God se Woord is lewend

Is opregtheid al wat nodig is om God te behaag?

VERSKRIKLIKE dinge is al in die naam van godsdiens gedoen. Kyk wat gebeur hier met Stefanus, ’n dissipel van Jesus Christus. Hy word doodgemaak!

Stefanus se moordenaars is baie godsdienstige manne. Een van hulle is Saulus, die man wat die klere oppas (Hand. 7:58-60). Hy het later gesê: “Ek [het] in die Jodedom vooruitgegaan . . . bo baie van my leeftyd.” Maar in plaas daarvan om hom ’n beter persoon te maak, het Saulus gesê dat sy godsdiens daarvoor verantwoordelik was dat hy “die gemeente van God uitermate vervolg” het.—Gal. 1:13, 14.

Saulus het die Christene in Jerusalem vervolg deur hulle huise met geweld binne te gaan, hulle uit te sleep en in die gevangenis te werp (Hand. 8:3). Maar hy was nie daarmee tevrede nie. Hy het ook na Damaskus vertrek om die Christene aldaar in hegtenis te neem.—Hand. 9:1, 2.

Maar op pad soontoe gebeur daar iets merkwaardigs. Soos jy kan sien, skyn ’n lig uit die hemel rondom Saulus en val hy op die grond neer. ’n Stem sê: “Saul, Saul, waarom vervolg jy My?”

“Wie is U, Here?” vra Saulus.

“Ek is Jesus wat jy vervolg”, is die antwoord (Hand. 9:3-5). Jesus sê dit omdat dit vir hom voel asof hy self seerkry wanneer Saulus sy volgelinge vervolg. Kort daarna word Saulus ’n lid van die Christengemeente en hy staan later bekend as die apostel Paulus.

Ons kan ’n belangrike les hieruit leer. Saulus was opreg en het geglo dat hy God behaag deur Christene te vervolg (Hand. 22:3, 4; Joh. 16:2). Maar dit het nie sy dade reg gemaak nie. Hy moes sy godsdiens verander om God se goedkeuring weg te dra. Hy het later geskryf van ander wat opreg was maar wat God nie behaag het nie. Wat was hulle probleem?

Paulus verduidelik: “Ek getuig van hulle dat hulle ’n ywer vir God het, maar sonder kennis” (Rom. 10:2). Ja, benewens opregtheid het ons ’n juiste kennis van God se Woord nodig. As ’n mens nie die waarheid omtrent iets weet nie, kan jy verskriklike dinge doen. Hoe belangrik is dit dus dat ons juiste kennis van God se voornemens verkry!—1 Tim. 1:13; Joh. 17:3.