Ankʋnamɩyɛlɛ Mɔɔ Inyiaa Anyunumihɔlɛ—Mɔɔ Bayɩbʋlʋ Yɩ Kã

Ɛbɩbɛlɛnu mɔɔ bɛyɛ yɩ aɣile asã yɩ da yɩ ali kɛɛ,a sɛ ɛyɩ mmenii anla kyina kɛ a, ɩáyɛ bʋwɔ kʋlaa nɩ, bo nu ɔkʋ̃ tɩ nɣanlɩ kɛɛ ɩyɛ ankʋnamɩ.

• “Abiyela kɔhʋla kɛdɩ nɣanlɩ kɛɛ ɩyɛ ankʋnamɩ, mɔɔ ɩávalɩ nwʋmɔ ɔlʋbɔ mɔɔ eli anzɛnyɩɩ dɩka mɔɔ ɔzʋ̃ nɩ.”​—Chido Mpemba, mɔɔ yɩzayɩ sʋ̃ ɩdɩ World Health Organization bɛ azʋkɔlɩyɛ fʋlɔ mɔɔ bɔfʋlɔ yɩ Commission on Social Connection yɩ biyianuwʋwalɛvʋlɔ nɩ.

Mmenii sʋ̃maa bɛ adwɩnɩ yɛ bɛ kɛɛ, mmenii mɔɔ bɛ alʋbɔ hɔ anyunumi anzɛnyɩɩ bɛzabɛ mɔɔ ɩha bɛzabɛ nkʋ̃ la yɛ ankʋnamɩyɛlɛ kã bɛ a. Naasʋ̃ ɩ́dɩ zɔ kʋlaa, iluwakɛɛ sɛ abiye yɩ pɔkɔdɩlɛ dɩ baaba, idi bʋwɔ, yɩ anyɩ ɩlɛ́tɩlɩ anzɛnyɩɩ igyia po a, ankʋnamɩyɛlɛ kɔhʋla kɛhã yɩ. Sɛ abiye ɩ nɩɩ mmenii mvʋlɔ ɩáwɔ na ɩtɩ nɣanlɩ kɛɛ ɩha yɩzayɩ nkʋ̃tɩnyɩɩ a, ɩkɔhʋla ɩkɛhã yɩ nnwʋnlamɩ nɩɩ yɩ nɣanlɩdɩlɛ ɔfʋã nu pɔkɔdɩlɛ.

• Awudoyɛlɛvʋlɔ Vivek Murthy mɔɔ ɩyɛ opilehyɛnɩ wɔ U.S. wɔlɩ amanɩyɛ kɛɛ, “Ankʋnamɩyɛlɛ kʋla nyia abiye zʋ tumi kezile paa.” Ɩva ɩzɔlɩ zʋlɔ kɛɛ: “Ankʋnamɩyɛlɛ kʋla kũ abiye dɩkɛɛ mɔɔ sɛ abiye nʋ̃ sɩgɛlɛtɩ 15 wɔ eɣile ɔkʋ̃ bela a, ɩkʋla ikũ yi nɩ.”

Mɔɔ Bayɩbʋlʋ yɩ kã

Yɛ Wɔlɛvʋlɔ yɩ pɛ kɛɛ yɛ nɩɩ mmenii mvʋlɔ bɔ. Nɩ Nyamɩnlɩ yi tile nu pɔkɔ yɛ lɛ kɛɛ adasamaa munwala bɛ nɩɩ bɔ nwʋ kɔwɔ wɔ azʋ̃nudwolɩyɛ nu na bɛ anyɩ iale.

• Mɔɔ Bayɩbʋlʋ yɩ kã: “Nyamɩnlɩ hanlɩ kɛɛ: ‘Ɩáyɛ baaba kɛɛ benyia yɩ yɩzayɩ nkʋ̃ kɔwʋwa.’”​—Gyɛnɛsɩsɩ 2:18.

Nyamɩnlɩ pɛ kɛɛ yɛ nɩɩ nyia abusunwawɔlɛ. Ɩwɔ anʋhʋba kɛɛ sɛ yɛbɔ mmɔdɩnɩ yɛtwɩ̃ yebike yi a, yɩzayɩ sʋ̃ ɩkɔhwɩ̃ ikeɣike yɛ.​—Gyemisi 4:8.

• Mɔɔ Bayɩbʋlʋ yɩ kã: “Anyɩnlɩlelɛ yɛ lɛ bɛzabɛ mɔɔ bezi bo sunzuma ɔfʋã nu ahyinyiadɩ, iluwakɛɛ sʋlɔ Bulombunlililɛ yɩ dɩ bɛ dɩyɛ.”​—Matiyu 5:3, New World Translation.

Nyamɩnlɩ pɛ kɛɛ yɛ nɩɩ mmenii mvʋlɔ bo numɔ sʋ̃mɩ yɩ. Sɛ yɛyɛ zɔ a, ɩkɛma yɛ anyɩ kele.

• Mɔɔ Bayɩbʋlʋ yɩ kã: ‘Mʋnlʋmmɔ bɛmá yɛdwɩnɩ ɔhʋanɩ mɔɔ yɛkɔhʋla yekezizi yɛ ɔhɔnwʋmmɔ bɛ kɛnɣa, yɛlʋlɔ́ yɛ nwʋ nkʋ̃kʋ̃ nkʋ̃kʋ̃, na yɛwɔ́ ɛbɩla baaba, dɩka mɔɔ yeyiyia numɔ yetiye Nyamɩnlɩ Odwokɔ nɩ nɩ, máma yeyiaki ɛkɛnɩ ɔhɔlɛ, mfomi mʋnlʋmmɔ bɛmá yezizi yɛ kɛnɣa nkʋ̃kʋ̃ ma ɩwʋlʋ́ ɔzʋlɔ.’​—Hibulumaa 10:24, 25.

Sɛ ɛpɛ kɛɛ ɔnwʋ ndwokɔ sʋ̃maa mɔɔ ɩfalɩ sianti mɔɔ nwʋmɔ hyinyia kɛɛ edi ankʋnamɩyɛlɛ zʋ a, kɩnga odwokɔ mɔɔ ise “Loneliness in a World of Mass Connection.”