Kɔ Zʋlɔ Fa Wʋ Nwʋ Tiã “Nyamɩnlɩ Yɩ Ɔhʋanɩhilelɛ” Zʋ

1. Mɩnla nninyeni yɛ adasamaa hyinyia a? (Matiyu 5:3)

GYEHOVA zi mɔɔ adasamaa hyinyia. Kɛ ndianwʋ nɩ, yehyinyia alɩyɛ, ntalɩ, nɩɩ dabɩlɛ na ama yɛahɔ zʋ yɛawʋwa nnwʋanlɩ nu. Sɛ yɛ sa ɩákã ɔzɔ nninyeni yi wɔ mmɩlɩ sikalɛ be po a, ɛbɩlawɔlɛ kɔhʋla kɛyɛ sɩ kɛma yɛ paa. Naasʋ̃ nnwʋnlamɩ ɔfʋã nninyeni eyimmɔ la ahanlɩ a, Gyehova wɔlɩ yɛ wɔ ɔhʋanɩ be zʋ mɔɔ ɩma yenyia ɛpɛ kɛɛ yɛkɔnwʋ yɩ na yɛava yɛ nwʋ yeadiã yɩ ɔhʋanɩhilelɛ zʋ. (Kɩnga Matiyu 5:​3, NWT.) Sɛ yɛ anyɩ kele paa a, ɩsɛ kɛɛ yɛnwʋ kɛɛ yehyinyia yɩ ɔhʋanɩhilelɛ, na yɛkɔ zʋ yɛfa yɛ nwʋ yetiã yɩ zʋ.

2. Mɩnla ɔhʋanɩ zʋ yɛ yɛ bʋwabɩlɛ dɩ kɛɛ ehyinyianii mɔɔ isinziã dɩyɛ a?

² Giliki odwokɔ mɔɔ bekile yɩ tʋ “bɔnwʋ yɩ kɛɛ behyinyia Nyamɩnlɩ yɩ ɔhʋanɩhilelɛ” nɩ, ɩyɛ sʋ̃ a bekile yɩ tʋ kɛɛ “bɛdɩ sunzuma nu ahyinyiamaa.” Mɔwʋ tua ehyinyianii be mɔɔ isinziãã dɩyɛ mɔɔ yɩ nwʋ yɛ evinli na mɔɔ ikeli po ɩyɛ sɩ ɩma yɩ nwʋ mfonyini kila. Sɛ oyuwa yɩ ifii ketee po a ɩda numɔ, na awulo two na ɛyɛbɛ ba sʋ̃ a ɩda numɔ. Mmenii nwʋ yɩ a bɛádɛnɩ yɩ nwʋ iluwa kezimɔ yɩ nwʋ dɩ nɩ ti. Ɔkʋla nwʋ kɛɛ ɩvɛ na yɩ anyɩ iále. Izi kɛɛ sɛ ɩkɔhʋla kenyia anwʋzɩzɩbɛ na ɩawʋwa nnwʋanlɩ nu a, ikehyinyia mmenii mvʋlɔ bɔ mmʋwalɩyɛ, meti ɩkɔ zʋ isinziã dɩyɛ. Ɔzɔ la yɛ bɛzabɛ mɔɔ bezi kɛɛ behyinyia Nyamɩnlɩ yɩ ɔhʋanɩhilelɛ nɩ wɔ ɛpɛ kɛɛ bekeɣizia yɩ kɛnɩ mmʋwalɩyɛ na bɛadiye yi sʋ̃ a.

3. Mɩnla yɛ yɛbazunzu nwʋmɔ wɔ dɩyɛzumanlɛ eyi nu a?

³ Wɔ dɩyɛzumanlɛ eyi nu nɩ, sa yedi bɔmʋnlɩ yekila mɔɔ yɛkɔhʋla kozuma wɔ Finihyianii baalɛ be mɔɔ izianlɩ Gyisɛsɩ kɛɛ ɩwʋwá yɩ nɩ kɛnɩ. Yi odwokɔ yɩ ma yɛnwʋ subanɩ asã be mɔɔ ihyinyia kɛɛ bɛzabɛ mɔɔ bɔnwʋ kɛɛ behyinyia Nyamɩnlɩ yɩ ɔhʋanɩhilelɛ nɩ da yɩ ali. Akʋ̃ sʋ̃, sa yesunzu ndianwʋ mɔɔ sʋ̃mavʋlɔ Pita, Pɔɔlʋ, nɩɩ Bulombunli Devidi mɔɔ bɛvalɩ bɔ nwʋ bedianlɩ Gyehova zʋ yɛlɩ nɩ nwʋ.

SUBANƖ ASÃ MƆƆ IHYINYIA KƐƐ YENYIA

4. Mɩnla yɛ nɩ Finihyianii baalɛ be pɛ kɛɛ Gyisɛsɩ yɛ ma yɩ a?

⁴ Eɣile ɔkʋ̃ be, Finihyianii baalɛ be ɣalɩ Gyisɛsɩ kɛnɩ. Nɩ sunzuma evinli be ididee yɩ ɣa baalɛ ɛzɩzɩbɛ ɛzɩzɩbɛ. (Mt. 15:​21-28) Baalɛ yɩ hɔ wuli ntwɛlɩ wɔ Gyisɛsɩ yɩ anyunu zianlɩ yɩ kɛɛ ɩwʋwá yɩ ɣa baalɛ yɩ. Mmɩlɩ mɔ baalɛ eyi hɔlɩ Gyisɛsɩ yɩ pɛ nɩ, ɩlalɩ subanɩ be mɔɔ nwʋmɔ hyinyia ali. Bɛmá yezunzu numɔ be nwʋ.

5. Mɩnla subanɩ yɛ baalɛ nɩ lalɩ yɩ ali a, na mɩnla yɛ eyi manlɩ Gyisɛsɩ yɛlɩ a? (Kila mfonyini yi sʋ̃.)

⁵ Finihyianii baalɛ yɩ lalɩ kãnwʋazɩ ankasa ali. Mɩnla ti mɔɔ yɛkʋla yɛkã yɩ zɔ a? Iluwakɛɛ mmɩlɩ mɔ Gyisɛsɩ valɩ yɩ dindianlɩ ɔhyʋwa ɣalɛ nwʋ nɩ, ɩáfa ɛya. Ɩkɛyɛ kɛɛ nɩ bɛzabɛ mɔɔ bɛ́dɩ Dwuumaa nɩ ta sʋ̃ nhyʋwa mmalɛ wɔ bɛ awudo. Sɛ mɔwʋ yɛ Gyisɛsɩ hanlɩ zɔ hileli wʋ a, ankɩ ɛkɛyɛ mɩnla a? Asʋ̃ ankɩ ɛkɛdɩ nɣanlɩ kɛɛ ɩwʋdʋ wʋ ma meti ekeyiaki mmʋwalɩyɛ mɔɔ ɛpɩbɛɛ yɩ wɔ yɩ kɛnɩ nɩ a? Kɛ ɔzɔ yɛ baalɛ nɩ yɛlɩ yɩ dɩyɛ a. Kɛ kãnwʋazɩ nkʋ̃ la yɛ ɩlalɩ yɩ ali a, mfomi nɩ izi yɩ kɛnɣa sʋ̃. Yɛnwʋ yɩ zɔ iluwakɛɛ ɩhɔlɩ zʋlɔ izianlɩ Gyisɛsɩ kɛɛ ɩwʋwá yɩ. Mɩnla yɛ ɩhanlɩ yɩ ma ɩyɛlɩ zɔ a? Nɩ ɩwɔ dedi wɔ Gyisɛsɩ nu. Nɔhʋanlɛ nu nɩ, dedi mɔɔ baalɛ eyi lalɩ yɩ ali nɩ hanlɩ Gyisɛsɩ yɩ ahʋnlɩnɩ ma ɩyɛlɩ debe sʋnʋnkʋ̃ be ɩwʋwalɩ yɩ. Ɩávalɩ nwʋmɔ kɛɛ ahyɛasɩ yɩ Gyisɛsɩ hanlɩ hileli yi kɛɛ bɔzʋ̃ma yɩ kɛɛ ɩɣa ɩwʋwá “Yizilayamaa nɩ mmɔ mɔɔ bɛdɩdɩ kɛɛ mmuwuanɩ mɔɔ beminli nɩ nkʋ̃” la nɩ, Gyisɛsɩ duli sunzuma evinli nɩ wɔ Finihyianii baalɛ yɩ ɣa kuakula baalɛ nɩ yi nu.

6. Mɩnla yɛ yesuma wɔ Finihyianii baalɛ yɩ yi odwokɔ yɩ nu a?

⁶ Sɛ yekenyia Nyamɩnlɩ yɩ ɔhʋanɩhilelɛ zʋ mfasʋ a, ɩsɛ kɛɛ yesumazuma Finihyianii baalɛ yɩ. Ɩsɛ kɛɛ yenyia kãnwʋazɩ, yesi yɛ kɛnɣa, na yenyia dedi kezile. Sɛ abiye kã yɩ nwʋ azɩ a, isi yɩ kɛnɣa kɛɛ ikeziã Nyamɩnlɩ kɛnɩ mmʋwalɩyɛ. Ɩsɛ kɛɛ yenyia dedi kezile wɔ Gyisɛsɩ Kɩlayɩsɩ nu, na yenyia anwʋlazʋ wɔ bɛzabɛ mɔɔ ɩlɛ bɛ ikilee yi mmenii ɔhʋanɩ nɩ nu. (Mt. 24:​45-47) Gyehova nɩɩ yɩ Ɣa yɩ bɛ anyɩ kele kɛɛ bɔkɔwʋwa yɛ mmɩlɩ mɔ bɔnwʋ kɛɛ yɛdaa subanɩ mɔɔ ɩdɩ zɔ ali nɩ. (Fa tindiã Gyemisi 1:​5-7 nwʋ.) Kakɩ yɩ, bɛmá yehila kezimɔ Gyehova bɔ yɛ nwʋ banɩ na ɩfa nninyeni mɔɔ yehyinyia nɩ ɩma yɛ nɩ. Akʋ̃ sʋ̃, yekehila kezimɔ yɛkɔhʋla kozumazuma sʋ̃mavʋlɔ Pita, Pɔɔlʋ nɩɩ Bulombunli Devidi.

SUMAZUMA PITA NA KƆ ZƲLƆ SUMA NYAMƖNLƖ ODWOKƆ YƖ

7. (a) Mɩnla yɛ Gyisɛsɩ hanlɩ hileli Pita a? (b) Mɩnla yɛ nɩ ɩsɛ kɛɛ Pita yɛ a? (Hibulumaa 5:14–6:1)

⁷ Sunzu sʋ̃mavʋlɔ Pita yi ndianwʋ yɩ nwʋ kila. Pita yɛlɩ yɩ ndwɩ kɛɛ Gyisɛsɩ yɛ lɛ Mɛzaya mɔɔ Gyehova luwa yɩ zʋ ikehilehilee yi mmenii nnwʋanlɩ mɔɔ íni awielɩyɛ nwʋ dɩyɛ nɩ a. (Dwɔ. 6:​66-68) Ansaana Gyisɛsɩ isiaa kɔhɔ sʋlɔ nɩ, ɩhã ihileli Pita kɛɛ: “Kila mu mmuwuanɩ nɩ mmɔ bʋwɔ.” (Dwɔ. 21:17) Pita yɛlɩ mɔɔ Gyisɛsɩ hanlɩ hileli nɩ, na Gyehova valɩ yɩ lili egyima ma ɩhɛlɛlɩ awuuku anwɩ̃ mɔɔ ɩkɩnla Bayɩbʋlʋ yɩ nwʋ nɩ. Naasʋ̃ nɩ ɩsɛ kɛɛ Pita yɩzayɩ munli yi ide mmɩlɩ isuma Nyamɩnlɩ Odwokɔ yɩ. Kɛ ndianwʋ nɩ, izumanlɩ sʋ̃mavʋlɔ Pɔɔlʋ yɩ ahɛlɛta mɔɔ ɩhɛlɛlɩ nɩ be. Pita ɣa nwʋnlɩ yɩ kɛɛ nninyeni be mɔɔ Pɔɔlʋ hɛlɛlɩ nɩ, “bɔ tʋdɩlɛ ɩ́la azɩ.” (2 Pit. 3:​15, 16) Naasʋ̃ Pita hɔlɩ zʋlɔ zumanlɩ ɔzɔ nninyeni yi, na inyianlɩ dedi kɛɛ Gyehova kɔwʋwa yɩ ma ɩkɛdɩ yɩ tʋ na ɩava mɔɔ isumaa nɩ ɩayɛ egyima.—Kɩnga Hibulumaa 5:14–6:1.

8. Mɩnla yɛ Pita yɛlɩ mmɩlɩ mɔ Gyehova manlɩ ɔhʋanɩhilelɛ fʋlɔ yɩ nɩ a?

⁸ Pita lalɩ yɩ ali kɛɛ ɩwɔ Gyehova nu dedi iluwa yɩ ɔhʋanɩhilelɛ mɔɔ idiyeli nɩ zʋ. Kɛ ndianwʋ nɩ, eɣile ɔkʋ̃ be, Pita nyianlɩ anyɩnlɩzʋdɩyɛnwʋnlɛ mɔɔ nɩ Nyamɩnlɩ bɔvʋlɔ ɩhyɛɛ yɩ kɛɛ ilí nnamɩ mɔɔ Mosisi mmɛla yɩ ɩáma ɔhʋanɩ kɛɛ Dwuumaa keli nɩ be. Nɩ ɔhʋanɩhilelɛ eyi kɛyɛ sɩ kɛma Dwuumaa nɩ paa. Ahyɛasɩ yɩ, Pita hanlɩ kɛɛ: “Anhã Niibenyia, dɩyɛ mɔɔ nwʋmɔ ɩádɩ na ɩdɩ kyibadɩ nɩ milédili ebiye kyɩ̃.” Na bɔvʋlɔ yɩ hanlɩ hileli yi kɛɛ: “Dɩyɛ mɔɔ Nyamɩnlɩ ɩdɩ nwʋmɔ nɩ áma obu yɩ kɛɛ nwʋmɔ ɩádɩ.” (Egy. 10:​9-15) Pita leli dianlɩ nu. Mɩnla ti mɔ yɛkãã zɔ a? Iluwakɛɛ inyianlɩ anyɩnlɩzʋdɩyɛnwʋnlɛ mɛda nɩ, Kɔnɛlɩyɔsɩ zʋ̃manlɩ yi mmenyia asã kɛɛ bɔhɔ bɔvʋlɔ Pita bɛma yɩ. Sɛ ahyɛasɩ mɔɔ nɩ ilényianlɩ anyɩnlɩzʋdɩyɛnwʋnlɛ yɩ a, ankɩ Pita lɔ́kɔ Kɔnɛlɩyɔsɩ yi awudo kyɩ̃, iluwakɛɛ ɩ́dɩ Dwuunii. Nɩ Dwuumaa bu bɛzabɛ mɔɔ bɛ́dɩ Dwuumaa nɩ kɛɛ bɔ nwʋ ɩádɩ. (Egy. 10:​28, 29) Naasʋ̃ mmɩlɩ mɔ Gyehova manlɩ Pita nwʋnlɩ kɛɛ ɩpɛ kɛɛ mmenii munwatĩĩ tɩ odwokɔba yɩ be nɩ, ndɛndɛ la Pita zɩnzanlɩ yɩ adwɩnɩ na idiyeli Gyehova. (Ɛɣɛ. 4:18) Ilili Kɔnɛlɩyɔsɩ nɩɩ yi pika yɩ nu maa dasɩlɛ, beleli nɔhʋanlɛ yɩ bedianlɩ nu, benyianlɩ sunzuma nwanzanwanza yɩ na bonlumanlɩ bɛ. Eyi manlɩ Pita anyɩ leli paa.—Egy. 10:​44-48.

9. Sɛ yesuma nninyeni mɔɔ ɩtʋdɩlɛ yɛ sɩ a, mɩnla ɔhʋanɩ anwɩ̃ zʋ yɛ ɩbʋwa yɛ a?

⁹ Dɩkɛɛ Pita nɩ, ɩsɛ kɛɛ eɣile bela yesuma Nyamɩnlɩ Odwokɔ yɩ. Eyi kɛma yɛkɛdɩ nninyeni mɔɔ ɩtʋdɩlɛ ɩáyɛ sɩ nɩ tʋ. Akʋ̃ sʋ̃, ɩsɛ kɛɛ yɛma yɛ anyɩ deli nninyeni mɔɔ ɩtʋdɩlɛ yɛ sɩ nɩ nwʋ. Ɩsɛ kɛɛ yenyia mmɩlɩ yɛfa yesuma Nyamɩnlɩ Odwokɔ yɩ bʋwɔ, na yɛbɔ mmɔdɩnɩ kɛɛ yɛkɛdɩ nninyeni mɔɔ ɩtʋdɩlɛ yɛ sɩ nɩ tʋ. Mɩnla ti a? Iluwakɛɛ ɩbʋwa yɛ wɔ ahʋanɩ anwɩ̃ zʋ: Ɔkʋ̃, nninyeni mɔɔ yesuma nɩ ma ɔlɔlɛ nɩɩ annidi mɔɔ yɛwɔ yɛma Gyehova nɩ yɛ kezi; nɩɩ anwɩ̃, ɩhyɛ yɛ ɛzɩzɩbɛ ma yɛkã nninyeni ngɩnlɩma mɔɔ yezuma yɛvalɩ yɛ sʋlɔ Ɛzɩlɛ yɩ nwʋ nɩ nwʋ odwokɔ yekile mmenii mvʋlɔ. (Wul. 11:33; Yik. 4:11) Pita yi ndianwʋ yɩ ma yenyia ozumalɛdɩyɛ fʋlɔ be sʋ̃: Sɛ bɛyɛ nzɩnzanlɩyɛ wɔ kezimɔ yɛtɩ Nyamɩnlɩ Odwokɔ yɩ tʋ nɩ nu a, ɩsɛ kɛɛ yɛyɛ ndɛndɛ yede yetiã nu na yɛfa yɛyɛ egyima. Sɛ yɛyɛ zɔ a, Gyehova kɔhɔ zʋlɔ kehile ɔhʋanɩ yɛ na yɛazʋ̃mɩ yɩ wɔ nɔhʋanlɛ nu.

SUMAZUMA PƆƆLƲ NA WULA SUBANƖ FƲLƆ YƖ

10. Kɛmɔ Kolosiyiamaa 3:​8-10 kile nɩ, mɩnla yɛ ɩsɛ kɛɛ yɛyɛ na ama yɛazɔ Gyehova anyɩ a?

¹⁰ Ɩsɛ kɛɛ yɛma ɔhʋanɩ ma Gyehova bʋwa yɛ ma yewula subanɩ fʋlɔ yɩ na ama yɛazɔ yɩ anyɩ. Sʋ̃mavʋlɔ Pɔɔlʋ hɛlɛlɩ kɛɛ ɩsɛ kɛɛ ‘yɛyɩ subanɩ dadampɔ nɩ yekua’ na yewula “subanɩ fʋlɔ” nɩ. (Kɩnga Kolosiyiamaa 3:​8-10.) Ide mmɩlɩ nɩɩ mmɔdɩnɩwɔlɛ na ama yɛawula subanɩ fʋlɔ yɩ. Ma yɛva Pɔɔlʋ yi odwokɔ yɩ kɛɛ ndianwʋ. Mmɩlɩ mɔ inyii nɩ, ɩwɔlɩ mmɔdɩnɩ kɛɛ ɩkɛyɛ mɔɔ ɩsɔ Nyamɩnlɩ anyɩ. (Gal. 1:14; Fɩl. 3:​4, 5) Naasʋ̃ nɩ ɩádɩ ɔhʋanɩba mɔɔ ikoluwa zʋ kɔzʋ̃mɩ Nyamɩnlɩ nɩ tʋ. Nɩ ízi nɔhʋanlɛ odwokɔ mɔɔ ɩfalɩ mɔɔ Gyisɛsɩ hilehileli nɩ nwʋ. Akʋ̃ sʋ̃, nɩ Pɔɔlʋ pigyiabigyia yɩ nwʋ sʋlɔ, meti nɩ ɩáhʋla ɩyɛ mɔɔ ɩsɔ Nyamɩnlɩ anyɩ. Ɩhanlɩ kɛɛ nɩ ɩyɛ aninyiamɔnwʋ.—1 Tim. 1:13.

11. Mɩnla nzɩnzanlɩyɛ yɛ nɩ ɩsɛ kɛɛ Pɔɔlʋ yɛ a? Kilehile nu.

¹¹ Ansaana Pɔɔlʋ ɩbayɛ Kilisinyianii nɩ, nɩ ɩáhyɛ nɩ ɩva ɛya. Odwokɔ be mɔɔ ɩwɔ Egyima buuku yi nu ma yɛnwʋ kɛɛ, Pɔɔlʋ valɩ Gyisɛsɩ yɩ adʋwavʋlɔ yɩ nwʋ ɛya nkʋ̃ʋ̃ ma nɩ ɩpɛ kɛɛ ikũ bɛ po. (Egy. 9:1) Meti mmɩlɩ mɔ Pɔɔlʋ ɣa yɛlɩ Kilisinyianii nɩ, nɩ ɩsɛ kɛɛ ɩbɔ mmɔdɩnɩ paa ɩyɩ yɩ subanɩ dadampɔ nɩ ikua. Akʋ̃ ɩɣa ɩyɛlɩ abiye mɔɔ ɩwɔ abʋtalɩ na yi kunlu dɩyɛnɛ. (Ɛfɩ. 4:​22, 31) Naasʋ̃ eɣile ɔkʋ̃ be, odwokɔ be zili ma ɩvalɩ pɩlazunɛ ɩɣalɩ Pɔɔlʋ nɩɩ Banabasɩ bɛ avinli. Pɔɔlʋ ɩákʋla ɩhyɛ yɩ nwʋ zʋ na ɩvalɩ ɛya. (Egy. 15:​37-39). Naasʋ̃ ɩáma yi padi kolɔ, mfomi iminyianlɩ yɩ nwʋ ilili subanɩ dadampɔ yɩ zʋ na ɩɣa ɩyɛlɩ enii mɔɔ ɩsɔ Gyehova anyɩ.—1 Kɔl. 9:27.

12. Mɩnla yɛ ɩwʋwalɩ Pɔɔlʋ ma ɩhɔlɩ zʋlɔ ɩyɛlɩ nzɩnzanlɩyɛ a?

¹² Pɔɔlʋ ɩáfa yɩ nwʋ itiã yɩzayɩ yɩ anwʋzɩzɩbɛ zʋ mfomi ɩhanlɩ yɩ nwʋ azɩ na mɛyɩ wʋwalɩ yɩ ma ɩyɩlɩ subanɩ dadampɔ yɩ igualɩ. (Fɩl. 4:13) Dɩkɛɛ Pita nɩ, Pɔɔlʋ sʋ̃ valɩ yɩ nwʋ dianlɩ ‘anwʋzɩzɩbɛ mɔɔ Nyamɩnlɩ fa ma nɩ’ zʋ. (1 Pit. 4:11) Wɔ mɛyɩ po nu nɩ, nɩ itwu mmɩlɩ be a, Pɔɔlʋ di mfomi na nɩ mɛyɩ ma yi padi kolɔ. Naasʋ̃ sɛ nɩ yi padi kolɔ a, ɩdwɩnɩ nninyeniba mɔɔ yɩ sʋlɔ Ɛzɩlɛ yɩ ɩyɛ ɩma yɩ nɩ nwʋ, na mɛyɩ hyɛlɩ yɩ ɛzɩzɩbɛ ma ɩhɔlɩ zʋlɔ ɩyɛlɩ mɔɔ ɩsɔ Gyehova anyɩ.—Wul. 7:​21-25.

13. Kɛ yɛkɛyɛ na yɛazumazuma Pɔɔlʋ a?

¹³ Sa yɛkʋla yesumazuma Pɔɔlʋ ɩávalɩ nwʋmɔ mmɩlɩ tɩndɩnlɩ bela mɔɔ yɛva yɛzʋ̃mɩ Gyehova nɩ. Ɩsɛ kɛɛ yɛbɔ mmɔdɩnɩ kɛɛ yɛkɛyɩ subanɩ dadampɔ nɩ yekogua na yɛawula subanɩ fʋlɔ yɩ. Naasʋ̃ sa yɛkʋla yedi mfʋmɩ. Kɛ ndianwʋ nɩ, sa yɛkʋla yɛfa ɛya, yɛkã odwokɔ be anzɛnyɩɩ yɛyɛ debe mɔɔ ɩávata. Sɛ debe mɔɔ ɩdɩ zɔ si a, íni kɛɛ yenyia adwɩnɩ kɛɛ yɛlɔ́kʋla kɔzɔ Gyehova anyɩ kyɩ̃. Mfomi, ɩsɛ kɛɛ yɛkɔ zʋlɔ yɛbɔ mmɔdɩnɩ kɛɛ yɛkɛyɛ nzɩnzanlɩyɛ. (Wul. 12:​1, 2; Ɛfɩ. 4:24) Mmɩlɩ mɔ yɛyɛɛ ɔzɔ nɩ, ɩsɛ kɛɛ yɛma ɩbʋwa yɛ adwɩnɩ nu kɛɛ sɛ yɛkɔhʋla kɛzɩnza ye subanɩ a, mɛyɩ nɩ ɩsɛ kɛɛ yɛma ɔhʋanɩ ma Gyehova kilehile yɛ na yɛnwʋ yɩ bʋwɔ.

SUMAZUMA DEVIDI NA MA GYEHOVA WƆ́ WƲ NWƲ BANƖ

14-15. Mɩnla ɔhʋanɩ azʋlɔtʋ zʋ yɛ Gyehova bɔ yi mmenii nwʋ banɩ a? (Ndwomi 27:5) (Kila mfonyini yi sʋ̃.)

¹⁴ Sɛ yekenyia anyɩnlɩlelɛ mɔɔ idi munli a, mɛyɩ nɩ ɩsɛ kɛɛ yɛma Gyehova bɔ yɛ nwʋ banɩ. Ebiye a ekeɣizia wʋ kɛɛ, mɩnla ɔhʋanɩ zʋ yɛ Gyehova bɔ yɛ nwʋ banɩ a? Mɩnla yɛ ɩsɛ kɛɛ mɩyɛ na ama Gyehova ɩawɔ mʋ nwʋ banɩ a?

¹⁵ Nɩ Bulombunli Devidi wɔ anwʋlazʋ kɛɛ Gyehova kɔwɔ yɩ nwʋ banɩ mmɩlɩ mɔ nɩ iyiyiaa ndwokɔzɩzɩbɛ nɩ. (Kɩnga Ndwomi 27:5.) Mɩnla ɔhʋanɩ zʋ yɛ nnɛ Gyehova bɔ yɩ asʋ̃mɩvʋlɔ nwʋ banɩ a? Ɩbɔ yɛ nwʋ banɩ wɔ dɩyɛ bela mɔɔ ɩkɔhʋla kɛzɩkɛ dedi mɔɔ yɛwɔ wɔ yi nu nɩ nwʋ. Gyehova bɔ yɛ anʋhʋba kɛɛ akʋndɩ bela mɔɔ bɛkɛva kɛɣa yɛ zʋ nɩ, ilékyina. (Ndw. 34:7; Ayɩ. 54:17) Ɩwɔ numɔ kɛɛ Setanɩ, azunzuma evinli nɩɩ bɛzabɛ mɔɔ botwodwu betiyia yɛ nɩ wɔ tumi dɩyɛ, naasʋ̃ Gyehova wɔ tumi tɛla bɛ kʋlaa. Sɛ ɩbayɩ kɛɛ yewu po a, Gyehova kodunwo yɛ. (1 Kɔl. 15:​55-57; Yik. 21:​3, 4) Akʋ̃ sʋ̃, Gyehova bʋwa yɛ mmɩlɩ mɔ adwɩnɩndwɩnɩ hyɛ yɛ zʋ nɩ na ama yɛahɔ zʋ yɛazʋ̃mɩ yɩ. (Ɛɣɛ. 12:25; Mt. 6:​27-29) Gyehova va ye mmeliyema ma yɛ kɛɛ bɛhyɛ́ yɛ ɛzɩzɩbɛ mmɩlɩ mɔ yeyiyiaa ndwokɔzɩzɩbɛ nɩ. Akʋ̃ sʋ̃, ɩva asafʋ nu mbanimbani ɩma yɛ kɛɛ behilehilé yɛ na bɔwʋwa yɛ ma ye dedi yɛ sɩ. (Ayɩ. 32:​1, 2) Sɛ yɛkɔ dɩyɛzumalɛ a, yɛnwʋ ahʋanɩ mvʋlɔ mɔɔ yɛkɔhʋla kɛma Gyehova kɔwʋwa yɛ na ɩawɔ yɛ nwʋ banɩ.—Hib. 10:​24, 25.

16. Mɩnla ahʋanɩ azʋlɔtʋ zʋ yɛ Gyehova wɔlɩ Devidi nwʋ banɩ a?

¹⁶ Nɩ sɛ Devidi yɛ sutiye ma Gyehova a, Gyehova bɔ yɩ nwʋ banɩ. Mɩnla ɔhʋanɩ zʋ a? Nɩ ɩbʋwa Devidi ma isizi abɔkɔba, na eyi manlɩ Devidi anyɩ leli. (Fa tindiã Ɛɣɛlɛwulɛ 5:​1, 2 nwʋ.) Naasʋ̃ mmɩlɩ bela mɔɔ Devidi kowuli Gyehova yɩ mmɛla zʋ nɩ, nɩ Gyehova ɩáwɔ yɩ nwʋ banɩ wɔ mɔɔ ɩzʋ̃ numɔ ɩkɛɣa nɩ nwʋ. (2 Sa. 12:​9, 10) Nɩ itwu mmɩlɩ be a, mmenii mvʋlɔ tɩɩdɩɩ Devidi nkʋ̃ʋ̃ ma idi ɛyɛkɛ. Sɛ ɩbayɩ zɔ a, ɩkã mɔɔ iduwaa numɔ nɩ nwʋ odwokɔ ikile Gyehova, na Gyehova sʋ̃ bʋwa yɩ. Kɛ ɩyɛ yɩ ise a? Nɩ ɩma Devidi tɩ nɣanlɩ kɛɛ ɩdɔ yɩ na ɩwɔ kɛnɩ ɩma yɩ. Nɩ eyi kyɩkyɩ Devidi yɩ ɛyɛlɛ paa.—Ndw. 23:​1-6.

17. Kɛ ɩkɛyɛ yɛazumazuma Devidi a?

¹⁷ Sa yɛkʋla yesumazuma Devidi. Mɩnla ɔhʋanɩ zʋ a? Sɛ yɛbazi pɔkɔ be a, ɩsɛ kɛɛ yɛpɩbɛ Gyehova yɩ adwɩnɩ wɔ nwʋmɔ ansa. Ɩsɛ kɛɛ yɛkakɛ kɛɛ, sɛ yɛátiye Gyehova yi odwokɔ na yesizi abɔkɔ tanɩ a, mɔɔ ɩzʋ̃ numɔ ɩkɛɣa mɛyɩ, Gyehova ɩlɔ́bɔ yɛ nwʋ banɩ wɔ nwʋmɔ. (Gal. 6:​7, 8) Naasʋ̃ sɛ yɛyɛ sutiye yɛma Gyehova po a, sa yɛkʋla yɛnwʋ amanɩyɛ iluwa sianti mvʋlɔ be ti. Ɩbayɩ zɔ a, sa yɛkʋla yɛkã yɛ ɔhawʋ yɩ munwala nwʋ odwokɔ yekile Gyehova na yesiã yɩ kɛɛ ɩwʋwá yɛ. Gyehova kediye yɛ mpayɩ nɩ na ɩkɛma yɛkɛdɩ nɣanlɩ kɛɛ ɩdɔ yɛ paa.—Fɩl. 4:​6, 7.

KƆ ZƲLƆ FA WƲ NWƲ TIÃ GYEHOVA ZƲ NA PƖBƐ YƖ ƆHƲANƖHILELƐ

18. Mɩnla adwɩnɩ yɛ mmenii lɛ yɩ wɔ Nyamɩnlɩ yɩ ɔhʋanɩhilelɛ nwʋ a, na kɛ ɩkɛyɛ na yɛahɔ zʋ yɛama Gyehova iahile ɔhʋanɩ yɛ a? (Kila mfonyini yi sʋ̃.)

¹⁸ Yɛ ɔlʋbɔ odwokɔ ma 2026 yɩ se: “Anyɩnlɩlelɛ yɛ lɛ bɛzabɛ mɔɔ bɔnwʋ yɩ kɛɛ behyinyia Nyamɩnlɩ yɩ ɔhʋanɩhilelɛ.” Nnɛ paa yɛ yehyinyia Nyamɩnlɩ yɩ ɔhʋanɩhilelɛ na ama yɩ anyɩ iale a. Mɩnla ti a? Iluwakɛɛ mmenii sʋ̃maa bɛále betiã nu anzɛnyɩɩ bɛánwʋ yɩ kɛɛ behyinyia Nyamɩnlɩ yɩ ɔhʋanɩhilelɛ. Abiyemmɔ sʋ̃ de di kɛɛ Nyamɩnlɩ wɔ kɛ, naasʋ̃ bɔsʋ̃mɩ yɩ wɔ ɔhʋanɩ mɔɔ bɛzabɛ bɛpɛ yɩ nɩ zʋ. Abiyemmɔ sʋ̃ mɛyɩ, ndwokɔ mɔɔ mmenii kã nɩ yɛ bedi yɩ mɛda a. Eyi ɩáma bɛ anyɩ de. Na íni kɛɛ yɛtʋwa bɛ kʋlaa. Meti kɛ yɛkɛyɛ na yɛahɔ zʋ yɛava yɛ nwʋ yɛadiã Gyehova zʋ a? Ɩsɛ kɛɛ yɛkɔ zʋ yesuma Gyehova yi odwokɔ yɩ, yewula subanɩ fʋlɔ yɩ, yɛyɛ sutiye yɛma Gyehova na yɛma ɩbɔ yɛ nwʋ banɩ.