Kɛ Gyehova Dasɩvʋlɔmaa Bu Ayileyɛlɛ Se a?
Adwɩnɩ mɔɔ yɛlɛ wɔ ayileyɛlɛ nwʋ nɩɩ mɔɔ yɛyɛ wɔ nwʋ nɩ gyĩ Bayɩbʋlʋ ehilehilelɛ zʋ. Numɔ be yɛ lɛ kɛɛ:
Ɩ́dɩ tanɩ kɛɛ ekeli wʋ dɔvʋlɔ be yi owulo nwʋ ɛyɛkɛ. Gyisɛsɩ yɩ adʋwavʋlɔ yɩ lili bɛ alɔvʋlɔ bo owulo nwʋ ɛyɛkɛ. (Dwɔɔnʋ 11:33-35, 38; Egyima 8:2; 9:39) Ɔzɔ ti, kɛ ayile tʋ yɛ yɛkɔ yede yɛ anyɩ a. (Odwokɔhanlɛvʋlɔ 3:1, 4; 7:1-4) Mfomi, yɛnwʋ yɩ kɛɛ ɩdɩ mmɩlɩ mɔ ɩsɛ kɛɛ yɛfa yɛkyɩkyɩ mmenii ɛɣɛɛlɛ.—Wulomimaa 12:15.
Awuvʋlɔ bézi debela. Ɩávalɩ nwʋmɔ dɩka mɔɔ yɛzʋ̃ anzɛnyɩɩ yɛ ammamu nɩ, yɛtwɩ̃ yɛ nwʋ wɔ amamɩlɛ anzɛnyɩɩ nyɛlɩyɛ mɔɔ ígyĩ Bayɩbʋlʋ yɩ zʋ mɔɔ ebiye yɛ lɛ kɛɛ, abiye wu a, nɩ ilówuli na sa ɩkʋla idi tanɩ yɛ anzɛnyɩɩ ɩbʋwa yɛ nɩ nwʋ. (Odwokɔhanlɛvʋlɔ 9:5, 6, 10) Nninyeni mɔɔ yɛtwɩ̃ yɛ nwʋ wɔ nwʋmɔ nɩ be yɛ lɛ ɛpɛzilɛ, ayile nɣezilɛyɛlɛ nɩɩ ɔlʋbɔlilɛ, amanɩ mɔɔ bɛyɛ bɛma awuvʋlɔ, awuvʋlɔ mɔɔ bɛ nɩɩ bɛ tɩndɛ, nɩɩ kunayɛlɛ. Yɛyɛ ɔzɔ yɛfa yedi Bayɩbʋlʋ yɩ ahyɛdɩ mɔɔ ise, “bɔhwɩ̃ bɔ nwʋ wɔ bɔ nwʋ. Máma mʋnlʋmmɔ bɛfa bɛ sa bɛkã dɩyɛ mɔɔ nwʋmɔ ɩádɩ nɩ” zʋ.—2 Kɔlɛntɩmaa 6:17.
Anyɩnlɩlazʋ wɔ kɛnɩ ma awuvʋlɔ. Bayɩbʋlʋ yɩ kilehile kɛɛ bɛbadunwo awuvʋlɔ na mmɩlɩ be baɣa mɔɔ owulo íni kɛnɩ dɔkʋ̃. (Egyima 24:15; Yikile 21:4) Dɩkɛɛ ɔwɔkɩ Kilisinyiamaa yɩ nɩ, ɔzɔ anyɩnlɩlazʋ eyi sʋ̃ bʋwa yɛ ma yɛáli alɔbɔ dɩkɛɛ mɔɔ bɛzabɛ mɔɔ béni anyɩnlɩlazʋ yɛ nɩ.—1 Tɛsalonikamaa 4:13.
Bayɩbʋlʋ yɩ tu yɛ fʋlɔ kɛɛ yɛhã yɛ nwʋ azɩ. (Ɛɣɛlɛwulɛ 11:2) Yede yedi kɛɛ, kɛ ayileyɛlɛ yɛ lɛ mmɩlɩ mɔ ɩsɛ kɛɛ abiye fa nninyeni mɔɔ ɩlɛ dɩkɛɛ ozukua anzɛnyɩɩ yi dibilɛ tu yɩ nwʋ a. (1 Dwɔɔnʋ 2:16) Yɛáwɔ kakɛ yɛyɛ ayile nɣezile anzɛnyɩɩ yɛtʋdɔɔ alɩka nɩɩ nninyeni mɔɔ yɩ bʋlɔ yɛ sɩ yɛfa yɛyɛ ayile ama mmenii bɛanwʋ yɩ kɛɛ amɩyɛ sʋ̃ yɛwɔ kɛ.
Yɛáva ye dedi mɔ yɛlɛ yɩ wɔ ayileyɛlɛ nwʋ nɩ yepunwabunwa mvʋlɔ. Ɔzɔ ti, yɛfa Bayɩbʋlʋ nu odwokɔ eyi yɛyɛ egyima: “Meti ye nu ɔkʋ̃ bela ikowu yɩ ngʋnda ikehile Nyamɩnlɩ.” (Wulomimaa 14:12) Naasʋ̃ sɛ yenyia nwʋmɔ ɔhʋanɩ a, yɛbɔ mmɔdɩnɩ yekilehile ye dedi nu wɔ “odwolɛ nɩɩ annidi nu.”—1 Pita 3:15.
Kɛ Gyehova Dasɩvʋlɔmaa yɛ bɛ ayile se a?
Dɩka: Sɛ bɛyɛɛ ayile a, abusunwa yɩzayɩ yɛ bekile dɩka mɔɔ ɩkɔhɔlɩ zʋ a, dɩkɛɛ Kɩndɔm Hɔɔlʋ, dɩka mɔɔ bɛyɛ ayile, abiyemmɔ bɛ abika nu, dɩka mɔɔ bɛyɩba funli, anzɛnyɩɩ nna yɩ zʋ.
Kezimɔ bɛyɛ yɩ: Bɛma ndɛnɩ bɛfa bɛhyɛ abusunwamaa yɩ ɛzɩzɩbɛ iluwaa mɔɔ Bayɩbʋlʋ yɩ kã falɩ owulo nɩɩ awudunwolɩyɛ nwʋ anyɩnlɩlazʋ mɔɔ bekehilehile numɔ nɩ. (Dwɔɔnʋ 11:25; Wulomimaa 5:12; 2 Pita 3:13) Wɔ egyimalilɛ yɩ nu nɩ, bɔtwɩ̃ adwɩnɩ besiye enii mɔɔ iwu yi subanɩ ngɩnlɩma zʋ, na ebiye a, bɛahã ozumalɛdɩyɛ be wɔ enii nkʋ̃ nɩ yɩ ɛbɩlaba mɔɔ ɩwɔlɩ nɩ nu.—2 Samʋwɛlɩ 1:17-27.
Bɔtʋ ndwomi be mɔɔ igyĩ Bayɩbʋlʋ yɩ zʋ. (Kolosiyiamaa 3:16) Awielɩyɛ kʋlaa nɩ bɔbɔ mpayɩ.—Fɩlɩpɩmaa 4:6, 7.
Ozukua anzɛnyɩɩ kɔlɛhyɩnɩ: Yɛálile ozukua anzɛnyɩɩ kɔlɛhyɩnɩ wɔ yɛ ayiyialɩyɛ bela tʋ, mɔɔ ayile sʋ̃ kɩnla nwʋmɔ.—Matiyu 10:8.
Bɛzabɛ mɔɔ bɔkʋla bɛba biye: Sɛ bɛyɛɛ ayile yi wɔ Kɩndɔm Hɔɔlʋ a, bɛzabɛ mɔɔ bɛ́dɩ Dasɩvʋlɔmaa po kʋla ba biye. Kɛmɔ abiyela kʋla ba yɛ ayiyialɩyɛ azʋlɔtʋ tʋ nɩ, ɔzɔ la yɛ yɛ ayile sʋ̃ dɩ a.
Asʋ̃ Gyehova Dasɩvʋlɔmaa kɔ ɔzʋ̃mɩnlɛ mvʋlɔ bɛ ayile tʋ a?
Gyehova Dasɩvʋlɔmaa bo nu ɔkʋ̃ bela kyina yi tiwʋwaba mɔɔ ɩva Bayɩbʋlʋ ɩdɩdɩ yɩ zʋ isi eyi nwʋ pɔkɔ. (1 Timoti 1:19) Naasʋ̃, yɛáva yɛ nwʋ yewula ɔzʋ̃mɩnlɛ nu nyɛlɩyɛ mɔɔ Bayɩbʋlʋ tɩndɛ tiyia nɩ nu.—2 Kɔlɛntɩmaa 6:14-17.