Mɩnla Ti Mɔɔ Gyehova Dasɩvʋlɔmaa Sia Kɔ Abiye Mɔɔ Bɔmʋnlɩ Nɩ Ɩhanlɩ Kɛɛ “Mɩ Anyɩ Iáleli Nwʋ” Nɩ Yɩ Ɛkɛnɩ Dɔkʋ̃ a?

Ɔlɔlɛ mɔɔ Gyehova Dasɩvʋlɔmaa wɔ ma Nyamɩnlɩ nɩɩ bɔ ɔhɔnwʋ enii nɩ kã bɛ ma bɛkã Bayɩbʋlʋ nu odwokɔ bekile mmenii munwatĩĩ mɔɔ bɛzabɛ mɔɔ bɔmʋnlɩ nɩ, bɛhanlɩ kɛɛ “Mɩ anyɩ iáleli nwʋ” nɩ kɩnla nwʋ. (Matiyu 22:37-39) Ɔlɔlɛ mɔɔ yɛwɔ yɛma Nyamɩnlɩ nɩ kã yɛ ma yetiye yɩ Ɣa yɩ ahyɛdɩ mɔɔ ise “yelí yɩ nwʋ dasɩlɛ bɔkɔbɔkɔ” nɩ. (Egyima 10:42; 1 Dwɔɔnʋ 5:3) Sɛ yɛkɔhʋla yɛkɛyɛ zɔ a, gyɩsɛ yɛkɔ zʋlɔ yɛkã Nyamɩnlɩ yɩ odwokɔ yekile mmenii mbɔmɩ sʋ̃maa, kɛmɔ nkɔmɩhyɛmaa mɔɔ bɔwʋwalɩ azɩ wɔ ɔwɔkɩ mmɩlɩ nu yɛlɩ nɩ. (Gyɛlɩmaya 25:4) Iluwakɛɛ yɛdɔ mmenii nɩ ti, yɛbɔ mmɔdɩnɩ kɛɛ yɛkɛhã “Bulombunlililɛ yɩ nwʋ odwokɔba” mɔɔ ɩma nnwʋanlɩ nɩ yekehile mmenii mvʋlɔ mɔɔ bɛzabɛ mɔɔ bɔmʋnlɩ nɩ bɛhanlɩ kɛɛ, bɛ anyɩ iáleli nwʋmɔ po kɩnla nwʋ.​—Matiyu 24:14.

Mbɔmɩ sʋ̃maa nɩ, sɛ yesia yɛkɔ abika be mɔɔ mmɩlɩ mɔ ili bɔmʋnlɩ mɔɔ yɛhɔlɩ kɛnɩ nɩ bɛátiye yɛ nɩ nu a, yesia yeyiyia mmenii mvʋlɔ mɔɔ bɛ anyɩ deli yɛ odwokɔ yɩ nwʋ. Ma yehilá sianti asã ti mɔɔ yɛkãã ɔzɔ nɩ:

• Mmenii kʋla tu kɔbʋwa nnɩka mvʋlɔ.

• Mmenii mvʋlɔ mɔɔ bɔwɔ pika yɩ nu kɛnɩ kɔhʋla kehile yɛ odwokɔ yɩ nwʋ anyɩnlɩlelɛ.

• Mmenii bo subanɩ sɩnza. Nninyeni mɔɔ isizii wɔ oyuwadɩ yi nu nɩɩ ndwokɔzɩzɩbɛ azʋlɔtʋ ma abiyemmɔ “bɔnwʋ yɩ kɛɛ behyinyia Nyamɩnlɩ yɩ ɔhʋanɩhilelɛ,” na ɩma betiye Bayɩbʋlʋ nu odwokɔ yɩ. (Matiyu 5:3) Dɩkɛɛ sʋ̃mavʋlɔ Pɔɔlʋ nɩ, bɛzabɛ mɔɔ botwodwu betiyia yɛ nɩ po kɔhʋla kɛzɩnza.​—1 Timoti 1:13.

Naasʋ̃, yɛáhyɛ abiyela kɛɛ kyɩngyɩ̃ɩ̃ la idiyé yɛ odwokɔ nɩ. (1 Pita 3:15) Yɛnwʋ yɩ kɛɛ sɛ ɩba yɩ nɩ ɔzʋ̃mɩnlɛ a, abiyela lɛ nwʋmɔ ɔhʋanɩ kɛɛ yɩzayɩ isi nwʋmɔ pɔkɔ.​—Ditilonɔmi 30:19, 20.