Wat sê die Bybel daaroor om te gee?
Die Bybel se antwoord
Die Bybel moedig mense aan om vrywillig en vir die regte redes te gee. Dit wys dat wanneer iemand dit doen, word nie net die ontvanger bevoordeel nie, maar ook die gewer (Spreuke 11:25; Lukas 6:38). Jesus het gesê: “Dit verskaf groter geluk om te gee as om te ontvang.” — Handelinge 20:35.
Wanneer is dit goed om te gee?
Dit is goed om te gee as dit vrywillig gedoen word. Die Bybel sê: “Laat elkeen doen net soos hy hom in sy hart voorgeneem het, nie teësinnig of onder dwang nie, want God het ’n blymoedige gewer lief.” — 2 Korintiërs 9:7.
Wanneer ons uit die hart gee, is dit deel van “die vorm van aanbidding” wat God goedkeur (Jakobus 1:27). Iemand wat behoeftige mense vrygewig help, werk hand aan hand met God. God beskou sulke vrygewigheid as iets wat aan hom geleen word (Spreuke 19:17). Die Bybel wys dat God die persoon wat gee, sal terugbetaal. — Lukas 14:12-14.
Wanneer is dit sleg om te gee?
Wanneer dit vir selfsugtige redes gedoen word. Voorbeelde sluit in:
Om mense te beïndruk. — Matteus 6:2.
Om iets daaruit te kry. — Lukas 14:12-14.
Om redding te probeer koop. — Psalm 49:6, 7.
As die geskenk gebruik word vir dinge wat God veroordeel. Byvoorbeeld, dit sou verkeerd wees om vir iemand wat dobbel of dwelms of alkohol misbruik, geld te gee (1 Korintiërs 6:9, 10; 2 Korintiërs 7:1). Dit is ook nie gepas om vir iemand te gee wat homself finansieel kan help, maar weier om dit te doen nie. — 2 Tessalonisense 3:10.
As dit inmeng met iemand se godgegewe verantwoordelikhede. Die Bybel wys dat gesinshoofde vir hulle gesinne moet sorg (1 Timoteus 5:8). Dit sou verkeerd wees as ’n gesinshoof soveel vir ander gee dat sy eie gesin as gevolg hiervan swaarkry. Net so het Jesus mense veroordeel wat geweier het om na hulle bejaarde ouers te kyk omdat hulle gesê het dat al hulle besittings “’n gawe [is] wat aan God gewy is”. — Markus 7:9-13.