩbɛ sʋ̃maa wɔ kɛnɩ mɔɔ sɛ agyiahʋnlɩmaa bo numɔ bɔ nwʋmɔ mpayɩ ɛzɩzɩbɛ ɛzɩzɩbɛ, bɛfa Bayɩbʋlʋ nu egyinalɛzʋ-ndwokɔ bɛyɛ egyima, na bɛda ɔlɔlɛ ali bekile bɔ nwʋ bɔ nwʋ a, sa bɔkʋla bedi nwʋmɔ egyima.—1 Kɔlɛntɩmaa 13:4-8; Galatiyiamaa 5:22.
Naasʋ̃ wɔ bʋwabɩlɛ mɔɔ numɔ yɛ sɩ nu nɩ, Kilisinyiamaa be si pɔkɔ kɛɛ bokodu wɔ bɔ nwʋkãvʋlɔ yɩ nwʋ bɔkɔhɔ kɔwʋwa dɩka be. Ebiye yɛ lɛ kɛɛ:
Bo nu ɔkʋ̃ hyɛda la kɛɛ ilékila yɩ abusunwa.—1 Timoti 5:8.
Bo nu ɔkʋ̃ yɛ́ yɩ nwʋkãvʋlɔ yɩ ayɛkwa.—Ndwomi 11:5.
Bo nu ɔkʋ̃ ma ɩyɛ sɩ kɛɛ yɩ nwʋkãvʋlɔ yɩ kɔzʋ̃mɩ Nyamɩnlɩ. Kɛ ndianwʋ nɩ, ebiye a, agyiahʋnlɩmaa be mɔɔ bo nu ɔkʋ̃ ɩ́dɩ Dasɩvʋlɔ nɩ kɔwɔ mmɔdɩnɩ kɛɛ ɩkɛhyɛ mɔɔ ɩdɩ Dasɩvʋlɔ nɩ kɛɛ iwulú Nyamɩnlɩ yɩ mmɛla zʋ. Meti ebiye a, mɔɔ iyiyiaa ɔzɔ ɔhawʋ nɩ kezi pɔkɔ kɛɛ ɩzʋ̃ yɩ nwʋkãvʋlɔ yɩ nwʋ ikodu ama ‘iadiye Nyamɩnlɩ kɛɛ tumivʋlɔ tɛla enii.’—Egyima 5:29.