Kɛmɔ Mmalɛwʋlɛ Ɩfa Nzɩnzanlɩyɛ Ɩba Agyiahʋnlɩ Nu

Ɛɣalɛwʋlɛ ɩfa anyɩnlɩlelɛ ɩba na mmɩlɩ ɔkʋ̃ nɩ la sʋ̃, ɩfa asɛdɩ kezile itiã agyiahʋnlɩmaa nɩ bɔzʋ. Kɛ agyiahʋnlɩmaa mɔɔ bɔwʋ fʋlɔ nɩ, ɩkɛyɛ bɛ nnwʋánlɩ kɛɛ bɔkɔnwʋ kɛɛ, bɛ ɣa yɩ nɩ idee bɛ mmɩlɩ sʋ̃maa nɩɩ bɛ anwʋzɩzɩbɛ. Ɛɣalɛwʋlɛ nɩ ɩkɛma bɛ mmɩlɩ mɔɔ bɛfa bɛda nɩ ɔzʋlɔ ɩkɛdɩ, na ɩkɔhʋla ɩkɛva ɛvɛlɩyɛ ikediã bɛ agyiahʋnlɩ yɩ zʋ. Ikehyinyia kɛɛ ɛ nɩɩ wu hũ anzɛnyɩɩ wʋ yɩ nɩ bɛyɛ nzɩnzanlɩyɛ mɔɔ ɩkɛma bekehila ɛɣalɛ yɩ nɩ na bɛawɔ bɛ agyiahʋnlɩ nɩ sʋ̃ nwʋ banɩ. Kɛ ɩkɛyɛ na Bayɩbʋlʋ nu fʋlɔdulɛ nɩ ɩawʋwa bɛ ma bɛali ndwokɔ ɛzɩzɩbɛ eyimmɔ nwʋ egyima a?

1 BƐDƖ́ KEZIMƆ ƐƔALƐWƲLƐ ƖSƖNZA BƐ ƐBƖLAWƆLƐ NƖ ƖTƲ

MƆ BAYƖBƲLƲ YƖ ƖKÃ: “Ɔlɔlɛ ɩwɔ abʋtalɩ, yi ti nu iko.” Akʋ̃ sʋ̃, ɔlɔlɛ “ɩ́dɩ angʋmidi, ɩáva ɛya.” (1 Kɔlɛntɩmaa 13:4, 5) Kɛ ɛdanɩ fʋlɔ nɩ, sa ɛfa wʋ adwɩnɩ esiye wʋ ɣa nɩ ɩzʋ. Naasʋ̃, wu hũ ɩkɔwɔ yɩ tʋ ɩkɛdɩ nɣanlɩ kɛɛ ɛva yɩ eziye ahanlɩ, meti íni mɔɔ ɛma wʋ ɛɣɛɛlɛ ifi kɛɛ wu hũ sʋ̃ ihyinyia wʋ. Iluwa abʋtalɩ nɩɩ kunlumiba zʋ nɩ, ɔkɔhʋla ɔkɔwʋwa wu hũ ma ɩkɛdɩ nɣanlɩ kɛɛ ɩnwʋ ihyinyia na ɩahɩnla wʋ nwʋ ma bɛahila kuakula yɩ nɩ.

“Mʋnlʋmmɔ ohunɛmaa sʋ̃ . . . bɛ nɩɩ bɛ yɩmmɔ bɛda a ɩwɔ kɛɛ mʋnlʋmmɔ bede betiã nu kɛɛ bɛdɩ mmaalɛ na béni anwʋzɩzɩbɛ.” (1 Pita 3:7) Tɩ yɩ tʋ kɛɛ, wʋ yɩ ɩkɛva yɩ anwʋzɩzɩbɛ kezile nɩ la ikehila bɛ ɣa yɩ nɩ. Inyia asɛdɩ fʋlɔ na ɩkɛma ɩkɛvɛ, na ebiye a, sa yɩ apadi ikolɔ. Ɩyɛ po a, sa ɩkʋla ɩfa wʋ nwʋ ɛya, naasʋ̃ bɔ mmɔdɩnɩ kɛɛ ɛkɛyɛ bɛtɛɛ, ‘yɛɛ íni kɛɛ ɛfa ɛya ndɛndɛ. Sianti yɛ lɛ kɛɛ, enii yɩ ɛyavalɛ áma ɩyɛ dɩyɛ mɔɔ ɩsɔ Nyamɩnlɩ yɩ anyɩ.’ (Gyemisi 1:19, 20) Dá ntɩyasɩ ali, na fa mmʋwalɛ mɔɔ wʋ yɩ ihyinyia nɩ mayɩ.

MƆ ƆKƆHƲLA ƐKƐYƐ:

• Ɛzɩlɛmaa: Sɛ ɩdɩ nwɔnɩ o, ohunluma o, bʋwa wʋ yɩ ma ihila kuakula yɩ nɩ. Tɩ́ mmɩlɩ mɔɔ ɛfa ɛyɛ nninyeni mvʋlɔ nɩ ɩzʋ, na ama wʋanyia mmɩlɩ sʋ̃maa wʋama wʋ yɩ nɩɩ wʋ ɣa yɩ nɩ

• Enlilɛmaa: Sɛ wu hũ ɩpɛ kɛɛ ɩbʋwa wʋ wɔ ɛɣalɛ yɩ ihilalɛ nu a, de yɩ mmʋwalɛ nɩ tiã numɔ. Sɛ ɩánwʋ yɩ yɛlɛ bʋwɔ a, mɩátɩndɛnlɩ yɩ anyunu, ɔzʋ̃ ɔlɔlɛ nu kile yɩ kezimɔ bɛyɛ dɩyɛ ɔkʋ̃ nɩ

2 HYƐ́ WƲ AGYIAHƲNLƖ YI NU ƐZƖZƖBƐ

MƆ BAYƖBƲLƲ YƖ ƖKÃ: ‘Bɛkɛyɛ nnwʋnlamɩ ɔkʋ̃.’ (Matiyu 19:5) Ɩwɔ numɔ kɛɛ benyia ɛɣalɛ wɔ bɛ abusunwa yɩ nu dɩyɛ, naasʋ̃ máma wʋ ɛɣɛɛlɛ ifi kɛɛ ɛ nɩɩ wu hũ anzɛnyɩɩ wʋ yɩ nɩ bɛdɩ “nnwʋnlamɩ ɔkʋ̃.” Bɛyɛ́ mɔɔ bɔkɔhʋla bela bɛma bɛ agyiahʋnlɩ nɩ ɩzɔ.

Ɛyɩlɛmaa, bɛma bɛ anyɩ ɩzɔ mmʋwalɛ bela mɔ ɩzʋ̃ bo hũmmɔ bɛ ɛkɛnɩ nɩ. Sɛ ɛkã ndwokɔ mɔ ɩyɛ fɛ ekile yɩ a, ɩkɛma ‘ɩnwʋ ɩkɛza’ anzɛnyɩɩ yɩ ahʋnlɩnɩ ɩkɔdɔ ikunlu. (Proverbs 12:18, NWT) Ohunɛmaa, bɛhã kezimɔ bɔdɔ bɛ yɩmmɔ na bɔtʋ bʋlɔ bɛma bɛ nɩ nwʋ odwokɔ behile bɛ. Kamvʋ yɩ wɔ ɔhʋanɩ mɔ iduwa ɔzʋlɔ ɩfa ikila abusuwa yɩ nɩ.—Proverbs 31:10, 28, NWT.

“Áma abiyela ɩdwɩnɩ yɩzayɩ nkʋ̃ yɩ bʋwɔyɛlɛ nwʋ. Mfomi mʋnlʋmmɔ bɔdwɩnɩ bɔ ɔhɔnwʋmmɔ sʋ̃ bɔ bʋwɔyɛlɛ nwʋ.” (1 Kɔlɛntɩmaa 10:24) Eɣile bela nɩ, yɛ dɩyɛ mɔ ɩdɩ baaba ma wu hũ anzɛnyɩɩ wʋ yɩ. Kɛ agyiahʋnlɩmaa nɩ, bele mmɩlɩ bɔwɔ nkɔmɔ, bɛ hamvʋ na bediye bɔ nwʋ bɔ nwʋ. Sɛ ɩba nna nu nkitanwʋlilɛ a, áma ɔdwɩnɩ wʋzawʋ nkʋ̃tɩnyɩɩ wʋ nwʋ. Sunzu wu hũ anzɛnyɩɩ wʋ yɩ nɩ yɩ ahyinyiadɩ nwʋ. Bayɩbʋlʋ ɩkã kɛɛ: “Máma mʋnlʋmmɔ botuwa bɔ nwʋ nna. Ansaana mɔ botuwaa bɔ nwʋ nna nɩ, nɩ mʋnlʋmmɔzabɛ anwɩ̃ yɩ beli bɔmʋnlɩ bɛbɩnlɩ ɔzʋlɔ kɛɛ bɛyɛɛ yɩ ɔzɔ.” (1  Kɔlɛntɩmaa 7:3-5) Meti, bɔzʋ̃ nɔhʋanlɛ nu bozunzu odwokɔ eyi nwʋ wɔ bɛzabɛ anwɩ̃ la bɛ avinli. Sɛ bɛda abʋtalɩ ali na bɛtɩ bɔ nwʋ bɔ nwʋ tʋ a, sa bɛ agyiahʋnlɩ nɩ ɩsɔ.

MƆ ƆKƆHƲLA ƐKƐYƐ:

• Kɛ ohunɛ nɩɩ ɛyɩlɛ nɩ, benyia mmɩlɩ bɛma bɔ nwʋ bɔ nwʋ

• Yɛ nninyeni ngyɩkɩ̃ɩ̃ ngyɩkɩ̃ɩ̃ be mɔ ɩkɛma wu hũ anzɛnyɩɩ wʋ yɩ nɩ ɩkɛdɩ nɣanlɩ kɛɛ ɔdɔ yɩ, dɩkɛ ɛhanlɛ mɔɔ ɛkɛhã ɔlɔlɛ ndwokɔ be ekehile yɩ anzɛnyɩɩ ɛkɛhyɛ dɩyɛ yɩ nɩgift

3 BƐDƖDƖ BƐ ƔA YƖ NƖ

MƆ BAYƖBƲLƲ YƖ ƖKÃ: “Ɔzʋmɩ wʋ nnwuakula nu yɛ ozumanlɩ Nyamɩnlɩ Odwokɔ nɩ a. Nyamɩnlɩ Odwokɔ nɩ mɔɔ ɩma ɔnwʋ nɣɛlɛbɛ, . . . , na ɩma enyia nnwʋanlɩ nɩ.” (2 Timoti 3:15) Bozunzu ɔhʋanɩ mɔɔ bokoluwa ɔzʋlɔ bɛkɛdɩdɩ bɛ ɣa yɩ nɩ nwʋ. Wɔ mmɩlɩ po mɔ iwula kunlumi nu nɩ, ɩkʋla isuma dɩyɛ ma ɩyɛ nnwʋánlɩ. Ɛɣalɛ yɩ nɩ ɩkʋla ɩtɩ wʋ nnɩ nɩɩ kezimɔ ɛtɩ nɣanlɩ wɔ mmɩlɩ mɔ iwula kunlumi nu nɩ. Kɩnga dɩyɛ kile yɩ wɔ mmɩlɩ mɔ ɩdɩ abɔdɔma nɩ. Ɩwɔ numɔ kɛɛ ɩlɛ́tɩ mɔɔ ɛkɩnga nɩ tʋ dɩyɛ, naasʋ̃ ɩkɔwʋwa yɩ ma yɩ anyɩ ikeleli ɛɣɩngalɛ nwʋ wɔ mmɩlɩ mɔ ɩyɛ ebani nɩ.

Áma obu wʋ ɣa yɩ nɩ kɛɛ ɩdɩ kuakula kʋlaa mɔɔ ɔlɔ́kʋla ɛkɛhã Nyamɩnlɩ nwʋ odwokɔ ekehile yɩ. Sɛ ɔbɔɔ Gyehova mpayɩ a, bɔ yɩ kezile ma ɩdɩ. (Deuteronomy 11:19, NWT) Sɛ bedii ɛɣɛlɛ bɔbɔ numɔ po a, kã nninyeni mɔ Nyamɩnlɩ ɩwɔ nɩ nwʋ odwokɔ kile yɩ. (Ɛfɩsɛsɩmaa 6:4) Mmɩlɩ mɔ ɛɣalɛ nɩ inyii nɩ, sa ɩnwʋ ɔlɔlɛ mɔ ɔwɔ ma Gyehova nɩ, na yɩzayɩ sʋ̃ ikozuma kɛɛ ɩkɔlɔ Gyehova.

MƆ ƆKƆHƲLA ƐKƐYƐ:

• Bɔ́ mpayɩ pɩbɛ nɣɛlɛbɛ mɔ ɛkɛva ɛkɛdɩdɩ wʋ ɣa yɩ nɩ

• Sizí ndwokɔ abɔkɔ zʋ owudo kile wʋ ɣa yɩ nɩ na ama ɩawɔ yɩ tʋ iazuma dɩyɛ ndɛndɛ mmɩlɩ mɔɔ ɩdɩ abɔdɔma nɩ