April

Sɛ yekenyia Gyisɛsɩ yɩ nnwʋnlamɩ nɩɩ yi mmegyia yɩ zʋ mfasʋ a, ɩsɛ kɛɛ yenyia dedi wɔ elelɛdɩyɛ yɩ nu. (Ɛfɩ. 1:7) Bɛzabɛ mɔɔ Gyisɛsɩ hanlɩ bɔ nwʋ odwokɔ kɛɛ bɛdɩ “mmuwuanɩ mvʋlɔ” nɩ, íni kɛɛ bedi pʋanʋ nɩɩ nwanyɩ yɩ be wɔ Niibenyia Nunuma Alɩyɛ yɩ tʋ. (Dwɔ. 10:​16, NWT) Naasʋ̃ benyia Gyisɛsɩ yɩ nnwʋnlamɩ nɩɩ yi mmegyia yɩ zʋ mfasʋ, iluwakɛɛ benyia dedi wɔ Gyisɛsɩ yi elelɛdɩyɛ afɔlɩ yɩ nu. (Dwɔ. 6:53) Naasʋ̃, bɛzabɛ mɔɔ bedi ebiye nɩ da yɩ ali kɛɛ bɛkɩnla nhyɩhyɛlɩyɛ fʋlɔ yɩ nwʋ na bɔwɔ anyɩnlɩlazʋ kɛɛ bekeli tumi wɔ sʋlɔ. Meti, kɛ yɛkɔhɔ sʋlɔ anzɛnyɩɩ yɛkɔwʋwa azɩlɛ yɩ zʋ nɩ, sɛ yekenyia nnwʋanlɩ mɔɔ íni awielɩyɛ a, ɩsɛ kɛɛ yenyia dedi. w24.12 13 ¶14, 16

Wɔ Niibenyia Nunuma Alɩyɛ yɩ tʋ nɩ, Gyisɛsɩ valɩ pʋanʋ mɔɔ fɩyayɛ íni numɔ manlɩ yɩ adʋwavʋlɔ yɩ na ɩhã ihileli bɛ kɛɛ igyĩ kɛnɩ ɩma yɩ nnwʋnlamɩ. Akʋ̃ sʋ̃, ɩvalɩ nwanyɩ yɩ ɩmanlɩ bɛ, na ɩhã ihileli bɛ kɛɛ igyĩ kɛnɩ ɩma yi “mmegyia mɔɔ ɩsɔ Nyamɩnlɩ yɩ nhyɩhyɛlɩyɛ nɩ yi munwa” nɩ. (Mk. 14:​22-25; Lk. 22:20; 1 Kɔl. 11:24) Ɩvʋlɔlɩ nhyɩhyɛlɩyɛ eyi “nhyɩhyɛlɩyɛ fʋlɔ.” Bɛzabɛ mɔɔ bɛ nɩɩ Gyisɛsɩ keli dɩyɛ wɔ Nyamɩnlɩ Bulombunlililɛ yɩ nu nɩ la yɛ bɛkɩnla nhyɩhyɛlɩyɛ eyi nwʋ a. (Hib. 8:​6, 10; 9:15) Mɔɔ Gyisɛsɩ hanlɩ wɔ Niibenyia Nunuma Alɩyɛ yɩ tʋ nɩ falɩ “mmuwuanɩ kubo ɛgyɩkɩ̃ɩ̃” yɩ nwʋ. Yɩ adʋwavʋlɔ mɔɔ nɩ bɛkɩnla yɩ nwʋ wɔ ɔzɔ mmɩlɩ yɩ yɛ belili bɔmʋnlɩ bɛɣa bɛhɩnlanlɩ okuwu eyi nwʋ a. Mmenii eyimmɔ yɛ bɔkɔhɔ kɛhɩnla Gyisɛsɩ nwʋ wɔ sʋlɔ a. w24.12 11 ¶9-10

Bɛyɩlɩ Gyisɛsɩ bɛmanlɩ, bɛhyɩlɩ yɩ, bɔwʋdʋwʋdʋlɩ yɩ, bɛvalɩ odwokɔ bedianlɩ yɩ zʋ, bowuwalɩ yɩ owulo ɔfɔ, na bɛyɛlɩ yɩ ayɛkwa po. Azogyiamaa valɩ yɩ hɔlɩ dɩka mɔɔ bokohũ yi nɩ, na bɔwɔlɩ yɩ owudo nu. Mmɩlɩ mɔ nɩ ɩlɛ nɔhʋanlɛlilɛ ikyinaa ɔzɔ ɛyɛkɛ nɩ yi munwa nɩ, nɩ abiye wɔ kɛnɩ mɔɔ mɛyɩ po idii ɛyɛkɛ baaba paa. Ɔzɔ enii nɩ yɛ lɛ Gyehova. Nɩ Gyehova wɔ tumi kezile paa mɔɔ nɩ ɩkɔhʋla kɛva kɛyɩ yɩ Ɣa yɩ wɔ amanɩyɛnwʋnlɛ yɩ nu, naasʋ̃ ɩáfa yɩ nwʋ idideli odwokɔ yɩ nu. Sɛ Gyehova dɔ yɩ Ɣa yɩ paa a, nɩ mɩnla ti mɔɔ ɩmanlɩ ɔhʋanɩ ma ɩnwʋnlɩ amanɩyɛ na iwuli a? Yetuaa yɩ sini a, ɩdɩ ɔlɔlɛ. Gyisɛsɩ yɩ afɔlɩ yɩ dɩ dasɩlɛ petee mɔɔ ikile kɛɛ Gyehova dɔ wʋ baaba paa. Ɩvalɩ yɩ Dɔɣalɛ nɩ ɩwɔlɩ afɔlɩ na igyinanlɩ ɛyɛkɛ kezile mɔɔ ɩzʋ̃ numɔ ɩɣalɩ nɩ munwa na ɩava iale wʋ wɔ tanɩ nɩɩ owulo nu. (1 Dwɔ. 4:​9, 10) Amba, ɩpɛ kɛɛ ɩbʋwa ye nu ɔkʋ̃ bela ma ɩkʋ̃ itiyia tanɩ na idi zʋlɔ nkunimi! w24.08 6 ¶13-14

Sɛ yɛdwɩnɩndwɩnɩ ɛyɛkɛ mɔɔ ɩkɛyɛ kɛɛ Gyehova lili mmɩlɩ mɔ ɩnwʋnlɩ kɛɛ yɩ Ɣa nɩ ɩnwʋʋ amanɩyɛ nɩ nwʋ a, ɩkɛma yɛkɛdɩ kezimɔ ɩdɔ yɛ nɩ tʋ bʋwɔ. Setanɩ kã kɛɛ Gyehova yɩ sʋ̃mɩvʋlɔ bela íni kɛnɩ mɔɔ sɛ iyiyiaa ndwokɔzɩzɩbɛ a, ɩkɔhɔ zʋ keli nɔhʋanlɛ kɛma yɩ. Mɔɔ ɩkɛma ɩkɛla ali kɛɛ Setanɩ idii awohwi nɩ, Gyehova manlɩ ɔhʋanɩ ma Gyisɛsɩ nwʋnlɩ amanɩyɛ ansaana ibawu. (Dwb. 2:​1-5) Gyehova nwʋnlɩ kezimɔ mmenii bedii Gyisɛsɩ nwʋ nwɔwɩ, kezimɔ azogyiamaa hyinli yi, na bɔwɔlɩ yɩ owudo nu nɩ. Nɩ Gyehova yɩ anyɩ duwa owulo ɛyɛkɛ ɛyɛkɛ mɔɔ nɩ yɩ Ɣa yɩ iwuu nɩ. (Mt. 27:​28-31, 39) Gyehova wɔ tumi mɔɔ ankɩ ɩkɛva kezi eyi munwala nwʋ ɔhʋanɩ mmɩlɩ bela. (Mt. 27:​42, 43) Naasʋ̃, sɛ Gyehova yɛlɩ zɔ a, ankɩ Gyisɛsɩ ɩlɔ́kʋla koduwa elelɛdɩyɛ nɩ, na ankɩ yelényia anyɩnlɩlazʋ bela sʋ̃. Meti, Gyehova manlɩ ɔhʋanɩ ma yɩ Ɣa nɩ gyinanlɩ amanɩyɛnwʋnlɛ yɩ munwa kɔbʋmɩ kɛɛ iwuli. w25.01 22 ¶7

Nɩ ɩdɩ Nisan 16, 33 Y.M. nu. Nɩ Gyisɛsɩ yɩ adʋwavʋlɔ yɩ bedii alɔbɔ na bo kunlu du. Nɩ bo nu anwɩ̃ bɔzʋ̃ Gyelusalamɩ bɔkɔɔ Yimayɔsʋ. Benyia be mɔɔ bézi yi ɣa dʋlɩ bɛ na ɩ nɩɩ bɛ wɔlɩ numɔ hɔlɩ. Adʋwavʋlɔ yɩ hanlɩ nninyeni tanɩ mɔɔ bɛva bɛyɛlɩ Gyisɛsɩ nɩ nwʋ odwokɔ behileli benyia yɩ. Benyia nɩ wɔlɩ yɩ tʋ kɛɛ ɩ nɩɩ bɛ bɔbɔɔ nkɔmmɔ be mɔɔ bɛ ɛɣɛɛlɛ iléfi kyɩ̃. “Ɩwɔlɩ yɩ tʋ wɔ Mosisi yɩ awuuku nɩ zʋ ɩhɔlɩ idwuli nkɔmɩhyɛmaa nɩ mmɔ bɛ dɩyɛ nɩ zʋ,” ihilehileli bɛ sianti mɔɔ nɩ ɩsɛ kɛɛ Mɛzaya nɩ ɩnwʋ amanɩyɛ na iwu nɩ. Mmɩlɩ mɔ bodwuli Yimayɔsʋ nɩ, benyia nɩ lalɩ yɩ nwʋ ali hileli bɛ. Nɩ ɩdɩ Gyisɛsɩ mɔɔ bodunwo yɩ nɩ! (Lk. 24:​13-35) Gyisɛsɩ yɩlɩ yɩ nwʋ hileli yɩ adʋwavʋlɔ yɩ mbɔmɩ sʋ̃maa wɔ yi eɣile 40 mɔɔ itualɩ yɩ tʋ wɔ azɩlɛ yɩ zʋ nɩ. Wɔ ɔzɔ mmɩlɩ yɩ nɩ, Gyisɛsɩ yɩ adʋwavʋlɔ mɔɔ nɩ bɔlɔ kezile hã bɛ na bo kunlu du nɩ, benyianlɩ anyɩnlɩlelɛ na bɛvalɩ akɛnɣazɩzɩbɛ bɛhanlɩ Bulombunlililɛ nwʋ odwokɔba yɩ na behilehileli mmenii. w24.10 12 ¶1-3

Kuakula mɛyɩ sɛ bɔwʋ yɩ a, ɔhʋanɩ bela zʋ sa inyi. Naasʋ̃, kɛ yekenyi wɔ sunzuma ɔfʋã nu nɩ ɩáɣa mbʋanlɩ, gyɩsɛ yɛyɛ nwʋmɔ egyima. Kɛ ndianwʋ nɩ, Kilisinyiamaa mɔɔ nɩ bɔwɔ Kɔlɛntɩ nɩ, beleli odwokɔba nɩ belili, bonlumanlɩ, benyianlɩ sunzuma nwanzanwanza yɩ, na benyianlɩ fʋlɔdulɛ mɔɔ sʋ̃mavʋlɔ Pɔɔlʋ va manlɩ bɛ nɩ zʋ mfasʋ. (Egy. 18:​8-11) Naasʋ̃ bo onlumanlɛ mɛda alʋbɔ be nɩ, nɩ bo nu sʋ̃maa lanwʋ la dɩ nnwuakula wɔ sunzuma ɔfʋã nu. (1 Kɔl. 3:2) Sɛ yɛ nwʋ kɔhʋla kɔwʋkwa a, ɩsɛ kɛɛ yenyia ɛpɛ kɛɛ yekenyi wɔ sunzuma ɔfʋã nu. Bɛzabɛ mɔɔ “bɔdɔ asili ndwokɔ” mɔɔ bɛpɛ kɛɛ bɔkɔ zʋlɔ bɛyɛ nnwuakula wɔ sunzuma ɔfʋã nu nɩ, bɔ nwʋ lɔ́kwʋkwa kyɩ̃. (Ɛɣɛ. 1:22) Yɛábɛ kɛɛ yɛkɛyɛ kɛɛ bɛzabɛ mɔɔ bɛ anyɩ dɩ naasʋ̃ bɛlanwʋ la bekila ɔhʋanɩ kɛɛ bɛ awʋvʋlɔ kezizi abɔkɔ kɛma bɛ nɩ. Mfomi, yɛpɛ kɛɛ yɛzayɛ yɛbɔ mmɔdɩnɩ kɛɛ yekenyi wɔ sunzuma ɔfʋã nu. Sɛ ɛlanwʋ la ɔbɔɔ mmɔdɩnɩ kɛɛ wʋ nwʋ kɔwʋkwa a, siã Gyehova kɛɛ ‘ɩmá ɔhʋla ɛyɛ nninyeni mɔɔ ɩpɛ yɩ nɩ.’—Fɩl. 2:13. w24.04 4 ¶9-10

Gyehova ma yɛnwʋ kezimɔ ɩtɩ nɣanlɩ mmɩlɩ mɔ ibuwaa mmenii ndɛnɩ nɩ. (Izi. 33:11) Gyehova ɩlɛ́sɩkɛ abiyela kɛkɛ, gyɩsɛ ɩwɔ sianti baaba be ti mɔɔ ɩsɛ kɛɛ ɩyɛ zɔ. Gyehova yɩ nwɔkɛnwʋnlɛ dɩ kezi paa, na ɩda yɩ ali wɔ mmɩlɩ bela mɔɔ ɩfata nɩ. Mɩnla yɛ yezi yɛfalɩ mmenii mɔɔ bolótunwo bɛ nɩ nwʋ a? Bayɩbʋlʋ yɩ kã bo nu ɛgyɩkɩ̃ɩ̃ be nwʋ odwokɔ. Kɛ ndianwʋ nɩ, Gyisɛsɩ hanlɩ kɛɛ Dwudasɩ Ɩsɩkalɩyɔtʋ mɛyɩ, bolótunwo yi. (Mk. 14:21; Dwɔ. 17:12) Dwudasɩ ɩhyɛlɩda idwodwuli idiyialɩ Gyehova Nyamɩnlɩ nɩɩ yɩ Ɣa yɩ. (Mk. 3:29) Ɔzɔ sʋ̃ la yɛ Gyisɛsɩ hanlɩ kɛɛ, Nyamɩnlɩzʋ̃mɩnlɛ nu mbanimbani be mɔɔ bodwodwuli bediyialɩ yɩ nɩ bokowu, mɔɔ belényia awudunwolɩyɛ. (Mt. 23:33) Na sʋ̃mavʋlɔ Pɔɔlʋ sʋ̃ hanlɩ kɛɛ, ɔvʋakɩlɛmaa mɔɔ bɛánlu bɔ nwʋ nɩ, bolótunwo bɛ.—Hib. 6:​4-8; 10:29. w24.05 4 ¶10-11

Sɛ yɛkɔ zʋ yebike Gyehova a, Setanɩ lɔ́kʋla kɛyɛ dɩyɛ bela mɔɔ ɩkɛva ɔhawʋ ɩkɛɣa yɛ zʋ daabaa. (1 Dwɔ. 3:8) Wɔ oyuwadɩ fʋlɔ yɩ nu nɩ, Gyehova kɔhɔ zʋ kɔwɔ yɩ ɔhɔnwʋmmɔ nɔhʋanlɛmaa nwʋ banɩ wɔ nninyeni mɔɔ ɩkɔhʋla kɛzɩkɛ bɛ nɩɩ yɩ avinli abusunwawɔlɛ nɩɩ owulo nwʋ. (Yik. 21:4) Ɩdɩ ɔnwʋmɔ ɔhʋanɩ kezile kɛɛ yɛwɔ Gyehova yɩ ɛdamɛ aliyia yɩ nu. Sa yɛkʋla yɛ nɩɩ yɩ nyia ɔhɔnwʋvalɛ mɔɔ ɩkɔwʋwa kɛnɩ daabaa. (Izi. 37:27) Sɛ yɛpɛ kɛɛ yɛkɔ zʋlɔ yɛbʋwa yɩ ɛdamɛ aliyia yɩ nu a, mɩnla yɛ ɩsɛ kɛɛ yɛyɛ a? Sɛ abiye tʋ salɛ fʋlɔ wʋ kɛɛ ɛɣɩla yɩ awudo a, ɛkɛbɛ yɩ kɛɛ ɔkɔnwʋ kezimɔ ɩpɛ kɛɛ ɛyɛ wʋ dɩyɛ wɔ kɛnɩ. Ɔzɔ la sʋ̃ yɛ yɛpɛ kɛɛ yɛnwʋ mɔɔ Gyehova pɩbɛ wɔ bɛzabɛ mɔɔ bɛpɛ kɛɛ bɔkɔ zʋlɔ bɔbʋwa yɩ ɛdamɛ aliyia yɩ nu bɛ kɛnɩ a. Ɔlɔlɛ mɔɔ yɛwɔ yɛma Gyehova nɩ kã yɛ ma yɛyɛ mɔɔ yɛkɔhʋla bela ‘yɛsɔ yɩ anyɩ.’ (Kol. 1:10) Ɩsɛ kɛɛ mmɩlɩ munwala ye kunlu tuli yɩ nwʋ, na íni kɛɛ yɛma yɛ ɛɣɛɛlɛ fi enii kʋ̃ mɔɔ ɩdɩ nɩ kyɩ̃. Ɔzɔ annidi kezile mɔɔ yekenyia yɛkɛma yɩ nɩ kɔwʋwa yɛ ma yɛkɔhwɩ̃ yɛ nwʋ wɔ nyɛlɩyɛ bela mɔɔ ɩábɛ yɩ nɩ nwʋ, na yɛ nɩɩ yɛ Nyamɩnlɩ ‘yɛaluwa wɔ kãnwʋazɩ nu’ eɣile bela.—Mik. 6:8. w24.06 4 ¶8-9

Gyehova hanlɩ hileli Abilehamɩ kɛɛ ɩvá yɩzayɩ yɩ ɣa benyia Ayɩzɩkɩ ɩwɔ́ afɔlɩ. Pɩlazunɛ bela íni nwʋmɔ kɛɛ eyi manlɩ Abilehamɩ lili ɛyɛkɛ baaba paa. Naasʋ̃ nɩ iziyeziye yɩ nwʋ kɛɛ ikediye Gyehova. Naasʋ̃, ɩka ɛgyɩkɩ̃ɩ̃ ma ikũ yɩ ɣa yɩ la pɛ yɛ Gyehova manlɩ iyiakili a. Ɔzɔ ndianwʋ yɩ ma yɛnwʋ mɔɔ nɩ Gyehova kɛyɛ wɔ eɣile be. Nɩ Gyehova ɩzʋ̃ yɩ pɛ nu ɩkɛva yɩzayɩ yɩ Dɔɣalɛ ɩkɔwɔ afɔlɩ. Amba, Gyehova dɔ adasamaa paa. (Gyn. 22:​1-18) Wɔ alʋbɔ sʋ̃maa mɛda nɩ, Mmɛla mɔɔ Gyehova va manlɩ Yizilayamaa nɩ bɩbɛlɩ kɛɛ bɔkɔwɔ afɔlɩ azʋlɔtʋ na ama bɛava bɛ tanɩ bɛahyɛ bɛ. (Lɛv. 4:​27-29; 17:11) Ɔzɔ afɔlɩ azʋlɔtʋ nɩ ma yɛnwʋ kɛɛ, nɩ Gyehova kɔwɔ afɔlɩ kezile be mɔɔ ikele adasamaa wɔ tanɩ nu. Sunzuma yɩ hanlɩ Nyamɩnlɩ yɩ nkɔmɩhyɛmaa ma behilehileli numɔ kɛɛ, yɩ tʋnii mɔɔ bɔwɔ yɩ nwʋ anʋhʋba mɔɔ ɩɣa ɩlalɩ ali kɛɛ ɩdɩ Nyamɩnlɩ Ɣalɛ sʋnʋnkʋ̃ nɩ kɔnwʋ amanɩyɛ na bɛahũ yi, ama iale adasamaa, mɔɔ wʋzawʋ sʋ̃ ɛkɩnla nwʋmɔ nɩ wɔ tanɩ nɩɩ owulo nu!—Ayɩ. 53:​1-12. w24.08 4 ¶7-8

Sɛ ɛyɛɛ wʋ Bayɩbʋlʋ ɛɣɩngalɛ a, bɔ mmɔdɩnɩ kɛɛ ɔkɔnwʋ kezimɔ ɛkɛva mɔɔ ozuma nɩ kɛyɛ egyima. Mmɩlɩ mɔ ɔdwɩnɩndwɩnɩɩ Bayɩbʋlʋ yɩ ɔfʋã be mɔɔ ɛɣɩnga yɩ nwʋ nɩ, bizia wʋ nwʋ kɛɛ, ‘Kɛ ɩkɛyɛ na mɩava odwokɔ eyi mɩayɛ egyima kakɩ yɩ anzɛnyɩɩ eɣile be a?’ Kɛ ndianwʋ nɩ, fa yɩ kɛɛ 1 Tɛsalonikamaa 5:​17, 18 kɩnla wʋ Bayɩbʋlʋ ɛɣɩngalɛ yɩ nwʋ. Sɛ ɛkɩnga nkyɩkyɛmi anwɩ̃ eyimmɔ owie yi a, sa ɔkʋla kyina na wʋaɣizia wʋ nwʋ kɛɛ, ‘mbɔmɩ dʋdʋ ana yɛ mʋzʋ̃ mɩ ahʋnlɩnɩ munwala nu mʋbɔ mpayɩ a?’ Akʋ̃ sʋ̃, sa ɔkʋla dwɩnɩndwɩnɩ nninyeni mɔɔ ɛpɛ kɛɛ ekile nwʋmɔ anyɩnlɩzɔlɛ nɩ nwʋ. Ebiye a, ɛkɛbɛ yɩ kɛɛ ɛkɛla Gyehova asɩ wɔ nninyeni asã pɔkyɩ̃ɩ̃ be nwʋ. Sɛ ede mmɩlɩ ɛgyɩkɩ̃ɩ̃ po fa dwɩnɩndwɩnɩ mɔɔ osuma nɩ nwʋ a, ɩkɔwʋwa wʋ ma ɛkɛdɩ Nyamɩnlɩ Odwokɔ yɩ tʋ na wʋayɛ mɔɔ ɩkã nɩ sʋ̃. Sɛ ɛyɛ zɔ eɣile bela a, kila kezimɔ ekenyia zʋlɔ mfasʋ! Amba, ɛkɛɣa kɛyɛ Gyehova yɩ sʋ̃mɩvʋlɔ mɔɔ yɩ nwʋ wʋkwa. w24.09 4-5 ¶9-10

Kɛmɔ yeli bɔmʋnlɩ yɛhã nɩ, Gyehova wɔlɩ yɛ wɔ ɔhʋanɩ be zʋ mɔɔ ɩma yenyia anyɩnlɩlelɛ wɔ ɛmanlɛ nu yɛtɛla elelɛ. Sɛ yɛbʋwa ye mmeliyema a, yɛ ahʋnlɩnɩ tɔ ye kunlu. Na sɛ bekile nwʋmɔ anyɩnlɩzɔlɛ a yɛ anyɩ de paa. Naasʋ̃ sɛ bɛákile nwʋmɔ anyɩnlɩzɔlɛ sʋ̃ a, yɛ anyɩ de iluwakɛɛ yɛyɛ dɩyɛ baaba. Áma ɛma wʋ ɛɣɛlɛ fi kɛɛ, “Gyehova kɔhʋla kɛva mɔɔ ɩtɛla zɔ kʋlaa ɩkɛma wʋ.” (2 Mm. 25:9) Gyehova keyila wʋ ma ɩkɔwʋlʋ mɔɔ ɛfa ma nɩ zʋ kʋlaa! Na Gyehova yi nyilalɛ sʋ̃ dɩ baaba tɛla dɩyɛ bela. Meti bɛmá yezi yɛ kɛnɣa kɛɛ yekozumazuma yɛ sʋlɔ Ɛzɩlɛ nɩ yɩ baabayɛlɛ yɩ. w24.09 31 ¶20-21

Gyehova da nwɔkɛnwʋnlɛ nɩɩ kunlumiyɩbalɛ ali. (Ndw. 103:13; Ayɩ. 49:15) Sɛ yedii ɛyɛkɛ a, yɩzayɩ sʋ̃ idi ɛyɛkɛ. (Zak. 2:8) Ɩma ɩyɛ mɛlɛkɛ kɛɛ yekeɣike yi na yɛava yɩ Ɔhɔnwʋ. (Ndw. 25:14; Egy. 17:27) Ɩkã yɩ nwʋ azɩ sʋ̃; “ɩkã yi nu azɩ ikila sʋlɔ nɩɩ azɩlɛ yɩ zʋ, na ipigyia enii mɔɔ yɩ nwʋ yɛ nwɔkɛ nɩ wɔ ndudulubo nu.” (Ndw. 113:​6, 7) Iluwa sianti eyimmɔ ti, yɛpɛ kɛɛ yɛhyɛ yɛ Nyamɩnlɩ kezile yi nɩ animinyiamɩ.Yɛhyɛ Gyehova animinyiamɩ iluwakɛɛ yɛpɛ kɛɛ mmenii mvʋlɔ nwʋ yɩ. Mmenii sʋ̃maa bézi nɔhʋanlɛ mɔɔ ɩfalɩ Gyehova nwʋ. Mɩnla ti a? Iluwakɛɛ Setanɩ izi bɛ adwɩnɩ anyɩ iluwa awohwi ndwokɔ mɔɔ ɩkã ɩfalɩ Gyehova nwʋ mɔɔ mmenii sʋ̃maa bele beli nɩ zʋ. (2 Kɔl. 4:4) Setanɩ ma mmenii sʋ̃maa bele beli kɛɛ Gyehova yi ti nu yɛ sɩ, ɩádwɩnɩ yɛ nwʋ, na amanɩyɛ mɔɔ yɛnwʋʋ yɩ nɩ numɔ sʋ̃maa zʋ̃ mɛyɩ. Naasʋ̃ yezi nɔhʋanlɛ mɔɔ ɩfalɩ yɛ Nyamɩnlɩ yɩ nwʋ nɩ! Yɛwɔ ɔnwʋmɔ ɔhʋanɩ kɛɛ yɛkɛma mmenii kɔnwʋ Nyamɩnlɩ kʋ̃ mɔɔ ɩdɩ na yɛawʋwa bɛ ma bɔnlʋmmɔ sʋ̃ bɛahyɛ yɩ animinyiamɩ.—Ayɩ. 43:10. w25.01 3 ¶6-7

Wɔ adʋwavʋlɔ yɩ bɛ mmɩlɩ zʋ nɩ, Setanɩ luwalɩ mmenii be zʋ hanlɩ awohwi ndwokɔ valɩlɩ Gyisɛsɩ mɔɔ ɩdɩ Nyamɩnlɩ Ɣalɛ mɔɔ idi munli na ɩyɛ nnwʋánlɩ nninyeni po nɩ nwʋ. Kɛ ndianwʋ nɩ, nyamɩnlɩzʋ̃mɩnlɛ nu mbanimbani hanlɩ hileli mmenii kɛɛ, tumi mɔɔ Gyisɛsɩ ɩfa itu azunzuma evinli nɩ, ɩzʋ̃ “azunzuma evinli be ebani” nɩ kɛnɩ. (Mk. 3:22) Mmɩlɩ mɔ bedii Gyisɛsɩ yi odwokɔ nɩ, nyamɩnlɩzʋ̃mɩnlɛ nu mbanimbani valɩ ɔzʋnɩ dianlɩ yɩ zʋ kɛɛ ɩhã Nyamɩnlɩ nwʋ mmuzulo ndwokɔ, na bɛmanlɩ ɔlɔmɩ nɩ hanlɩ kɛɛ bohũ Gyisɛsɩ. (Mt. 27:20) Aɣinzi yi mɔɔ Kɩlayɩsɩ yɩ mɛdalilɛmaa bɛkãã odwokɔba yɩ nɩ, bɛ adamvʋlɔ yɩ ‘bonlunkunli mmenii nɩ’ ma bodwodwuli bediyialɩ Kilisinyiamaa nɩ. (Egy. 14:​2, 19) December 1, 1998 Ɔwɩɛnɩlɛ Aɣanɩ yɩ hilehileli Egyima 14:2 yɩ nu kɛɛ: “Kɛ odwokɔba yɩ nkʋ̃ la yɛ Dwuumaa odwodwudiyialɛmaa yɩ bʋlɩ a, mfomi bɛzɩkɛlɩ Kilisinyiamaa nɩ be dima na bɔwɔlɩ mmɔdɩnɩ kɛɛ bɛkɛma mmenii mɔɔ bɛdɩ Dwuumaa nɩ kenyia Kilisinyiamaa nɩ bɔ nwʋ adwɩnɩ tanɩ na bɛadanɩ bɛ.” Nnɛ sʋ̃, Setanɩ kɔ zʋlɔ di awohwi. Ɩlanwʋ la “ɩdahɩlɩdahɩlɩ oyuwadɩ munwatĩĩ.” w24.04 11 ¶15-16

Sɛ abiye kenyia nnwʋanlɩ mɔɔ íni awielɩyɛ a, ígyĩ mmɩlɩ mɔ iwuli nɩ zʋ. Gyehova dɩ Ndɛnɩwuwalɛvʋlɔ mɔɔ idi munli, meti ɩkɛva pɛlɩpɛlɩlilɛ ikowuwa ndɛnɩ mɔɔ ɩtɩnɣɛ. (Ndw. 33:​4, 5) Sa yɛkʋla yenyia anwʋlazʋ kɛɛ “azɩlɛ yɩ munwala zʋ Ndɛnɩwuwalɛvʋlɔ nɩ” kowuwa ndɛnɩ mɔɔ ɩtɩnɣɛ. Akʋ̃ sʋ̃ ntɩyasɩ wɔ numɔ kɛɛ yɛkɛhã kɛɛ, nnwʋanlɩ mɔɔ íni awielɩyɛ mɔɔ abiye kenyia nɩ, ígyĩ dɩka mɔɔ ikowu nɩ zʋ. Ntɩyasɩ íni numɔ kɛɛ Gyehova kowuwa mmenii abʋmɩ abʋmɩ sʋ̃maa mɔɔ bɛda nnɩka mɔɔ Bulombunlililɛ yɩ nwʋ odwokɔba nɩ lótwuli kɛnɩ nɩ ndɛnɩ kɛɛ bɛdɩ “nzɩkɛ.” (Mt. 25:46) Azɩlɛ yɩ munwala zʋ Ndɛnɩwuwalɛvʋlɔ mɔɔ ɩtɩnɣɛ nɩ, ɩdwɩnɩ ɔzɔ mmenii yi nwʋ ɩtɛla kezimɔ yɛdwɩnɩ bɔ nwʋ nɩ kʋlaa. Yézi kezimɔ Gyehova keli nninyeni nwʋ egyima wɔ anwʋhyɩlɩyɛ kezile yi nu. Ebiye a, sɛ bɔnwʋ nninyeni mɔɔ isizii wɔ anwʋhyɩlɩyɛ kezile yi nu nɩɩ kezimɔ Gyehova kɛdɩ yi dima nwʋ wɔ amanlɩ amanlɩ yɩ bɛ anyunu a, ɩkɛhã bɛ ma bekenyia Gyehova nu dedi.—Izi. 38:16. w24.05 12 ¶14-15

Gyehova yi mmenii anyɩ deli nwʋmɔ kɛɛ bɔkɔwʋwa bɔ nwʋ bɔ nwʋ. (2 Kɔl. 8:4) Naasʋ̃ itwu mmɩlɩ be a, ide akɛnɣazɩzɩbɛ paa na bɛahʋla bɛayɛ zɔ. Kɛ ndianwʋ nɩ, sɛ kʋnɛ be si wɔ dɩka be a, asafʋ nu mbanimbani mɔɔ bɔwɔ kɛnɩ nɩ nwʋ yɩ kɛɛ be mmeliyema mmenyia nɩɩ mmaalɛ hyinyia ɛzɩzɩbɛhyɛlɛ, sunzuma ɔfʋã nu nɩɩ nnwʋnlamɩ ɔfʋã nu mmʋwalɩyɛ. Iluwa ɔlɔlɛ mɔɔ asafʋ nu mbanimbani wɔ ma be mmeliyema nɩ ti, bɛfa bɔ nnwʋanlɩ betiã asianɩ nu ama bɛava mɔɔ behyinyia nɩ munwatĩĩ bɛama bɛ. Wɔ bʋwabɩlɛ mɔɔ ɩdɩ zɔ nu nɩ, ihyinyia kɛɛ yɛyɛ sutiye na ama ɔkʋ̃yɛlɛ ɩawʋwa yɛ avinli. Ɔhʋanɩhilelɛ mɔɔ Bɛtɩlɩ mɔɔ ɩwɔ bɛ kɛnɩ kɛva kɛɣa nɩ, ɩsɛ kɛɛ ɛfa ɛyɛ egyima. Ɩsɛ kɛɛ asafʋ nu mbanimbani ta kakɛ bɔ nwʋ wɔ ɔhʋanɩhilelɛ mɔɔ ɩfalɩ kezimɔ bekeziyeziye bɔ nwʋ bɛkɛma asianɩ mmɩlɩ, nɩɩ mɔɔ bɛkɛyɛ mmɩlɩ mɔ asianɩ be zi nɩ. (1 Kɔl. 14:​33, 40) Da akɛnɣazɩzɩbɛ ali, naasʋ̃ ma wʋ anyɩ ɩla kɛnɩ. (Ɛɣɛ. 22:3) Dwɩ̃ ansaana wʋayɛ dɩyɛ bela. Kila kɛɛ ɛlɛ́fa wʋ nnwʋanlɩ kediã asianɩ nu. Fa wʋ nwʋ tiã Gyehova zʋ. Gyehova kɔwʋwa wʋ ma ɔkɔwʋwa wu mmeliyema mmɩlɩ mɔ ɛlɛ́fa wʋ nnwʋanlɩ kediã asianɩ nu sʋ̃. w24.07 4 ¶8; 5 ¶11

Nɩ Bulombunli Devidi zi Gyehova na ɩvalɩ yɩ nwʋ idianlɩ yɩ zʋ. Mmɩlɩ mɔ Bulombunli Sɔɔlʋ nɩɩ mmenii mvʋlɔ wɔlɩ mmɔdɩnɩ kɛɛ bokohũ Devidi nɩ, ɩwɔlɩ Gyehova mpayɩ kɛɛ ɩwʋwá yɩ. Mmɩlɩ mɔ Nyamɩnlɩ wuwalɩ Devidi yɩ mpayɩwɔlɛ na ileli yi nɩ, ɩhanlɩ kɛɛ: “Gyehova da azɩ!” (Ndw. 18:46) Asʋ̃ nɩ Devidi ɩpɛɛ kɛhã kɛɛ Nyamɩnlɩ wɔ kɛnɩ kɛkɛ a? Buuku be hilehileli numɔ kɛɛ, nɩ Devidi ɩdaa yɩ ali kɛɛ ɩwɔ anwʋlazʋ kɛɛ Gyehova dɩ “Nyamɩnlɩ mɔɔ ɩda azɩ na ɩkɔ zʋlɔ ɩbʋwa yi mmenii.” Amba, nɩ Devidi zi paa kɛɛ yɩ Nyamɩnlɩ nɩ ɩnwʋ dɩyɛ bela mɔɔ iduwaa numɔ nɩ, na iziyeziye yɩ nwʋ kɛɛ ɩkɔwʋwa yɩ. Mɛyɩ wʋwalɩ Devidi ma ɩhɔlɩ zʋlɔ ɩzʋ̃mɩnlɩ Gyehova na ɩyɩlɩ yɩ ayɛlɛ. (Ndw. 18:​28, 29, 49) Sɛ yede yedi kɛɛ Gyehova yɛ lɛ tɩyasɩvʋlɔ Nyamɩnlɩ nɩ a, ɩkɔwʋwa yɛ ma yɛkɛva ɛhyɩmɛ yɛkɔzʋ̃mɩ yɩ. Ɩkɛma yekenyia anwʋzɩzɩbɛ yɛkɛva yekegyina odwohilalɛ bela munwa na ɩkɛhyɛ yɛ ɛzɩzɩbɛ ma yɛkɔhɔ zʋ yɛkɛyɛ sʋ̃maa wɔ yɛ ɔzʋ̃mɩnlɛ egyima yɩ nu. Akʋ̃ sʋ̃, ɩkɛma yekezi yɛ kɛnɣa kɛɛ yɛkɔhɔ zʋ yekeɣike Gyehova. w24.06 20-21 ¶3-4

Mɩnla yɛ yɛkɔhʋla yekozuma wɔ sʋ̃mavʋlɔ Pɔɔlʋ yi ndwokɔ mɔɔ ɩhɛlɛlɩ ɩhɔ ɩmanlɩ Tɛsalonikamaa nɩ nu a? Sɛ yɛtɩ ndwokɔ be mɔɔ ɩ nɩɩ mɔɔ yezuma wɔ Bayɩbʋlʋ nu nɩ iáyiyia anzɛnyɩɩ ndwokɔ be mɔɔ bogugua numɔ sʋ̃maa a, ɩsɛ kɛɛ yɛfa nɣɛlɛbɛ yɛyɛ egyima. Mmɩlɩ mɔ nɩ Soviet Union aɣanɩ yɩ idii tumi nɩ, yɛ adamvʋlɔ valɩ kɛlɛta be mɔɔ nɩ bekile kɛɛ ɩzʋ̃ ye egyimayɛlɛdɩka ti hɔ manlɩ ye mmeliyema sʋ̃maa. Nɩ kɛlɛta yɩ ɩhyɛɛ mmeliyema yɩ ɛzɩzɩbɛ kɛɛ bɛdɩ́ okuwu be wɔ ahanlɩ. Sɛ wʋákila a ɛkɛhã kɛɛ kɛlɛta yɩ nu ndwokɔ yɩ dɩ nɔhʋanlɛ. Naasʋ̃ eyi ɩádahɩlɩ mmeliyema mɔɔ bedi nɔhʋanlɛ yɩ. Bɔnwʋnlɩ yɩ kɛɛ ndwokɔ mɔɔ ɩwɔ kɛlɛta yɩ nu nɩ, ɩ nɩɩ mɔɔ bozuma nɩ iáyiyia. Nnɛ sʋ̃, bɛzabɛ mɔɔ botwodwu betiyia nɔhʋanlɛ yɩ nɩ, boduwa intanɛtɩ nɩɩ sohyiya midiya zʋ bɔbɔ mmɔdɩnɩ kɛɛ bɛkɛma yɛ adwɩnɩ kodu kɔvʋla na ye nu ɩahyɩhyɛ. Kɛ ankɩ yɛkɛma ‘bɛkɛzɩkɛ yɛ adwɩnɩ’ nɩ, sa yɛkʋla yɛpɩbɛlɩ mɔɔ yɛtɩ nɩɩ mɔɔ yɛkɩnga nɩ nu yekila kɛɛ ɩ nɩɩ nɔhʋanlɛ yɩ mɔɔ yezuma daada nɩ yiyia a.—2 Tɛs. 2:2; 1 Dwɔ. 4:1. w24.07 12 ¶14-15

Pɔkɔ mɔɔ nwʋmɔ hyinyia tɛla ebiyela yɛ lɛ kɛɛ, abiye kezi pɔkɔ kɛɛ ikeyila yɩ nwʋ zʋ kɛma Gyehova na ɩaɣa ɩahɩnla yɩ azʋ̃mɩvʋlɔ nwʋ. Gyehova pɛ kɛɛ abiyela yɛ zɔ. Mɩnla ti a? Iluwakɛɛ ɩdɔ mmenii na ɩpɛ kɛɛ isi bɛ bʋwɔ. Ɩpɛ kɛɛ ɩ nɩɩ bɛ nyia ɔhɔnwʋvalɛ na bɔbʋwa azɩ daabaa. (Dit. 30:​19, 20; Gal. 6:​7, 8) Naasʋ̃ Gyehova ɩáhyɛ abiye kɛɛ ɩzʋ̃mɩ́ yɩ. Ɩma ɔhʋanɩ ma abiyela si mɔɔ ɩpɛ kɛɛ ɩyɛ nɩ nwʋ pɔkɔ. Na sɛ Kilisinyianii mɔɔ inluma bu Nyamɩnlɩ yɩ mmɛla zʋ na ɩyɛ tanɩ mɔɔ numɔ yɛ ɔnlʋmɔ sʋ̃ ɛ? Sɛ iánu yɩ nwʋ a, ɩsɛ kɛɛ bɛyɩ yɩ wɔ asafʋ yɩ nu. (1 Kɔl. 5:13) Naasʋ̃ mɛyɩ po nɩ, Gyehova kila ɔhʋanɩ paa kɛɛ, tanɩyɛlɛnii nɩ konlu yɩ nwʋ na iazia ɩaɣa yɩ pɛ. Nɔhʋanlɛ nu nɩ, eyi yɛ lɛ sianti titili paa ti mɔɔ Gyehova valɩ elelɛdɩyɛ nɩ manlɩ a, na ama iluwa zʋ ɩava mmenii mɔɔ bonlu bɔ nwʋ nɩ bɛ tanɩ ɩahyɛ bɛ. Yɛ Nyamɩnlɩ mɔɔ ɩwɔ ɔlɔlɛ nɩ kɔ zʋlɔ hyɛ tanɩyɛlɛmaa ɛzɩzɩbɛ kɛɛ, bonlú bɔ nwʋ.—Zak. 1:3; Wul. 2:4; Gye. 4:8. w24.08 14 ¶1-2

Mmɩlɩ mɔ Dwɔɔnʋ hɛlɛlɩ yɩ kɛlɛta mɔɔ ɩtɔ zʋlɔ asã yɩ nɩ, nɩ abiyemmɔ bɛtɛlɛɛ awohwi ehilehilelɛ nu na bɛlɛ nkyɩkyɛmi bɛbaa asafʋ yɩ nu. Naasʋ̃, nɩ abiyemmɔ bɛlanwʋ la “boluwa nɔhʋanlɛ nɩ nu.” Bɛyɛlɩ sutiye bɛmanlɩ Gyehova na ‘belili Nyamɩnlɩ mmɛla nɩ zʋ.’ (2 Dwɔ. 4, 6) Kɛ Dwɔɔnʋ nkʋ̃ la yɛ Kilisinyiamaa nɔhʋanlɛmaa eyimmɔ bɛmanlɩ yɩ anyɩ leli a, mfomi bɛmanlɩ Gyehova sʋ̃ yɩ anyɩ leli. (Ɛɣɛ. 27:11) Mɩnla yɛ yesuma wɔ nu a? Nɔhʋanlɛlilɛ fa anyɩnlɩlelɛ ba. (1 Dwɔ. 5:3) Kɛ ndianwʋ nɩ, sɛ yezi kɛɛ yɛyɛɛ nninyeni mɔɔ ɩma Gyehova anyɩ de a, ɩma yɛzayɛ sʋ̃ yɛ anyɩ de. Sɛ ɩnwʋ kɛɛ yɛbʋ odwohilalɛ mɔɔ oyuwadɩ yɩ fa ba yɛ zʋ nɩ na yetiyee yi a, idi fɛlɛkʋ̃. Awɔvʋlɔ yɩ sʋ̃ di fɛlɛkʋ̃. (Lk. 15:10) Amɩyɛ sʋ̃, sɛ yɛnwʋ kɛɛ ye mmeliyema bedii nɔhʋanlɛ a, yɛ anyɩ de. (2 Tɛs. 1:4) Na sɛ bɛsɩkɛ Setanɩ yi oyuwadɩ yɩ a, ye munwatĩĩ yɛ anyɩ kele kɛɛ yelili nɔhʋanlɛ yɛmanlɩ Gyehova. w24.11 12 ¶17-18

Mmɩlɩ tɩndɩnlɩ ana yɛ ɩsɛ kɛɛ ɛfa nwʋ abiye bʋwɔ ansaana wʋahã wʋahile yi kɛɛ wʋ anyɩ deli yɩ nwʋ a? Sɛ ɛpɩlɩ wʋ nwʋ kã kile enii kʋ̃ nɩ kɛɛ wʋ anyɩ deli yɩ nwʋ a, sa ɩkʋla ɩma inyia adwɩnɩ kɛɛ esii pɔkɔ a, wʋádwɩnɩ nwʋmɔ kɔ aɣinzi. (Ɛɣɛ. 29:20) Naasʋ̃, íni kɛɛ ɛkyɛ sʋ̃maa ansaana wʋahã wʋahile yi, kɛ zɔ a, ikenyia adwɩnɩ kɛɛ sɛ esii pɔkɔ a, ɔtwɩnhwɩ̃ wʋ agyia azɩ. (Odw. 11:4) Kakɛ kɛɛ, ansaana ɛkɛhã kehile abiye kɛɛ wʋ anyɩ deli yɩ nwʋ nɩ, íni kɛɛ enyia adwɩnɩ kɛɛ sɛ ɛkã kile yi a, ikile kɛɛ ɔhʋanɩ bela zʋ, mɛyɩ la yɛ ekegyia yɩ a. Naasʋ̃, ɩsɛ kɛɛ ɔnwʋ yɩ kɛɛ eziyeziye wʋ nwʋ kɛɛ ekegyia, na ebiye a enii kʋ̃ nɩ sʋ̃ kɔhʋla kɛyɛ ɔnwʋkãvʋlɔ mɔɔ ɩfata wʋ. Na sɛ ɔnwʋ yɩ kɛɛ abiye anyɩ deli wʋ nwʋ sʋ̃ ɛ, mɩnla yɛ ɛkɛyɛ a? Sɛ wʋ anyɩ iáleli enii kʋ̃ nɩ yɩ nwʋ a, má ɩnwʋ yɩ petee, na áma ɔsʋzɔ yɩ zʋlɔ. Áma ɛma enii kʋ̃ nɩ tɩ nɣanlɩ kɛɛ wʋ anyɩ deli yɩ nwʋ mmɩlɩ mɔ wʋ anyɩ iáleli yɩ nwʋ. Ɩba yɩ zɔ a, iáhile ɔlɔlɛ.—Ɛfɩ. 4:25. w24.05 22-23 ¶9-10

Bɛzabɛ mɔɔ bɔvɔ ngɔlɔ bɛ mɔɔ bekeli nɔhʋanlɛ nɩ nkʋ̃ la yɛ Gyisɛsɩ kele bɛ kɔhɔ sʋlɔ Bulombunlililɛ yɩ nu a. Abiyela mɔɔ bɔvɔ ngɔlɔ yɩ mɔɔ ɩákɔ zʋlɔ ɩwɩɛnɩ nɩ, bɛlɛ́fa yɩ bɛkɛhɩnla “mmenii‘mɔɔ ɩba numɔ ɩyɩ bɛ nɩ” nwʋ. (Mt. 24:31) Sɛ yɛkɛhã a, Nyamɩnlɩ mmenii munwala, kɛ bɔwɔ anyɩnlɩlazʋ kɛɛ bɔkɔhɔ sʋlɔ anzɛnyɩɩ bɔkɔwʋwa azɩlɛ yɩ zʋ nɩ, ɩsɛ kɛɛ bobu Gyisɛsɩ yi odwokɔ yɩ kɛɛ kɔkɔwɔlɛ mɔɔ ɩkɛma bɔkɔhɔ zʋ bɔkɔwɩɛnɩ na bɛali nɔhʋanlɛ. Yɛɣa yɛnwʋ Gyehova bʋwɔ, na yɛwɔ yɩ ndɛnɩwuwalɛ nu anwʋlazʋ. Meti sɛ ɩfɔɔ bɛzabɛ mɔɔ bedi nɔhʋanlɛ nɩ be ngɔlɔ wɔ yɛ mmɩlɩ nu a, iálile yɛ. Wɔ Gyisɛsɩ yi ndianwʋ mɔɔ ɩfalɩ nwanyɩ egyini yi nwʋ nɩ, yɛkakɛ mɔɔ ɩhanlɩ ɩvalɩlɩ ɛpamaa mɔɔ bɛɣa yɛlɩ egyima mmɩlɩ mɔ ɩka ɛgyɩkɩ̃ɩ̃ ma bɔbɔ nɔnɩ anlu yi nwʋ nɩ. (Mt. 20:​1-16) Mmenii mɔɔ bɔvʋlɔlɩ bɛ ma bɛɣa yɛlɩ egyima wɔ nwanyɩ egyini yi nu aɣinzi yi wɔ ɔzɔ eɣile yi nu nɩ, bɛ nɩɩ bɛzabɛ mɔɔ bɔwɔlɩ egyima yɩ tʋ ndɛ nɩ nyianlɩ akatuwa ɔkʋ̃. Ɔzɔ la sʋ̃ yɛ ɩávalɩ nwʋmɔ mmɩlɩ mɔ bɛkɛva bɔkɔvɔ abiye ngɔlɔ nɩ, sɛ bobuwa yɩ ndɛnɩ kɛɛ ɩdɩ nɔhʋanlɛvʋlɔ a, ikenyia sʋlɔ akatuwa yɩ be a. w24.09 24 ¶15-17

Gyisɛsɩ yɛlɩ kezimɔ yɛkɛyɛ yɛ dɩyɛ mmɩlɩ mɔ bɛ nɩɩ yɛ iádi yi bʋwɔ nɩ nwʋ ndianwʋ mɔɔ idi munli manlɩ yɛ. Mmenii sʋ̃maa mɔɔ yi mmusunwamaa po kɩnla nwʋmɔ bɛ nɩɩ yɩ iádi yi bʋwɔ. Yi mmusunwamaa be hanlɩ hileli yi kɛɛ yi ti zɩkɛ, nyamɩnlɩzʋ̃mɩnlɛ nu mbanimbani yi hanlɩ kɛɛ inyia yi tumi wɔ azunzuma avinli bɛ kɛnɩ, na Wulomi azogyiamaa yɩ sʋ̃ belili yɩ nwʋ nwɔwɩ, bɛyɛlɩ yɩ ayɛkwa na aɣinzi yi bohunli yi. (Mk. 3:​21, 22; 14: 55; 15:​16-20, 35-37) Naasʋ̃ Gyisɛsɩ gyinanlɩ eyimmɔ munwala munwa na ɩáyɛ ebiye tuwa kakɛ bɛ. Mɩnla yɛ yɛkɔhʋla kozuma wɔ mɔɔ ɩyɛlɩ nɩ nu a? (1 Pit. 2:​21-23) Gyisɛsɩ yɛlɩ ndianwʋ mɔɔ idi munli paa manlɩ yɛ wɔ kezimɔ yekegyina nsisi munwa. Nɩ izi mmɩlɩ mɔ ɩsɛ kɛɛ ɩyɛ dinyii nɩɩ mmɩlɩ mɔ ɩsɛ kɛɛ ɩtɩndɛ. (Mt. 26:​62-64) Ndwokɔ mɔɔ ɩáyɛ nɔhʋanlɛ mɔɔ bɛhanlɩ bɛvalɩ yɩ nwʋ nɩ, kɛ yi munwala yɛ ɩzʋzɔlɩ zʋ a. (Mt. 11:19) Sɛ nɩ ɩ nɩɩ adamvʋlɔ yɩ bɛtɩndɛɛ sʋ̃ a, nɩ ɩáwʋdʋwʋdʋ bɛ anzɛnyɩɩ iáwunlawunla bɛ. w24.11 4-5 ¶9-10

Fa yɩ kɛɛ ɛva akyɛdɩ sʋnʋnkʋ̃ be mɔɔ ɩyɛ pɩkɛ na mfasʋ wɔ zʋlɔ ɛma abiye mɔɔ ɔdɔ yɩ paa. Sɛ ɛba ɔnwʋ yɩ kɛɛ ɩva akyɛdɩ yɩ iwula alɩka be nu ɩdʋ yɩ adwɩnɩ nu a, ɩkɛma ekeli ɛyɛkɛ paa! Naasʋ̃ sɛ ɔnwʋ yɩ kɛɛ ɩlɛ akyɛdɩ eyi idii egyima bʋwɔ na ihile nwʋmɔ anyɩnlɩzɔlɛ a, ɩkɛma wʋ anyɩ kele paa. Kɛ ndianwʋ eyi falɩ elelɛdɩyɛ nɩ nwʋ ise a? Gyehova manlɩ yɩ ɣa Gyisɛsɩ wuli manlɩ yɛ. Sɛ yekile akyɛdɩ mɔɔ ɩtʋ bɔlɔ eyi nɩɩ ɔlɔlɛ mɔɔ ɩhanlɩ Gyehova ma ɩvalɩ akyɛdɩ mɔɔ ɩdɩ zɔ ɩmanlɩ yɛ nɩ nwʋ anyɩnlɩzɔlɛ a, kila kezimɔ Gyehova anyɩ kele! (Dwɔ. 3:16; Wul. 5:​7, 8) Mmɩlɩ kɔlɩ zʋlɔ nɩ, yɛákila bʋwɔ a, kezimɔ elelɛdɩyɛ akyɛdɩ yɩ tʋ bʋlɔ ma yɛ nɩ kɛhã azɩ. Eyi kɛyɛ kɛɛ mɔɔ yɛva Nyamɩnlɩ yɩ akyɛdɩ mɔɔ ɩtʋ bʋlɔ eyi yewula alɩka be nu mɔɔ yɛádwɩnɩ nwʋmɔ po. Sɛ yɛábɛ kɛɛ eyi kezi a, nɩ ɩsɛ kɛɛ eɣile bela yɛdwɩnɩndwɩnɩɩ mɔɔ Nyamɩnlɩ nɩɩ Gyisɛsɩ bɛyɛ bɛma yɛ nɩ nwʋ. w25.01 26 ¶1-2

Sɛ eliyema benyia be kɛvata kɛɛ asafʋ nu ebani a ɩsɛ kɛɛ ɩyɛ abiye mɔɔ “ɩvalɩ yɩ nwʋ ɩmanlɩ Gyisɛsɩ Kɩlayɩsɩ nɩ ɩhyɛ.” Ɩwɔ numɔ kɛɛ sɛ onuma owie a, iáhyinyia kɛɛ idi alʋbɔ sʋ̃maa ansaana wʋaɣa wʋayɛ asafʋ nu ebani dɩyɛ, naasʋ̃ ekehyinyia mmɩlɩ ɛgyɩkɩ̃ɩ̃ na wʋaɣa wʋayɛ Kilisinyianii mɔɔ yɩ nwʋ wʋkwa. Ansaana bɛkɛyɛ wʋ asafʋ nu ebani nɩ, ɩsɛ kɛɛ ɛda yɩ ali kɛɛ ɛkã wʋ nwʋ azɩ na ɔwɔ pɛ kɛɛ ɛkɛyɛ egyima bela mɔɔ bɛkɛva bɛkɛma wʋ nɩ. Akʋ̃ sʋ̃, ɔzʋ̃ abʋtalɩ nu ɛkɛlɩkɛ kɛɛ Gyehova kɛva egyima sʋ̃maa kowula wʋ sa, kɛmɔ Gyisɛsɩ yɛlɩ nɩ. (Mt. 20:23; Fɩl. 2:​5-8) Sɛ ɔkɔ zʋ fʋãmɩ Gyehova nwʋ na ɛfa yɩ mmɛla bɔ wʋ ɛbɩla, na ɛfa ɔhʋanɩhilelɛ bela mɔɔ ɩzʋ̃ yɩ ahyɩhyɛdɩ yɩ kɛnɩ nɩ ɛyɛ egyima a, ikile kɛɛ edi nɔhʋanlɛ. Ɛhɛlɛlɛdwokɔ yɩ kã kɛɛ ɩsɛ kɛɛ ebani yɛ abiye mɔɔ “ɩkʋla ikilehile baaba.” Asʋ̃ eyi kile kɛɛ ɩsɛ kɛɛ ɛyɛ abiye mɔɔ izi ndɛnɩmanlɛ baaba paa a? Anhã. Asafʋ nu mbanimbani mɔɔ bɛfata sʋ̃maa wɔ kɛnɩ a, bɛáyɛ dɩyɛ wɔ bagua nu ndɛnɩmanlɛ nwʋ baaba, naasʋ̃ sɛ ɩba yɩ kɛɛ behilehilé wɔ dasɩlɛlilɛ nu anzɛnyɩɩ bɛvá Bayɩbʋlʋ yɩ bɛhyɛ mmeliyema ɛzɩzɩbɛ a, bɛyɛ dɩyɛ paa. w24.11 23-24 ¶14-15

Sɛ ɛkɩnga debe wɔ Bayɩbʋlʋ yɩ nu na wʋádɩ yɩ tʋ a, yɛ nwʋmɔ ɛbɩbɛlɛnu. Akʋ̃ wɔ ɔzɔ eɣile yi nu nɩ, dwɩnɩndwɩnɩ mɔɔ ɔnwʋnlɩ yɩ nwʋ nɩɩ mɔɔ ɩma ɔnwʋ falɩ Gyehova, yɩ Ɣa yɩ, nɩɩ ɔlɔlɛ mɔɔ bɔwɔ bɛma wʋ nɩ nwʋ. (Ndw. 119:​97, ad.) Sɛ ɛkɩngaa dɩyɛ anzɛnyɩɩ ɛyɛɛ ɛbɩbɛlɛnu na wʋánwʋ dɩyɛ fʋlɔ anzɛnyɩɩ dɩyɛ bela mɔɔ ɩyɛ anyɩnlɩlelɛ a, áma wʋ padi kolɔ. Ɔhʋanɩ be zʋ nɩ ɛdɩ kɛɛ abiye mɔɔ ɩpɩbɛɛ goodu. Bɛzabɛ mɔɔ bɛpɩbɛ goodu nɩ, ansaana bekenyia goodu ɛgyɩkɩ̃ɩ̃ be po nɩ, bɔzʋ̃ abʋtalɩ nu bɛfa dɔnɩhwɩlɩ sʋ̃maa anzɛnyɩɩ aɣile sʋ̃maa bɛyɛ nwʋmɔ egyima. Naasʋ̃ bɛ padi iágolɔ iluwakɛɛ goodu ɛgyɩkɩ̃ɩ̃ bela mɔɔ bekenyia nɩ tʋ bʋlɔ ma bɛ. Na nninyeni mvʋlɔ mɔɔ yɛnwʋ yɩ wɔ Bayɩbʋlʋ yɩ nu sʋ̃, ɩtɛla goodu po! (Ɛɣɛ. 8:10) Meti nyia abʋtalɩ na kɔ zʋlɔ di wʋ Bayɩbʋlʋ ɛɣɩngalɛ nwʋ nhyɩhyɛlɩyɛ yɩ zʋ.—Ndw. 1:2. w25.01 25 ¶14-15

Gyehova kila ɔhʋanɩ kɛɛ yekeziyeziye yɛ nwʋ mmɩlɩ munwala kɛɛ yɛkɛva mmenii mɔɔ bɛyɛ tanɩ yɛ nɩ bɛ tanɩ yɛkɛhyɛ bɛ. (Ndw. 86:5; Lk. 17:4; Ɛfɩ. 4:32) Sɛ abiye kã odwokɔ be anzɛnyɩɩ ɩyɛ debe itiyia yɛ a, sa ɩkʋla ɩyɛ ɛyɛkɛ yɛ paa, titili sɛ enii kʋ̃ nɩ dɩ ye busunwanii anzɛnyɩɩ yɛ ɔhɔnwʋ be mɔɔ ibike yɛ paa a. (Ndw. 55:​12-14) Sa ɩkʋla ɩyɛ ɛyɛkɛ yɛ dɩkɛɛ mɔɔ bɛva dadʋwa bɔwɔ yɛ. (Ɛɣɛ. 12:18) Ebiye a yɛkɔwɔ mmɔdɩnɩ kɛɛ yekowu yɛ anyɩ kogua yɛ ɛyɛkɛ yɩ zʋ anzɛnyɩɩ yɛkɛhyɛ yɛ nwʋ zʋ. Naasʋ̃ yɛyɛ zɔ a, ɩkɛyɛ kɛɛ mɔɔ bɛva dadʋwa bɔwɔ yɛ na yeyiaki yi wɔ yɛ nnwʋnlamɩ nu. Ɔzɔ la sʋ̃ yɛ sɛ yebu yɛ anyɩ yekua yɛ ɛyɛkɛ yɩ zʋ kɛkɛ a, íni kɛɛ yekila ɔhʋanɩ kɛɛ yɩzayɩ ɩkɔhɔ. Sɛ abiye yɛ tanɩ yɛ a, ebiye a mɔɔ yekeli bɔmʋnlɩ yɛkɛyɛ la yɛ lɛ kɛɛ yɛkɛva ɛya. Bayɩbʋlʋ yɩ po ma yɛnwʋ kɛɛ sa yɛkʋla yenyia ɛya. Naasʋ̃ isia ɩbɔ yɛ kɔkɔ kɛɛ, íni kɛɛ yɛma ɛya yɩ hyɛ yɛ zʋ. (Ndw. 4:4; Ɛfɩ. 4:26) Mɩnla ti a? Iluwakɛɛ sɛ yɛfa ɛya a, yɛáda yɛyɛ dɩyɛ baaba. (Gye. 1:20) Kakɛ kɛɛ, ɛya mɛyɩ sa ɩkʋla ɩba, naasʋ̃ kɛ ɔkɔhɔ zʋ kɛva ɛya nɩ mɛyɩ, igyĩ wʋzawʋ wʋ zʋ. w25.02 15 ¶4-6

Gyisɛsɩ yɛlɩ ndianwʋ be mɔɔ ɩma yɛnwʋ kɛɛ nɣɛlɛbɛ íni numɔ kɛɛ yekohunwahunwa anwʋnyia munwa mmɩlɩ mɔ “yéni ebiye wɔ Nyamɩnlɩ yɩ anyunu.” (Lk. 12:​16-21) Abiyela ízi mɔɔ ikezi wɔ ɛhyɩ̃. (Ɛɣɛ. 23:​4, 5; Gye. 4:​13-15) Akʋ̃ sʋ̃, Gyisɛsɩ hanlɩ kɛɛ bɛzabɛ mɔɔ bɛpɛ kɛɛ bɛba bɛyɛ yɩ adʋwavʋlɔ munwatĩĩ, ɩsɛ kɛɛ besiyeziye bɔ nwʋ kɛɛ ‘bɔkɔbʋ’ bɔ nnwʋnlamɩ ɔfʋã nu nninyeni mɔɔ bɛlɛ yɩ nɩ. (Lk. 14:33) Nɩ Kilisinyiamaa mɔɔ bɔwɔ asʋ̃mavʋlɔ yɩ bɛ mmɩlɩ zʋ nɩ ziyeziye bɔ nwʋ kɛɛ bɛkɛva be nninyeni bɔkɔwɔ afɔlɩ. (Hib. 10:34) Nnɛ sʋ̃, iluwa manlɩwulɛndwokɔ mɔɔ ye mmeliyema bɛábɛ kɛɛ bɛfa bɔ nwʋ bowula numɔ ti, bo nu sʋ̃maa bɔ nnwʋnlamɩ ɔfʋã nu nninyeni ivi bɛ sa. (Yik. 13:​16, 17) Mɩnla yɛ ɩbʋwa bɛ ma besi pɔkɔ mɔɔ ɩdɩ zɔ a? Bɔwɔ anwʋlazʋ kezile wɔ Gyehova yɩ anʋhʋba eyi nu: “Miléyiaki mʋnlʋmmɔ kyɩ̃, yɛɛ mɩ ɛɣɛɛlɛ iléfi mʋnlʋmmɔ kyɩ̃.” (Hib. 13:5) Meti, yɛyɛ mɔɔ yɛkɔhʋla bela yɛyɛ nhyɩhyɛlɩyɛ mɔɔ yɛkɛva kehila yɛ nwʋ mmɩlɩ mɔ yɛyɛ mbanimbani nɩ, na sɛ yeyiyia ndwokɔzɩzɩbɛ mɔɔ yɛáhila ɔhʋanɩ a, yɛwɔ anwʋlazʋ kɛɛ Gyehova kɔwʋwa yɛ. w25.03 29 ¶13-14

Gyehova iáyiaki yɛ kɛɛ yɛvá yɛ anwʋzɩzɩbɛ yɛbɩ yenyi wɔ sunzuma ɔfʋã nu. Bɛzabɛ mɔɔ bɔsʋ̃mɩ kɛɛ mmuwuanɩzʋhilalɛmaa nɩɩ ehilehilelɛmaa wɔ Kilisinyianɩ asafʋ yɩ nu nɩ, beziyeziye bɔ nwʋ kɛɛ bɔkɔwʋwa yɛ ma yekenyi wɔ sunzuma ɔfʋã nu na ‘yɛ adwɩnɩ iadĩ na yɛayɛ kɛɛ Kɩlayɩsɩ yɩzayɩ munli yi.’ (Ɛfɩ. 4:​11-13) Gyehova fa yi sunzuma nwanzanwanza yɩ sʋ̃ bʋwa yɛ ma yenyia “Kɩlayɩsɩ yɩ adwɩnɩ nɩ be.” (1 Kɔl. 2:​14-16) Akʋ̃ sʋ̃, Nyamɩnlɩ ma bɛhɛlɛ kezimɔ nɩ Gyisɛsɩ dwɩ̃, ɩtɩndɛ na ɩyɛ yɩ dɩyɛ mmɩlɩ mɔ nɩ ɩwɔ azɩlɛ yɩ zʋ nɩ nwʋ odwokɔ wɔ Odwokɔba anla yɩ nu. Sɛ osumazuma kezimɔ nɩ Gyisɛsɩ dwɩ̃ na ɩyɛ yɩ dɩyɛ nɩ a, sa ɔkʋla twu bʋtayɩ mɔɔ ɛva ziye wʋ anyɩ zʋ kɛɛ ɛkɛyɛ Kilisinyianii mɔɔ yɩ nwʋ wʋkwa nɩ nwʋ. Naasʋ̃ mɔɔ ɩkɛyɛ na yɛ nwʋ ɩawʋkwa nɩ, ɩsɛ kɛɛ yesuma sʋ̃maa yɛkɩnla mɔɔ yelili bɔmʋnlɩ yezumanlɩ yɛvalɩ ‘Gyisɛsɩ Kɩlayɩsɩ yɩ nwʋ ehilehilelɛ’ nwʋ nɩ. w24.04 4-5 ¶11-12

Ihyinyia kɛɛ yesizi abɔkɔ azʋlɔtʋ eɣile bela. Pɔkɔzilɛ yɩ be wɔ kɛnɩ a, izilɛ ɩáyɛ sɩ, dɩkɛɛ mɔɔ ɩfalɩ alɩyɛ mɔɔ yekeli nɩɩ mmɩlɩ mɔ yɛkɛla nwʋ. Naasʋ̃ nninyeni be sʋ̃ wɔ ɛkɛnɩ a, nwʋmɔ pɔkɔzilɛ yɛ sɩ paa. Nninyeni eyimmɔ kɔhʋla kɛhã yɛ pɔkɔdɩlɛ, yɛ anyɩnlɩlelɛ, yɛ alɔvʋlɔ, nɩɩ yɛ ɔzʋ̃mɩnlɛ. Yɛpɛ kɛɛ pɔkɔ bela mɔɔ yekezi nɩ bʋwa yɛ nɩɩ yɛ abusunwa munwala. Na mɔɔ ɩtɛla ebiyela nɩ, yɛpɛ kɛɛ yɛ pɔkɔzilɛ sɔ Gyehova anyɩ. (Wul 12:​1, 2) Dɩyɛ mɔɔ ihyinyia mɔɔ ɩsɛ kɛɛ ɛyɛ na ama wʋazi pɔkɔba nɩ yɛ lɛ kɛɛ ɔkɔnwʋ odwokɔ yɩ anyɩ zʋ bʋwɔ. Mɩnla ti mɔɔ eyi nwʋ hyinyia a? Fa yɩ kɛɛ abiye mɔɔ yɩ nwʋ ba yɩ ɛzɩzɩbɛ ɛzɩzɩbɛ ɩhɔ ɩnwʋ dɔkɩta. Asʋ̃ dɔkɩta nɩ kodwodwu la na iazi pɔkɔ kɛɛ ɩlɛ awudo be ɩmaa yɩ mmɩlɩ mɔ ɩlɛ́pɩbɛlɩ mɔɔ ɩyɛɛ enii kʋ̃ nɩ yɩ nu bʋwɔ a? Anhã, ɩlɛ́yɛ zɔ. Wʋzawʋ sʋ̃, sɛ ɔkɔhʋla kezi pɔkɔba a, ɩsɛ kɛɛ osunzu ndwokɔ mɔɔ ɩfalɩ bʋwabɩlɛ kʋ̃ nɩ nwʋ munwatĩĩ bʋwɔ. w25.01 14 ¶1-3

Mɩnla yɛ yezi yɛfalɩ Gyehova yɩ nwɔkɛnwʋnlɛ nwʋ a? Mɩnla ɔhʋanɩ zʋ yɛ ihile kɛɛ “ɩábɛ kɛɛ ɩsɩkɛ abiyela” a? (2 Pit. 3:9) Mɔwʋ sunzu kezimɔ ɩlalɩ nwɔkɛnwʋnlɛ ali ihileli mmenii be mɔɔ bɛyɛlɩ tanɩ mɔɔ numɔ yɛ ɔnlʋmɔ nɩ nwʋ. Bulombunli Devidi yɛlɩ tanɩ azʋlɔtʋ mɔɔ numɔ yɛ ɔnlʋmɔ, dɩkɛɛ agyiahʋnlɩzɩkɛlɛ nɩɩ awulilɛ. Naasʋ̃ Devidi nlunli yɩ nwʋ, meti Gyehova nwʋnlɩ yɩ nwɔkɛ, na ɩva ɩhyɛlɩ yɩ. (2 Sa. 12:​1-12) Bulombunli Manasɛ sʋ̃ yɛlɩ tanɩ nɣezile sʋ̃maa wɔ yɩ ɛbɩlawɔlɛ nu. Ɩyɛlɩ tanɩ ɩhɔlɩ aɣinzi paa, naasʋ̃, Gyehova nwʋnlɩ yɩ nwɔkɛ na ɩvalɩ yɩ tanɩ ɩhyɛlɩ yɩ, iluwakɛɛ inlunli yɩ nwʋ. (2 Mm. 33:​9-16) Ndianwʋ eyimmɔ ma yɛnwʋ kɛɛ, sɛ Gyehova nwʋ sianti be ti mɔɔ ɩsɛ kɛɛ ɩda nwɔkɛnwʋnlɛ ali ikile abiye a, ɩyɛ zɔ. Ikodunwo ɔzɔ mmenii yi, iluwakɛɛ beleli bedianlɩ numɔ kɛɛ bɛyɛlɩ tanɩ mɔɔ anyɩnlɩbʋlʋ wɔ nu, na bonlunli bɔ nwʋ. w24.05 4 ¶12