Mɔɔ Ɩkɛyɛ Na Azʋ̃nudwolɩyɛ Ɩawʋwa Ɛ Nɩɩ Wʋ Abusunwamaa Nɩ Mmɔ Bɛ Avinli

Sɛ ekyia a, nɩ enyia abusunwa fʋlɔ. Ɩwɔ numɔ kɛɛ sa ɔdɔ wʋ awʋvʋlɔ na wʋali be nni dɩyɛ, naasʋ̃ wu hũ anzɛnyɩɩ wʋ yɩ yɛ ɩɣa ɩyɛ abiye mɔɔ ɩsɛ kɛɛ ɩnwʋ ihyinyia wʋ baaba ɩtɛla abiyela mɔɔ ɩwɔ azɩlɛ yɩ zʋ a. Eyi ɩkɔhʋla ɩkɛyɛ ɛzɩzɩbɛ ɩkɛma wʋ abusunwamaa nɩ mmɔ be kɛɛ bekele bekediã numɔ. Naasʋ̃ Bayɩbʋlʋ nu egyinalɛzʋ-ndwokɔ ɩkɔhʋla ɩkɔwʋwa wʋ ma ɛkɛyɛ wʋ dɩyɛ pɛpɛɛpɛ, kɛmɔ ɩkɛyɛ a, azʋ̃nudwolɩyɛ ɩkɔwʋwa ɛ nɩɩ wʋ abusunwamaa nɩ mmɔ bɛ avinli wɔ mmɩlɩ mɔɔ ɔbɔ mmɔdɩnɩ kɛɛ ɛkɛhyɩhyɛ wʋzawʋ wʋ abusunwa fʋlɔ nɩ.

1 NYIA WƲ ABUSUNWAMAA NƖ MMƆ BƆ NWƲ ADWƖNƖBA

MƆ BAYƖBƲLƲ YƖ ƖKÃ: “Di wʋ zɩ nɩɩ wʋ nli nni.” (Ɛfɩsɛsɩmaa 6:2) Ɩávalɩ nwʋmɔ ɔlʋbɔ mɔɔ eli nɩ, ihyinyia kɛɛ obu wʋ awʋvʋlɔ na edi be nni eɣile bela. Nwʋ yɩ sʋ̃ kɛɛ, wu hũ anzɛnyɩɩ wʋ yɩ nɩ, ɩwɔ ɛzɩlɛ nɩɩ enlinlɛ mɔɔ ɩsɛ kɛɛ ɩma yɩ anyɩ ɩkɔ bɔ nwʋ. Iluwakɛɛ “ɔlɔlɛ ɩáyɛ anyɩnlɩbʋlʋ” nɩ ti, máma ɩyɛ wʋ atɩɩtɩɩ kɛɛ wu hũ anzɛnyɩɩ wʋ yɩ ɩ nɩɩ yɩ abusunwamaa nɩ mmɔ bɔ. —1 Kɔlɛntɩmaa 13:4; Galatiyiamaa 5:26.

MƆ ƆKƆHƲLA ƐKƐYƐ:

• Mákã ndwokɔ be mɔɔ ifuu ahʋnlɩnɩ, dɩkɛ, “Wʋ abusunwamaa nɩ mmɔ bɛáwu mɩ kʋlaa” anzɛnyɩɩ “Mɩlɛ́yɛlɩ dɩyɛ bela ma wʋ maamɩ yɩ anyɩ ɩlɔ́sɔlɩ yɩ kyɩ̃”

• Bɔ mmɔdɩnɩ kɛɛ ɔkɔnwʋ sianti mɔɔ wu hũ anzɛnyɩɩ wʋ yɩ ɩyɛ yɩ dɩyɛ ɔzɔ nɩ

2 FA WƲ AGYIA KYINA AZƖ

MƆ BAYƖBƲLƲ YƖ ƖKÃ: “Eyi ti benyia ikediã yɩ zɩ nɩɩ yɩ nli ɛkɛnɩ na ɩava yɩ nwʋ ɩahɔ́, ɩawɔ yɩ yɩ nwʋ na bɛzabɛ anwɩ̃ nɩ bɛayɛ nnwʋnlamɩ ɔkʋ̃.” (Matiyu 19:5) Sɛ ekyia a, ebiye a, wʋ awʋvʋlɔ bɛkɛdɩ nɣanlɩ kɛɛ bɛla nwʋ la bɔwɔ wʋ zʋ tumi, na bɛkɛbɛ yɩ kɛɛ bɛkɛva bɔ nwʋ bekelileli wʋ agyiahʋnlɩ nu.

Ɩdɩ wʋzawʋ nɩɩ wu hũ anzɛnyɩɩ wʋ yɩ bo odwokɔ kɛɛ bokozunzu mɔɔ ɩsɛ kɛɛ bɛ awʋvʋlɔ bɛyɛ, nɩɩ mɔɔ íni kɛɛ bɛyɛ nwʋ, na bɔzʋ̃ ɔlɔlɛ nu bɛahã bɛahile bɛ. Bɛmá nninyeni anyɩ ɩla ɛkɛnɩ, mɔɔ bɛlɛ́tɩndɛ bekediyia bɛ. (2 Timoti 2:24) Sɛ bɛkã bɔ nwʋ azɩ, bɛyɛ bɛtɛɛ, na benyia abʋtalɩ a, ɩkɛma bɛ nɩɩ bɛ abusunwamaa nɩ mmɔ bekenyia abusunwawɔlɛ baaba, na bɛahɔ ɔzʋlɔ ‘bɛava ɔlɔlɛ bɛazʋzɔ bɔ nwʋ nkʋ̃kʋ̃.’ —Ɛfɩsɛsɩmaa 4:2.

MƆ ƆKƆHƲLA ƐKƐYƐ:

• Sɛ wʋ anyɩ iáleli ɔhʋanɩ mɔɔ abusunwamaa nɩ mmɔ bɛlɛ bɔ nwʋ bedideli bo ndwokɔ nu nɩ nwʋ a, ɛ nɩɩ wu hũ anzɛnyɩɩ wʋ yɩ bozunzu nwʋ wɔ azʋ̃nudwolɩyɛ nu

• Bɛma bɛ adwɩnɩ ɩyɛ ɔkʋ̃ wɔ ɔhʋanɩ mɔɔ bekeli ɔzɔ ndwokɔ nwʋ egyima