Hoe behandel Jehovah se Getuies persone wat voorheen aan hulle godsdiens behoort het?

Ons doen ons bes om almal met liefde, vriendelikheid en respek te behandel. As een van Jehovah se Getuies nie meer so gereeld in sya aanbidding is as wat hy eers was nie of selfs opgehou het om Jehovah te aanbid, vat ons die eerste stap om met hom te kommunikeer, ons verseker hom dat ons vir hom lief is, en ons probeer hom help om weer nader aan God te wil kom. – Lukas 15:4-7.

In party gevalle doen die persoon dalk iets wat kan veroorsaak dat hy uit die gemeente verwyder moet word (1 Korintiërs 5:13). Maar omdat ons regtig lief is vir ons medeaanbidders, doen ons ons bes om die persoon voor die tyd te help sodat hy nie verwyder hoef te word nie. En selfs al word hy verwyder, sal ons hom nog steeds met liefde en respek behandel, net soos die Bybel ons aanmoedig om te doen. – Markus 12:31; 1 Petrus 2:17.

Wat lei daartoe dat ’n persoon uit die gemeente verwyder word?

Die Bybel maak dit duidelik dat ’n Christen wat ’n ernstige sonde pleeg en weier om te verander, uit die gemeente verwyder moet word (1 Korintiërs 5:11-13).b Die Bybel bepaal watter sondes so ernstig is dat ’n persoon daarvoor verwyder kan word. Byvoorbeeld, dit noem dade soos egbreuk, dronkenskap, moord, gesinsgeweld en diefstal. – 1 Korintiërs 6:9, 10; Galasiërs 5:19-21; 1 Timoteus 1:9, 10.

Maar ons verwyder nie onmiddellik ’n persoon wat ’n ernstige sonde gepleeg het uit die gemeente uit nie. Gemeentelike ouermannec probeer hom eers help om sy gedrag te verander (Romeine 2:4). Hulle probeer om sy hart te bereik deur sagmoedig, liefdevol en goedhartig te wees (Galasiërs 6:1). Deur hom op hierdie manier te behandel, help dit die sondaar dalk om te besef dat hy foute gemaak het en motiveer dit hom dalk om berou te toon (2 Timoteus 2:24-26). Maar as hy aanhou om te doen wat die Bybel sê verkeerd is en nie berou toon nie, selfs al probeer die ouermanne herhaaldelik om hom te help, moet hy uit die gemeente verwyder word. Die ouermanne maak ’n aankondiging in die gemeente dat die persoon nie meer een van Jehovah se Getuies is nie.

Twee gemeentelike ouermanne deel liefdevol Bybeltekste met ’n jong man. Een van die ouermanne sit sy hand op die jong man se skouer terwyl hy met hom praat. — Ouermanne probeer ’n sondaar se hart bereik deur sagmoedig, liefdevol en goedhartig te wees

Wat word bereik deur ’n persoon te verwyder wat vasbeslote is om sonde te beoefen? Om maar een ding te noem, die gemeente ondersteun God se standaarde van sedelike reinheid en word teen die persoon se negatiewe invloed beskerm (1 Korintiërs 5:6; 15:33; 1 Petrus 1:16). Verder kan dit die sondaar motiveer om op te hou om te doen wat verkeerd is en om die nodige veranderinge te maak. – Hebreërs 12:11.

Hoe behandel Jehovah se Getuies persone wat uit die gemeente verwyder is?

Die Bybel sê dat Christene moet “[ophou] assosieer” met iemand wat uit die gemeente verwyder is, hulle “moenie eers saam met so iemand eet nie” (1 Korintiërs 5:11). So ons assosieer nie met iemand wat verwyder is nie. Maar ons ignoreer hom nie heeltemal nie. Ons behandel hom met respek. Hy is welkom om ons vergaderinge by te woon, waar hy deur Jehovah se Getuies gegroet kan word.d Hy kan ook die ouermanne vir hulp vra om na die gemeente terug te keer.

By die Koninkryksaal groet ’n Getuiepaartjie vriendelik ’n vrou wat uit die gemeente verwyder is. — Persone wat uit die gemeente verwyder is, is welkom om ons vergaderinge by te woon

Wat van iemand wat uit die gemeente verwyder is, maar wie se huweliksmaat en jong kinders nog Getuies van Jehovah is? Al aanbid hy nie meer Jehovah saam met sy gesin nie, het hulle nog steeds ’n verhouding as gesinslede. Aangesien hulle in dieselfde huis bly, eindig sy verhouding met sy vrou en kinders nie en moet hulle mekaar nog steeds met liefde behandel.

’n Persoon wat verwyder is, kan die ouermanne vra om besoek te word, en gedurende hierdie besoeke sal hulle hom liefdevolle raad uit die Bybel gee en hom vriendelik aanmoedig om berou te toon en na God terug te keer (Sagaria 1:3). As hy ophou om te doen wat verkeerd is en deur sy dade wys dat hy regtig die Bybel se standaarde wil volg, kan hy weer deel van die gemeente word. Die gemeente sal hom “vryelik vergewe en hom vertroos”, net soos die Christene in Korinte gedoen het toe iemand wat voorheen gesondig het, sy gedrag verander het. – 2 Korintiërs 2:6-8.

Hoe voel persone wat voorheen verwyder was?

Kyk na die kommentare van party Getuies van Jehovah wat uit die gemeente verwyder was en later besluit het om na God terug te keer.

“Toe ek besluit het om na die gemeente terug te keer, het ek gedink dat die ouermanne alles sou wou weet wat ek gedoen het gedurende die baie jare wat ek verwyder was. Maar hulle het net gesê: ‘Ons wil hê jy moet fokus op wat jy nou gaan doen.’ Ek het so rustig gevoel nadat hulle dit gesê het.” – Maria, Verenigde State.

“Die gemeente was so bly dat ek teruggekeer het. Ek het gevoel dat ek waardeer word. My geestelike broers en susters het my gehelp om te voel dat ek vergewe is en om vorentoe te beweeg. Die ouermanne was altyd daar om my te help om my verhouding met Jehovah te herstel. Hulle het my vertroos en my gehelp om te sien dat Jehovah my nog steeds waardeer en liefhet.” – Malcom, Sierra Leone.

“Ek is bly dat Jehovah sy volk lief genoeg het om toe te sien dat sy organisasie rein gehou word. Wat vir buitestanders hardvogtig lyk is nodig, asook werklik liefdevol. Ek is dankbaar dat ons hemelse Vader ’n liefdevolle en vergewensgesinde God is.” – Sandi, Verenigde State.

Kommentare van regsdeskundiges wat nie Jehovah se Getuies is nie

Wat het howe en deskundiges te sê oor Jehovah se Getuies wat onberouvolle sondaars uit hulle gemeentes verwyder? Kyk na die volgende kommentare.

“Daar kan verwag word dat ’n godsdiensgroep wat deur skriftuurlike beginsels gelei word en dit probeer toepas, die mag sal hê om [’n sondaar te verwyder as dit gepas is]. Dit is nie net redelik nie, maar ook noodsaaklik, want as iemand nie Bybelbeginsels kan of wil volg nie, kwalifiseer hy nie om deel van hierdie groep te wees nie en, as hy nie verwyder word nie, kan hy ’n negatiewe invloed hê op dié wat sulke beginsels wil volg.” – Die Hooggeregshof, Engeland en Wallis, 7 Junie 2019.
Die howe in Europa en op ander plekke het óf beslis dat Jehovah se Getuies die wetlike reg het om sekere persone te verwyder op grond van hulle grondwetlike reg tot godsdiensvryheid, óf dat die howe nie eens die reg het om betrokke te raak by hierdie sake nie. – Professor Paulo Pinto de Albuquerque, voormalige regter van die Europese Hof van Menseregte.

a Al verwys ons na die persoon as manlik is die inligting in hierdie artikel van toepassing op beide geslagte.

b Voorheen het ons gesê dat onberouvolle sondaars uitgesit is. Maar nou gebruik ons dieselfde uitdrukking wat ons in die Bybel kry en sê ons dat hulle uit die gemeente verwyder is.

c Ouermanne is volwasse Christenmans wat uit die Bybel onderrig en vir Jehovah se volk sorg deur hulle te help en aan te moedig. Hulle word nie vir hierdie werk betaal nie. – 1 Petrus 5:1-3.

d In uiterste gevalle verlaat ’n individu dalk die gemeente en doen hy dinge om dit te probeer beskadig en dié daarin te ontmoedig of hy bevorder dalk aktief verkeerde gedrag. Wanneer dit gebeur, volg ons die Bybel se opdrag om nie so ’n persoon te “groet” nie. – 2 Johannes 9-11.