Wil jy graag meer doen?
1 Jesus het die Koninkryk met kosbare skatte vergelyk (Matt. 13:44-46). Die werk om die nuus van die Koninkryk te versprei, is ook ’n kosbare skat. Hierdie bediening verdien die eerste plek in ons lewe, selfs al vereis dit ’n mate van selfverloëning om ’n volle deelname daaraan te hê (Matt. 6:19-21). Wil jy graag meer in Koninkryksdiens doen?
2 Oorweeg hierdie noodsaaklikhede: ’n Hele paar dinge is nodig om ons persoonlike deelname aan die bediening uit te brei: (1) vasbeslotenheid om Koninkryksbelange eerste in ons lewe te stel (Matt. 6:33); (2) om geloof te beoefen en op Jehovah te vertrou (2 Kor. 4:1, 7); (3) om God se hulp in opregte en aanhoudende gebed te vra (Luk. 11:8-10); (4) om in ooreenstemming met ons gebede op te tree.—Jak. 2:14, 17.
3 Maniere om ons bediening uit te brei: Ons almal kan die basiese doelwit stel om gereeld elke maand tyd in die bediening deur te bring. Maar het jy ook daaraan gedink om elke geleentheid te gebruik om informeel te getuig, om jou aanbiedinge sinvoller en jou herbesoeke doeltreffender te probeer maak en om progressiewe tuisbybelstudies te probeer hou? Kan jy hulppionierdiens of gewone pionierdiens doen of dien waar daar hulp nodig is? Kan jy, as jy ’n gedoopte broer is, daarna streef om as ’n bedieningskneg of ouer man te kwalifiseer? (1 Tim. 3:1, 10). Kan jy jou bediening uitbrei deur aansoek te doen vir Betheldiens, die Bedieningsopleidingskool of opleiding as ’n sendeling by die Gileadskool?—Luk. 10:2.
4 ’n Broer wat ’n voltydse werk gehad het en baie tyd aan sport bestee het, is aangemoedig om ’n gewone pionier te word. Hy het hulppionierdiens begin doen en toe sy omstandighede aangepas sodat hy die voltydse bediening kon betree. Hy het later die Bedieningsopleidingskool bygewoon, wat hom help voorberei het vir sy huidige toewysing as ’n kringopsiener. Hy is baie bly dat hy gereageer het op die aanmoediging wat hy ontvang het, en hy is oortuig dat hy baie gelukkiger is as gevolg van sy besluit om meer in Koninkryksdiens te doen.
5 Jehovah seën diegene wat hulle beskikbaar stel (Jes. 6:8). Laat niks jou daarvan weerhou om jou bediening uit te brei en sodoende selfs groter bevrediging en verkwikking te geniet nie.